Mickey Correia-Bharoti Jaz Songitacho Raza
Mickey Correia-n Bharoti Jaz songitacho raza mhonn nam’na melloilea ani aplea Mickey Correia and his Band hache vorvim segid bavis vorsam – 1938 tem 1960 meren – Mumboichea fankivont Taj Mahal hottelant vazovpacho vikrom (record) rochla. Hea mhalgoddea Goenkarak ostomtechea xastrio (classical) songitachi vollokh Igorjen choloilolea songit iskolam vorvim prapt zali. Songitachem xikxonn Kristi Goenkarank kamank ailem dekhun tannim Mumbointleam Musolman vazovpeank aple huxearkaien hea vesaiantle poisaile. Hollu- hollu Hindu ani Parsi lognachea mirvonnukanim Goenkaruch vazovnk lagle. Uprant monea (silent) Hindi filmamni aplem modhur (melodious) songit rigovpak taka sondhi mell’lli, tor kaim zonn Mharajeanchea hovelinim (palaces) vazovpak pavle..Toxench hottelank vazovpak vatt ugti zali.
Mickey Correia-che huxarkaiek lagun fankivont songitkar Anibal Crasto taka “boreantlo boro ttrompett vazovpi” mhonntta ani nanvloukik Maurice Concessio zalear taka “Bharatacho Louis Armstrong” mhonnun pacharta.
Mickey babacho zolm Setembrache 29ver 1913 vorsa Udent Afrikechea Mombassa xarant zalo. Atth vorsanche piraier tacho songita kodden sombond ailo. Tachea mhonn’nnea pormonnem songit, ek khella porim zaka omkech nem (rules) astat, te nem xiktoch tum tacho guru zata. Taka jaz songitacho tizlolo (seasoned) mhonn vollkhotat. Tachea hixeoban jaz songit ekdom sobit; Pop ani Rock don bhurgim zalear, Jaz tanchi avoi. Jaza itlem ruchik ani dorjeacheam dusrem songit na.
Tannem, mullavem xikop Purtugezintlean ghetokuch, bapain taka Karachi St Patrick’s iskolant dhaddlo zoim taka rebekachi xikovnn eka Brittix xikxokan dili. Punn aplo put songitkar zalolo tachea bapaik naka aslo, karann, tea kallar songitkarank bebde ani bailam fattlean dhanvpi oxem somzotale. “Punn mhojea paik, hanv rebekachi puja kortalom, hi khobor nasli,” oxem Mickeybaban mhaka bara vorsam fattim tachi mulakhot tachea Mumbointlea Colaba bhagant urtolea Esperansa imarotint,ghetana sanglea.
Songitak lobhdon tannem borea pagarachi nokri ghaloili, ani 1938 vorsa Mumboi gelo. Survatek, All India Radio-nt kam kelem. Uprant eka German vazovpea khala kam pollelem. Aplea bhavachea Alex Correia’s Optimist Band-ant bhitor sorun rebek, banjo, alto- saxaphone, clarinet vazovpak laglo. Eka vorsa uprant khaxelem Mickey Correia and his band ghoddlem ani Taj Mahal hottelant vazovn ek voznadik itihas rochlo.
Tacheo ugddas urpi ghoddnneo 1948 vorsa nanvlovkik Frank Fernand songitkara vangdda poilo Swing Concert hantunt bhag ghelto, 1953 vorsant Brittix Ranniechea rajeabhixekek (coronation) to hajir zalo. Teach vorsa Taj Mahal hottelachea bhangra utsova somoiar taka tin mhoine pordesant suttier dhaddlo. Modle satthint, Mumboichea Symphony Orchestra-nt poilo klarinet vazovpi ani boreantlo ttrompett vazovpi mhonn man zoddlo.
Madam Pompidouchea Ontoraxttrik Modinche dakhovnnent background songit dilem, zoim motthea videxi songitkaram kodde tachi soirigot zali. 1984 tannem vorsa Jaz Yatrent jen’na apli xotabdi (centenary) somorpili ten’na tachi konnench proxonsa (appreciation) korunk na mhonn taka khont bhogli.
Sax, tachem avoddttem vazontor (instrument) ani Jazz, xastrio songit tachi ghottai. Klarinet, piano, murli vazovpakui to huxar. Durdoivan 1960 vorsa taka kanttel (diphtheria) zalolean funkichim vazontram soddun taka chaviechea (keyboard) vazontracher bodli korchi poddli.. Tache bholaikecho ghutt kosrot (exercise) korop, sorea, sigrettim pasun pois ravop zavn asa.
Tannem Hindi cholchitramni jaz, xastrio songit toxench Rock’n’ roll songit vazoilam. Unchle zuttier asloleank aplea ghora to songitachi xikovnn utar piraier pasun ditalo. Hindi filmamni vazovpak taka apovnnem aslem zoim tannem modlea satthint kam kelem. Punn zorui thoim zodd bori asli, thoim apunn dhadoxi aschonam mhonn taka dislem. Atam songitant zaitoch bodol zal’lo asa, ani heram toranche prokar tantunt ghusleat ani loukikui zaleat. Rap songita vixim vicharlear Mickeybab mhonntta Rap-ant, songit thoddem punn bovall vhodd. Songitak sumell (harmony) asunk zai, oxem tachem mhonn’nnem.
Tachea bhurgeank songitachi avodd asa ani tachi ek dhuv – Christine – Amerikent ek bori gavpi zavn asa.
Mickey Correia ganvan Moiddechea Sataporia vaddeantlo ani thoinchea Doreenbaie kodde tannim satvo sakrament zoddla. Tim Mumboichea Colaba vibhagant ravpi.. Tanchem sukhi jivit sur, tals ani songitachea avazachea gunnacher revoddlolem asa. Setembrache 22ver 2011 vorsa to devadhin zalo. Hea mhan songitkarak mhozo salam.
- Isidore Dantas
