ಮಿಕ್ಕಿ ಮೊರೆಯಾ – ಭಾರತೀಯ್ ಜಾಜ಼್ ಸಂಗೀತಾಚೊ ರಾಯ್

 ಮಿಕ್ಕಿ ಕೊರೆಯಾ-ನ್ ಭಾರತಿ ಜಾಜ಼್  ಸಂಗೀತಾಚೊ ರಾಯ್ ಮ್ಹಣೊನ್ ನಾಂವ್ ಆಪ್ಣಾಯ್ಲಾಂ ಆನಿ ಮಿಕ್ಕಿ ಕೊರೆಯಾ ಎಂಡ್ ಹಿಸ್ ಬೇಂಡ್ ಹಾಚೆ ದ್ವಾರಿಂ ಸಾದಾರ್ಣ್ ಬಾವೀಸ್ ವರ್ಸಾಂ – 1938 ತೆಂ 1960 ಮ್ಹಣಾಸರ್ – ಮುಂಬೈಚ್ಯಾ ನಾವಾಡ್ದಿಕ್ ತಾಜ್ ಮಹಲ್ ಹೊಟೆಲಾಂತ್ ಸಂಗೀತ್ ವಾಜಾವ್ನ್ ದಾಕ್ಲೊ ರಚ್ಲಾ.   ಹ್ಯಾ ಮಾಲ್ಘಡ್ಯಾ ಗೊಂಯ್ಕಾರಾಕ್ ಅಸ್ತೆಮ್ತೆಚ್ಯಾ ಶಾಸ್ತ್ರೀಯಾ ಸಂಗೀತಾಚಿ ವಳಕ್ ಇಗರ್ಜೆನ್ ಚಲೆಯ್ಲೆಲ್ಯಾ ಸಂಗೀತ್ ಇಸ್ಕಲಾಂ ಮಾರಿಫಾತ್ ಜಾಲಿ. ಸಂಗೀತಾಚಿ ಶಿಕೊಣ್ ಕ್ರಿಸ್ತೀ ಗೊಂಯ್ಕಾರಾಂಕ್ ಕಾಮಾಂಕ್ ಆಯ್ಲಿಂ ದೆಕುನ್ ತಾಣಿಂ ಮುಂಬೈಂತ್ಲ್ಯಾ ಮುಸಲ್ಮಾನ್ ವಾಜೊವ್ಪ್ಯಾಂಕ್ ಆಪ್ಲೆ ಹುಶ್ಯಾರ್ಕಾಯೆನ್ ಸಂಗೀತ್ ಕ್ಶೇತ್ರಾಂತ್ಲೆಂ ಪಯ್ಸ್ ಕೆಲೆಂ.   ಹಳು ಹಳು ಪಾರ್ಸಿ ಆನಿ ಹಿಂದು ಲಘ್ನಾಂಕ್ ವಾಜಂತ್ರಾ ವಾಜೊಂವ್ಚೆಂ ಕಾಮ್ ಗೊಂಯ್ಕಾರಾಂಕ್ ಫಾವೊ ಜಾಲೆಂ.

ಉಪ್ರಾಂತ್ “ಮೊನ್ಯಾ” (silent) ಹಿಂದಿ ಫಿಲ್ಮಾನಿಂ ಅಪ್ಲೆಂ ಮಧುರ್ ಸಂಗೀತ್ ದಿಂವ್ಚ್ಯಾಕ್ ತಾಂಕಾಂ ಸಂಧಿ ಲಾಭ್ಲಿ ತರ್, ಹೆರ್ ಥೊಡೆ ಮಹಾರಾಜಾಂಚಾ ಹವೆಲಿನಿಂ (ರಾವ್ಳೆರಾನಿಂ) ವಾಜೊವ್ಪಾಕ್ ಪಾವ್ಲೆ…  ತಶೆಂಚ್ ಹೊಟೆಲಾನಿಂ ವಾಜೊವ್ಪಾಕ್ ವಾಟ್ ಉಗ್ತಿ ಜಾಲಿ.

ಮಿಕ್ಕಿ ಕೊರೆಯಾ-ಚೆ ಹುಶ್ಯಾರ್ ಕಾಯೆಕ್ ಲಾಗುನ್ ಫಾಂಕಿವಂತ್ ಸಂಗೀತ್ ಕಾರ್ ಅನಿಬಲ್ ಕ್ರಾಸ್ಟೊ ತಾಕಾ “ಬೊರ‍್ಯಾಂತ್ಲೊ ಬರೊ ಟ್ರಂಪೆಟ್ ವಾಜೊವ್ಪಿ” ಮ್ಹಣ್ತಾ ಆನಿ ನಾವಾದ್ಡೀಕ್ ಮಾವ್ರಿಸ್ ಕೊನ್ಸೆಸಿಯೊ ತಾಕಾ “ಭಾರತಾಚೊ ಲುವಿಸ್ ಆರ್ಮ್ ಸ್ಟ್ರೋಂಗ್” ಮ್ಹಣ್ ಪಾಚಾರ್ತಾ.

ಮಿಕ್ಕಿ ಬಾಬಾಚೊ ಜಲ್ಮ್ ಸಪ್ಟೆಂಬರಾಚೆ 29ವೆರ್ 1913 ವರ್ಸಾ ಉದೆಂತ್ ಆಪ್ರಿಕಾಚಾ ಮೊಂಬಾಸಾ ಶೆರಾಂತ್ ಜಾಲೊ.  ಆಟ್ ವರ್ಸಾಂಚಾ ಪ್ರಾಯೆರ್ ತಾಚೊ ಸಂಗೀತಾ ಕಡೆನ್ ಸಂಬಂಧ್ ಜಾಲೊ. ತಾಚ್ಯಾ ಮ್ಹಣ್ಣ್ಯಾ ಪರ್ಮಾಣೆ ಸಂಗಿತ್, ಎಕ್ ಖೆಳಾ ಪರಿಂ, ತಾಕಾ ಅಮ್ಕೆಚ್ ಮ್ಹಳ್ಳೆ ನೇಮ್ (rules) ಆಸ್ತಾತ್, ತೆ ನೇಮ್ ಶಿಕ್ತೊಚ್ ತುಂ ತಾಚೊ ಗುರು ಜಾತಾ.  ತಾಕಾ ಜಾಜ಼್  ಸಂಗೀತಾಚೊ “ತಿಜ್ಲೊಲೊ” (seasoned) ಮ್ಹಣೊನ್ ವಳ್ಕಾತಾತ್. ತಾಚ್ಯಾ ಹಿಶೊಬಾನ್ ಜಾಜ಼್  ಸಂಗೀತ್ ಎಕ್ದಮ್ ಸೊಭಿತ್; ಪೋಪ್ ಆನಿ ರೊಕ್ ದೊನ್ ಭುರ್ಗಿಂ ಜಾಲ್ಯಾರ್, ಜಾಜ಼್  ತಾಂಚಿ ಆವಯ್.  ಜಾಜ಼ಾ ತಿತ್ಲೆಂ ರುಚಿಕ್ ಆನಿ ದರ್ಜ್ಯಾಚೆಂ ದುಸ್ರೆಂ ಸಂಗೀತ್ ನಾ.

ತಾಣೆಂ, ಮುಳಾವೆಂ ಶಿಕಪ್ ಪೊರ್ರ್ತುಗಿಸಾಂತ್ಲ್ಯಾನ್ ಘೆತೆಚ್, ಬಾಪಾಯ್ನ್ ತಾಕಾ ಕರಾಚಿ  ಸೈಂಟ್ ಪೆಟ್ರಿಕ್ಸ್ ಇಸ್ಕಲಾಂತ್ ದಾಡ್ಲೊ.  ಥಂಯ್ಸರ್ ತಾಕಾ ರೆಬೆಕಾಚಿ (mouth organ) ಶಿಕವ್ಣ್ ಎಕಾ ಬ್ರಿಟಿಶ್ ಶಿಕ್ಷಕಾನ್ ದಿಲಿ.  ಪುಣ್ ಅಪ್ಲೊ ಪುತ್ ಸಂಗೀತ್ ಕಾರ್ ಜಾಲೊಲೊ ತಾಚ್ಯಾ ಬಾಪಾಯ್ಕ್ ನಾಕಾ ಆಸ್ಲೊ, ಕಾರಣ್ ತ್ಯಾ ಕಾಳಾರ್ ಸಂಗೀತ್ ಕಾರಾಂಕ್ ಬೆಬ್ದೆ ಆನಿ ಬಾಯ್ಲಾಂಡೆ ಆಶೆಂ ಸಮ್ಜಾತಾಲೆ!  “ಪುಣ್ ಮ್ಹಜ್ಯಾ ಪಾಯ್ಕ್, ಹಾಂವ್ ರೆಬೆಕಾಚಿ ಪುಜಾ ಕರ್ತಾಲೊ, ಹಿ ಖಬಾರ್ ಆಸ್ಲಿ,” ಆಶೆಂ ಮಿಕ್ಕಿ ಬಾಬಾನ್ ಮ್ಹಾಕಾ ಬಾರಾ ವರ್ಸಾಂ ಪಾಟಿಂ ತಾಚಿ ಮುಲಾಕತ್ ತಾಚ್ಯಾ ಮುಂಬೈಂತ್ಲ್ಯಾ ಕೊಲಾಬಾ ಭಾಗಾಂತ್ ಅಸ್ಚ್ಯಾ ಎಸ್ಪೆರೆನ್ಸಾ ಇಮಾರಿತಿಂತ್ ಘೆತಾನಾ ಸಾಂಗ್ಲಾಂ.

ಸಂಗೀತಾಕ್ ಲಬ್ಧೊನ್ ತಾಣೆಂ ಬೊರ‍್ಯಾ ಪ್ರಗತೆಚಿ ನವ್ಕರಿ ಸಾಂಡ್ಲಿ ಆನಿ 1938 ವರ್ಸಾ ತೊ ಮುಂಬಯ್ ಗೆಲೊ.  ಸುರ್ವಾತೆಕ್, ಆಲ್ ಇಂಡಿಯಾ ರೆಡಿಯೊಂತ್ ಕಾಮ್ ಕೆಲೆಂ.  ಉಪ್ರಾಂತ್ ಎಕಾ ಜರ್ಮನ್ ವಾಜೊವ್ಪ್ಯಾ ಖಾಲ್ ಕಾಮ್ ಕೆಲೆಂ.  ಆಪ್ಲ್ಯಾ ಭಾವಾಚಾ ಆಲೆಕ್ಸ್ ಕೊರೆಯಾಚಾ ಒಪ್ಟಿಮಿಸ್ಟ್ ಬೇಂಡಾಂತ್ ಭಿತರ್ ಸರುನ್ ರೆಬೆಕ್, ಬೆಂಜೊ, ಆಲ್ಟೊ ಸಾಕ್ಸಾಫೊನ್, ಕ್ಲಾರಿನೆಟ್ ವಾಜೊವ್ಪಾಕ್ ಲಾಗ್ಲೊ.  ಎಕಾ ವರ್ಸಾ ಉಪ್ರಾಂತ್ ಅಪ್ಲೆಂಚ್ ಖಾಶೆಲೆಂ “ಮಿಕ್ಕಿ ಕೊರೆಯಾ ಎಂಡ್ ಹಿಸ್ ಬೇಂಡ್” ಘಡ್ಲೆಂ ಆನಿ ತಾಜ್ ಮಹಲ್ ಹೊಟೆಲಾಂತ್ ವಾಜೊವ್ನ್ ಎಕ್ ದಾಕ್ಲೊ (ಇತಿಹಾಸ್) ರಚ್ಲೊ.

ತಾಚ್ಯೊ ಉಗ್ಡಾಸ್ ಉರ್ಪಿ ಘಡ್ನ್ಯೊ ಮ್ಹಳ್ಯಾರ್, 1948 ವರ್ಸಾ ನಾವಾದ್ಡೀಕ್ ಪ್ರ್ಯಾಂಕ್ ಫೆರ್ನಾಂಡ್ ಸಂಗೀತ್ ಕಾರಾ ಸಾಂಗಾತಾ ಪಯ್ಲೊ “ಸ್ವಿಂಗ್ ಕೊನ್ಸರ್ಟ್”  ಹಾಂತು ಭಾಗ್ ಘೆತ್ಲೊ.  1953 ವರ್ಸಾಂತ್ ಬ್ರಿಟಿಷ್ ರಾಣಿಯೆಚ್ಯಾ ರಾಜ್ಯಾಭಿಶೆಕೆಕ್ (Coronation) ತೊ ಹಾಜಿರ್ ಜಾಲೊ.  ತ್ಯಾಚ್ ವರ್ಸಾ ತಾಜ್ ಮಹಲ್ ಹೊಟೆಲಾಚ್ಯಾ ಭಾಂಗಾರಾ ಉತ್ಸವ ವೆಳಾರ್ ತಾಕಾ ತೀನ್ ಮಹಿನೆ ವಿಶೇಶಾಕ್ ಸುಟಿಯೆರ್ ದಾಡ್ಲೊ.  ಮಧೆಗಾತ್ ತಾಣೆಂ ಮುಂಬಯ್ಚ್ಯಾ ಸಿಂಫನಿ ಒರ್ಕೆಸ್ಟ್ರಾ- ಹಾಂತುಂ ಪಯ್ಲೊ ಕ್ಲಾರಿನೆಟ್ ವಾಜೊವ್ಪಿ ಆನಿ ಬೊರೊ ಟ್ರಂಪೆಟ್ ವಾಜೊವ್ಪಿ ಮ್ಹಣ್ ಮಾನ್ ಜೊಡ್ಲೊ.

ಮೇಡಮ್ ಪೊಂಪಿದೊವ್-ಚ್ಯಾ ಅಂತರಾಷ್ಟ್ರಿಯ್ ಮೊಡಿಂಚೆ ದಾಕವ್ಣೆಂತ್ ಪಾರ್ಶ್ವ ಸಂಗೀತ್ (back ground music) ಸಂಗೀತ್ ದಿಲೆಂ, ಜಂಯ್ ಫಾಮಾದ್ ವಿದೇಶಿ ಸಂಗೀತ್ಕಾರಾಂ ಸಂಗಿಂ ತಾಚಿ ವಳಕ್ ಜಾಲಿ.  1984 ವರ್ಸಾ ತಾಣೆಂ ಜಾಜ಼್  ಯಾತ್ರೆಂತ್ ಜೆದ್ನಾ ಅಪ್ಲಿ ಶತಾಬ್ಧಿ (centenary) ಸಮರ್ಪಿಲಿ ತೆದ್ನಾ ತಾಚಿ ಕೊಣೆಂಚ್ ಪ್ರಶಂಶಾ (appreciation) ಕೆಲಿ ನಾ ಮ್ಹಣ್ ತಾಕಾ ಖಂತ್ ಆನಿ ಬೆಜಾರಾಯ್ ಆಸ್ಲಿ.

ಸಾಕ್ಸ್, ತಾಚೆಂ ಪಸಂದಿದ್ ವಾಜಾಂತ್ರ್ ಆನಿ ಜಾಜ಼್, ಶಾಸ್ತ್ರೀಯ್ ಸಂಗೀತ್ ತಾಚಿ ಘಟಾಯ್.  ಕ್ಲಾರಿನೆಟ್, ಪಿಯಾನೊ, ಮುರ್ಲಿ (ಪಿರ್ಲುಕ್) ವಾಜೊವ್ಚ್ಯಾಂತ್ ತೊ ಹುಶಾರ್.  ದುರ್ದೈವಾನ್ 1960 ವರ್ಸಾ ತಾಕಾ “ಕಾಂಟೆಲ್” (Diphtheria) ಜಾಲ್ಲ್ಯಾನ್ ಪುಂಕ್ಚಿಂ ವಾಜಾಂತ್ರಾಂ ಸೊಡುನ್ ತಾಕಾ ಚಾವಿಯೆಚ್ಯಾ (keyboard) ವಾಜಾಂತ್ರಾಂಚೆರ್ ಬದ್ಲಿ ಕರುಂಕ್ ಪಡ್ಲಿ.  ತಾಚೆ ಬಲಾಯ್ಕೆಚೊ ಘುಟ್ ಕಸ್ರತ್ (exercise) ಕರಪ್, ಸೊರೊ, ಸಿಗ್ರೆಟ್ ಹಾಂಚೆಂ ಥಾವ್ನ್ ರಾವಪ್ ಜಾವ್ನ್ ಆಸಾ.

ತಾಣೆಂ ಹಿಂದಿ ಚಲ್ ಚಿತ್ರಾನಿಂ ಜಾಜ಼್ ಶಾಸ್ತ್ರೀಯ್ ಸಂಗೀತ್ ತಶೆಂಚ್ ರೋಕ್-ಎನ್-ರೋಲ್ ಸಂಗಿತ್ ವಾಜಯ್ಲಾಂ.  ಆಪ್ಲ್ಯಾ ಘರಾಂತ್ ತೊ ಸಂಗಿತಾಚಿ ಶಿಕವ್ಣ್ ಉತರ್ ಪ್ರಾಯೆರ್ ಪಾಸುನ್ ದಿತಾಲೊ.  ಹಿಂದಿ ಫಿಲ್ಮಾನಿಂ ವಾಜೊವ್ಪಾಕ್ ತಾಕಾ ಆಪೊವ್ಣೆ ಅಸ್ಲೆಂ.  ಥಂಯ್ಸರ್ ಜೋಡ್ ಬರಿ ಆಸ್‍ಲ್ಲಿ ತರೀ ತಾಕಾ ಸಮಾಧಾನ್ ಮೆಳ್ಲೆಂ ನಾಂ.  ಆತಾಂಚಾ ಸಂಗೀತಾಂತ್ ಜಾಯ್ತಿ ಬದ್ಲಾವಣ್ ಜಾಲ್ಲಿ.  ಆನಿ ಸಬಾರ್ ಥರಾಚೆ ಪ್ರಕಾರ್ ತಾಂತುಂ ಮಿಸ್ಳಾಲ್ಯಾತ್ ಆನಿ ಲೌಕಿಕ್ ಜಾಲ್ಯಾತ್.

ರ‍್ಯಾಪ್ ಸಂಗೀತಾಂ ವಿಶಿಂ ವಿಚಾರ‍್ಲ್ಯಾರ್ ಮಿಕ್ಕಿ ಬಾಬ್ ಮ್ಹಣ್ತಾ ರ‍್ಯಾಪಾಂತ್ ಸಂಗೀತ್ ಥೊಡೆಂ ಪುಣ್ ಬೊವಾಳ್ ಚಡ್.  ಸಂಗೀತಾಂತ್ ಸುಮೇಳ್ (harmony) ಅಸುಂಕ್ ಜಾಯ್, ಅಶೆಂ ತಾಚೆಂ ಮ್ಹಣ್ನೆಂ.

ತಾಚ್ಯಾ ಭುರ್ಗ್ಯಾಂಕ್  ಸಂಗೀತಾಚಿ ಅವೊಡ್ ಆಸಾ.  ತಾಚಿ ಎಕ್ ಧುವ್ – ಕ್ರಿಸ್ಟಿನ್ – ಅಮೇರಿಕಾಂತ್ ಎಕ್ ಬೊರಿ ಗಾವ್ಪಿಣ್ ಜಾವ್ನ್ ಆಸಾ.

ಮಿಕ್ಕಿ ಕೊರೆಯಾ ಗಾಂವಾನ್ ಮೊಯ್ಡಿಚ್ಯಾ ಸತಾಪೊರಿಯಾ ವಾಡ್ಯಾಂತ್ಲೊ ಆನಿ ಥಂಯ್ಚ್ಯಾ ಡೊರಿನ್ ಬಾಯೆ ಕಡೆ ತಾಣಿಂ ಸಾತ್ವೊ ಸಾಕ್ರಾಮೆಂತ್ ಜೊಡ್ಲಾ. ತಿಂ ಮುಂಬಯ್ಚ್ಯಾ ಕೊಲಾಬಾ ವಿಭಾಗಾಂತ್ ರಾವ್ಪಿ. ತಾಚೆಂ ಸುಖಿ ಜಿವಿತ್ ಸುರ್, ತಾಳ್ ಆನಿ ಸಂಗೀತಾಚ್ಯಾ ಆವಾಜಾಚಾ ಗುಣಾಂಚೆರ್ ರೆವಾಡ್ಲೆಲೆಂ ಆಸಾ.

ಸಪ್ಟೆಂಬರಾಚಾ 22ವೆರ್ 2011 ವರ್ಸಾ ತೊ ದೆವಾಧಿನ್ ಜಾಲೊ.

ಹ್ಯಾ  ಮಹಾನ್ ಸಂಗೀತ್ ಕಾರಾಕ್ ಮ್ಹಜೊ ಸಲಾಮ್.

– ಇಜಿದೊರ್ ದಾಂತಾಸ್