ಆಶೆಂ ಜಾಲೆಂ ಕಶೆಂ ? ಫಿಲ್ಮಾಚೆಂ ಮುಂಬಂಯ್ತ್ ಯಶಸ್ವಿಬರಿತ್ ಪ್ರದರ್ಶನ್

ಆಕ್ತೊಬರ್ 8, 2017 ಸಕಾಳಿಂ 9.30 ವರಾಂಚೆರ್ ಮ್ಯಾಕ್ಸಸ್ ಸಿನೆಮಾ, ಜೆರಿಮೆರಿ ಹಾಂಗಾಸರ್ ಆಶೆಂ ಜಾಲೆಂ ಕಶೆಂ? ಹ್ಯಾ  ಫಿಲ್ಮಾಚೆಂ ಪಯ್ಲೆಂ ಪ್ರದರ್ಶನ್ ಬೋವ್ ಯಶಸ್ವಿ ಥರಾನ್ ಜಾಲೆಂ.

ಹ್ಯಾ ಫಿಲ್ಮಾಚೆಂ ಉದ್ಘಾಟನ್ ಮುಂಬಂಯ್ತ್ಲೊ ಪ್ರಿಂಟಾನಿಯಾ ಖ್ಯಾತೆಚೊ ಆನಿ ಆಲ್ಡೇಲ್ ಟ್ರಸ್ಟಾಚೊ ಸಭಾಧ್ಯಕ್ಷ್, ಮೋಡೆಲ್ ಕೊ-ಓಪರೇಟಿವ್ ಬ್ಯಾಂಕಾಚೊ ಕಾರ್ಯಾಧ್ಯಕ್ಷ್, ಫಾಮಾದ್ ಉದ್ಯಮಿ ಶ್ರೀ ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ ಹಾಂಚೆಂ ಹಾತಿಂ ಜಾಲೆಂ. ಆಪ್ಲ್ಯಾ ಉದ್ಘಾಟನ್ ಭಾಷಣಾಂತ್  “ಆಶೆಂ ಜಾಲೆಂ ಕಶೆಂ?” ಎಕ್ ದ್ವಿ-ಬಾಶಿಕ್ ಫಿಲ್ಮ್ ಜೆ ಕೊಂಕ್ಣಿ ಆನಿ ತುಳು ಭಾಷೆನಿಂ ಮಿಶ್ರಿತ್ ಫಿಲ್ಮ್ ಜಾವ್ನಾಸಾ.  ಆಮಿ ಮಂಗ್ಳೂರ‍್ಗಾರ್ ಬಹು ಭಾಶಿಕ್ ಜಾವ್ನಾಸ್ಲೆಲ್ಯಾನ್ ಅಮ್ಕಾಂ ಅಸಲಿಂ ದ್ವಿ ಭಾಶಿಕ್ ಫಿಲ್ಮಾ ಪಳೆವ್ನ್, ದೊನೀ ಭಾಶೆಂಚಾ ಕಲೆಚೊ ಆನಂದ್ ಜೊಡುಂಕ್ ಸಾದ್ಯ್ ಅಸಾ.  ಹ್ಯಾ ಫಿಲ್ಮಾಚಿಂ ಇತರ್ ಜಾಗ್ಯಾನಿಂ ಸಬಾರ್ ಪ್ರದರ್ಶನಾಂ ಜಾಲ್ಯಾಂತ್.   ಕೊಂಕ್ಣಿ ಆನಿ ತುಳು ಕಲಾಕಾರಾಂನಿ ಸಾಂಗಾತಾ ನಟನ್ ಕೆಲ್ಲ್ಯಾ ಹ್ಯಾ ಫಿಲ್ಮಾ ದ್ವಾರಿಂ ಲೋಕಾ ಥಂಯ್ ಎಕ್ವೊಟ್ ವಾಡೊಂದಿ ಆನಿ ಹ್ಯಾ ಮುಂಬಂಯ್ತ್ ಹ್ಯಾ ಫಿಲ್ಮಾಚಿಂ ಸಬಾರ್ ಪ್ರದರ್ಶನಾ ಜಾಂವ್ದಿ ಆನಿ ಲೋಕ್ ಹೆಂ ಫಿಲ್ಮ್ ಪಳೆವ್ನ್ ತಾಚೊ ಸ್ವಾದ್ ಚಾಕೊಂದಿ ಮ್ಹಣೊನ್ ಫಿಲ್ಮಾಕ್ ಯಶಸ್ವಿ ಮಾಗ್ಲಿ.

ಹ್ಯಾ ಫಿಲ್ಮಾಚೊ ನಿರ್ದೆಶಕ್, ನಿರ್ಮಾಪಕ್ ಶ್ರೀ ಮ್ಯಾಕ್ಷಿಮ್ ಪಿರೇರಾ ಹಾಣಿಂ ಫಿಲ್ಮಾ ವಿಶಿಂ ಥೊಡ್ಯಾನಿಂ ಕೆಲ್ಲ್ಯಾ ಅಪಪ್ರಚಾರಾ ವಿಶಿಂ ಉಲ್ಲೇಖ್ ಕರ್ನ್ ಬೆಜಾರಾಯ್ ಉಚಾರ್ಲಿ.  ಆಪ್ಣೆಂ ಖಂಚಾಯ್ ಎಕಾ ಭಾಷೆಕ್ ಮತಿಂತ್ ದವರ್ನ್  ತ್ಯಾ ಭಾಶೆಚಾ ಉದರ್ಗತೆ ಖಾತಿರ್ ಹೆಂ ಮೇಟ್ ಕಾಡುಂಕ್ ನಾ.  ಬಗಾರ್ ಕೊಂಕ್ಣಿ ಆನಿ ತುಳು ಪ್ರೇಕ್ಷಕಾಂಕ್  ದೋನ್ ವರಾಂಚೆಂ ಉಂಚ್ಲ್ಯಾ ದರ್ಜೆಚೆಂ ಮನೋರಂಜನ್ ದಿಂವ್ಚಾ ಉದ್ದೇಶಾನ್ ಹೆಂ ಫಿಲ್ಮ್ ನಿರ್ಮಾಣ್ ಕೆಲಾಂ ಹೆಂ ತುಮಿ ಸ್ವತಾ ಪಳೆಯ್ತೆಲ್ಯಾತ್ ಮ್ಹಣೊನ್ ಸರ್ವಾಂಚೊ ಸಹ್ಕಾರ್ ಮಾಗ್ಲೊ.

ಫಿಲ್ಮಾಚೊ ಸ್ಥಾನೀಯ್ ವ್ಯವಸ್ಥಾಪಕ್ ಶ್ರೀ ಲೊರೆನ್ಸ್ ಡಿ’ಸೋಜಾ, ಕಮಾನಿನ್ ಧನ್ಯವಾದ್ ಅರ್ಪಣ್ ಕೆಲೆಂ. ಮೊಡೆಲ್ ಕೋ-ಓಪರೇಟಿವ್ ಬ್ಯಾಂಕಾಚೊ ನಿರ್ದೆಶಕ್ ಶ್ರೀ ಕ್ಲೆಮೆಂಟ್ ಲೊಬೊನ್ ಫಿಲ್ಮಾಕ್ ಸರ್ವಾಂಚೊ ಸಹಕಾರ್ ಮಾಗೊನ್ ಬರ‍್ಯಾ ರಿತಿನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ.

ಪ್ರೇಕ್ಷಕಾಂಚಾ ಆಭಿಪ್ರಾಯೆ ಪ್ರಮಾಣೆ ಹೆಂ ಫಿಲ್ಮ್ ಬರ್ಪೂರ್ ಮನೋರಂಜನ್ ದಿಂವ್ಚೆಂ ತಸಲೆಂ ಜಾವ್ನಾಸಾ. ಸಕ್ಕಡ್ ಕಲಾಕಾರಾಚೆಂ ಆನಿ ಚಡ್ ಕರ್ನ್ ತುಳು ಕಲಾಕಾರಾಂಚೆಂ ನಟನ್ ಊಂಚ್ಲ್ಯಾ ಮಟ್ಟಾಚೆಂ ಜಾವ್ನಾಸೊನ್ ಪೋಟ್  ಬರ್ ಹಾಸ್ಯಾಂಚೊ ಬರ್ಗಾಲ್ ನಾ.

[ಕರೋಡಾನಿಂ ಖರ್ಚ್ ಕರ್ನ್ ತಯಾರ್ ಕೆಲ್ಲ್ಯಾ ಇತರ್ ಭಾಷೆಚಾ ಫಿಲ್ಮಾನಿಂ ಸಮೇತ್ ಲ್ಹಾನ್-ವ್ಹಡ್ ಚೂಕೀ ಸೊಧುನ್ ಕಾಡ್ತಾತ್.  ದೆಕುನ್ ಥೊಡ್ಯಾಚ್ ಲಾಖಾನಿಂ ಆನಿ ನವ್ಯಾ ನವ್ಯಾ ಕಲಾಕಾರಾಂಕ್ ಘೆವ್ನ್ ತಯಾರ್ ಕೆಲ್ಲ್ಯಾ ಫಿಲ್ಮಾಂಕ್ ಆಮಿ ಅಮ್ಚೊ ಸಹಕಾರ್ ದಿಲೊ ತರ್ ಆನಿ ಮುಕಾರ್ ಹಿಂದಿ ಆನಿ ಇಂಗ್ಲಿಷ್ ಮಟ್ಟಾಚಿಂ ಕೊಂಕ್ಣಿ ಫಿಲ್ಮಾಂ ಯೆಂವ್ಚಾಂತ್ ವೇಳ್ ಲಾಗ್ಚೊ ನಾ.]