ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಥಾವ್ನ್ ತಾಲೆಂತ್ ಸ್ಪರ್ಧೊ

 ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಮುಂಬಂಯ್ತ್ಲ್ಯಾ ಹ್ಯಾ ಬೋವ್ ಪರ್ನ್ಯಾ ಕೊಂಕ್ಣಿ ಸಂಸ್ಥ್ಯಾನ್ ಜುಲಾಯ್ 15, 2018 ಆಯ್ತಾರಾ ದನ್ಪಾರಾಂಚಾ ಜುಸ್ತ್ 3.30 ವರಾಂಚೆರ್ ಸರಸ್ವತಿ  ವಿದ್ಯಾ ಮಂದಿರ್ ಹೊಲ್, ಸೆನಾಪತಿ ಬಾಪಟ್ ಮಾರ್ಗ್, ಮಾಹಿಮ್ (ಪಶ್ಶಿಮ್) ಮುಂಬಯ್ -400 016 ಹಾಂಗಾಸರ್ ತಾಲೆಂತ್ ಸ್ಪರ್ಧೊ ಆಯೋಜಿತ್ ಕೆಲ್ಲೊ.

ಹ್ಯಾ ಸ್ಪರ್ಧ್ಯಾಂತ್ – ಲ್ಹಾನ್ ಭುರ್ಗ್ಯಾಂಕ್ ಚವ್ತಿ ಕ್ಲಾಸ್ ಮ್ಹಣಾಸರ್, ಪಾಂಚ್ವಿ ಥಾವ್ನ್- ನವ್ಯಾ ಕ್ಲಾಸಿ ಮ್ಹಣಾಸರ್ ಆನಿ ಧಾವಿ ಕ್ಲಾಸ್ ಆನಿ ವಯ್ರ್ ಅಶೆಂ ತೀನ್ ವಿಭಾಗ್ ಆಸಾ ಕೆಲ್ಲೆ. ಹರ್ಯೆಕಾ ವಿಭಾಗಾಕ್ ಭಾಷಣ್, ಗಾಯನ್ (ಎಕೊಡೆಂ, ದೊಡೆಂ ಆನಿ ಪಂಗಡ್) ಆನಿ ನಾಚ್ (ಎಕೊಡೆಂ ಆನಿ ಪಂಗಡ್) ಆಸಾ ಕೆಲ್ಲೆಂ.  ಹ್ಯಾ ಸ್ಪರ್ಧ್ಯಾಂತ್ 175 ವಯ್ರ್ ಸ್ಪರ್ಧಿಕಾನಿಂ ಭಾಗ್ ಘೆತ್ಲೊ.  ಪಾವ್ಸಾಳೆ ದೀಸ್ ಜಾವ್ನ್, ಶಿರಾಂಧಾರಿಂಚೊಂ ಪಾವ್ಸ್ ವೊತ್ತಾಲೊ ತರೀ, ಕೊಂಕಣಿ ಭಾಶೆಚಾ ಮೊಗಾನ್ ಆನಿ ಉಮೆಧಿನ್ ಪಯ್ಶಿಲ್ಯಾ ವಸಯ್, ಮಿರಾ ರೋಡ್, ಮಾಲಾಡ್-ಮಾಲ್ವಾನಿ, ಮಹಾಕಾಲಿ (ಆಂಧೆರಿ ಪೂರ್ವ್) ಆನಿ ಇತರ್ ಫಿರ್ಗಜೆಂ ಥಾವ್ನ್ ಬರೊಚ್ ಲೋಕ್ ಹಾಜರ್ ಆಸ್‍ಲ್ಲೊ ತೆಂ ಪಳೆತಾನಾ ಕೊಂಕ್ಣಿ ಭಾಶೆಕ್ ಬರೊ ಫುಡಾರ್ ಆಸಾ ತೆಂ ಉಟೊನ್ ದಿಸ್ತಾಲೆಂ.

ಸ್ಪರ್ಧ್ಯಾಚ್ಯಾ ಸುರ್ವೆರ್ ಸಂಸ್ಥ್ಯಾಚೊ ಅಧ್ಯಕ್ಷ್ ಶ್ರೀ ಜೋನ್ ಡಿ’ಸಿಲ್ವಾ ಬಾಬಾನ್ ಸರ್ವ್ ಸ್ಪರ್ಧಿಕಾಂಕ್ ಯೆವ್ಕಾರ್ ಆನಿ ಬರೆಂ ಮಾಗೊನ್ ಸ್ಪರ್ಧ್ಯಾಕ್ ಚಾಲನ್ ದಿಲೆಂ.  ಜೆರಾಲ್ ಕಾರ್ಯಾದರ್ಶಿ ಶ್ರೀ ಲೋರೆನ್ಸ್ ಡಿ’ಸೋಜಾ, ಕಮಾನಿನ್,  ಕೊಂಕಣಿ ಭಾಸ್ ಬಾಳ್ವಜಾಯ್ ತರ್ ಆಮಿ ಸರ್ವಾನಿಂ ಆಪಾಪ್ಲ್ಯಾ ತಾಂಕಿ ಭಿತರ್ಲಿ ಸೆವಾ ದಿಂವ್ಚಿಂ ಗರ್ಜೆಚಿ ಆನಿ ಆಮಿ ಆಮ್ಚ್ಯಾ  ಘರಾನಿಂ ಆಮ್ಚಾ ಭುರ್ಗ್ಯಾಂ ಸಾಂಗಾತಾ ಕೊಂಕ್ಣಿ ಭಾಶೆನ್ ಉಲಂವ್ಕ್ ಫಾವೊ. ಕೊಂಕ್ಣಿ ಮಿಸಾಂಕ್ ವಚೊನ್, ದಿಸಾಚಿಂ ಮಾಗ್ಣಿಂ ಕೊಂಕ್ಣೆಂತ್ ಮ್ಹಳಿಂ ತರ್ ಆಮ್ಚಾ ಆವಯ್ನ್ ಆಪ್ಲ್ಯಾ ಉಸ್ಕ್ಯಾರ್ ಬಸವ್ನ್ ಶಿಕಯ್ಲೆಲಿ ಹಿ ಭಾಸ್ ಕೆದಿಂಚ್ ಆಳ್ವೊಂಚಿ ನಾ ಮ್ಹಣೊನ್ ಸ್ಪರ್ಧ್ಯಾಚಿ ಸುರ‍್ವಾತ್ ಕೆಲಿ.

ವೆಧಿಚೆರ್ ಸರ್ವ್ ಶ್ರೀ ಲಿಯೊ ಫೆರ್ನಾಂಡಿಸ್, ವಾಲ್ಟರ್ ಡಿ’ಸೋಜಾ, ಜೆರಿಮೆರಿ, ವಾಲ್ನೆಸ್ ರೇಗೊ, ಜೋನ್ ಆರ್. ಪಿರೇರಾ, ಟೊನಿ ಮಾರ್ಟಿನ್, ಸ್ಟ್ಯಾನಿ ಡಾಯಸ್, ಪಾಸ್ಕಲ್ ಲೊಬೊ, ಆನಿ ಶ್ರೀಮತಿ ಬೆಟ್ಟಿ ನಾಜ಼್ ಹಾಜರ್ ಆಸ್‍ಲ್ಲಿಂ.

ಶ್ರೀಮತಿ ರಿಟಾ ರೋಜ್, ಶ್ರೀ ಫ್ರಾನ್ಸಿಸ್ ಎ. ಫೆರ್ನಾಂಡಿಸ್ ಆನಿ ಶ್ರೀ ಕ್ಯಾರಿದಾದ್ ಫೆರ್ನಾಂಡಿಸ್ – ಹಿಂ ವರಯ್ಣಾರಾಂ ಜಾವ್ನ್ ಆಯಿಲ್ಲಿಂ.  ತಾಂಕಾಂ ಸಂಸ್ಥ್ಯಾಚ್ಯಾ ತರ್ಫೆನ್ ಫುಲಾಂ ದಿವ್ನ್ ಮಾನ್ ಕೆಲೊ.

ಶ್ರೀ ಸಿರಿಲ್ ಕಸ್ತೆಲಿನೊನ್ ವಿಜೆತ್ಯಾಂಚಿಂ ನಾಂವಾಂ ಘೊಷಿತ್ ಕೆಲಿಂ.  ಸ್ಪರ್ಧ್ಯಾಂತ್ ಜಿಕ್ಲೆಲ್ಯಾಂಕ್ ಆಗಸ್ಟ್ 18 ತಾರೀಕೆರ್ ಸಾಂಜೆರ್ 6 ವರಾಂಚೆರ್ ಸರಸ್ವತಿ ಮಂದಿರ್ ಸ್ಕೂಲ್ ಹೋಲ್, ಸೆನಾಪತಿ ಬಾಪಟ್ ಮಾರ್ಗ್, ಮಾಹಿಮ್ (ಪಶ್ಶಿಮ್), ಮುಂಬಯ್ ಹಾಂಗಾಸರ್ ಕೊಂಕಣಿ ದಿವಸ್ ಆಚಾರ್ಸುಂಚಾ ಸಂದರ್ಭಾರ್ ಇನಮಾ ವಾಂಟ್ತೆಲೆ.