ವಾಲ್ಟರ್ ಡಿ’ಸೋಜಾ, ಜೆರಿಮೆರಿ
ಶ್ರೀ ವಾಲ್ಟರ್ ಡಿ’ಸೋಜಾ, ಜೆರಿಮೆರಿ
ಎಕ್ ಬೋವ್ ಸಮಾಧಾನಿ, ಸದಾಂಚ್ ಹಾಸ್ತ್ಯಾ ತೋಂಡಾಚೊ, ದಡಂಗ್ ಜಿವಾಚೊ, ಖಂಚಾಯ್ ಸಂಸ್ಥ್ಯಾಚೆಂ ಕಸಲೇಂಯ್ ಲ್ಹಾನ್-ವ್ಹಡ್ ಕಾಮ್ ಸಂತೋಸಾನ್ ತಿರ್ಸುಂಚೊ ಕೊಣೀ ವ್ಯಕ್ತಿ ಆಸಾ ತರ್ ತೊ ಜಾವ್ನಾಸಾ ಜೆರಿಮೆರಿಚೊ ಶ್ರೀ ವಾಲ್ಟರ್ ಡಿ’ಸೋಜಾ. ತೊ ಸಬಾರ್ ಸಂಘ್-ಸಂಸ್ಥ್ಯಾಂನಿ ಸಕ್ರೀಯ್ ವಾವ್ರ್ ದೀವ್ನ್ ಆಸೊನ್, ತಾಕಾ ವಳ್ಕಾನಾತ್‌ಲ್ಲೊ ಕೊಣೀ ಆಸ್ಚೊ ನಾ. ನಾಂವಾಕ್ ಜಾಂವ್ ಯಾ ಪದ್ವೆಕ್ ತೊ ಕೆದಳಾಯ್ ಆಶೆಲ್ಲೊ ನಾ ಹೆಂ ತಾಕಾ ಜಾಣಾ ಆಸ್‌ಲ್ಲೆ ಇನ್ಕಾರ್ ಕರ್ಚೆ ನಾಂತ್. ತಾಚೆ ವಿಶಿಂ ದೋನ್ ಸಬ್ದ್ ಬರವ್ನ್, ಮಟ್ವ್ಯಾನ್ ತಾಚಿ ಪರಿಚಯ್ ಕರ್ನ್ ದೀಂವ್ಕ್ ಮ್ಹಾಕಾ ವ್ಹರ್ತೊ ಸಂತೊಸ್ ಭಗ್ತಾ.
ಉಡ್ಪಿ ಲಾಗ್ಸಾರ್ ಆಸ್ಚ್ಯಾ ಕಲ್ಮಾಡಿಂತ್ 1961 ಇಸ್ವೆಂತ್ ಜೂನಾಚಾ 4 ತಾರೀಕೆರ್ ಶ್ರೀ ಫ್ರಾನ್ಸಿಸ್ ಡಿ’ಸೋಜಾ ಆನಿ ಶ್ರೀಮತಿ ಲಿಲ್ಲಿ ಡಿ’ಸೋಜಾ ಹಾಂಚಾ ದುಬ್ಳ್ಯಾ ಘರಾಣ್ಯಾಂತ್, ತಾಂಚ್ಯಾ ಚಾರ್ ಜಣಾಂ ಭುರ್ಗ್ಯಾಂ ಪಯ್ಕಿ ದುಸ್ರೊ ಜಾವ್ನ್ ತಾಚೊ ಜಲ್ಮ್ ಜಾಲೊ. ಸಾತ್ವಿ ಮ್ಹಣಾಸರ್ ತಾಚೆಂ ಶಿಕಾಪ್ ಆದಿ ಉಡುಪಿಂತ್ ಸಂಪ್ತಚ್, ಗರಿಬ್‌ಪಣಾಕ್ ಲಾಗೊನ್ ತಾಕಾ ಅಪ್ಲ್ಯಾ ತೆರಾ ವರ್ಸಾಂಚಾ ತರ್ನ್ಯಾ ಪ್ರಾಯೆರ್‌ಚ್ ಮುಂಬಯ್‌ಚಿ ವಾಟ್ ಧರುಂಕ್ ಪಡ್ಲಿ. ಪುಣ್ ತೊ ನಿರಾಸ್ಲೊ ನಾ. ತಾಕಾ ಜಿಣ್ಯೆಂತ್ ಕಿತೆಂ ತರೀ ಜಾಂವ್ಕ್ ಆಸ್‌ಲ್ಲೆಂ. ಥೊಡೊ ತೇಂಪ್ ಕೊಲಾಬಾಂತ್ಲ್ಯಾ ಆಪ್ಲ್ಯಾ ಆಕಯ್ಚಾ ಘರಾ ತೊ ರಾವ್ಲೊ ಆನಿ ದಿಸಾಚೆಂ ಕಾಮ್ ಕರ್ನ್ ರಾತಿಚೆಂ ಶಿಕಾಪ್ ಮುಂದರ್ಸುಂಕ್ ಸೈಂಟ್ ಕ್ಸೇವಿಯರ್ ಇಸ್ಕಲಾಕ್ ತೊ ಭರ್ತಿ ಜಾಲೊ. ‘ಸಾಧಿಸಿದರೆ ಸಬಳ ನುಂಗ ಬಹುದು’ ಮ್ಹಳ್ಳೆ ಪರಿಂ ತಾಣೆಂ ಆಪ್ಲೆಂ ಸಾಧನ್ ಸೊಡ್ಲೆಂ ನಾಂ. ಅಶೆಂ 1982 ಇಸ್ವೆಂತ್ ತಾಣೆಂ ಆಪ್ಲ್ಯಾ ಪುಡಾರಾಚೊ ಬುನ್ಯಾಧಿ ಫಾತೊರ್ ಘಾಲೊ.
1984 ಇಸ್ವೆಂತ್ ತಾಣೆಂ ಅಪ್ಲ್ಯಾ ಸ್ವತಾಚೆಂ ದುಕಾನ್ ‘ಡಿ’ಸೋಜಾ ಇಲೆಕ್ಟ್ರೊನಿಕ್ಸ್’ ಹಾಚಿ ಸುರ್ವಾತ್ ಕೆಲಿ. ಸರ್ವ್ ಥರಾಚೆ ಇಲೆಕ್ಟ್ರೊನಿಕ್ ವಸ್ತುಂಚೆ ರಿಪೇರ್ ಶೋಪ್ ಬರೆಂಚ್ ಚಲೊಂಕ್ ಸುರು ಜಾಲೆಂ. ಸಂಸಾರ್ ವ್ಹಡ್ ಎಕ್ ಕೋಲೆಜ್. ಹ್ಯಾ ಸಂಸಾರಾಂತ್ ಆನ್ಭೋಗ್ ಜಾವ್ನಾಸಾ ಡಿಗ್ರಿ ಆನಿ ತೊ ಆನ್ಭೋಗ್ ತಾಚೆ ಲಾಗಿಂ ಬರ್ಪೂರ್ ಮಾಫಾನ್ ಆಸ್‌ಲ್ಲೊ. ತಾಚೊ ತಾಣೆಂ ಬರೊ ವಾಪಾರ್ ಕೆಲೊ ಆನಿ ಪ್ರತಿಪಳ್ ಜಾವ್ನ್ ‘ವಿಲ್ಮಾ ಇಲೆಕ್ಟ್ರೊನಿಕ್ಸ್’ ವಿಡಿಯೊ ಕೆಸೆಟ್ ಲೈಬ್ರೆರಿಚಿ ಸುರ್ವಾತ್. ಹೆಂ ದುಕಾನ್ ಜೆರಿಮೆರಿಂತ್ ಉಣ್ಯಾ ಆವ್ದೆ ಭಿತರ್ ಬರೆಂಚ್ ನಾಂವಾಡ್ಧೀಕ್ ಜಾಲೆಂ. ದಂದ್ಯಾಂತ್ ಯಶಸ್ವ್ ಜಾಂವ್ಕ್ ಮನ್ಸಾಕ್ ಕೋಲೆಜಿಂಚ್ಯಾ ಡಿಗ್ರಿಂಚಿ ಗರ್ಜ್ ಪಡನಾ ಹೆಂ ವಾಲ್ಟಾರ್‌ ಬಾಬಾನ್ ರುಜು ಕೆಲಾಂ. ‘ಕಾಲಕ್ಕೆ ತಕ್ಕಂತ್ತೆ ಕೋಲ ಕಟ್ಟ ಬೇಕು’ ಮ್ಹಳ್ಳ್ಯಾ ಸಾಂಗ್ಣೆಂ ಪರಿಂ, 1984 ಇಸ್ವೆಂತ್ ತಾಣೆಂ ಎಕ್ ಆಥ್ವೊಚ್ ದಂದೊ ಸುರು ಕೆಲೊ. ತೊ ಜಾವ್ನಾಸ್ಲೊ ಟಿ. ವಿ. ಆನಿ ವಿ. ಸಿ. ಆರ್ ವಿಡಿಯೊ ಕೆಸೆಟಿ ಸಾಂಗಾತಾ ಬಾಡ್ಯಾಕ್ ದಿಂವ್ಚೊ! ಇತ್ಲ್ಯಾ ಘಂಟ್ಯಾಂಕ್ ಇತ್ಲೆ ಪಯ್ಶೆ! ತೆಂಯೀ ನಗದ್ ಆನಿ ಎಡ್ವಾನ್ಸ್! ಹೊ ದಂದೊ ತ್ಯಾ ಕಾಳಾರ್ ಇತ್ಲೊ ಪ್ರಭಾವಿತ್ ಆನಿ ಲೋಕಾಮೊಗಾಳ್ ಜಾಲ್ಲೊ ಸಾಂಗ್ಚೆಂ ನಹಿಂ. ಎಕಾ ಘರ್ಚಾಂಕ್ ಪರ್ವಡಾನಾ ತರ್ ಹೆರಾಂ ಸಾಂಗಾತಾ ಭಾಗಿದಾರಿಂತ್ ಟಿ. ವಿ. ಆನಿ ವಿ. ಸಿ. ಆರ್. ಘೆವ್ನ್ ತಾಚೆ ಸಾಂಗಾತಾ ತ್ಯಾಚ್ ಹಪ್ತ್ಯಾಂತ್ ರಿಲಿಜ್ ಜಾಲ್ಲ್ಯಾ ನವ್ಯಾ ಪಿಕ್ಷರಾಚಿ ವಿಡಿಯೊ ಕೇಸೆಟ್ ಘೆವ್ನ್, ಆಪ್ಲ್ಯಾಚ್ ಘರ್ಚಾ ಸಾಲಾಂತ್, ಕುಟ್ಮಾ ಸಮೇತ್ ಪಿಕ್ಷರ್ ಪಳೆಂವ್ಚೆಂ ಫೇಶನ್ ಜಾಲ್ಲೆಂ! ಪರಿಣಾಮ್ ವಾಲ್ಟರ್ ಬಾಬಾಕ್ ಎಕಾ ಮಿನುಟಾಚಿ ಪುರ್ಸತ್ ಮೆಳಾನಾತ್‌ಲ್ಲಿ.
ಆಶೆಂ ಜಿಣ್ಯೆಂತ್ ಯಶ್ ಚಾಕ್‌ಲ್ಲ್ಯಾ ವಾಲ್ಟರ್ ಬಾಬಾನ್ ಅಜೂನ್ ಪಾಟಿಂ ಪಳೆಲ್ಲೆಂ ನಾ. ತ್ಯಾ ಘಡಿಯೆ ಥಾವ್ನ್ ತಾಚಾ ಜಿಣ್ಯೆಚೆಂ ‘ಗ್ರಾಫ್’ ವಯ್ರ್ ಚಡೊಂಕ್ ಲಾಗ್‌ಲ್ಲೆಂ. ಪುಣ್ ತೊ ತಿತ್ಲ್ಯಾರ್ ವ್ಹಗೆ ಬಸ್ಲೊ ನಾ. 1989 ಇಸ್ವೆಂತ್ ಮುಂಬಂಯ್ತ್ ಕೇಬಲ್ ಟಿವಿ-ಚೊ ಉದ್ಭವ್ ಜಾಲೊ. ಎದ್ದೊಳ್ ಮ್ಹಣಾಸರ್ ಟಿ. ವಿ. ಆನಿ ವಿ. ಸಿ. ಆರ್. ಬಾಡ್ಯಾಕ್ ದಿಂವ್ಚೆಂ ಹ್ಯಾ ಕೇಬಲಾ ಮಾರಿಫಾತ್ ಬಂಧ್ ಜಾಲೆಂ. ಏಕ್ ಕಂಟ್ರೋಲ್ ರೂಮಾ ಥಾವ್ನ್ ಟಿ.ವಿ. ಸಿಗ್ನಲ್ ಘರಾಂ-ಘರಾಂನಿ ಕೇಬಲಾ ಮಾರಿಫಾತ್ ಫಾವೊಂಕ್ ಸುರು ಜಾಲೆಂ. ವಾಲ್ಟರ್ ಬಾಬಾನ್ ‘ಆಶ್ವಿನಿ ಕೇಬಲ್ ವಿಜನ್’ ನಾಂವಾಚಿ ಕೇಬಲ್ ವಿತರಣ್ ಸಂಸ್ಥ್ಯಾಚಿ ಸುರ್ವಾತ್ ಕೆಲಿಚ್! ಆಜ್ ಹೊ ಸಂಸ್ಥೊ ಜೆರಿಮೆರಿ-ಸಾಕಿನಾಕಾ ಇಲಾಖ್ಯಾಂತ್ ಬರೊಚ್ ಲೋಕಾಮೊಗಾಳ್ ಜಾಲಾ. ಸುರ್ವೆರ್ ದಿಸಾಕ್ ಎಕ್ ಪಿಕ್ಷರ್ ಮ್ಹಣ್ ಸುರು ಜಾಲ್ಲೊ ಹೊ ದಂದೊ ಆಜ್ ಟಾಟಾ, ವಿಡಿಯೊಕೊನ್ ಆನಿ ಏಯರ್‌ಟೆಲ್ ತಸಲ್ಯಾ ಕಂಪೆನಿಂಕ್ ಅಪ್ಲೆ ಖುಶಿನ್ ವೊಡುಂಕ್ ಸಕ್ಲಾ.
1989 ಇಸ್ವೆಂತ್ ಜಾಲ್ಲ್ಯಾ ಹ್ಯಾ ದಂದ್ಯಾಂತ್ ಬರೆಚ್ ಜಣ್ ಕೇಬಲ್ ಒಪರೇಟರ್ ಆಸೊನ್, ಬರೊಚ್ ಸ್ಪರ್ಧ್ ಆಸ್‌ಲ್ಲೊ. ಎಕಾ ಇಲಾಖ್ಯಾಂತ್ ಆನ್ಯೇಕಾ ಇಲಖ್ಯಾಚೊ ಜರ್ ತರ್ ಘುಸ್ಲೊ ಥಂಯ್ಸರ್ ಮಾರ್-ಝಗ್ಡೆಂ ಜಾಂವ್ಚೆಂ ಸದಾಂಚೆಂ ಜಾಲ್ಲೆಂ. ಪುಣ್ ಹ್ಯಾ ಸರ್ವ್ ಖೆಳಾಕ್ 1992 ಇಸ್ವೆಂತ್ ಜಾಲ್ಲ್ಯಾ ಎಕಾ ಘಡಿತಾನ್ ಖಾಡು ಘಾಲೊ. 1992 ವರ್ಲ್ಡ್ ಕಪ್ ಸುರ್ವಾತ್ ಜಾತಾನಾ ‘ಸ್ಟಾರ್ ಟಿ.ವಿ. ಮ್ಹಣೊನ್ ಎಕಾ ಟಿ. ವಿ. ಚಾನೆಲಾಚಿ ಸುರ್ವಾತ್ ಜಾಲಿ. ಎದ್ದೊಳ್ ಮ್ಹಣಾಸರ್ ಕೇಬಲ್ ಒಪರೇಟರ್ ಆಪ್ಲ್ಯಾ ಕಂಟ್ರೋಲ್ ರೂಮಾ ಥಾವ್ನ್ ಪಿಕ್ಷರಾಂಚೆಂ ಸಿಗ್ನಲ್ ವಾಂಟುನ್ ಆಸ್‌ಲ್ಲೆ. ಪುಣ್ ಆತಾಂ ತಾಂಕಾಂ ಸ್ಟಾರ್ ಟಿ. ವಿ.-ಚೆಂ ಸಿಗ್ನಲ್ ವೋಡುಂಕ್ ವ್ಹಡ್-ವ್ಹಡ್ “ಡಿಶ್ಯಾಂ”ಚಿ ಗರ್ಜ್ ಆಸ್‌ಲ್ಲಿ. ಹಾಕಾ ಭಂಡ್ವಾಳಾಚಿ ಗರ್ಜ್ ಅಸ್‌ಲ್ಲಿ.
ದೆಕುನ್ ಲ್ಹಾನ್ ಒಪರೇಟರ್ ವ್ಹಡ್ ಒಪರೇಟಾರಾಂ ಸಾಂಗಾತಾ ಸಹಕಾರ್ ದೀಂವ್ಕ್ ಲಾಗ್ಲೆ ಆನಿ ಸಾಂಗಾತಾ ಮೆಳೊನ್ ದುಡು ಘಾಲ್ನ್ ಡಿಶ್ಶ್ಯಾಂ ಲಾವ್ನ್ ತಾಚೆಂ ಸಿಗ್ನಲ್ ವಾಂಟುಂಕ್ ಲಾಗ್ಲೆ. ಮುಕಾರ್ ವ್ಹೆತಾಂ ವ್ಹೆತಾಂ ಚಾನೆಲಾಂ ವಾಡೊಂಕ್ ಲಾಗ್ಲಿಂ ಆನಿ ಸಾಂಗಾತಾಚ್ ತಾಂಚೆಂ ಬಾಡೆಂ ವಾಡ್ಲೆಂ. ಹಾಚೊ ಪರಿಣಾಮ್ ಜಾವ್ನ್ ಎಕ್ ವ್ಹಡ್ಲಿ ಬದ್ಲಾವಣ್ ಜಾಲಿ. ‘ಸಿಟಿ ಕೇಬಲ್’ ಅನಿ ‘ಇನ್ ಮುಂಬಯ್’ ಮ್ಹಳ್ಳೆ ದೋನ್ ವ್ಹಡ್ ಕೇಬಲ್ ಡಿಸ್ಟ್ರಿ‌ಬ್ಯೂಟರ್ ಆಸ್ಥಿತ್ವಾಂತ್ ಆಯ್ಲೆ ಆನಿ ಇತರ್ ಸರ್ವ್ ಒಪರೇಟರ್ ಹ್ಯಾ ದೋನ್ ಮುಖೇಲ್ ಒಪರೇಟಾರಾಂ ಥಾವ್ನ್ ಸಿಗ್ನಲ್ ಬಾಡ್ಯಾಕ್ ಘೆವ್ನ್, ಆಪಾಪ್ಲ್ಯಾ ಇಲಾಖ್ಯಾನಿಂ ವಿತರಣ್ ಕರುಂಕ್ ಸುರ್ ಕೆಲೆಂ.
ಕೇಬಲ್ ಸೆವಾ ದಿಂವ್ಚೆ ಸಬಾರ್ ಸಂಸ್ಥೆ ಆಸಾತ್. ಪುಣ್ ಆಶ್ವಿನಿ ಕೇಬಲ್ ವಿಜನ್ ಬರಿ ಸೆವಾ ದಿತಾ ಜಾಲ್ಲ್ಯಾನ್ ತಾಂಚೊ ದಂದೊ ಬರ‍್ಯಾ ರಿತಿನ್ ಚಲಾತ್ತ್ ಆಯ್ಲಾ. ಕೇಬಲ್ ಒಪರೇಟಾರಾಂ ಮಧೆಗಾತ್ ಇಲಾಖ್ಯಾ ಖಾತಿರ್ ಆತಾಂಯೀ ಸ್ಪರ್ಧೊ ಚಲ್ತಾ ಆನಿ ಹೆಣೆಂ ತೆಣೆಂ ತಾಂಚೆಂ ಮಧೆಗಾತ್ ಘರ್ಷಣ್ ಚಲ್ತೆ ಆಸ್ತಾ. ತೆಂ ತಸಲ್ಯಾ ಧಂದ್ಯಾಂ ಸಾಂಗಾತಾ ಅನಿವಾರ್ಯ್ ವಾಂಟೊ ಜಾಲಾ.
ಕೇಬಲ್ ಸಿಗ್ನಲ್ ಚೊರಿ ಕರ್ಚೊ ಆನ್ಯೇಕ್ ಸಮಸ್ಸೊ ಜಾಲಾ. ತಶೆಂ ಜಾಯ್ನಾತ್‌ಲ್ಲೆ ಬರಿಂ ಪಳೆಂವ್ಕ್ ಪಡ್ತಾ. ಥೊಡೆ ಪಾವ್ಟಿಂ ಬಳ್ ಪ್ರದರ್ಶನ್ ಕರುಂಕ್ ಪಡ್ತಾ ತೆಂ ನಾಕಾರುಂಕ್ ಜಾಯ್ನಾಂ. ಹಾಂವ್ ಹ್ಯಾ ದಂದ್ಯಾಕ್ ಬೋವ್ ಲಾಗ್ಶಿಲ್ಯಾನ್ ಜಾಣಾಂ. ಆನಿ ಥೊಡೆ ಪಾವ್ಟಿಂ ರಾಜಕಾರಣಿ ಹ್ಯಾ ದಂದ್ಯಾಂತ್ ಯೇವ್ನ್ ತ್ರಾಸ್ ದಿಂವ್ಚೆಂ ಆಸ್ತಾ. ಅಸಾಮಾಜಿಕ್ ತತ್ವಾಂ ಥಾವ್ನ್ ವಸೂಲಿಚೆ ತ್ರಾಸ್ ಆಸ್ತಾತ್. ಖಂಯ್ಸರ್ ಗೋಡ್ ಆಸಾ ಥಂಯ್ಸರ್ ಮೂಸ್ ಯೆಂವ್ಚೆಂ ಸಹಜ್. ತರಿಕೀ ವಾಲ್ಟರ್ ಬಾಬ್ ಸಮಾಧಾನೆನ್ ಹರ್ಯೆಕಾ ಸಮಸ್ಸ್ಯಾಕ್ ಪರಿಹಾರ್ ಜೊಡ್ತಾ ಆನಿ ಸರ್ವಾಂಕ್ ಜಾಯ್ ಜಾಲ್ಲೆ ತಸಲೊ ವ್ಯಕ್ತಿ ಜಾಂವ್ಕ್ ಪಾವ್ಲಾ.
ತೊ ಎಕ್ ಇತ್ಲೊ ಮಿನ್ಹತಿ ಆನಿ ಬಿಜೀ ಮನಿಸ್ ತರೀ ಸಮಾಜ್ ಸೆವೆಂತ್ ತೊ ಬರೊಚ್ ವೇಳ್ ಖರ್ಚಿತಾ. ಫಿರ್ಗಜೆಚಾ ಸರ್ವ್ ಚಟುವಟಿಕೆನಿಂ ತೊ ಕಾರ್ಯಾಳ್ ಆನಿ ಕ್ರಿಯಾತ್ಮಕ್ ಪಾತ್ರ್ ಖೆಳ್ತಾ. 1990 ಇಸ್ವೆಂತ್ ಸದ್ದಾಮ್ ಹುಸೈನಾಚಾ ಕರ್ತುಬಾಂಕ್ ಬಲಿ ಜಾಲ್ಲೊ ಲೋಕ್ ಮುಂಬಯ್ ಏರ್ ಪೊರ್ಟಾಂತ್ ಅಯಿಲ್ಲೆ ತೆದಳಾ ರೆ| ಫಾ| ವಾಲ್ಟರ್ ಪಿಂಟೊ ಸಾಂಗಾತಾ ತಾಣೆ ಬರೊಚ್ ವಾವ್ರ್ ಕೆಲ್ಲೊ. ಜೆರಿಮೆರಿ ಇಗರ್ಜ್ ಆನಿ ಇಸ್ಕಾಲ್ ಬಾಂದ್ತಾನಾ ತಾಣೆ ಕೆಲ್ಲಿ ಸೆವಾ ಸಕ್ಕಡ್ ಪಳೆವ್ನ್ ಜಾಣಾಂತ್. 2001 ಇಸ್ವೆಂತ್ ಇಗರ್ಜೆಚಾ ಬಾಂದ್ಪಾಕ್ ಆದಾರ್ ಜಾವ್ನ್ ಆಕ್ಟೊಬರ್ 11 ತಾರಿಕೆರ್ ಕೊಂಕ್ಣಿ ನಾಯ್ಟ್ ಆನಿ 10 ತಾರೀಕೆರ್ ತುಳು ನಾಯ್ಟ್ ಆನಿ ನಾಟ್ಕುಳೊ ಸಾಧರ್ ಕರ್ನ್ ದುಡು ಜಮೊ ಕೆಲ್ಲಿ ಕೀರ್ತ್ ತಾಂಕಾಂ ಫಾವೊ ಜಾತಾ. ನಾಂವಾಕ್ ಅಶೆನಾಸ್ತಾನಾ ಪಕತ್ತ್ ಸಮಾಜಿ ಖಾತಿರ್ ವಾವ್ರ್ ಕರ್ಚೆ ಬಾರೀ ವಿರಳ್. ತಾಂಚೆ ಪಯ್ಕಿ ಶ್ರೀ ವಾಲ್ಟರ್ ಡಿ’ಸೋಜಾ ಎಕ್ಲೊ ಜಾವ್ನಾಸಾ. ತೊ ಜೆರಿಮೆರಿ ಪಿರ್ಗಜೆಚಾ ಫಾಯ್ನಾನ್ಸ್ ಕಮಿಟಿ ಆನಿ ಸ್ಕೂಲ್ ಕಮಿಟಿಚೆ ಸಾಂದೊ ಜಾವ್ನ್ ವಾವ್ರ್ ದೀವ್ನ್ ಆಯ್ಲಾ.
ಮಹಾರಾಷ್ಟ್ರ ಕೊಂಕಣ್ ಎಸೋಸಿಯೇಶನಾನ್ ಮೊಂತಿ ಫೆಸ್ತ್ ಆಚಾರಣ್ ಕರ್ಚಾಂತ್ ಶ್ರೀ ವಾಲ್ಟರ್ ಬಾಬಾಚೊ ಬರೊಚ್ ಹಾತ್ ಆಸಾ. ಆನಿ ಆಜ್ ಮೊಂತಿ ಫೆಸ್ತ್ ಅಖ್ಖ್ಯಾ ಮುಂಬಂಯ್ತ್ ಆಚಾರಣ್ ಕರ್ತಾತ್ ತರ್ ತಾಚೆ ಪಾಟ್ಲ್ಯಾನ್ ಮಹಾರಾಷ್ಟ್ರ ಕೊಂಕಣ್ ಎಸೋಶಿಯೇಶನಾಚೊ ಇಲ್ಲೊ ತರೀ ವಾವ್ರ್ ಆಸಾ.
ಮಾರ್ಚ್ 17, 2001 ಇಸ್ವೆಂತ್ ಮಹಾರಾಷ್ಟ್ರ ಕೊಂಕಣ್ ಎಸೋಸಿಯೇಶನ್ ದ್ವಾರಿಂ ಸಾಧರ್ ಜಾಲ್ಲ್ಯಾ ಕೊಂಕ್ಣಿ ಸಹಮಿಲಾನಾಕ್ ವಾಲ್ಟರ್ ಬಾಬ್ ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಜಾಲ್ಲೆ. ತ್ಯಾ ದೀಸ್ ಕೊಂಕ್ಣಿಂ ವಿಶಿಂ ಪ್ರಭಾವಿತ್ ಜಾಲ್ಲೆ ತೆ ಆಜ್ ಮ್ಹಣಾಸರ್ ಕೊಂಕ್ಣಿ ಸಂಸ್ಥ್ಯಾನಿಂ ಖಳಾನಾಸ್ತಾನಾ ವಾವ್ರ್ ದೀವ್ನ್ ಆಸಾತ್. ಆತಾಂ ತೆ ಮಹಾರಾಷ್ಟ್ರ ಕೊಂಕಣ್ ಎಸೋಸಿಯೇಶನ್ ಸಂಸ್ಥ್ಯಾಚೆ ಅಧ್ಯಕ್ಷ್ ಜಾವ್ನ್ ಸೆವಾ ದಿತೇ ಆಸಾತ್.
ಲ್ಹಾನ್-ವ್ಹಡ್ ಖಂಚೆಂಯ್ ಕಾಮ್ ತೆಂ ಜಾಂವ್ದಿ ‘ಹಾಂವ್ ಆಸಾಂ ನೈಂವೇ’ ವಾಲ್ಟರ್ ಬಾಬಾಚಿ ಜಾಪ್ ತಯಾರ್. ಆನಿ ತಾಣಿಂ ಹಾಂವ್ ಆಸಾಂ ಮ್ಹಳ್ಯಾರ್ ತ್ಯಾ ಕಾಮಾ ವಿಶಿಂ ಹೆರಾನಿಂ ತಕ್ಲಿ ಹುನ್ ಕರ್ಚಿ ಗರ್ಜ್ ಪಡಾನಾ. ಸಬಾರ್ ವರ್ಸಾಂ ಥಾವ್ನ್ ತೊ ಕೊಂಕಣಿ ಬಾಷಾ ಮಂಡಳ್ ಮಹಾರಾಷ್ಟ್ರ ಹಾಚೊ ಖಜನ್ದಾರ್ ಜಾವ್ನ್ ವಾವ್ರ್ ದಿವ್ನ್ ಆಯ್ಲಾ. ಕೊಂಕಣಿ ಸಭಾ, ಮುಲುಂಡ್ ಹ್ಯಾ ಸಂಸ್ಥ್ಯಾಂತ್ ತೆ ಕ್ರಿಯಾತ್ಮಕ್ ಪಾತ್ರ್ ಖೆಳೊನ್ ಆಸಾತ್. ಕೊಂಕ್ಣಿ ಬಾಷಾ ಮಂಡಳ್ ಮಾಹಾರಾಷ್ಟ್ರ ಹಾಂತುಂ ತಾಂಚಿ ಬರಿಚ್ ಮಿನ್ಹತ್ ಆಸಾ. ಸಂಸ್ಥ್ಯಾಂನಿ ಸಲಹ-ಸೂಚನಾಂ ದಿಂವ್ಚೆ ಆನಿ ಖೊಡಿ ಕಾಡ್ಚೆ ಮನಿಸ್ ಉಣೆಂ ನಾಂತ್. ಪುಣ್ ಆಯಿನ್ನ್ ವೆಳಾರ್ ಲ್ಹಾನ್-ವ್ಹಡ್ ಕಾಮ್ ಕರ್ತೆಲ್ಯಾಂಚೆಂ ಮಾತ್ರ್ ಉಣೆಪಣ್ ಆಸಾ ಆನಿ ತೆಂ ವಾಲ್ಟರ್ ಬಾಬಾನ್ ಸಬಾರ್ ಠಕ್ಕೆ ಉಣೆಂ ಕೆಲಾಂ.
ಜುಲಾಯ್ 26, 2005 ಇಸ್ವೆಂತ್ ಮುಂಬಯ್ ಆಯಿಲ್ಲ್ಯಾ ಆವ್ರಾಂತ್ ಪೀಡಿತ್ ಜಾಲ್ಲ್ಯಾ ಲೋಕಾಂಕ್ ವಾಲ್ಟರ್ ಬಾಬಾನ್ ಇಗರ್ಜೆಚಾ ವಠಾರಾಂತ್ ಬರಿಚ್ ಸೆವಾ ದಿಲ್ಯಾ. ತ್ಯಾ ನಿರಾಶ್ರಿತ್ ಲೋಕಾಂಕ್ ಸಕಾಳಿಚೆಂ ಚಾ-ನಸ್ಟೊ, ದನ್ಪಾರಾಂಚೆಂ ಆನಿ ಸಾಂಜೆಚೆಂ ಜೆವಾಣ್, ತಾಂಕಾಂ ಮಾಂದ್ಯ್ರೊ, ಸ್ಟೋವ್, ವೊಲಿ-ಕಾಂಬೊಳ್ ಮ್ಹಣೊನ್ ತಾಣಿಂ ಬಾರಿಚ್ ವಾಂವ್ಟ್ ಕಾಡ್‌ಲ್ಲಿ ಜೆರಿಮೆರಿಚೊ ಲೋಕ್ ಪಳೆವ್ನ್ ಜಾಣಾಂ. ವಿಗಾರ್ ಮಾ| ಬಾಪ್ ಮೈಕಲ್ ಡಿ’ಸೋಜಾ ಆನಿ ಸಹಾಯಕ್ ವಿಗಾರ್ ಮಾ| ಬಾಪ್ ಹ್ಯುಬರ್ಟ್ ಗೋವಿಯಸ್ ಹಾಣಿಂ ಸಾಂಗಾತಾ ಮೆಳೊನ್ ಅವ್ರಾಂತ್ ಪೀಡಿತ್ ಜಾಲ್ಲ್ಯಾ 85 ಲೋಕಾಂಚಿ ಘರಾಂ ದುರಸ್ತಿ ಆನಿ ಪುನರ್ವಸನ್ ಕೆಲ್ಲೆಂ ಕಾಮ್ ಹೊಗ್ಳಿಕೆಕ್ ಪಾತ್ರ್ ಜಾವ್ನಾಸಾ. ಡೋನ್ ಬೊಸ್ಕೊ, ಮಾಟುಂಗಾ ಹಾಂಚ್ಯಾ ಎಂಪ್ಲೊಯ್‌ಮೆಂಟ್ ಎಕ್ಶೇಂಜಾ ಸಾಂಗಾತಾ ಮೆಳೊನ್ ಸಬಾರ್ ತರ್ನಾಟ್ಯಾಂಕ್ ಕಾಮಾಂ ಮೆಳಾಶೆಂ ತಾಣಿ ಪ್ರಯತ್ನ್ ಕೆಲಾಂ. ತೆ ಇತರ್ ಸಬಾರ್ ಸಂಘ್-ಸಂಸ್ಥ್ಯಾನಿಂ ಸಕ್ರಿಯ್ ವಾವ್ರ್ ದೀವ್ನ್ ಆಸಾತ್. ತಾಂಚೆ ಪಯ್ಕಿ ತೊಡಿಂ ನಾಂವಾಂ ಘೆಂವ್ಚಿಂ ತರ್:
- ನೇಶನಲ್ ಸೆಕ್ರೆಟರಿ : ಮಾನವಾಧಿಕಾರ್ ಸೆವಾ ಸಂಘ (ರಿ) ಹ್ಯುಮನ್ ರಾಯ್ಟ್ಸ್. (ಹೊ ಸಂಸ್ಥೊ ಅಂತರಾಷ್ತ್ರೀಯ್ ಹ್ಯುಮನ್ ರಾಯ್ಟ್ಸ್ ಫೌಂಡೇಶನ್ ಹಾಕಾ ಮೆಳೊನ್ ಆಸಾ.)
- ನೇಶನಲ್ ಸೆಕ್ರೆಟರಿ : ಭಾರತೀಯ್ ಪತ್ರಾಕಾರ್ ಸಂಘ್ (ರಿ) ಟ್ರೇಡ್ ಯೂನಿಯನ್.
- ಸಹ-ಸಂಪಾದಕ್: ಮೆಟ್ರೊ ಆಜ್ ತಕ್ (ಹಿಂದಿ ಪತ್ರ್)
- ಮಾಜಿ-ಅಧ್ಯಕ್ಷ್ – ಸಾಂದೊ: ಕಾಜುಪಾಡಾ ಟ್ರೇಡರ್ಸ್ ವೆಲ್ಫೇರ್ ಎಸೋಸಿಯೇಶನ್.
- ಅಧ್ಯಕ್ಷ್ : ಹ್ಯುಮನ್ ರಾಯ್ಟ್ಸ್ ವಿಭಾಗ್ (MPCC Ward No. 173, kurla Taluk)
- S E O : ಮಹಾರಾಷ್ಟ್ರ ಸರ್ಕಾರ್.
- ಅಧ್ಯಕ್ಷ್ : ಮಹಾರಾಷ್ಟ್ರ ಕೊಂಕಣ್ ಎಸೋಸಿಯೇಶನ್.
- ಮೆನೆಜಿಂಗ್ ಕಮಿಟಿ ಮೆಂಬರ್ : ಕುರ್ಲಾ ರೈಲ್ವೇ ಪೋಲಿಸ್ ಸ್ಟೇಷನ್ (ಮುಂಬಯ್)
- ಮೆಂಬರ್ : ಪೋಲಿಸ್ ಜನತಾ ಸಂಪರ್ಕ್ ಸಮಿತಿ. (ಸಾಕಿನಾಕಾ ಪೋಲಿಸ್ ಸ್ಟೇಷನ್)
- ಮೆಂಬರ್ : ಪೋಲಿಸ್ ಝೊಪಡ್‌ಪಟ್ಟಿ ಪಂಚಾಯತ್ ಸಮಿತಿ (ಸಾಕಿನಾಕಾ ಪೋಲಿಸ್ ಸ್ಟೇಷನ್)
- ಖಜನ್ದಾರ್: ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ
- ಆಡಳ್ತೆ ಸಮಿತಿ ಸಾಂದೊ: ಕೊಂಕಣಿ ಸಭಾ (ರಿ) ಮುಲುಂಡ್.
- ಮ್ಹಾಲಕ್ : ಅಶ್ವಿನಿ ಕೇಬಲ್ ವಿಜನ್ / ವಿಲ್ಮಾ ಇಲೆಕ್ಟ್ರೊನಿಕ್ಸ್ / ಡಿ’ಸೋಜಾ ಇಲೆಕ್ಟ್ರೊನಿಕ್ಸ್
- ಸಾಂದೊ : ಕ್ರಿಶ್ಚಿಯನ್ ಚೇಂಬರ್ ಆಫ್ ಕೋಮರ್ಸ್ ಎಂಡ್ ಇಂಡಸ್ಟ್ರಿ.
- ಸಾಂದೊ: ಜಯ್ ಶ್ರೀ ಕೃಷ್ಣಾ ಪರಿಸರ ಫ್ರೇಮಿ ಸಮಿತಿ
- ಸಾಂದೊ-ವಿಶ್ವ ತುಳು ಸಮ್ಮೇಳನ್.
ಬಾಬ್ ವಾಲ್ಟರ್ ಎಕ್ ಖರೊ ಕೊಂಕ್ಣಿ ಮೊಗಿ. ಸಾಂಗಾತಿ ಕ್ರಿಯೇಶನ್ಸ್ ನಾಂವಾರ್ ತಾಣಿಂ ಹೆರ್ ದೊಗ್ ಭಾಗಿದಾರಾಂ ಸಾಂಗಾತಾ ಮೆಳೊನ್ “ಜಾಂವಯ್ ನಂ. 1” ಹ್ಯಾ ನಾವಾಚೆಂ ಕೊಂಕ್ಣಿ ಫಿಲ್ಮ್ ನಿರ್ಮಾಣ್ ಕೆಲಾಂ ಆನಿ ತೆಂ ಜನವರಿ-2018 ಮಯ್ನ್ಯಾಂತ್ ರುಪ್ಯಾಳ್ಯಾ ಪರ್ದ್ಯಾರ್ ರಿಲಿಜ್ ಜಾತೆಲೆಂ ಅಶೆಂ ಕಳೊನ್ ಯೆತಾ. ಕೊಂಕ್ಣಿ ಫಿಲ್ಮ್ಸ್ ಡೊಟ್ ಕೊಮ್ ವಾಲ್ಟರ್ ಬಾಬಾಕ್ ತಾಚ್ಯಾ ಹ್ಯಾ ಪ್ರಯಾಸಾಂತ್ ಯಶ್ ಮಾಗ್ತಾ.
