ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ – ಪ್ಲಾಟಿನಮ್ ಜುಬಿಲೀ ಆಚಾರಣ್
ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಥಾವ್ನ್
ಪ್ಲಾಟಿನಮ್ ಜುಬಿಲಿ ಆನಿ ಕೊಂಕಣಿ ಮಾನ್ಯತಾ ದಿಸಾಚೊ ರುಪ್ಯೋತ್ಸವ್
ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಹ್ಯಾ ಮುಂಬಯ್ಚಾ ಅತೀ ಪರ್ನ್ಯಾ ಕೊಂಕ್ಣಿ ಸಂಸ್ಥ್ಯಾನ್, ಅಗೊಸ್ತಾಚ್ಯಾ 20, 2017 ದನ್ಪರಾಂ 3.30 ವರಾಂಚೆರ್ ಸೈಂಟ್ ಆನ್ನ್ ಹೈಸ್ಕೂಲ್, ಬೊರಿವಲಿ, ಮುಂಬಯ್ ಹಾಂಗಾಸರ್ ಸಂಸ್ಥ್ಯಾಚಿ ಪ್ಲಾಟಿನಮ್ ಜುಬಿಲೀ ಆನಿ ಕೊಂಕಣಿ ಭಾಶೆಕ್ ಭಾರಾತಾಚಾ ಸಂವಿಧಾನಾಚಾ ಆಟ್ವೆ ವೋಳೆರಿಂತ್ ಮಾನ್ಯಾತಾ ಮೆಳೊನ್ 25 ವರ್ಸಾಂ ಸಂಪ್ಚಾ ಸವೆಂ ಕೊಂಕಣಿ ಭಾಷಾ ಮಂಡಳಾಕ್ ಜಿವಾಳ್ ಕರ್ನ್ 25 ವರ್ಸಾಂ ಜಾಂವ್ಚಾ ಹ್ಯಾ ಸಂದರ್ಬಾರ್ ಎಕ್ ಬೋವ್ ದಬಾಜಿಕ್ ಕಾರ್ಯಾಕ್ರಮ್ ಆಸಾ ಕೆಲ್ಲೆಂ.
ಹ್ಯಾ ಕಾರ್ಯಾಕ್ ಮುಖೆಲ್ ಸಯ್ರಿ ಜಾವ್ನ್ ರಾಯನ್ ಗ್ರೂಪ್ ಅಫ್ ಎಡುಕೇಶನಲ್ ಇನ್‍ಸ್ಟಿಟ್ಯೂಶನ್ಸ್ ಹಾಚಿ ಮೆನೆಜಿಂಗ್ ಡೈರೆಕ್ಟರ್ ಮೇಡಮ್ ಗ್ರೇಸ್ ಪಿಂಟೊ ಆನಿ ಮಾನಾಚೆ ಸಯ್ರೆ ಜಾವ್ನ್ ಸಭಾದ್ಯಕ್ಷ್, ದಿ ಶ್ಯಾಮ್‍ರಾವ್ ವಿಟ್ಟಲ್ ಕೋ-ಒಪರೇಟಿವ್ ಬೇಂಕ್, ಶ್ರೀ ಉದಯ್ ಕುಮಾರ್ ಪಿ. ಗುರ್ಕಾರ್, ಆನಿ ಉದ್ಘಾಟಕ್ ಜಾವ್ನ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಆಕಾಡಮಿಚೊ ನಿಕಟ್ ಪೂರ್ವ್ ಅಧ್ಯಕ್ಷ್ ಆನಿ ನಾವಾಡ್ಡಿಕ್ ಬಿಲ್ಡರ್ ಶ್ರೀ ರೋಯ್ ಕಸ್ತೆಲಿನೊ ಹಾಜಾರ್ ಆಸ್‍ಲ್ಲೆ. ವೆಧಿಚೆರ್ ಸಂಸ್ಥ್ಯಾಚೊ ಅಧ್ಯಕ್ಷ್ ಆನಿ ಚಾರ್ ಸಹಕಾರಿ ಬೇಂಕಾಂಚೊ ಸ್ಥಾಪಕ್ ಶ್ರೀ ಜೋನ್ ಡಿ’ಸಿಲ್ವಾ, ಸಂಸ್ಥ್ಯಾಚೊ ಉಪಾಧ್ಯಕ್ಷ್ ಪ್ರಿಂಟಾನಿಯಾ ಒಫ್‍ಸೆಟ್ಟ್ ಖ್ಯಾತೆಚೊ ಆನಿ ಆಲ್ಡೆಲ್ ಟ್ರಸ್ಟಾಚೊ ಮೆನೆಜಿಂಗ್ ಡೈರೆಕ್ಟರ್ ಶ್ರೀ ಆಲ್ಬರ್ಟ್ ಡಬ್ಲ್ಯೂ ಡಿ’ಸೋಜಾ, ಸಭಾಧ್ಯಕ್ಷ್ ಶ್ರೀ ಹೆನ್ರಿ ಲೋಬೊ, (ಮಾಜಿ ಸಭಾಧ್ಯಕ್ಷ್ ಕ್ರಿಸ್ಚಿಯನ್ ಛೇಂಬರ್ ಆಫ್ ಕೋಮರ್ಸ್ ಎಂಡ್ ಇಂಡಸ್ಟ್ರಿ), ಶ್ರೀ ಪಿ. ಎನ್. ಶ್ಯಾನ್ ಭಾಗ್, (ಸಂಸ್ಥ್ಯಾಚೊ ಮಾಜಿ ಅಧ್ಯಕ್ಷ್ ಆನಿ ನೊರ್ತ್ ಕೆನರಾ ಜಿ. ಎಸ್. ಬಿ. ಕೋ-ಒಪರೇಟಿವ್ ಬೇಂಕಾಚೊ ಮಾಜಿ ಅಧ್ಯಕ್ಷ್), ಜೆರಾಲ್ ಕಾರ್ಯಾದರ್ಶಿ ಶ್ರೀ ಜೋನ್ ಆರ್. ಪಿರೆರಾ, ಖಜನ್ದಾರ್ ಶ್ರೀ ವಾಲ್ಟರ್ ಡಿ’ಸೋಜಾ ಹೆ ವೆಧಿಚೆರ್ ಉಪಸ್ಥಿತ್ ಆಸ್‍ಲ್ಲೆ.
ಪಂಟಿ ಕಾರ್ಯಾಚೆಂ ಪೆಟೊವ್ನ್ ಕಾರ್ಯಾಕ್ ಚಾಲನ್ ದಿಲ್ಲ್ಯಾ ಉದ್ಘಾಟಕ್ ಶ್ರೀ ರೊಯ್ ಕಸ್ತೆಲಿನೊನ್ ಕೊಂಕ್ಣಿ ಭಾಶೆಚೊ ಇತಿಹಾಸ್ ಬೋವ್ ಸುಡಾಳ್ ಥರಾನ್ ವಿವರ‍್ಸಿಲೊ. ಕೊಂಕ್ಣಿ ಎಕ್ ಬೋವ್ ಪರ್ನಿ, ಇಂಡೊ-ಆರ್ಯಾನ್ ಮುಳಾಚಿ ಭಾಸ್, ಸಬಾರ್ ಕಾರಣಾಂಕ್ ಲಾಗೊನ್ ತ್ಯಾ ಭಾಸೆಕ್ ಆನಿ ಭಾಶಿಕಾಂಕ್ ಕಷ್ಟ್ ಸೊಸುಂಕ್ ಪಡ್ಲೆ ತರೀ, ತ್ಯಾ ಭಾಸೆಚೊ ನಾಸ್ ಕರುಂಕ್ ಪ್ರಯತ್ನ್ ಚಲ್‍ಲ್ಲೆಂ ತರೀ, ತಿ ಭಾಸ್ ಆಜ್ ಭಾರಾತಾಚಾ ಸಂವಿಧಾನಾಚಾ ಆಟ್ವೆ ವೋಳೆರಿಂತ್ ನೊಂದಿತ್ ಜಾಲ್ಲ್ಯಾ 22 ಭಾಸಾಂ ಪಯ್ಕಿ ಎಕ್ ಜಾವ್ನಾಸಾ ಮ್ಹಣೊನ್, ಸರ್ವ್ ಕೊಂಕ್ಣಿ ಲೋಕಾನ್ ಜಾತ್-ಪಾತ್ ಮ್ಹಳ್ಳೊ ಬೆಧ್ ಬಾವ್ ಕರಿನಾಸ್ತಾನಾ ಎಕ್ ಮತಾನ್ ಕೊಂಕ್ಣಿ ಭಾಶೆಚೊ ಪೋಸ್ ಕರುಂಕ್ ಜಾಯ್ ಮ್ಹಣ್ ಉಲೊ ದಿಲೊ.
ಪ್ಲಾಟಿನಮ್ ಜುಬಿಲೀ ಸಂದರ್ಭಾರ್ ಆಸಾ ಕೆಲ್ಲ್ಯಾ ಸ್ಮಾರಕ್ ಪುಸ್ತಕಾಚೆಂ ಉದ್ಘಾಟನ್ ಮೇಡಮ್ ಗ್ರೇಸ್ ಪಿಂಟೊ ಹಿಚೆ ಹಾತಿಂ ಜಾಲೆಂ.
ಕೊಂಕ್ಣಿ ಮನೋರಂಜನ್ ಆನಿ ಇತರ್ ಕಾರ್ಯಾಂಚೊ ಪ್ರಸಾರ್ ಆನಿ ಮಾಹೆತ್ ದಿಂವ್ಕ್ ನವ್ಯಾನ್ Thoughtstart ಸಂಸ್ಥ್ಯಾನ್ ಆಸಾ ಕೆಲ್ಲ್ಯಾ www.konkanifilms.com ವೆಬ್ ಸಾಯ್ಟಿಚೆಂ ಉದ್ಘಾಟನ್ ಶ್ರೀ ಆಲ್ಬರ್ಟ್ ಡಬ್ಲ್ಯೂ ಡಿ’ಸೋಜಾ ಹಾಂಚೆಂ ಹಾತಿಂ ಜಾಲೆಂ. ಹ್ಯಾ ವೆಬ್ ಸಾಯ್ಟಿಚೆರ್ ಸರ್ವ್ ಲ್ಹಾನ್-ವ್ಹಡ್ ಕೊಂಕ್ಣಿ ಕಾರ್ಯಾಕ್ರಮಾಂಚೊ ಪ್ರಸಾರ್ ಕರುಂಕ್ ಆಪಾಪ್ಲ್ಯಾ ಕಾರ್ಯಾಂಚೊ ವಿವರ್ ದಾಡುಂಕ್ ಶ್ರೀ ಲೊರೆನ್ಸ್ ಡಿ’ಸೋಜಾ, ಕಮಾನಿನ್ ಸರ್ವಾಂಕ್ ಉಲೊ ದಿಲೊ. ಸಾಂದ್ಯಾಂಚ್ಯಾ ಭುರ್ಗ್ಯಾಂಕ್ ಪ್ರತಿಭಾ ಪುರಸ್ಕಾರ್ ದಿವ್ನ್ ಮಾನ್ ಕೆಲೊ. ಜುಲಾಯ್ ಮಹಿನ್ಯಾಂತ್ ಆಸಾ ಕೆಲ್ಲ್ಯಾ ತಾಲೆಂತ್ ಸ್ಪ್ರಧ್ಯಾಂತ್ ಭಾಗ್ ಘೆತ್‍ಲ್ಲ್ಯಾ ಸರ್ವ್ ವಿಜೆತ್ಯಾಂಕ್ ವೆಧಿಚೆರ್ ಅಪವ್ನ್ ಇನಮಾ ವಾಂಟ್ಲಿ.
ಶ್ರೀ ಸ್ಟ್ಯಾನಿ ಆಲ್ವಾರಿಸ್, (ಅಧ್ಯಕ್ಶ್ ರಚನಾ), ಶ್ರೀ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ (ನಾಟಕಿಸ್ತ್), ಶ್ರೀ ಟೊನಿ ಮಾರ‍್ಟಿನ್ಸ್ (ತಿಯಾತ್ರಿಸ್ತ್) ಅನಿ ಶ್ರೀ ಎಚ್. ಜೆ. ಗೋವಿಯಾಸ್(ಲೇಖಕ್), ಶ್ರೀ ವಿನ್ಸೆಂಟ್ ಕಸ್ತೆಲಿನೊ (ದಿ ಮೆಂಗ್ಳೊರಿಯನ್ ವೆಲ್ಫೇರ್ ಎಸೋಶಿಯೇಶನ್, ವಿದ್ಯಾವಿಹಾರ್ ಆನಿ ಶ್ರೀಮತಿ ವೆರೊನಿಕಾ ನೊರೊನ್ಹಾ, ಬೊರಿವ್ಲಿ ಹಾಂಕಾಂ ಪುಲಾಂ ಆನಿ ಯಾದಿಸ್ತಿಕಾ ದಿವ್ನ್ ಮಾನ್ ಕೆಲೊ.
ಭಾಷಾ ಮಂಡಳಾಚೊ ಸಹ-ಕಾರ್ಯಾದರ್ಶಿ, ಶ್ರೀ ಪಾಸ್ಕಲ್ ಲೋಬೊ, ಸಹ ಖಜನ್ಧಾರ್ ಸಿರಿಲ್ ಕಸ್ತೆಲಿನೊ, ಕಾರ್ಯಾಕಾರಿ ಸಮಿತಿಚೆ ಸಾಂದೆ ಶ್ರೀ ಲೊರೆನ್ಸ್ ಡಿ’ಸೋಜಾ ಕಮಾನಿ, ಬೆಟ್ಟಿ ನಾಜ಼್, ಸ್ಟ್ಯಾನ್ಲು ಡಾಯಸ್, ರುಜಾರಿಯೊ ಫೆರ್ನಾಂಡಿಸ್, ಶ್ರೀಮತಿ ಬೆನೆದಿಕ್ಟಾ ರೆಬೆಲ್ಲೊ, ಸಿಪ್ರಿಯನ್ ಆಲ್ಬುಕೆರ್ಕ್, ಅನಂತ್ ಅಬೆಂಬಳ್, ಲಿಯೊ ಫೆರ್ನಾಂಡಿಸ್ ಆನಿ ವಾಲ್ನೆಸ್ ರೇಗೊ ಹಾಂಕಾಂ ಯಾದಿಸ್ತಿಕಾ ದಿವ್ನ್ ಮಾನ್ ಕೆಲೊ.
ಸಂಗೀತ್ ಸಾಮ್ರಾಟ್ ಶ್ರೀ ಹೆನ್ರಿ ಡಿ’ಸೋಜಾ ಹಾಂಕಾಂ ಜಿಣ್ಯೆ ಸಾಧನ್ ಪುರಸ್ಕಾರ್-2017 ಸಂವೆಂ ಮಾನ್ ಪತ್ರ್, ಫುಲಾಂ-ಫಳಾಂ, ಶಾಲ್, ಉರ್ಮಾಲ್, ಯಾದಿಸ್ತಿಕಾ ದಿವ್ನ್ ಮಾನ್ ಕೆಲೊ.
ಮಾನಾಚೊ ಸಯ್ರೊ ಶ್ರೀ ಉದಯ್ ಕುಮಾರ್ ಪಿ. ಗುರ್ಕಾರ್ ಕೊಕ್ಣಿ ಭಾಸ್ ಎಕ್ ಗ್ರೇಸ್ತ್ ಭಾಸ್, ತಿಕಾ ಸಂವಿದಾನಾಂತ್ ಮಾನ್ ಲಾಭ್ಲಾ. ಭಾಸ್ ಆನಿ ಸಂಸ್ಕೃತಿ ಬಾಳ್ವಾಜಯ್ ತರ್ ತಿಚೊ ಫಾವೊತೊ ಪೋಸ್ ಕರುನ್ ಸರ್ವಾಂನಿ ಮಾಂಯ್ ಭಾಶೆಂತ್ ಉಲಂವ್ಕ್ ಜಾಯ್, ಬರಂವ್ಕ್ ಜಾಯ್ ಮ್ಹಳೆಂ.
ಮುಖೆಲ್ ಸಯ್ರಿ ಮೇಡಮ್ ಗ್ರೇಸ್ ಪಿಂಟೊನ್ “ಮಾಂಯ್ ಭಾಸ್ ಮನ್ಶ್ಯಾ ಕುಳಾಚೆಂ ಮೂಳ್, ಕೊಂಕ್ಣಿ ಭಾಶೆಕ್ ಆತಾಂ ಸಾಸು ಮಾಂಯ್ಚೊ ದರ್ಜೊ ಫಾವೊ ಜಾಲಾ, ತಿಕಾ ಮಾಂಯ್ ಭಾಶೆಚೊ ಮಾನಾಚೊ ಜಾಗೊ ಮೆಳಾಜಯ್” ಮ್ಹಣ್ ಅಪ್ಲ್ಯಾ ಸಂದೇಶಾಂತ್ ಉಲೊ ದಿಲೊ.
ವಿವಿಧ್ ಮನೋರಂಜನ್ ಕಾರ್ಯೆಂ ಆಸಾ ಕೆಲ್ಲೆಂ. ಹಾಂತುಂ ವಸಯ್, ನಲ್ಲಾಸೊಪರ, ಮಾಲಾಡ್, ಗೊರೆಗಾಂವ್ ಆನಿ ಮಹಾಕಾಲಿ ಅನಿ ಜೆರಿಮೆರಿ ಫಿರ್ಗಜೆಚಾ ಲ್ಹಾನಾ-ವ್ಹಡಾನಿಂ ಪಾತ್ರ್ ಘೆತ್ಲೊ.
ಜೊಸೆಫ್ ಡಿ’ಸೋಜಾನ್ ಬರವ್ನ್ ದಿಗ್ದರ್ಶಿಲ್ಲೊ “ಕಶಿ ಕರ್ನಿ ತಶಿ ಭರ್ನಿ”, ಬೆಟ್ಟಿ ನಾಜ್ ಪಂಗ್ಡಾ ಥಾವ್ನ್ “ಜಾಲಾಂತ್ಲ್ಯೊ ಖಬ್ರೊ” ಆನಿ ಶ್ರೀಮತಿ ವಸುಧಾ ಪ್ರಭು ಹಿಣೆ ಬರಯ್ಲೆಲೊ“ವಸ್ರಾಯನ್ ಕಿ ಪಿಟ್ಕಾಯನ್’ ಹೆ ತೀನ್ ನಾಟ್ಕುಳೆ ಸಾದರ್ ಜಾಲೆ.
ಸುರ್ವೆರ್ ಅಧ್ಯಕ್ಷ್ ಶ್ರೀ ಜೋನ್ ಡಿ’ಸಿಲ್ವಾ-ನ್ ಯೆವ್ಕಾರ್ ಮಾಗ್ಲೊ. ಶ್ರೀ ಹೆನ್ರಿ ಲೋಬೊ-ನ್ ಉಪ್ಕಾರ್ ಆಟಾವ್ಣಿ ಕೆಲಿ. ಶ್ರೀ ಲೊರೆನ್ಸ್ ಡಿ’ಸೋಜಾ, ಕಮಾನಿ, ಶ್ರೀ ಲಿಯೊ ಫೆರ್ನಾಂಡಿಸ್ ಜೆರಿಮೆರಿ ಆನಿ ಶ್ರೀಮತಿ ವೆರೊನಿಕಾ ನೊರೊನ್ಹಾ ಹಾಣಿಂ ಕಾರ್ಯಾ ನಿರ್ವಾಹಣ್ ಕೆಲೆಂ. ಸಾಲ್ ಭರ್ ಲೋಕ್ ಆಸೊನ್ ಕಾರ್ಯೆಂ ಬರೆಂ ಸೊಭ್ಲೆಂ.
ಕಾರ್ಯೆಂ ಸಂಪ್ಲೆಲ್ಯಾ ಉಪ್ರಾಂತ್ ಸರ್ವಾಂಕ್ ರುಚಿಕ್ ಕೊಂಕ್ಣಿ ಜೆವಾಣ್ ಆಸಾ ಕೆಲ್ಲೆಂ.
