ಸೊಫಿಯಾ – ಎಕ್ ಆಭಿಪ್ರಾಯ್
ಹಿಂದಿ ಫಿಲ್ಮ್ ಇಂಡಸ್ಟ್ರಿಂತ್ ಎಕಾಚ್ ವರ್ಸಾ ಭಿತರ್ ಎಕಾಚ್ ನಿರ್ದೆಶಕಾಚೆಂ ಎಕಾ ಪಾಟ್ಲ್ಯಾನ್ ಅನ್ಯೇಕ್ ಸುಪರ್ ಹಿಟ್ಟ್ ಫಿಲ್ಮ್ ರಿಲಿಜ್ ಜಾಂವ್ಚೆಂ ಅಪ್ರೂಪ್ ಪಳೆಂವ್ಕ್ ಮೆಳ್ತಾ. ಅಸಲೆಂ ಎಕ್ ಘಡಿತ್ ಕೊಸ್ಟಲ್ ವುಡ್ಡಾಂತ್, ಕೊಂಕ್ಣಿ ಫಿಲ್ಮ್ ಕ್ಷೇತ್ರಾಂತ್ ಪಳೆಂವ್ಕ್ ಮೆಳ್ಚೆಂ ಮ್ಹಳ್ಯಾರ್ ಖಂಡಿತ್ ಜಾವ್ನ್ ತಿ ಎಕ್ ವಿಶೇಷ್ ಗಜಾಲ್ ಜಾವ್ನಾಸಾ. ವಿಶೇಷ್ ಕಿತ್ಯಾಕ್ ಮ್ಹಳ್ಯಾರ್ ಎಕ್-ದೊನ್ ವರ್ಸಾಂ ಅದ್ಲಿ ಗಜಾಲ್ ಆಮಿ ಪಳೆಲಿ ತರ್ ಕೊಂಕ್ಣಿ ಫಿಲ್ಮಾಂ ನಾಂ ಬರಾಬರ್ ಆಸ್ಲ್ಲಿಂ. ಆನಿ ಆಜ್ ಕಾಲ್ ಮಂಗ್ಳೂರ್, ಗೋಯಾಂ, ಯು.ಎ.ಇ., ಯು.ಕೆ., ಇಸ್ರಾಯೆಲ್, ಕೆನಡಾ, ಯು.ಎಸ್.ಎ. ಮ್ಹಣೊನ್ ಕೊಂಕ್ಣಿ ಫಿಲ್ಮಾಂಚಿಂ ಇತ್ಲಿಂ ಪ್ರದರ್ಶನಾ ಜಾಂವ್ಚಿಂ ಪಳೆತಾನಾ ಕೊಂಕ್ಣಿ ಫಿಲ್ಮ್ ಇತಿಹಾಸಾಂತ್ಲೆಂ ಭಾಂಗ್ರಾಳೆ ದಿಸ್ ಆಯಿಲ್ಲೊ ಅನ್ಭೋಗ್ ಜಾತಾ.
ಶ್ರೀಮತಿ ಜಾನೆಟ್ ನೊರೊನ್ಹಾ ಕೊಂಕ್ಣಿ ಫಿಲ್ಮಾಂಚಿ ಕೊಸ್ಟಲ್ ವುಡ್ಡಾಚಿ ಪಯ್ಲಿ ಮಹಿಳಾ ನಿರ್ಮಾಪಕಿ ಜಾವ್ನ್, ಪ್ರೇಕ್ಶಕಾಂಕ್ ಎಕ್ ಬರೆಂ ಮನೋರಂಜನ್ ದಿಂವ್ಚಾಂ ಅಪ್ಲ್ಯಾ ವಾವ್ರಾಂತ್ ಸುಫಳ್ ಜಾಲ್ಯಾ.
“ಸೊಫಿಯಾ” ವಿಶಿಂ ಸಾಂಗ್ಚೆಂ ತರ್ ಎಕ್ ಸಾದಿ ಕಾಣಿ, ತ್ರಿಕೋಣ್ ಮೋಗ್, ಉಗ್ಡಾಸ್ ವ್ಹೆಚೊ ಆನಿ ಅಖ್ರೆಕ್ ಪಾಟಿಂ ಯೆಂವ್ಚೊ, (ಹಾಂಗಾಸರ್ ತೊ ಉಗ್ದಾಸ್ ಪಾಟಿಂ ಯೆತಾ ವ ನಾ ತೆಂ ಜಾಣಾಂ ಜಾಂವ್ಕ್ ತುಮ್ಕಾಂ ಫಿಲ್ಮ್ ಪಳೆಂವ್ಕ್ ಪಡ್ತೆಲೆಂ.) ಆಮಿ ಸಬಾರ್ ಹಿಂದಿ ಫಿಲ್ಮಾನಿಂ ಪಳೆಲಾಂ. ಪುಣ್ ಸೊಫಿಯಾ ಫಿಲ್ಮಾಚೊ ನಿರ್ದೆಶಕ್ ಶ್ರೀ ಹ್ಯಾರಿ ಫೆರ್ನಾಂಡಿಸ್ (ಬಾರ್ಕುರ್) ಕಾಣ್ಯೆ ಭಿತರ್ ಕಾಣ್ಯೊ ರಚುನ್, ಚಿಂತುಂಕ್ ಸಕಾನಾಂವ್ ತಸಲ್ಯೊ ಘುಂವ್ಡ್ಯೊ ದಿವ್ನ್, ಪ್ರೇಕ್ಷಕಾಕ್ ಧರ್ನ್ ದವರ್ಚಾಂತ್ ಖಂಡಿತ್ ಜಾವ್ನ್ ಯಶಸ್ವಿ ಜಾಲಾ. ಹ್ಯಾರಿಚೊ ಹಿಂದಿ ಆನಿ ಬೋಜ್ ಪುರಿ ಫಿಲ್ಮಾನಿಂ ಕಾಮ್ ಕೆಲ್ಲೊ ಆನ್ಭೋಗ್ ತಾಣೆಂ ಹಾಂಗಾಸರ್ ಬರ್ಪೂರ್ ಮಾಫಾನ್ ವಾಪಾರ್ಲಾ ತೊ ದಿಸ್ಟಿಕ್ ಪಡ್ತಾ. ಹಾಸ್ಯಾಂಚೊ ಬಾಪುಯ್ ಪ್ರಿನ್ಸ್ ಜೇಕಬ್ “ಪೆದ್ರು” ಜಾವ್ನ್ ಆನಿ “ಸೀತಮ್ಮಾ” ಫ್ರಿವಿಟಾ ಡಿ’ಸೋಜಾ ಪ್ರೇಕ್ಶಕಾಂಕ್ ಘಡಿಯೆ ಹಾಸೊಂವ್ಚಾ ಅಪ್ಲ್ಯಾ ಕಾಮಾಂತ್ ಶೆಂಬರ್ ಟಕ್ಕೆ ಯಶಸ್ವಿ ಜಾಲ್ಯಾಂತ್.
ಗುಣ್ ವಂತ್ ಸೇನಾಚೆಂ ಊಂಚ್ಲೆ ಸಂಗೀತ್ ಆನಿ 6 ಮಧುರ್ ಪದಾಂ ಆಸೊನ್ ಹೆಂ ಎಕ್ ಬರೆಂ ಫಿಲ್ಮ್ ಮ್ಹಣ್ಚಾಂತ್ ಕಾಂಯ್ ದೋನ್ ಉತ್ರಾಂ ನಾಂತ್.
ಫಿಲ್ಮಾಚೊ ಹಿರೊ ಐವನ್ (ಎಲ್ಟನ್ ಮಸ್ಕರೇನ್ಹಸ್) ಎಕ್ ಅನಾಥ್, ಹೆಪ್ಪಿ ಗೊ ಲಕ್ಕಿ, ಸದಾಂಚ್ ಹಾಸೊನ್-ಖೆಳೊನ್ ಜಿಯೆಂವ್ಚೊ ಭುರ್ಗೊ ಮಂಗ್ಳೂರಾಂತ್ ಜಿಯೆತಾ. ಎಕ್ ದಿಸ್ ಮುಂಬಯ್ ಪಾವ್ಲ್ಲ್ಯಾ ತೊ ಅಛಾನಕ್ ಇಗರ್ಜೆಂತ್ ಎಕಾ ಚೆಡ್ವಾಕ್ ಪಳೈತಾ ಆನಿ ತ್ಯಾಚ್ ಘಡಿಯೆ ತ್ಯಾ ಚೆಡ್ವಾಚಾ ಮೊಗಾರ್ ಪಡ್ತಾ. ಲವ್ ಎಟ್ ಫಸ್ಟ್ ಸಾಯ್ಟ್? ಪುಣ್ ಕಾಮಾ ಬಾಬ್ತಿ ಮುಂಬಯ್ ಗೆಲ್ಲ್ಯಾ ತಾಕಾ ಪಾಟಿಂ ಮಂಗ್ಳೂರ್ ಯೆಂವ್ಕ್ ಪಡ್ತಾ. ಮಂಗ್ಳೂರ್ ಪಾವ್ಲ್ಲ್ಯಾ ಐವನಾಕ್ ತೆಂ ಚೆಡುಂ ಮಂಗ್ಳೂರಾಂತ್ ದಿಷ್ಟಿಕ್ ಪಡ್ತಾ. ಪುಣ್ ಉಲಂವ್ಕ್ ಮೆಳಾನಾ.
ತ್ಯಾಚ್ ವೆಳಾ ಐವನಾಕ್ ಬಿಜ್ನೆಸ್ ಟ್ರಿಪ್ಪಾರ್ ಥೊಡ್ಯಾ ದಿಸಾಂ ಖಾತಿರ್ ಭಾಯ್ಲ್ಯಾ ಗಾಂವಾಂಕ್ ವ್ಹಚುಂಕ್ ಪಡ್ತಾ. ಎರ್ಪೊರ್ಟಾಕ್ ವ್ಹೆತಾನಾ ಐವನಾಚಾ ಹಾತಿಂ ಎಕ್ ಎಕ್ಸಿಡೆಂಟ್ ಘಡ್ತಾ. ತಾಣೆ ಮುಂಬಯ್ ಪಳೈಲ್ಲೆಂ ತೆಂಚ್ ಚೆಡುಂ ಆಕಾಸ್ಮತ್ ತಾಚಾ ಜೀಪಾಕ್ ಅಪ್ಟತಾ ಆನಿ ತ್ಯಾ ಚೆಡ್ವಾಚಾ ತಕ್ಲೆಕ್ ಕಠಿಣ್ ಮಾರ್ ಜಾತಾ. ಐವನಾಕ್ ತಾಚೆಂ ಪ್ಲಾಯ್ಟ್ ಸುಕಾತ್ ಮ್ಹಣ್ ತಾಚಿ ಪೊಸ್ಕಿಂ ಆವಯ್-ಬಾಪಯ್ ತ್ಯಾ ಚೆಡ್ವಾಕ್ (ಎಸ್ತೆರ್ ನೊರೊನ್ಹಾ) ಲಾಗ್ಸಾರ್ ಆಸ್ಚ್ಯಾ ಐವನಾಚಾ ಇಷ್ಟಾಚಾ ಹೊಸ್ಪಿಟಲಾಂತ್ ಎಡ್ಮಿಟ್ ಕರ್ತಾತ್ ಆನಿ ಐವನಾಕ್ ಎರ್ಪೊರ್ಟಾಕ್ ಸೊಡ್ತಾತ್.
ಪುಣ್ ತಕ್ಲೆಕ್ ಜಾಲ್ಲ್ಯಾ ಮಾರಾ ವರ್ವಿಂ ಚೆಡ್ವಾಕ್ ಕಿತೆಂಚ್ ಉಗ್ಡಾಸ್ ಯೆನಾ. ತ್ಯಾ ಚೆಡ್ವಾಕ್ ಸಕ್ಡಾಂ ಮೆಳೊನ್ “ಸೊಫಿಯಾ” ಮ್ಹಳ್ಳೆಂ ಎಕ್ ನವೆಂ ನಾಂವ್ ದಿತಾತ್.
ಇಂಡಿಯಾಕ್ ಥೊಡ್ಯಾಚ್ ದಿಸಾಂ ಬಿತರ್ ಪಾಟಿಂ ಆಯಿಲ್ಲೊ ಐವನ್ ಸೊಪಿಯಾಚಾ ಕುಟ್ಮಾಚಿಂ ಸೊಧ್ನಾಂ ಕರ್ತಾ… ಸೊಫಿಯಾಚೊ ಉಗ್ಡಾಸ್ ಪಾಟಿಂ ಯೆಂವ್ಚೆಂ ಖಾತಿರ್ ಕಿತೆಂ ಸಕ್ಕಡ್ ಖೆಳ್ ಖೆಳ್ತಾ…! ಐವನಾಚೆಂ ಪ್ರಯತ್ನ್ ಕಿತ್ತುನ್ ಪಾವ್ತಾ….? ಸೊಫಿಯಾಚಿಂ ಕುಟ್ಮಾಚಿಂ ಸೊಪಿಯಾಚಿಂ ಸೊಧ್ನಾಂ ಕಿತ್ಯಾಕ್ ಕರ್ನಾಂತ್ …? ಸೊಫಿಯಾ ಐವನಾಚೆಂ ಜಾಲೆಂ.. ?
ಹ್ಯಾ ಸರ್ವ್ ಸವಲಾಂಕ್ ಜಾಪ್ ಜಾಯ್ ತರ್ ಸೊಫಿಯಾ ಫಿಲ್ಮ್ ಸ್ವತಾ ಪಳೆಯಾತ್. ಹೆಂ ಫಿಲ್ಮ್ ಕುಟ್ಮಾ ಸಾಂಗಾತಾ ಪಳೈಜಯ್ ತಸಲೆಂ ಜಾವ್ನಾಸಾ.