“ಸೊಫಿಯಾ” ಫಿಲ್ಮಾಚೆಂ ಭವ್ಯ ಉಗ್ತಾವಣ್ ಕಾರ್ಯೆಂ
ಮಂಗ್ಳೂರ್ ಮೇ 12: ಕೊಂಕ್ಣಿ ಲೋಕಾನ್ ಸಬಾರ್ ತೇಂಪ್ ಥಾವ್ನ್ ರಾಕೊನ್ ಆಸ್‍ಲ್ಲ್ಯಾಜಾನೆಟ್ ಪ್ರೊಡಕ್ಶನ್ಸ್ ದ್ವಾರಿಂ ನಿರ್ಮಿತ್ “ಸೊಫಿಯಾ” ಕೊಂಕ್ಣಿ ಫಿಲ್ಮಾಚೆಂ ಭವ್ಯ ಉಗ್ತಾವಣ್ ಕಾರ್ಯೆಂ ಆಜ್ ಸಕಾಳಿಂ 10 ವರಾಂಚೆರ್ ಪ್ರಭಾತ್ ಟೊಕಿಸಾಂತ್, ಮಂಗ್ಳೂರ್ ದಿಯೆಸೆಜಿಚೊ ಬಿಸ್ಫ್ ಅ| ಮಾ| ದೊತೊರ್ ಎಲೋಸಿಯಸ್ ಪಾವ್ಲ್ ಡಿ’ಸೊಜಾ ಹಾಂಚಾ ಹಾತಿಂ ಜಾಲೆಂ.
ತಾಣಿಂ ಆಪ್ಲ್ಯಾ ಉದ್ಘಾಟನ್ ಭಾಷಣಾಂತ್ “ಆಜ್ ಕಾಲ್ ಹೆಣೆ ತೆಣೆ ಸಬಾರ್ ಕೊಂಕ್ಣಿ ಫಿಲ್ಮಾಂ ರಿಲಿಜ್ ಜಾವ್ನ್ ಆಸಾತ್. ಹಾಂತುಂ ಕೊಂಕ್ಣಿ ಫಿಲ್ಮ್ ಕ್ಷೇತ್ರಾಕ್ ಬರೊ ಪುಡಾರ್ ಆಸಾ ಮ್ಹಣ್ ಕಳೊನ್ ಯೆತಾ. ಸಾಂಗಾತಾಚ್ ಉದೆವ್ನ್ ಯೆಂವ್ಚಾ ನವ್ಯಾ ತಾಲೆಂತ್ ವಂತ್ ಕಲಾಕರಾಂಕ್ ಹಿ ಎಕ್ ಬೊರಿ ವೆಧಿ ಜಾವ್ನಾಸಾ” ಮ್ಹಣ್ ಸಾಂಗೊಂನ್ ಸೊಫಿಯಾ ಫಿಲ್ಮಾಚ್ಯಾ ನಿರ್ಮಾಪಕಿಕ್, ದಿಗ್ದರ್ಶಕಾಕ್ ಆನಿ ಸರ್ವ್ ಕಲಾಕಾರಾಂಕ್ ಬೊರೆಂ ಮಾಗ್ಲೆಂ.
ಮಾ| ಬಾ| ಸಾವೆರ್ ಗೋಮ್ಸ್ ಹಾಣಿಂ ಮಟ್ವಿ ಮಾಗ್ಣ್ಯಾ ವಿಧಿ ಚಲವ್ನ್ ವ್ಹೆಲಿ. ಜಾನೆಟ್ ನೊರೊನ್ಹಾ ಕೊಸ್ಟಲ್ ವುಡ್ಡಾಚಿ ಪಯ್ಲಿ ಮಹಿಳಾ ನಿರ್ಮಾಪಕಿ ಜಾವ್ನಾಸಾ. ತಿಣೆಂ ಧೈರ್ ಘೆವ್ನ್ ಘೆತ್‍ಲ್ಲೆಂ ಹೆಂ ಮೇಟ್ ಪ್ರಶಂಸನಿಯ್ ಜಾವ್ನಾಸಾ. ಕೊಂಕ್ಣಿ ಫಿಲ್ಮ್ ಇಂಡಸ್ಟ್ರೀಕ್ ಖಂಡಿತ್ ಜಾವ್ನ್ ಬರೊ ಫುಡಾರ್ ರಾಕೊನ್ ಆಸಾ ಮ್ಹಣಾಲೊ MLA ಶ್ರೀ ಜೆ. ಆರ್. ಲೋಬೊ. ಜಾನೆಟ್ ನೊರೊನ್ಹಾ-ನ್ ಕೊಂಕ್ಣಿಂ ಚಲ್-ಚಿತ್ರಾಂಚಾ ಆನಿ ಕೋಸ್ಟಲ್ ವುಡ್ಡಾಂತ್ ಇತಿಹಾಸ್ ರಚ್ಲಾ ಹಿ ಕೊಂಕ್ಣಿ ಲೋಕಾಕ್ ಎಕ್ ವ್ಹರ್ತ್ಯಾ ಆಭಿಭಿಮಾನಾಚಿ ಗಜಾಲ್ ಜಾವ್ನಾಸಾ ಮ್ಹಣಾಲೊ ದಾಯ್ಜಿವರ್ಲ್ಡ್.ಕೋಮ್ ಹಾಚೊ ಸ್ಥಾಪಕ್ ಆನಿ ಆಡಳ್ತೆ ನಿರ್ದೆಶಕ್ ಶ್ರೀ ವಾಲ್ಟರ್ ನಂದಳಿಕೆ.
ಹ್ಯಾ ಕಾರ್ಯಾಕ್ ಮಾಂಡ್ ಸೊಭಾಣ್ ಸಂಸ್ಥ್ಯಾಚೊ ಗುರ್ಕಾರ್ ಶ್ರೀ ಎರಿಕ್ ಓಜೆರಿಯೊ, ಅಧ್ಯಕ್ಷ್ ಶ್ರೀ ಲುವಿ ಜೆ. ಪಿಂಟೊ, ಕೊಂಕ್ಣಿ ಸಾಹಿತ್ಯ ಆಕಾಡಮಿಚೊ ಅದ್ಲೊ ಅಧ್ಯಕ್ಷ್ ಶ್ರೀ ರೋಯ್ ಕಸ್ತೆಲಿನೊ, ಪಿಲ್ಮಾಚೊ ದಿಗ್ದರ್ಶಕ್ ಶ್ರೀ ಹ್ಯಾರಿ ಫೆರ್ನಾಂಡಿಸ್, (ಬಾರ್ಕುರ್), ನಿರ್ಮಾಪಕಿ ಶ್ರೀಮತಿ ಜಾನೆಟ್ ನೊರೊನ್ಹಾ, ಶ್ರೀಮತಿ ಬ್ಲೊಸಮ್ ಒಸ್ಕರ್ ಫೆರ್ನಾಂಡಿಸ್, ಮುಖೆಲ್ ಕಲಾಕಾರಾಂ ಎಸ್ತೆರ್ ನೊರೊನ್ಹಾ ಆನಿ ಎಲ್ಟನ್ ಮಸ್ಕರೇನ್ಹಸ್ ವೆಧಿಚೆರ್ ಆನಿ ಶೆಲ್ಟನ್ ಕ್ರಾಸ್ಟಾ, ಫ಼್ಲೊಯ್ಡ್ ಡಿ’ಮೆಲ್ಲೊ, ಸ್ಟ್ಯಾನಿ ಆಲ್ವಾರಿಸ್, ರೊಯ್ಸ್ಟನ್ ಬಳ್ಕುಂಜೆ, ಫ್ರಾನ್ಸಿಸ್ ಒಲಿವೆರಾ (ಪಡುಕೋಣೆ) ಆನಿ ಸಿಡ್ನಿ ಮೆಂಡೊನ್ಸಾ ಹಾಣಿಂ ಕಾರ್ಯಾಕ್ ಸೊಭಾಯ್ ದಿಲಿ.
