ಹ್ಯಾರಿ ಫೆರ್ನಾಂಡಿಸ್ (ಬಾರ್ಕುರ್)

ಹ್ಯಾರಿ ಫೆರ್ನಾಂಡಿಸ್ (ಬಾರ್ಕುರ್) ಎಕ್ ಬಹುಮುಖಿ ವ್ಯಕ್ತಿತಾಚೊ ಮನಿಸ್ ಜಾವ್ನಾಸಾ. ತೊ ಎಕ್ ಲೇಖಕ್ ಆನಿ ದಿಗ್ದರ್ಶಕ್ ಮಾತ್ರ್ ನಹಿಂ ಆಸ್ತಾಂ, ಗಿತಾಂ ಆನಿ ಸಂವಾದ್ ಬರಂವ್ಚಾಂತ್ ಬಾರಿಚ್ ಹೆಳ್‍ಲ್ಲೊ ಜಾವ್ನಾಸಾ. ತಾಕಾ ಮಾರಾಠಿ ಆನಿ ಭೊಜ್ ಪುರಿ ಫಿಲ್ಮಾನಿಂ ಕಾಮ್ ಕೆಲ್ಲೊ ಬರ್ಪೂರ್ ಆನ್ಭೋಗ್ ಆಸಾ ಜಾಲ್ಲ್ಯಾನ್ ತಾಣೆಂ ಬರಂವ್ಚೆಂ ಆಂಬ್ಶೆ-ತಿಕ್ಶೆ ಸಂವಾದ್ ಆಯ್ಕಾತಾನಾ ತೆ ಕಾಳ್ಜಾಕ್ ತೊಪುಲ್ಲೊ ಆನ್ಭೋಗ್ ಜಾತಾ. ಹಾಚೆ ಖಾತಿರ್ ತಾಕಾ “ಬೆಸ್ಟ್ ಡಯಲಗ್ ರೈಟರ್” ಪುರಸ್ಕಾರ್ ಸಮೇತ್ ಫಾವೊ ಜಾಲಾ. ತೊ ಫಿಲ್ಮಾಂಚ್ಯಾ ಗೀತಾಂಕ್ ಉತ್ರಾಂ ಬರಂವ್ಚಾಂತ್ ಬರೊಚ್ ಹೆಳ್ಳಾ. ಫಾವೊ ತಿಂ ಉತ್ರಾಂ ಆನಿ ತಾಕಾ ಜಾಯ್ ತ್ಯಾ ರಿತಿನ್ ತಾಳೊ ತೊ ಮಿನುಟಾನಿಂ ಬರಂವ್ಕ್ ಸಕ್ತಾ. ಫಿಲ್ಮಾಂಚೆಂ ಸಂವಾದ್ ಬರಂವ್ಚಿಂ ತಾಚಿ ಸಕತ್ ಖಂಡಿತ್ ಜಾವ್ನ್ ಹೊಗ್ಳಿಕೆಕ್ ಫಾವೊ.

ತಾಚೆಂ ದಿಗ್ದರ್ಶನ್ ತುಮಿ “ನಶೀಬಾಚೊ ಖೆಳ್” ಫಿಲ್ಮಾಂತ್ ಪಳೆಲಾಂ. ಸೊಫಿಯಾ ಫಿಲ್ಮಾಚೆಂ ದಿಗ್ದರ್ಶನ್ ಅತೀ ಉತ್ತಮ್ ಮಟ್ಟಾಚೆಂ ಆಸಾ ಹೆಂ ತುಮಿಂ ಫಿಲ್ಮ್ ಪಳೆತಾನಾ ತುಮ್ಕಾಂ ಖಂಡಿತ್ ಜಾತೆಲೆಂ.

ಹ್ಯಾರಿನ್ ಹಿಂದಿ ಫಿಲ್ಮ್ ’ಸಾಜನ್’ ಖ್ಯಾತೆಚೊ ದಿಗ್ದರ್ಶಕ್ ಶ್ರಿ ಲೊರೆನ್ಸ್ ಡಿ’ಸೋಜಾ ಸಾಂಗಾತಾ ಆನಿ ಇತರ್ ಸಬಾರ್ ದಿಗ್ದರ್ಶಕಾಂ ಸಾಂಗಾತಾ ಸಹಾಯಕ್ ಜಾವ್ನ್ ಕಾಮ್ ಕರ್ನ್ ಬರೊಚ್ ಆನ್ಭೋಗ್ ಜೊಡ್ಲಾ ಆನಿ ಫಿಲ್ಮ್ ನಿರ್ಮಾಣಾಚಾ ಹರ್ಯೆಕಾ ಕ್ಷೇತ್ರಾಂತ್ ಗರ್ಜ್ ಆಸ್ಚ್ಯಾ ಹರ್ಯೆಕಾ ಸಂಗ್ತಿ ವಿಶಿಂ ಜಾಣ್ವಾಯ್ ಆಪ್ಣಾಯ್ಲ್ಯಾ.

ಮಾರಾಥಿ ಆನಿ ಬೋಜ್ ಪುರಿ ಫಿಲ್ಮಾನಿಂ ತೊ ಬರೊಚ್ ವ್ಯಸ್ಥ್ ಆಸ್‍ಲ್ಲೊ ತರೀ, ತಾಕಾ ಆಪ್ಲ್ಯಾ ಮಾಂಯ್ ಭಾಶೆ ಥಂಯ್ ಕಿತೆಂ ಪುಣಿ ಕರ್ಚಿ ಆಶಾ ಆಸ್‍ಲ್ಲಿ. ಆಪ್ಲೊ ಮಿತ್ರ್ ಶ್ರೀ ಹೆನ್ರಿ ಡಿ’ಸಿಲ್ವಾ, ಸುರತ್ಕಲ್ ಹಾಚೆ ಸಾಂಗಾತಾ ಮೆಳೊನ್ ತಾಣಿಂ “ನಶೀಬಾಚೊ ಖೆಳ್” ಕೊಂಕ್ಣಿ ಫಿಲ್ಮ್ ಉತ್ಪನ್ನ್ ಕೆಲೆಂ ಆನಿ ತೆಂ ಸುಪರ್ ಹಿಟ್ಟ್ ಜಾಲ್ಲಿ ಗಜಾಲ್ ತುಮಿ ಜಾಣಾಂತ್.

ಆತಾಂ ಹ್ಯಾರಿನ್ ದಿಗ್ದರ್ಶಿಲ್ಲೆಂ ದುಸ್ರೆಂ ಕೊಂಕ್ಣಿ ಫಿಲ್ಮ್, ಜೆ ನಾಂವಾಡ್ದೀಕ್ ಫಿಲ್ಮ್ ನಟಿ ಎಸ್ತೆರ್ ನೊರೊನ್ಹಾ ಹಾಚಿ ಆವಯ್ ಮಾನೆಸ್ತಿಣ್ ಜಾನೆಟ್ ನೊರೊನ್ಹಾನ್ ನಿರ್ಮಾಣ್ ಕೆಲಾಂ ತೆಂ ತುಮ್ಚೆ ಮುಕಾರ್ ಹಾಡ್ನ್ ಯೆತಾ. ಹ್ಯಾ ಫಿಲ್ಮಾಂತ್ ಎಸ್ತೆರ್ ನೊರೊನ್ಹಾ, ಎಲ್ಟನ್ ಮಸ್ಕರೆನ್ಹಸ್, ಶೆಲ್ಟನ್ ಕ್ರಾಸ್ಟಾ, ಪ್ರಿನ್ಸ್ ಜೇಕಬ್, ಸ್ಟ್ಯಾನಿ ಆಲ್ವಾರಿಸ್, ರೊಯ್ಸ್ಟನ್ ಬಳ್ಕುಂಜೆ, ಫ್ರಾನ್ಸಿಸ್ ಒಲಿವೆರಾ,(ಪಡುಕೊಣೆ), ಪ್ಲೋಯ್ಡ್ ಡಿ’ಮೆಲ್ಲೊ ಅಶೆಂ ಸಬಾರ್ ಜಣಾಂ ನವಿಂ ಆನಿ ಪರ್ನಿ ಕಲಾಕಾರಾಂನಿಂ ಅತೀ ಉತ್ತಮ್ ಪ್ರದರ್ಶನ್ ದಿಲಾಂ. ಹೆಂ ಫಿಲ್ಮ್ ಹ್ಯಾಚ್ ಮಹಿನ್ಯಾಚ್ಯಾ 12 ತಾರೀಕೆರ್ ಮಂಗ್ಳೂರ್ ಆನಿ ಭಂವ್ತಣಿಂಚಾ ಶಹರಾನಿಂ ಪ್ರದರ್ಶಿತ್ ಜಾಂವ್ಚೆಂ ಆಸಾ.
ಸರ್ವಾಂನಿಂ ಹೆಂ ಫಿಲ್ಮ್ ಪಳೆವ್ನ್ ತಾಚೊ ಪಾಯ್ಧೊ ಜೊಡ್ಚೊ.