ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಥಾವ್ನ್ ಕೊಂಕಣಿ ದಿವಸ್-2018 ಆಚಾರಣ್
ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಮುಂಬಯ್ಚ್ಯಾ ಹ್ಯಾ ಬೋವ್ ಪರ್ನ್ಯಾ ಕೊಂಕ್ಣಿ ಸಂಸ್ಥ್ಯಾನ್ ಅಗೊಸ್ತ್ 18, 2018 ಸಾಂಜೆರ್ 6 ವರಾಂಚೆರ್ ಸರಸ್ವತಿ ವಿದ್ಯಾ ಮಂದಿರ್ ಸ್ಕೂಲ್ ಹೋಲ್, ಸೆನಾಪತಿ ಬಾಪಟ್ ಮಾರ್ಗ್, ಮಾಹಿಮ್ ಹಾಂಗಾಸರ್ 26-ವೊ ಕೊಂಕ್ಣಿ ದಿವಸ್ ಆಚಾರಣ್ ಕೆಲೊ.
ಸುರ್ವೆರ್ ಹ್ಯಾಚ್ ಮಹಿನ್ಯಾಚ್ಯಾ 16 ತಾರಿಕೇರ್ ದೆವಾಧಿನ್ ಜಾಲ್ಲ್ಯಾ ಭಾರತಾಚೊ ಮಾಜಿ ಪ್ರಧಾನ್ ಮಂತ್ರಿ ಶ್ರೀ ಅಟಲ್ ಬಿಹಾರಿ ವಾಜಪೆಯಿ ಆನಿ ಸಾಂಗಾತಾಚ್ ಕೆರಳ ಆನಿ ದೇಶ್ ಭರ್ ಇತರ್ ಜಾಗ್ಯಾನಿಂ ಆವ್ರ್ ಯೆವ್ನ್ ಮರಣ್ ಪಾವ್ಲೆಲ್ಯಾ ಸರ್ವಾಂ ಖಾತಿರ್ ದೋನ್ ಮಿನುಟ್ ಮೌನ್ ರಾವೊನ್ ತಾಂಕಾಂ ಶ್ರದ್ದಾಂಜಲಿ ಭೆಟವ್ನ್ ಕಾರ್ಯಾಚಿ ಸುರ್ವಾತ್ ಕೆಲಿ.
ಕಾರ್ಯಾಕ್ ಮುಖೆಲ್ ಸೈರೊ ಜಾವ್ನ್ ಆರ್ಕಾಡಿಯಾ ಶೇರ್ ಎಂಡ್ ಸ್ಟೋಕ್ ಬ್ರೊಕರ್ಸ್ ಪ್ರಾಯ್ವೆಟ್ ಲಿಮಿಟೆಡ್ ಹಾಚೊ MD., ಅನಿ ಕ್ರಿಸ್ಚಿಯನ್ ಛೇಂಬರ್ ಆಫ್ ಕೋಮರ್ಸ್ ಎಂಡ್ ಇಂಡಸ್ಟ್ರಿ ಹಾಚೊ ಕಾರ್ಯಾಧ್ಯಕ್ಶ್ ಶ್ರೀ ಆಂಟನಿ ಸಿಕ್ವೇರಾ ಆನಿ ಮಾನಾಚೊ ಸೈರೊ ಜಾವ್ನ್ ಶ್ರೀ ಗಿರಿಶ್ ಎಸ್. ಪಿಕಳೆ, (ಚಾರ್ಟರ್ಡ್ ಎಕೌಂಟೆಂಟ್ ಅನಿ ಎಡ್ವೊಕೇಟ್), ಪಿಕಳೆ ಎಂಡ್ ಕಂಪೆನಿ, ಆಡ್ವೋಕೇಟ್ಸ್ ಆನಿ ದಿ ಸರಸ್ವತಿ ಮಂದಿರ್ ಎಡುಕೇಶನ್ ಟ್ರಸ್ಟ್ ಹಾಚೊ ಟ್ರಸ್ಟಿ ಹಾಣಿಂ ವೆಧಿಚೆರ್ ಮಾನಾಚಿ ಬಸ್ಕಾ ಘೆತ್‍ಲ್ಲಿ. ಸಂಸ್ಥ್ಯಾಚೊ ಅಧ್ಯಕ್ಷ್ ಶ್ರೀ ಜೋನ್ ಡಿ’ಸಿಲ್ವಾ, ಉಪಾಧ್ಯಕ್ಷ್ ಶ್ರೀ ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ, ಸಭಾಧ್ಯಕ್ಷ್ ಶ್ರೀ ಹೆನ್ರಿ ಲೋಬೊ, ಜೆರಾಲ್ ಕಾರ್ಯಾಧರ್ಶಿ ಶ್ರೀ ಲೋರೆನ್ಸ್ ಡಿ’ಸೋಜಾ, ಕಮಾನಿ, ಸಹ ಕಾರ್ಯಾಧರ್ಶಿ ಶ್ರೀ ಜೋನ್ ಆರ್. ಪಿರೇರಾ ಆನಿ ಖಜನ್ದಾರ್ ಶ್ರೀ ವಾಲ್ಟರ್ ಡಿ’ಸೋಜಾ, ಜೆರಿಮೆರಿ ಹಾಣಿಂ ವೆಧಿಚೆರ್ ಸಾಂಗಾತ್ ದಿಲ್ಲೊ.
ಸಭಾಧ್ಯಕ್ಷ್ ಶ್ರೀ ಹೆನ್ರಿ ಲೋಬೊನ್ ಸ್ಮರಣ್ ಪುಸ್ತಿಕಾಚೆಂ ವಿಮೋಚನ್ ಕೆಲೆಂ.
ಜುಲಾಯ್ ಮಹಿನ್ಯಾಂತ್ ಆಸಾ ಕೆಲ್ಲ್ಯಾ ತಾಲೆಂತ್ ಸ್ಫರ್ಧ್ಯಾಂತ್ ಜಿಕ್ಲೆಲ್ಯಾಂಕ್ ಇನಮಾಂ ಆನಿ ಶಿಕ್ಪಾಂತ್ ಆನಿ ಖೆಳ್ ಪಂದ್ಯಾಟಾಂತ್ ಉಂಚ್ಲೆ ಅಂಕ್ ಆಪ್ಣಾಯ್ಲ್ಯಾ ಪ್ರತಿಭಾವಂತ್ ವಿಧ್ಯಾರ್ಥಿಂಕ್ ಪ್ರತೊಭಾ ಪುರಸ್ಕಾರ್-2018 ಮುಖೆಲ್ ಸೈರೊ ಶ್ರೀ ಆಂಟನಿ ಸಿಕ್ವೇರಾ ಹಾಚೆಂ ಹಾತಿಂ ಕೆಲೊ. ಶ್ರೀಮತಿ ಬೆನೆದಿಕ್ಟಾ ರೆಬೆಲ್ಲೊ, ದಿರೆಕ್ತೊರ್, ಮೋಡೆಲ್ ಕೋ-ಒಪರೇಟಿವ್ ಬೇಂಕ್ ಲಿಮಿಟೆಡ್ ಆನಿ ಸಮಾಜ್ ಸೆವಕಿ ಹಿಕಾ ಶಾಲ್ ಪಾಂಗ್ರುನ್ ಮಾನ್ ಕೆಲೊ. ಸಾಂಗಾತಾಚ್ ಪವರ್ ಲಿಪ್ಟಿಂಗ್ ಹಾಂತುಂ ಭಾಂಗಾರಾಚೆಂ ಪಧಕ್ ಜಿಕ್ಲೆಲ್ಯಾ ಶ್ರೀ ಡೆಂಜ಼ಿಲ್ ವಾಲ್ಟರ್ ಡಿ’ಸೋಜಾ, ಜೆರಿಮೆರಿ ಹಾಂಕಾಂ ಸನ್ಮಾನ್ ಕೆಲೊ.
ಕೊಂಕಣಿ ಫಿಲ್ಮಾನಿಂ ಆನಿ ಮಂಗ್ಳೂರಿ ನಾಟಕಾನಿಂ ಆನಿ ಗೊಂಯ್ಚ್ಯಾ ತಿಯಾತ್ರಾನಿಂ ನಟನ್ ಕರ್ನ್ ಫಾಮಾಧ್ ಜಾಲ್ಯಾ ಶ್ರೀಮತಿ ಬಿಯಾಟ್ರಿಸ್ ಜೋಸ್ಫಿನ್ ನಜರೆತ್ (ಬೆಟ್ಟಿ ನಾಜ಼್) ಹಿಕಾ ಜಿವಾವ್ಧಿ ಸಾಧನ್ ಪುರಸ್ಕಾರ್-2018, ಫುಲಾಂ-ಫಳಾಂ, ಶಾಲ್, ಮಾನ್ ಪತ್ರ್ ಆನಿ ನಗದ್ ಇನಾಮ್ ದಿವ್ನ್ ಸನ್ಮಾನ್ ಕೆಲೊ. ಮಾನ್ ಪತ್ರ್ ಶ್ರೀ ವಿನ್ಸೆಂಟ್ ಕಸ್ತೆಲಿನೊ ವಿದ್ಯಾವಿಹಾರ್ ಹಾಣಿಂ ವಾಚ್ಲೆಂ.
ತಾಲೆಂತ್ ಸ್ಪರ್ಧ್ಯಾಂತ್ ಜಿಕ್ಲೆಲ್ಯಾ ಮಹಾಕಾಳಿ, ಕಾಂಜುರ್ ಮಾರ್ಗ್, ಮಿರಾ ರೋಡ್, ಮಾಲ್ವಾಣಿ ಆನಿ ಇತರ್ ಫಿರ್ಗಜೆಂಚ್ಯಾ ಲ್ಹಾನಾ-ವ್ಹಡಾಂ ಥಾವ್ನ್ ಪದಾಂ ಆನಿ ನಾಚ್ ಆಸಾ ಕೆಲ್ಲೆ. ಟೊನಿ ಮಾರ್ಟಿನ್ಸ್ ಹಾಣೆಂ ಬರವ್ನ್ ದಿಗ್ದರ್ಶಿಲ್ಲೊ “ಬೆಳ್ಶೆಲ್ಲಿಂ ಸನ್ನಾಂ ಲಾಗ್ತಾತ್ ಗೋಡ್ !” ನಾಟ್ಕುಳೊ ಸಾದರ್ ಕೆಲೊ.
ಉಪಾಧ್ಯಕ್ಷ್ ಶ್ರೀ ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ ಹಾಣಿಂ ಆಪ್ಲ್ಯಾ ಮಹತ್ವಾಚ್ಯಾ ಉಲವ್ಪಾಂತ್ 1939 ಇಸ್ವೆಂತ್ ಲೋಕ್ ಕೊಂಕ್ಣಿ ಉಲಂವ್ಕ್ ಲಜೆತಾನಾ ಕೊಂಕ್ಣಿ ಭಾಶೆಕ್ ಪಾವೊತೆಂ ಸ್ಥಾನ್-ಮಾನ್ ಮೆಳ್ಚೆ ಖಾತಿರ್ ಚಳ್ವಳ್ ಕರ್ನ್ ಅಖಿಲ್ ಭಾರತೀಯ್ ಕೊಂಕಣಿ ಪರಿಶದ್ ಸುರ್ವಾತ್ ಕೆಲ್ಲ್ಯಾ ಕಾರ‍್ವಾರ್-ಚೊ ವಕೀಲ್ ಶ್ರೀ ಮಾಧವ್ ಮಂಜುನಾಥ್ ಶ್ಯಾನ್‍ಭಾಗ್, ಆನಿ ಹಿ ಚಳ್ವಳ್ ಮುಂಬಂಯ್ತ್ ಮುಕಾರುನ್ ವರ್ನ್ 1942 ಇಸ್ವೆಂತ್ ಮುಂಬಯ್ ಜಾಲ್ಲ್ಯಾ ಅಖಿಲ್ ಬಾರತೀಯ್ ಕೊಂಕಣಿ ಪರಿಶದೆಚಾ ತಿಸ್ತ್ರ್ಯಾ ಅಧಿವೇಶನಾ ವೆಳಿಂ ಮುಂಬಂಯ್ತ್ ಕೊಂಕಣಿ ಭಾಶಾ ಮಂಡಳ್ ಸುರ್ವಾತ್ ಕೆಲ್ಲ್ಯಾ ಇತರಾಂ ಪಯ್ಕಿಂ ಶ್ರೀ ವಾಮನ್ ರಘುನಾಥ್ ಶೆಣೈ ವಾರ್ದೆ ವಲಾವ್ಲಿಕರ್ ಮಟ್ವ್ಯಾನ್ ಶೆಣೈ ಗೋಂಯ್ ಬಾಬ್ ಹಾಂಚೊ ಆನಿ ಕಾರಣಾಂತರ್ ಬಂಧ್ ಪಡ್ಲೆಲ್ಯಾ ಕೊಂಕಣಿ ಭಾಷಾ ಮಂಡಳಾಕ್ ಪುನರ್ ಜಿವಾಳ್ ಕೆಲ್ಲ್ಯಾ ತಿಕ್ಡಿ ಸರ್ವ್ ಶ್ರೀ ಜೆ. ಬಿ. ಮೊರಾಯಸ್, ಜೆ. ಬಿ. ಸಿಕ್ವೇರಾ ಆನಿ ಜಿ. ಎಮ್. ಬಿ. ರೊಡ್ರಿಗಸ್ ಹಾಂಚೊ ಉಗ್ಡಾಸ್ ಕಾಡ್ನ್ ತಾಂಕಾಂ ಶ್ರದ್ದಾಂಜಲಿ ಅರ್ಪಿಲಿ.
ಮುಖೆಲ್ ಸೈರೊ ಶ್ರೀ ಆಂಟನಿ ಸಿಕ್ವೇರಾ ಹಾಣಿಂ ಸರ್ವ್ ಕೊಂಕಣಿ ಲೋಕಾಕ್ ಆಪ್ಲಿ ಮಾಂಯ್ ಭಾಸ್ ಕೊಂಕಣಿ ಉಲಂವ್ಕ್ ಆನಿ ತಿಚಿ ಸಂಸ್ಕೃತಿ ಜಿವಾಳ್ ದವರುಂಕ್ ಉಲೊ ದಿಲೊ. ಗೆಲೆತ್ಯಾ ವರ್ಸಾ ವ್ಹಡಾ ದಾಬಾಜ್ಯಾನ್ ಜಾಲ್ಲ್ಯಾ ಕೊಂಕಣಿ ಭಾಷಾ ಮಂಡಳಾಚಾ ಪ್ಲೆಟಿನಮ್ ಜುಬಿಲಿ, ಕೊಂಕಣಿ ಮಾನ್ಯಾತಾ ದಿಸಾಚೊ ರುಪ್ಯೋತ್ಸವ್ ಆನಿ ಉಪ್ರಾಂತ್ ಜನೆರ್ 6 ಆನಿ 7, 2018 ಭಾಷಾ ಮಂಡಳಾನ್ ಮುಂಬಂಯ್ತ್ ಆಸಾ ಕೆಲ್ಲ್ಯಾ ಅಖಿಲ್ ಭಾರತೀಯ್ ಕೊಂಕಣಿ ಪರಿಶೆದೆಚ್ಯಾ 31-ವ್ಯಾ ಅಧಿವೇಶನಾಚೊ ಉಲ್ಲೆಖ್ ಕರುನ್ ಶಾಬಾಶ್ಗಿ ದಿಲಿ.
ಮಾನಾಚೊ ಸೈರೊ ಶ್ರೀ ಗಿರಿಶ್ ಎಸ್. ಪಿಕಳೆ ಹಾಣಿಂ ಅಪ್ಲೊ ಬಾಪುಯ್ ಶ್ರೀ ಶಾಂತಾರಾಮ್ ವಿ. ಪಿಕಳೆ ಹಾಣಿಂ ಭಾಷಾ ಮಂಡಳಾಕ್ ಟ್ರಸ್ಟ್ ಮ್ಹಣ್ ನೊಂದಿತ್ ಕೆಲ್ಲೆ ವಿಶಿಂ ಆನಿ ಭಾಷಾ ಮಂಡಳಾಚಾ ಕಾರ್ಯಾಕ್ರಮಾಂ ವಿಶಿಂ ಸಂತೊಸ್ ವ್ಯಕ್ತ್ ಕೆಲೊ. ಶ್ರೀ ಶಾಂತಾರಾಮ್ ವಿ. ಪಿಕಳೆ ಕೊಂಕಣಿ ಭಾಷಾ ಮಂಡಳಾಚೆ ಮಾಜಿ ಅಧ್ಯಕ್ಷ್ ಜಾವ್ನಾಸ್‍ಲ್ಲೆ.
ಸುರ್ವೆರ್ ಅಧ್ಯಕ್ಷ್ ಶ್ರೀ ಜೋನ್ ಡಿ’ಸಿಲ್ವಾ ಹಾಣಿಂ ಸರ್ವಾಂಕ್ ಹುನೊನಿತ್ ಯೆವ್ಕಾರ್ ಮಾಗ್ಲೊ. ಶ್ರೀ ಲೋರೆನ್ಸ್ ಡಿ’ಸೋಜಾ, ಕಮಾನಿ ಹಾಣಿಂ ಉಪ್ಕಾರ್ ಆಟಾವ್ಣಿ ಕೆಲಿ. ಶ್ರೀ ಸಿರಿಲ್ ಕಸ್ತೆಲಿನೊ ಆನಿ ಶ್ರೀ ಲಿಯೊ ಫೆರ್ನಾಂಡಿಸ್, ಜೆರಿಮೆರಿ ಹಾಣಿಂ ಬರ‍್ಯಾ ಥರಾನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ.
ರುಚಿಕ್ ಜೆವ್ಣಾ ಸವೆಂ ಕಾರ್ಯೆಂ ವೆಳಾರ್ ಸಂಪ್ಲೆಂ.
