ದಿ ಮೆಂಗ್ಳೂರಿಯನ್ ವೆಲ್ಫೇರ್ ಎಸೋಸಿಯೇಶನ್ (ರಿ) ವಿದ್ಯಾವಿಹಾರ್ ಹಾಚೊ 45-ವೊ ವಾರ್ಷಿಕೋತ್ಸವ್

ಶ್ರೀ ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ ಹಾಂಕಾಂ ಶ್ರೇಷ್ಟ್ ಕೊಂಕಣಿ ಉದ್ಯಮಿ ಪ್ರಶಸ್ತಿ

ದಿ ಮೆಂಗ್ಳೂರಿಯನ್ ವೆಲ್ಫೇರ್ ಎಸೋಸಿಯೇಶನ್ (ರಿ) ವಿದ್ಯಾವಿಹಾರ್ ಹ್ಯಾ ಸಂಸ್ಥ್ಯಾನ್ ಆಪ್ಲೊ 45-ವೊ ವಾರ್ಷಿಕೋತ್ಸವ್ ಡಿಸೆಂಬರ್ 2, 2018 ತಾರಿಕೆರ್ ಸಾಂಜೆಚಾ 7.00 ವರಾರ್ ಸಾಂ ಜೂಡ್ ಇಗರ್ಜೆಚಾ ಉಗ್ತೆಂ ಮೈದಾನ್, ಜೆರಿಮೆರಿ, ಮುಂಬಯ್ ಹಾಂಗಾಸರ್ ವ್ಹಡಾ ದಬಾಜ್ಯಾನ್ ಆಚಾರಣ್ ಕೆಲೊ.

45-ವ್ಯಾ ವಾರ್ಷಿಕೋತ್ಸವಾಚೊ ಅಂಗ್ ಜಾವ್ನ್ ಮಟ್ವೆಂ ವೆಧಿಚೆಂ ಕಾರ್ಯೆಂ ಆಸಾ ಕೆಲ್ಲೆಂ. ಮುಖೆಲ್ ಸಯ್ರೆ ಜಾವ್ನ್ ಶ್ರೀ ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ ಆನಿ ಕೊಂಕ್ಣಿ ಕಾರ್ಯಕರ್ತ್ ಆನಿ ಉದ್ಯಮಿ ಶ್ರೀ ವಾಲ್ಟರ್ ಡಿ’ಸೋಜಾ, ಜೆರಿಮೆರಿ ಹಾಣಿಂ ವೆಧಿಚೆರ್ ಬಸ್ಕಾ ಘೆತ್‍ಲ್ಲಿ.  ಸಂಸ್ಥ್ಯಾಚೊ ಅಧ್ಯಕ್ಷ್ ಶ್ರೀ ಲೋರೆನ್ಸ್ ಡಿ’ಸೋಜಾ-ಕಮಾನಿ, ಉಪಾಧ್ಯಕ್ಷ್ ಶ್ರೀ ವಿನ್ಸೆಂಟ್ ಕಸ್ತೆಲಿನೊ, ಜೆರಾಲ್ ಕಾರ್ಯಾದರ್ಶಿ ಲಿಯೊ ಫೆರ್ನಾಂಡಿಸ್, ಜೆರಿಮೆರಿ ಆನಿ ಖಜನ್ಧಾರ್ ಶ್ರೀ ರೋಬರ್ಟ್ ಕ್ವಾಡ್ರಸ್ ಹಾಣಿಂ ವೆಧಿಚೆರ್ ತಾಂಕಾಂ ಸಾಂಗಾತ್ ದಿಲ್ಲೊ. ಹ್ಯಾ ಸಂಧರ್ಬಾರ್ ಮುಖೆಲ್ ಸಯ್ರೊ, ಮೋಡೆಲ್ ಬೇಂಕಾಚೊ ಆನಿ ಆಲ್ಡೆಲ್ ಟ್ರಸ್ಟಾಚೊ ಅಧ್ಯಕ್ಷ್, ಪ್ರಿಂಟಾನಿಯಾ ಖಾತೆಚೊ ಶ್ರೀ ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ ಹಾಂಕಾಂ ಸಂಸ್ಥ್ಯಾ ತರ್ಫೆನ್ ’ಶ್ರೇಷ್ಟ್ ಕೊಂಕಣಿ ಉದ್ಯಮಿ’ ಪ್ರಶಸ್ತಿ ಜಾವ್ನ್ ಮಾನ್ ಪತ್ರ್, ಪುಲಾಂ, ಫಳಾಂ, ಶೋಲ್ ಆನಿ ಉರ್ಮಾಲ್ ಬಸೊವ್ನ್ ಸನ್ಮಾನ್ ಕೆಲೊ.

‘

ಆಮಿ ಜೆ ಕಿತೆಂ ಆಮ್ಚೆ ಖಾತಿರ್ ಕರ್ತಾಂವ್ ತೆಂ ಆಮ್ಚೆ ಸಾಂಗಾತಾಚ್ ವ್ಹೆತಾ; ಪುಣ್ ಜೆ ಕಿತೆಂ ಹೆರಾಂ ಖಾತಿರ್ ಕರ್ತಾಂವ್ ತೆಂ ಹಾಂಗಾಸರ್ ಶಾಸ್ವಿತ್ ಉರ್ತಾ. ದಿ ಮೆಂಗ್ಳೂರಿಯನ್ ವೆಲ್ಫೇರ್ ಎಸೋಸಿಯೇಶನ್ ಎಕ್ ಸಂಸ್ಥೊ ಗೆಲೆತ್ಯಾ 45 ವರ‍್ಸಾಂ ಥಾವ್ನ್ ಕೊಂಕ್ಣಿ ಭಾಸೆಚಾ ಉದರ್ಗತಿ ಖಾತಿರ್ ಅಸಲೊ ನಿರಂತರ್ ವಾವ್ರ್ ಕರ್ನ್ ಆಸಾ’ ಮ್ಹಣೊನ್   ಶ್ರೀ ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾನ್ ಸಂಸ್ಥ್ಯಾಚಾ ಕಾಮಾಂ ವಿಶಿಂ ಶಾಬಾಸ್ಕಿ ದಿಲಿ.   ಥೊಡ್ಯಾ ವರ್ಸಾಂ ಆಧಿಂ ತಾಣೆಂ ಕೊಂಕ್ಣಿ ಭುರ್ಗ್ಯಾಂಕ್ ತಾಂತ್ರಿಕ್ ಶಿಕಾಪ್ ಲಾಭಾಶೆಂ ಕರುಂಕ್ ಬೊರಿವ್ಲಿಂತ್ ತಾಂತ್ರಿಕ್ ಕೊಲೆಜಿಚಿ ಸುರ‍್ವಾತ್ ಕೆಲ್ಲಿ ಆನಿ ಉಪ್ರಾಂತ್ ತಾಣೆ ಫಾಲ್ಘಾರಾಂತ್ (ಮಹಾರಾಷ್ಟ್ರ) ಆಸಾ ಕೆಲ್ಲ್ಯಾ ಶಿಕ್ಪಾ ಸಂಕುಲಾ ವಿಶಿಂ ಮ್ಹಾಹೆತ್ ದಿಲಿ. ಆನಿ ಬೇಂಕಾ ವಿಶಿಂ ಉಲವ್ನ್, ಮೋಡೆಲ್ ಕೋ-ಓಪರಟಿವ್ ಬೇಂಕ್ ಸದ್ದ್ಯಾಕ್ ಎಕ್ ಶೆಡ್ಯೂಲ್ಡ್ ಬೇಂಕ್ ಜಾಂವ್ಚಾರ್ ಆಸಾ ಮ್ಹಣೊನ್ ಸಾಂಗ್ತಾನಾ ಹಾಜಿರ್ ಆಸ್‍ಲ್ಲ್ಯಾ ಪ್ರೇಕ್ಷಕಾನಿಂ ತಾಳಿಯ್ಯಾಂಚಾ ಶಿಂವೊರಾನ್ ಆಪ್ಲೊ ಸಂತೊಸ್ ವ್ಯಕ್ತ್ ಕೆಲೊ. ಪ್ರಸ್ತುತ್ ತೊ ಮೋಡೆಲ್ ಕೋ-ಓಪರಟಿವ್ ಬೇಂಕಾಚೆ ಅಧ್ಯಕ್ಷ್ ಜಾವ್ನಾಸಾ.

ವಾರ್ಷಿಕೋತ್ಸವಾಚೊ ಸ್ಮಾರಕ್ ಪುಸ್ತಕ್ ಹ್ಯಾ ಸಂದರ್ಭಿ ವಿಮೋಚನ್ ಕೆಲೊ.

ಶಾಂತಿ ಒಲಿವೆರಾ ಯೊಗಾ ಪ್ರದರ್ಶನ್ ಕರ್ತಾನಾ.

ಸುರ್ವೆರ್ ಶ್ರೀ ಲೋರೆನ್ಸ್ ಡಿ’ಸೋಜಾ-ಕಮಾನಿನ್ ವೆಧಿಚೆರ್ ಆಸ್‍ಲ್ಲ್ಯಾ ಸಯ್ರಾಚಿಂ ವಳಕ್ ಕರ್ನ್ ದಿವ್ನ್, ಸರ್ವಾಂಕ್ ಸ್ವಾಗತ್ ಮಾಗೊನ್, ಸಯ್ರಾಂಕ್ ಪುಲಾಂ ತುರೆ ದಿವ್ನ್ ಮಾನ್ ಕೆಲೊ. ವಿವಿಧ್ ಶೆತಾನಿಂ ಉತ್ತಿಮ್ ಅಂಕ್ ಘೆವ್ನ್ ಉತ್ತಿರ್ಣ್ ಜಾಲ್ಲ್ಯಾ ವಿಧ್ಯಾರ್ಥಿಂಕ್ ಪ್ರತಿಭಾ ಪುರಸ್ಕಾರ್ ದಿವ್ನ್ ಸನ್ಮಾನ್ ಕೆಲೊ.

ಸಾಂಗಾತಾಚ್ ಶ್ರೀ ರುಡೊಲ್ಫ್ ರೆಬೆಲ್ಲೊ (ಸಂಸ್ಥ್ಯಾಚೊ ಮಾಜಿ ಅಧ್ಯಕ್ಷ್), ಶ್ರೀ ಲೊರೆನ್ಸ್ ಕುವೆಲ್ಲೊ (ಸಂಪಾದಕ್ ’ದಿವೊ” ಹಪ್ತ್ಯಾಳೆಂ),  ಶ್ರೀ ಕ್ಲೆಮೆಂಟ್ ಲೋಬೊ, ಶ್ರೀಮತಿ ಬೆನೆದಿಕ್ಟಾ ರೆಬೆಲ್ಲೊ (ದೊಗಾಂಯ್ ಮೋಡೆಲ್ ಕೊ-ಓಪರೇಟೀವ್ ಬೇಂಕ್ ಹಾಚಿಂ ದಿರೆಕ್ತೊರ್), ಶ್ರೀ ಬ್ಲ್ಯಾನಿ ಡಿ’ಕೋಸ್ಟಾ (ಗಾಯಕ್), ಶ್ರೀಮತಿ ದೆವಿಕಾ ಮೊಂತೆರೊ (ಗಾಯಕಿ), ಶ್ರೀಮತಿ ಶಾಂತಿ ಒಲಿವೆರಾ, (ಯೊಗಾ), ಶ್ರೀಮತಿ ಶಾಂತಿ ಬಾರ್ಬೊಜ಼ಾ, ಶ್ರೀ ಗ್ರೆಗರಿ ನಿಡ್ಡೊಡಿ, ಶ್ರೀಮತಿ ಫ಼್ಲೊರಾ ಡಿ’ಸೋಜಾ, ಕಲ್ಮಾಡಿ, ( ಸರ್ವ್ ನಾಟಕ್ ಕಲಾಕಾ,ರಾಂ) ಶ್ರೀ ಲಿಬರ್ಟ್ ಒಲಿವೆರಾ (ಫಿಲ್ಮ್ ನಟ್), ಶ್ರೀ ರೆಜಿನಾಲ್ಡ್ ಸಾಂತುಮಾಯೆರ್, ಶ್ರೀಮತಿ ಬೆನೆದಿಕ್ಟಾ ನಜರೆತ್, ಶ್ರೀಮತಿ ಫಿಲೊಮೆನಾ ರೆಬೆಲ್ಲೊ, ಶ್ರೀಮತಿ ಐರಿನ್ ಮಥಾಯಸ್ ಹಾಂಕಾಂ ತಾಣಿಂ ತಾತಾಂಚಾ ಕ್ಷೇತ್ರಾಂತ್  ದಿಲ್ಲ್ಯಾ ಊಂಚ್ಲ್ಯಾ ಸೆವೆ ಖಾತಿರ್ ಫುಲಾಂಚೆ ತುರೆ ದಿವ್ನ್ ಮಾನ್ ಕೆಲೊ.

ಹ್ಯಾ ಸಂಧರ್ಬಾರ್ ಮನೋರಂಜನಾಚೊ ವಾಂಟೊ ಜಾವ್ನ್ ಸಾಂದ್ಯಾಚ್ಯಾ ಭುರ್ಗ್ಯಾಂ ಥಾವ್ನ್ ಪದಾಂ ಆನಿ ನಾಚ್ ಆಸಾ ಕೆಲ್ಲೆ. ಕುಮಾರಿ ಐನಿಶ್ ಮಥಾಯಸಾನ್ ನಾಚಾ ದ್ವಾರಿಂ ಕಾರ್ಯಾಚಿ ಸುರ್ವಾತ್ ಕೆಲಿ. ಮಿರಾ ರೋಡ್ ಥಾವ್ನ್ ಆಯಿಲ್ಲ್ಯಾ ಶ್ರೀಮತಿ ಶಾಂತಿ ಒಲಿವೆರಾ ಹಿಣೆಂ ಯೊಗಾ ಮಾರಿಫಾತ್ ಲೊಕಾಕ್ ಬಲಾಯ್ಕಿ ಸಾಂಭಾಳುಂಕ್ ಉಲೊ ದಿಲೊ ಆನಿ ಯೋಗಾಚಿಂ ಸಬಾರ್ ಆಸನಾಂ ಕರ್ನ್ ದಾಕಯ್ಲಿಂ.  ವಸಯ್ ಥಾವ್ನ್ ಆಯಿಲ್ಲ್ಯಾ ಕಲಾಕಾರಾನಿಂ ‘ಚಾವಿ’ ಮ್ಹಳ್ಳೊ ನಾಟ್ಕುಳೊ ಖೆಳವ್ನ್ ದಾಕಯ್ಲೊ.  ತಾಂತುಂ ರೆಜಿನಾಲ್ಡ್ ಸಾಂತುಮಾಯೆರ್, ಆಲ್ಬರ್ಟ್ ಡಿ’ಕೊಸ್ಟಾ, ಹೆನ್ರಿ ಪಿಂಟೊ, ಹಿಲ್ಡಾ ಡಿ’ಸೋಜಾ ಆನಿ ಲೊರೆನ್ಸ್ ಡಿ’ಕೊಸ್ಟಾ ಹಾಣಿಂ ಭಾಗ್ ಘೆತ್‍ಲ್ಲೊ. ಶ್ರೀಮತಿ ದೆವಿಕಾ ಆನಿ ಶ್ರೀ ಬ್ಲಾನಿ ಡಿ’ಕೊಸ್ಟಾ, ಡೊಕ್ಟರ್ ರೊಶ್ನಿ ಕ್ರಾಸ್ಟಾ, ಮಾನ್ಯುವೆಲ್ ಫೆರ್ನಾಂಡಿಸ್ ಆನಿ ಹೆರಾಂನಿ ಆಪ್ಲ್ಯಾ ಸುಮಧುರ್ ತಾಳ್ಯಾನಿ ಪ್ರೇಕ್ಷಕಾಂಕ್ ಬಸ್‍ಲ್ಲೆ ಥಂಯ್ ಧಲಾಶೆಂ ಕೆಲೆಂ. ಕಾರ್ಯಾಕ್ರಮ್ ವೆಳಾರ್ ಸುರ್ವಾತ್ ಜಾಲೆಂ ಆನಿ ಸರ್ವಾಂಕೀ ರುಚ್ಲೆಂ.

ಶ್ರೀ ಲೊರೆನ್ಸ್ ಡಿ’ಸೋಜಾ, ಕಮಾನಿ ಆನಿ ಶ್ರೀ ಲಿಯೊ ಫೆರ್ನಾಂಡಿಸ್ ಹಾಣಿಂ ಉತ್ತಿಮ್ ರಿತಿರ್ ಕಾರ್ಯಾ ನಿರ್ವಾಹಣ್ ಕೆಲೆಂ. ಶ್ರೀ ರೊಬರ್ಟ್ ಕ್ವಾಡ್ರಸಾನ್ ವಂದಿಲೆಂ.