ಶ್ರೀ ಆಂತೊನಿ ಗೊನ್ಸಾಲ್ವೆಸ್
(ಖ್ಯಾತ್ ಸಂಗೀತ್ಕಾರ್ ಗೊಂಯ್ಚೊ ಭಾವ್ ಆಂತೊನಿ ಗೊನ್ಸಾಲ್ವಿಸಾಚಿ ವಳಕ್ ದಿತಾ – ಇಜಿದೊರ್ ದಾಂತಾಸ್)
ಗೊಯಾಂತ್ ಮಾಜೊರ್ಡಾ ಗಾಂವ್ ನಾಂವಾಡ್ದಿಕ್ ಸಂಗೀತ್‍ಕಾರಾಂಕ್ ಜಲ್ಮ್ ದಿಲ್ಲೊ ಗಾಂವ್ ಮ್ಹಣ್ ನಾಂವಾಡ್ಲಾ. ತ್ಯಾ ಸಂಗೀತ್‍ಕಾರಾಂ ಮಧೆಂ ಆಂತೊನಿ ಗೊನ್ಸಾಲ್ವೆಸಾಚೆಂ ನಾಂವ್ ಭೋವ್ ಫಾಮಾದ್. ಮನ್‍ಮೋಹನ್ ದೇಸಾಯಿಚೆಂ ಹಿಂದಿ ಫಿಲ್ಮ್ ‘ಅಮರ್ ಅಕ್ಬರ್ ಆಂತೊನಿ’ ಏಕ್ ಯಶಸ್ವಿ ಜೊಡ್ಲೆಲೆಂ ಫಿಲ್ಮ್ ಜಾವ್ನಾಸಾ. ಹ್ಯಾ ಫಿಲ್ಮಾಂತ್ ಅಮಿತಾಬ್ ಬಚ್ಚನ್ ಹಾಣೆಂ ಆಂತೊನಿ ಗೊನ್ಸಾಲ್ವಿಸಾಚೊ ಪಾತ್ರ್ ಭೋವ್ ಉತ್ತೀಮ್ ಥರಾನ್ ನಟನ್ ಕೆಲಾ. ಎಕಾ ವ್ಹಡ್ಲ್ಯಾ ತಾಂತಿಯಾ ಥಾವ್ನ್ ಭಾಯ್ರ್ ಯೇವ್ನ್ ‘ಮೈ ನೇಮ್ ಇಸ್ ಆಂತೊನಿ ಗೊನ್ಸಾಲ್ವೆಸ್’ ಮ್ಹಳ್ಳೆಂ ಪದ್ ಭೋವ್ ಆಪುರ್ಬಾಯೆನ್ ಗಾವ್ನ್ ಪ್ರೇಕ್ಷಕಾಂಚಿ ಕಾಳ್ಜಾಂ ತೊ ಜಿಕ್ಲಾ.
ತಿ ಕಾಣಿ ಎಕಾ ಮೊಗಾಳ್ ಗೊಂಯ್ಕಾರಾಚೆರ್ ಆಟಾಪ್ಲ್ಯಾ ಆನಿ ಅಮಿತಾಬ್ ಬಚ್ಚನಾನ್ ತ್ಯಾ ಪಾತ್ರಾಕ್ ನ್ಯಾಯ್ ದಿಲಾ. ತ್ಯಾ ಪಾತ್ರಾಚೆಂ ನಾಂವ್ ಖರೆಂಪಣಿ ಆಂತೊನಿ ಡಿ’ಸೋಜಾ ಜಾವ್ನ್ ಆಸ್‍ಲ್ಲೆಂ. ಪುಣ್ ಲಕ್ಷ್ಮಿಕಾಂತ್ ಪ್ಯಾರೆಲಾಲ್ ಮಧ್ಲ್ಯಾ ಎಕ್ಲ್ಯಾನ್ – ಮ್ಹಣ್ಜೆ ಪ್ಯಾರೆಲಾಲಾನ್ ತೆಂ ನಾಂವ್ ಆಂತೊನಿ ಗೊನ್ಸಾಲ್ವಿಸ್ ಕರ್ನ್ ಹೊ ಪಾತ್ರ್ ಕರುಂಕ್ ಲಾಯ್ಲಾಂ. ಕಿತ್ಯಾಕ್ ಮ್ಹಳ್ಯಾರ್ ಪ್ಯಾರೆಲಾಲಾಕ್ ರೆಬೆಕ್ ಆನಿ ಪಾಶ್ಶ್ಯಾತ್ ವ್ಹಾಜಂತ್ರಾಂ ವಾಜೊಂವ್ಕ್ ಶ್ರೀ ಆಂತೊನಿ ಗೊನ್ಸಾಲ್ವೆಸಾನ್ ಶಿಕಯ್ಲಾಂ. ದೆಕುನ್ ತಾಚೊ ಉಪ್ಕಾರ್ ಬಾವುಡ್ಚೆ ಖಾತಿರ್ ತೊ ಖರೆಂಪಣಿಂ ಅಂತೊನಿ ಡಿ’ಸೋಜಾ ಮ್ಹಣ್ ಅಸ್ಲೆಲೆಂ ಆಂತೊನಿ ಗೊನ್ಸಾಲ್ವೆಸ್ ಮ್ಹಣೊನ್ ಬದ್ಲಿ ಕೆಲ್ಲೆಂ.
ಆಂತೊನಿ ಪ್ರಭು ಗೊನ್ಸಾಲ್ವಿಸ್, ಮಾಜೊರ್ಡಾಂತ್ 1927 ವರ್ಸಾ ಜೂನ್ 12 ವೆರ್ ಜಲ್ಮಾಲೊ. ತಾಚೊ ಬಾಪಯ್ ಜೋಸ್ ಆಂತೊನಿಯೊ ಗೊನ್ಸಾಲ್ವಿಸ್ ಹಾಣೆಂ ತ್ಯಾ ಗಾಂವ್ಚಾ ಇಗರ್ಜೆಚೊ ಮೆಸ್ತ್ರಿ ಜಾವ್ನ್ 50 ವರ್ಸಾಂ ಕಾಮ್ ಕರ್ನ್ ನಾಂವ್ ಜೊಡ್ಲಾಂ. ಆಂತೊನಿಚ್ಯಾ ಹೆರ್ ತೆಗಾಂ ಭಾವಾಂನಿ ಹಿ ಪರಂಪರಾ ಪೂರ್ಣ್‍ಪಣಿ ಸಾಂಬಾಳ್ಳ್ಯಾ.
ಪಾಟ್ಲ್ಯಾ ಯುಗಾಂತ್ ಇಗರ್ಜಾಂನಿ ಚಲಂವ್ಚಾ ಇಸ್ಕೊಲಾಂನಿ ಸಂಗೀತ್ ಶಿಕಯ್ತಾಲಿಂ. ಹ್ಯಾ ವರ್ವಿಂ ಜಾಯ್ತ್ಯಾ ಸಂಗೀತ್‍ಕಾರಾಂಕ್ ಆಪ್ಲೆಂ ನಾಂವ್ ಜೊಡುಂಕ್ ಆಧಾರ್ ಜಾಲೊ.
ಆಂತೊನ್ ಆಪ್ಲ್ಯಾ ತರ‍್ನ್ಯಾ ಸಾತ್ ವರ್ಸಾಂಚೆ ಪ್ರಾಯೆರ್ ಸಂಗೀತ್ ಶಿಕ್ಲೊ. ಆಪ್ಲ್ಯಾ 14 ವರ್ಸಾಂಚಾ ಪ್ರಾಯೆರ್ ಕುಡ್‍ಚಡ್ಯಾಂ ರಾಕಣ್ ಭಡ್ವ್ಯಾಚ್ಯಾ ಇಗರ್ಜೆಂತ್ ಸಂಗೀತಾಚೊ ಮೆಸ್ತ್ರಿ ಜಾಲೊ. ತೊ ಫಕತ್ ರೆಬೆಕ್ ವ್ಹಾಜಂವ್ಚಾಂತ್ ಹುಷಾರ್ ನಾಸ್ಲೊ ಬಗಾರ್ ತಾಕಾ ವಾಯೊಲಿನ್, ಕ್ಲಾರಿನೆಟ್ ಆನಿ ಪಿಯಾನೊ ವ್ಹಾಜಂವ್ಕ್ ಯೆತಾಲೆಂ.
ಚಾಳಿಸಾಂಚ್ಯಾ ಸುರ್ವೆರ್ ಮುಂಬಯ್ತ್ ಉಂಚ್ಲೆ ಕುಳಿಯೆಚೊ ಲೋಕ್ ಹೋಟೆಲಾಂನಿ ಸಂಗೀತ್ ಆಯ್ಕೊಂಕ್ ವೆತಾಲೊ, ಥಂಯ್ಸರ್ ಗೊಂಯ್ಕಾರ್ ಒರ್ಕೆಸ್ಟ್ರಾ ವ್ಹಾಜಯ್ತಾಲೆ. ಸೊರೊ ಬಂದಿ ಜಾಲ್ಲ್ಯಾ ಉಪ್ರಾಂತ್ ಪ್ರಭಾವ್ ಪಡ್ಲೊ. ಹೊಟೆಲಾಂಕ್ ಭೆಟ್ ದಿಂವ್ಚೊ ಲೋಕ್ ಉಣೊ ಜಾಲೊ. ಹ್ಯಾ ವರ್ವಿಂ ಗೊಂಯ್ಕಾರ್ ಸಂಗೀತ್‍ಕಾರಾಂಕ್ ನವ್ಯಾ ಉದ್ಯೋಗಾಂಕ್ ಲಾಗ್ಚೆಂ ಪಡ್ಲೆಂ. ಥೊಡೆ ಸಂಗೀತ್ಕಾರ್ ಫಿಲ್ಮ್ ಉದ್ಯೋಗಾಂತ್ ಭಿತರ್ ಸರ್ಲೆ. ಜೊ ತ್ಯಾ ಕಾಳಾರ್ ಎಕಾ ಭಾಂಗ್ರಾಳ್ಯಾ ಯುಗಾಂತ್ಲ್ಯಾನ್ ವೆತಾಲೊ. ಥಂಯ್ ಹಿಂದು ಸಂಗೀತ್ ರಚ್ಪಿ, ಮುಸ್ಲಿಮ್ ಗಿತಾಂ ಘಡ್ಪಿ ಆನಿ ಗೊಂಯ್ಕಾರ್ ಕ್ರಿಸ್ತಾಂವ್ ಸಂಗೀತ್ ಮಾಂಡ್ಪಿ (ಬಸವ್ಪಿ). ಹ್ಯಾ ತ್ರಿಮೂರ್ತಿಚೊ ಸುಂದರ್ ದೆಖಾವೊ ಪಳಂವ್ಕ್ ಮೆಳ್ತಾಲೊ. “ಗೊಂಯ್ಕಾರಾಂನಿ ಹಿಂದಿ ಫಿಲ್ಮ್ ಉದ್ಯೋಗಾಂತ್ ಭರ್ಪೂರ್ ಯೋಗ್ ದಾನ್ ದಿಲಾಂ.” ಅಶೆಂ ಉದ್ಗಾರ್ ಆಂತೊನಿ ಬಾಬಾನ್ ಧಾ ವರ್ಸಾಂ ಆದಿಂ ತಾಚೆಂ ಸಂದರ್ಶನ್ – ತಾಚ್ಯಾ ಮಜೊರ್ದಾಚ್ಯಾ ಘರಾಂತ್ ಘೆತಾಸ್ತಾನಾ ಕಾಡ್‍ಲ್ಲೆ.
ಪ್ರಶ್ನ್ ಅಶೆಂ ಆಸ್ಲೆಂ ಕೀ ಹಿಂದಿ ಫಿಲ್ಮ್ ಉದ್ಯೋಗಾಂತ್ ಕಿತ್ಯಾಕ್ ಗೊಂಯ್ಕಾರಾಂಚಿ ಗರ್ಜ್ ಆಸ್ಲಿ? ಧಾಕ್ಟ್ಯಾ ಸಂಗೀತ್ ಪಂಗ್ಡಾಚೊ ಜಮೊ ರುಪ್ಯಾ ಪಡ್ದ್ಯಾರ್ ಏಕ್ ಗುಣಾದಿಕ್ ಪರಿಣಾಮ್ ದೀನಾಸ್ಲೊ ವ್ಹಡ್ಲ್ಯಾ ಒರ್ಕೆಸ್ಟ್ರಾಂನಿ – ಜಾಂತುಂ ದೊಲಕ್, ಸಿತಾರ್, ರೆಬೆಕ್, ಟ್ರಂಪೆಟ್, ಹಾವಾಯಿಯನ್ ಗಿಟಾರ್ ತಶೆಂ ಸೆಕ್ಸಾಪೊನ್, ಕ್ಲಾರಿನೆಟ್ ಏಕ್ ಪರಿಪೂರ್ಣ್ ಪರಿಣಾಮ್ ದೀಂವ್ಕ್ ಹಾಂಚಿ ಗರ್ಜ್ ಆಸ್ಲಿ. ಕ್ರಿಸ್ತಿ ಗೊಂಯ್ಕಾರಾಂಕ್ ಹಿಂ ವಾಜಂತ್ರಾಂ ಬರ‍್ಯಾ ತರೇನ್ ವ್ಹಾಜಂವ್ಕ್ ಯೆತಾಲಿಂ. ಹಿಂದಿ ಸಂಗೀತಾಚೆಂ ರಚನ್, ಬರವ್ನ್ ಕಾಡುಂಕ್ ಜಾಯ್ ಆಸ್ಲೆಂ ಜೆಂ ಗೊಂಯ್ಕಾರಾಂಕ್ ಹಿಕ್ಮತೆನ್ ಕರುಂಕ್ ಜಾತಾಲೆಂ, ಕಿತ್ಯಾಕ್ ತೆ ಸೃಜನ್‍ಶೀಲ್ ಮಾಂಡ್ಪಿ ಸಂಗೀತ್ ಮಾಂಡ್ಪಿ ಜಾವ್ನಾಸ್‍ಲ್ಲೆ.
ಸಂಗೀತ್ ಮಾಂಡ್ಪ್ಯಾಂಚೆಂ ಕಾಮ್ ವೆವೆಗ್ಳ್ಯಾ ವ್ಹಾಜಂತ್ರಾಂಕ್ ಸಂಗೀತ್ ಮಾಂಡ್ಚೆಂ, ಸಂಗೀತ್ ಬರವ್ನ್ ಕಾಡ್ಚೆಂ, ಆನಿ ಸುರ್ ಸುಂದರ್ ಕರ್ಚೆಂ ಜಾವ್ನಾಸಾ. ಏಕ್ ಪರಿಣಾಮ್‍ಕಾರಕ್ ರೂಪ್ (ಡಿಸ್ಟಿಂಕ್ಟಿವ್ ಇಂಪ್ರೆಶನ್) ರಚುಂಕ್ ತೆ ಡಿಸ್ನಿಲೇಂಡ್ ಸ್ಟಂಪ್, ಪೊರ್ತುಗೀಸ್ ಫಾಡೊಸ್, ಎಲಿಂಗ್ಸ್‍ಟನ್ ಡೂಡಲ್ಸ್, ಚ್ಹಾ-ಚ್ಹಾ-ಚ್ಹಾ, ಮೊಝರ್ಟ್, ಆನಿ ಬಾರ್ ಹಾಂಚೆ ವಿಶಯ್ ವಾಪರ್ತಾಲೆ. ಆನಿ ತಾಂಚೊ ಶೆವಟ್ ಏಕ್ ಸುಂದರ್ ಸುಮೆಳ್ ಜಾವ್ನ್ ಆಸ್ಲೊ. ಆಂತೊನಿಚೆಂ ಸಂಗೀತ್ ಗೊಂಯ್ಚೆಂ ದಾಯ್ಜ್ ಆನಿ ಹಿಂದುಸ್ತಾನಿ ಮಧುರ್ ಸಂಗೀತ್ ಆನಿ ತಾಳಾಚೊ ಏಕ್ ಮೇಳ್ ಜಾವ್ನ್ ಆಸಾ. ಆಂತೊನಿ ಬಾಬಾನ್ ಹಿಂದಿ ಸಂಗೀತ್, ತಾಳ್ಯಾಂಚ್ಯಾ ಸುಮೇಳಾಚೆರ್ ಬರಯ್ಲೆಲೆಂ ಆಸಾ.
ಆಂತೊನಿಚೊ ಬಾಪುಯ್ ಜೆ.ಎಮ್. ಗೊನ್ಸಾಲ್ವೆಸ್ ನೌಶಾದ್ ಆಲಿಖಾನ್ ಹಾಚೆ ಖಾತಿರ್ ವಾವುರ್ತಾಲೊ. ತಾಚ್ಯೆ ಮ್ಹಾಲ್ಕೆಚೊ ಸ್ಟುಡಿಯೊ ಆಸೊನ್ ತಾಚಿ ಸ್ವತಾಚಿ ಪ್ರೊಡಕ್ಶನ್ ಕಂಪೆನಿ ಆಸ್‍ಲ್ಲಿ. ನೌಶಾದಾನ್ ತಾಚೆಂ ಆಡಿಶನ್ ಅಕ್ಟೋಬ್ರಾಚೆ 15ವೆರ್ 1943 ವರ್ಸಾ ಘೆತ್ಲೆಂ ಆನಿ ತಾಕಾ ಆಪ್ಲ್ಯಾ ಸಂಗೀತ್ ಕಂಪೆನಿಂತ್ ಘೆತ್ಲೊ.
ಹಿಂದಿ ಫಿಲ್ಮ್ ಉದ್ಯೋಗಾಂತ್ ಆಂತೊನಿಚೊ ಪಯ್ಲೊ ಸಾಂಬಾಳ್ ರು. 30/- ಜಾವ್ನಾಸ್ಲೊ. ತಾಚಿ, ಪನ್ನಾಲಾಲ್ ಹ್ಯಾ ಪಿರ್ಲುಕ್ ವ್ಹಾಜಂವ್ಚಾ ಸಾಂಗಾತಾ ಜುಗಲ್‍ಬಂದಿ ಲೋಕ್ ಹುಮೆದಿನ್ ಉಡಾಸ್ ಕಾಡ್ತಾತ್. ಕೊಂಕ್ಣಿ ಸಂಗೀತಾ ಖಾತಿರ್ ತಾಣೆಂ ಗೊಂಯ್ಚಿ ಶೆತಾಂ, ಇಮ್ಯಾಜಿನೇಶನ್ಸ್, ಸೊಭಿತ್ ಫುಲ್ ಗೊಂಯ್ಚೆಂ ಆನಿ ಸಬಾರ್ ಮಾಂಡೊ ಪದಾಂ ರಚ್ಲ್ಯಾಂತ್.
ಆಂತೊನಿನ್ ಸಂಗೀತಾಕ್ ಏಕ್ ನವೆಂ ವಳನ್ ದಿಲೆಂ. ಹಿಂದಿ ಫಿಲ್ಮಾಂನಿ ಆಪ್ಲೆಂ ಪಯ್ಲೆಂ ಮೇಟ್ ಧೊಲಕಾದ್ವಾರಿಂ ಕೆಲೆಂ. ತ್ಯಾ ಉಪ್ರಾಂತ್ ತಾಣೆಂ ‘ಕಿಸ್ಮತ್’ ಆನಿ ‘ಮಹಾಲ್’ ಹಾಂಕಾಂ ಸಂಗೀತ್ ಬಸಯ್ಲೆಂ. ತಾಕಾ ವ್ಹಡ್ ಸಂಗೀತ್ ದಿಗ್ದರ್ಶಕಾಂ ಖಾತಿರ್ ವ್ಹಾಜಂವ್ಕ್ ಭಾಗ್ ಮೆಳ್ಳೆಂ. ತೆ ಜಾವ್ನಾಸಾತ್ ಬಿ.ಆರ್. ಚೋಪ್ರಾ (ನಯಾ ದೌರ್, ವಕ್ತ್, ಧೂಲ್ ಕಾ ಪೂಲ್, ಸಾಧನಾ) ನೌಶಾದ್ (ದಿಲ್ಲಗಿ) ಚೇತನ್ ಆನಂದ್ (ಹಕೀಕತ್) ಆನಿ ರೊಮು ಮುಖರ್ಜಿ (ತುಹಿ ಮೇರಿ ಜಿಂದಗಿ). ಏಕ್ ವೆಗ್ಳೆಂಚ್ ಒರ್ಕೆಸ್ಟ್ರಾ ಆನಿ ಆಸ್ತಮ್ತಿ ಸಂಗೀತಾಚೊ ಮೇಳ್ ಕರ್ಪಾಚಿ ಕಲಾ ಪಯ್ಲೆಂ ಆಪ್ಣಾಯ್ಲಿ. ಜಿ, ಸಂಗೀತ್ ದಿಗ್ದರ್ಶಕ್ ಒ.ಪಿ.ನಾಯರ್, ಕಲ್ಯಾಣ್ ಜಿ-ಆನಂದ್ ಜಿ, ಲಕ್ಷ್ಮಿಕಾಂತ್-ಪ್ಯಾರೆಲಾಲ್, ಬಪ್ಪಿ ಲಾಹಿರಿ, ಆರ್. ಡಿ. ಬರ್ಮನ್ ಹಾಂಣಿಂ ಉಪ್ರಾಂತ್ ಪಾಟ್ಲಾವ್ ಕೆಲೊ.
1951 ವರ್ಸಾ ತಾಣೆಂ ಸಿನೆ ಮ್ಯೂಜಿಶಿಯನ್ ಆಸೋಸಿಯೇಶನ್ ಸ್ಥಾಪನ್ ಕೆಲೊ. ತಾಚೊ ಲಾಭ್ ಸಂಗೀತ್‍ಕಾರಾಂಕ್ ಉಪ್ರಾಂತ್ ಫಾವೊ ಜಾಲೊ. ಹಿಂದಿ ಫಿಲ್ಮ್ ಉದ್ಯೋಗಾಕ್ ತಾಣೆಂ ಖೂಬ್ ಸಹಕಾರ್ ದಿಲಾ. ಕಿತ್ಯಾಕ್ ತೊ ಸಂಗೀತಾಚೆಂ ಸೊಲ್ಫಾಂ ಬರಂವ್ಕ್ ಜಾಣಾ ಆಸ್ಲೊ. ಆದಿಂ ಎಕಾ ಪದಾಕ್ 30 ಇನ್ಸಾಯೊ ಕಚ್ರ್ಯೊ ಪಡ್ಟಾಲ್ಯೊ. ತಾಚಿ ಹುಷಾರ್ಕಾಯ್ ಬ್ಯಾಕ್‍ಗ್ರೌಂಡ್ ಸಂಗೀತ್ ಆನಿ ಪ್ರಸ್ತಾವಿತ್ ಸಂಗೀತಾಂತ್ ದಿಸೊನ್ ಯೆತಾಲಿ.
ತಾಚ್ಯಾ ಸಂಗೀತಾಚೆಂ ಮುಖೆಲ್ ಆಕರ್ಷಣ್ ಮುಂಬಯ್ತ್ ವಿದ್ಯಾ ಭವನಾಂತ್ ಜಾಲ್ಲ್ಯಾ ದಿ ಇಂಡಿಯನ್ ಸಿಂಫೊನಿ ಒರ್ಕೆಸ್ಟ್ರಾಚ್ಯಾ ದಾಖವ್ಣೆಂತ್ ದಿಸ್ಲ್ಯಾ. ಹಿ ದಾಖವ್ಣ್ ತೀನ್ ದೀಸ್ ಚಲ್ಲ್ಯಾ. ಗೊಂಯ್ಚ್ಯಾ ಸಂಗೀತಾಚಾ ತಾಳಾಚಿ ಸುಂದರ್‍ಕಾಯ್ ದಿಸ್ಲ್ಯಾ. ನಾಂವಾಡ್ದಿಕ್ ಗಾವ್ಪ್ಯಾಂನಿ ಮನ್ನಾಡೇ ಆನಿ ಸುಮನ್ ಕಲ್ಯಾಣ್‍ಪುರ್ ಹಾಂಣಿಂ ಸಾದರ್ ಕೆಲ್ಲೆಂ.
ತಾಚಿ ವ್ಹಡಾಂತ್ಲಿ ವ್ಹಡ್ ದಾಖವ್ಣ್ ಸೇಂಟ್ ಝೇವಿಯರ್ಸ್ ಕ್ವಾಡ್ರಾಂಗಲಾಂತ್ ಜಾಲ್ಲಿ. ತಾಚೊ ಉಡಾಸ್ ಕೊಂಕ್ಣಿ ಮೊಗಿ ಆತಾಂಯಿ ಕಾಡ್ತಾತ್. ಹಿ ಕಾರ್ಯವಳ್ 1958 ವರ್ಸಾ ಎಪ್ರಿಲ್ 15 ಆನಿ 16ವೆರ್ ಜಾಲ್ಲಿ. ವಿಶ್ವ ಸಂಗೀತ್ ಮಂಡಳೆನ್ ಪ್ರಸ್ತುತ್ ಕೆಲ್ಲ್ಯಾ ಹ್ಯಾ ಸಂಗೀತ್ ದಾಖವ್ಣೆಂತ್ ಆಂತೊನಿ ಗೊನ್ಸಾಲ್ವಿಸ್ ಸಂಗೀತ್ ನಿರ್ದೇಶಕ್ ಜಾವ್ನಾಸ್ಲೊ. ಹ್ಯಾ ದಾಖವ್ಣೆಂತ್ 100 ವಿವಿಂಗಡ್ ವ್ಹಾಜಾಂತ್ರಾಂ ವಾಪಾರ್ಲ್ಯಾಂತ್. ನಾಂವಾಡ್ದಿಕ್ ಗಾವ್ಪಿ ಲತಾ ಮಂಗೇಶ್ಕರ್, ಆನಿ ಮನ್ನಾಡೇ ಹಾಂಣಿಂ ಲಾತಿನ್, ಹಿಂದಿ ಆನಿ ಕೊಂಕ್ಣಿ ಭಾಷೆನ್ ಪದಾಂ ಗಾಯ್ಲ್ಯಾಂತ್.
ತಾಚ್ಯಾ ವಾವ್ರಾಚಿ ತೊಖ್ಣಾಯ್ ವಾಲ್ಟರ್ ಡಿಸ್ನೆಚೊ ಕ್ರಿಯೇಟಿವ್ ನಿರ್ದೇಶಕ್ ಕ್ಲೆರೆನ್ಸ್ ವೀಕ್ಸ್, ಜೊ ಭಾರತಾಚೆ ಪಯ್ಲೆಂ ಆನಿಮೆಟೆಡ್ ಫಿಲ್ಮ್ ಕರುಂಕ್ ಸೊಧ್ತಾಲೊ ತಾಕಾ ಆಂತೊನಿ ಜಾಯ್ ಆಸ್ಲೊ ಪುಣ್ ತಾಚಾ ನಶೀಬಾಂತ್ ತೆಂ ನಾಸ್ಲೆಂ. 1965 ವರ್ಸಾ ತೊ ಸಂಗೀತ್ ಶಿಕಂವ್ಚೆ ಖಾತಿರ್ ಆಮೆರಿಕಾಕ್ ಗೆಲ್ಲೊ. ಥಂಯ್ ತಾಣೆಂ ತೀನ್ ಶೈಕ್ಷಣಿಕ್ ಫಿಲ್ಮಾಂ – ಬೊರೀಸ್ ಮಾರ್ಗೊ, ಸಿಲ್ಕ್‍ಸ್ಕ್ರೀನ್ ಆನಿ ಫ್ರಾನ್ಸ್ ಹಾಂಕಾಂ ಸಂಗೀತ್ ಬಸಯ್ಲಾಂ.
ತಾಕಾ ಸಬಾರ್ ಪ್ರಶಸ್ಥಿ ಸನ್ಮಾನ್ ಫಾವೊ ಜಾಲ್ಯಾತ್. ಭಾರತಾಚಾ ಪ್ರಧಾನ್ ಮಂತ್ರಿ ಥಾವ್ನ್‍ಯಿ ಪ್ರಶಸ್ಥಿ ಮೆಳ್ಳ್ಯಾ (1957) ವರ್ಸಾ ಹಾಂಚ್ಯಾ ‘ಹಮ್ ಪಂಚಿ ಏಕ್ ಡಾಲ್-ಕೇ” ಫಿಲ್ಮಾಕ್ ಸುರ್ ಸಿಂಗಾರ್ ಪ್ರಶಸ್ಥಿ (1961) ತ್ಯಾಚ್ ವರ್ಸಾ ರಾಷ್ಟ್ರಪತಿಚಿ ಪ್ರಶಸ್ಥಿ ದಿಲ್ಯಾ. ಗೊಂಯ್ಚಾ ಸರ್ಕಾರಾನ್ ರಾಜ್ಯ ಪುರಸ್ಕಾರ್ ದೀವ್ನ್ ಸನ್ಮಾನ್ ಕೆಲಾ. ದಾಲ್ಗದೊ ಕೊಂಕ್ಣಿ ಆಕಾಡೆಮಿನ್ ತಾಕಾ 2004 ವರ್ಸಾ ಪ್ರಶಸ್ಥಿ ದಿಲ್ಯಾ. ಟ್ರಾನ್ಸ್ ಮಿಡಿಯಾ ಹಾಂಣಿಂ ತಾಕಾ ಅಕ್ಟೋಬರ್ 2006 ವರ್ಸಾ ಸನ್ಮಾನ್ ಕೆಲಾ. ಅಶೋಕ್ ರಾಣೆನ್ ತಾಚೆ ವಯ್ರ್ ಮಾಹೆತ್ ದಿಂವ್ಚೆಂ ಲಗು ಚಿತ್ರ್ ತಯಾರ್ ಕೆಲಾಂ. ನಾಂವ್ ಆಸಾ ಆಂತೊನಿ ಗೊನ್ಸಾಲ್ವೆಸ್ – ದಿ ಲೆಜೆಂಡ್ ಲೈಫ್ ಟೈಮ್ ಎಚೀವ್ ಮೆಂಟ್ ಕರ್ಮವೀರ್ ಪುರಸ್ಕಾರ್, ದಾದಾ ಸಾಹೇಬ್ ಫಾಲ್ಕೆ ಲೈಫ್ ಟೈಮ್ ಎಚೀವ್‍ಮೆಂಟ್ ಆವಾರ್ಡ್ ತಾಕಾ ಮೆಳ್ಳ್ಯಾತ್.
