ಬೆಟ್ಟಿ ನಾಜ಼್

ತಿಯಾತ್ರ್ ಆನಿ ಫಿಲ್ಮ್ ನಟಿ, ಬಿಯಾಟ್ರಿಸ್ ಜೊಸೆಫೀನ್ ನಜ಼ರೆತ್ ಫೆರ್ನಾಂಡಿಸ್

“ಬೆಟ್ಟಿ ನಾಜ಼್” ಮ್ಹಣೊನ್ ಸರ್ವಾಂಕ್ ವಳ್ಕಿಚಿ ತಿಯಾತ್ರ್ ಆನಿ ಫಿಲ್ಮ್ ನಟಿ, ಬಿಯಾಟ್ರಿಸ್ ಜೊಸೆಫೀನ್ ನಜ಼ರೆತ್ ಫೆರ್ನಾಂಡಿಸ್ ಗಾಂವಾನ್ ಮಂಗ್ಳೂರ್ಚಿ ತರೀ ತಿಚೊ ಜಲ್ಮ್ ಎಪ್ರಿಲ್ 18, 1945 ವರ್ಸಾ ಮುಂಬಯ್ಚಾ ಮಜ್ಘಾಂವ್ ಹಾಂಗಾಸರ್ ಜಾಲೊ. ತಿಚೆಂ ಲಘ್ನ್ ಗೊಂಯ್ಕಾರ್ ಮಾನೆಸ್ತ್ ಎಬ್ಡೊನ್ ಆರ್. ಫೆರ್ನಾಂಡಿಸ್ ಹಾಚೆಂ ಸಂಗಿಂ ಜಾಲೆಂ ಆನಿ ತಾಂಕಾಂ ದೋಗ್ ಪುತ್, ಆರೊನ್ ಆನಿ ವಾರ್ರನ್ ದೆವಾನ್ ಫಾವೊ ಕೆಲೆ.

ತಿಚೊ ಬಾಪುಯ್,  ಎಲೋಸಿಯಸ್ ಲುವಿಸ್ ನಜ಼ರೆತ್ ಮಂಗ್ಳೂರ್ ಕೊಂಕ್ಣಿ ರಂಗ್ ಮಂಚಾರ್ ಗಾಯಕ್ ಆನಿ ಕಂಪೊಸರ್ ಜಾವ್ನ್ ನಾಂವಾಡ್ಲೊಲೊ ಜಾವ್ನಾಸಾ.    

ಆಪುಣ್ ಲ್ಹಾನ್ ಆಸ್ತಾನಾ, ಎ. ಟಿ. ಲೊಬೊ-ಚಾ ಎಕಾ ನಾಟಕಾ ಖಾತಿರ್ ಎಕ್ ಬಾಳ್ ಕಲಾಕಾರಾಚಿ ಗರ್ಜ್ ಆಸ್‍ಲ್ಲಿ.  ತೆದಳಾ ಅಪ್ಣಾಕ್ ತೊ ಪಾತ್ರ್ ಖೆಳ್ಚೊ ಸುಯೋಗ್ ಲಾಭ್ಲೊ.  ಆನಿ ಆಜ್  ಆಪುಣ್  ಮ್ಹಣಾಸರ್ ಕೊಂಕ್ಣಿ ರಂಗ್ ಮಂಚಾರ್ (ಮಂಗ್ಳೂರ್ ಆನಿ ಗೊಂಯ್) ಆನಿ ಫಿಲ್ಮಾನಿಂ ನಟನ್ ಕರ್ತೆ ಅಯ್ಲ್ಯಾಂ ಮ್ಹಣ್ತಾ ಬೆಟ್ಟಿ ನಾಜ್.  ಅಪ್ಣಾಚೆಂ ನಟನ್ ಪಳೈಲ್ಲ್ಯಾ ಎ. ಟಿ. ಲೊಬೊನ್ ಹಾಂವ್ ಮುಕಾರ್ ಎಕ್ ನಾಂವಾಡ್ದಿಕ್ ನಟಿ ಜಾಂವ್ಕ್ ಪಾವ್ತೆಲಿಂ ಮ್ಹಣ್ ಬಲ್ಮೆ ಸಾಂಗ್ಲೆಲೆ ಆನಿ ಚಡ್ ಮಟ್ಟಾಕ್ ತೆಂ ಸತ್ ಜಾಲಾಂ ಮ್ಹಣ್ತಾ ಬೆಟ್ಟಿ.

ತ್ಯಾ ಕಾಳಾರ್ ಮಜ಼್ಗಾಂವ್ ಮ್ಹಳ್ಯಾರ್ ದರಾಬಸ್ತ್ ಕೊಂಕ್ಣಿ ಲೋಕ್ ವಸ್ತಿ ಕರ್ಚೊ ಜಾಗೊ.  ದೆಕುನ್ ಥಂಯ್ಸರ್ ಕೆದಳಾಯೀ ಕೊಂಕ್ಣಿ ಕಾರ್ಯಕ್ರಮಾ ಸಾದರ್ ಜಾತೆಲಿಂ.  ಜುಲಾಯ್ 26 ಸೈಂಟ್ ಆನ್ನಾಚಾ ಫೆಸ್ತಾ ದಿಸಾ ಸಬಾರ್ ನಾಟ್ಕುಳೆ ಜಾತೆಲೆ ಆನಿ ಅಮ್ಕಾಂ ನಟನ್ ಕರುಂಕ್ ಜಾಯ್ ತಿತ್ಲೆ ಆವ್ಕಾಸ್ ಮೆಳ್ತೆಲೆ ಮ್ಹಣ್ತಾ ತೆಂ.

ಬಾಯ್ಕಾಲಾಂತ್ ನಾಟಕ್ ಖೆಳೊಂವ್ಚೊ ಎಕ್ ಮಂಗ್ಳೂರ್ ಗಾರಾಂಚೊ ಸಂಸ್ಥೊ ಆಸ್‍ಲ್ಲೊ.  ತ್ಯಾ ಸಂಸ್ಥ್ಯಾಂತ್ ಸುಕ್ರಿನ್, ರಿಕೊ ರೋಡ್, ಟಿಟಾ ಪ್ರೆಟೊ, ಆಂತೊನೆತ್ ಮೆಂಡಿಸ್ ತಶೆಂ ಸಬಾರ್ ಕಲಾಕಾರಾಂ ಮೆಳೊನ್ ಆಸ್‍ಲ್ಲಿಂ.  ತಾಂಚೆಂ ಸಾಂಗಾತಾ ನಟನ್ ಕರ್ನ್ ಆಪ್ಣಾಕ್ ಗೊಂಯ್ಕಾರಾಂ ಆನಿ ಮಂಗ್ಳೂರ್ ಕರಾಂ ಮಧೆಂ ನಟನ್ ಕರುಂಕ್ ಸಲೀಸ್ ಜಾಲೆಂ ಮ್ಹಣ್ತಾ ತೆಂ.

ಎಕ್ ದಿಸ್ ಎಮ್. ಕೆ. ದಾಸ್ ನಾಂವಾಚೊ ಎಕ್ಲೊ ನಿರ್ಮಾಪಕ್ ಬೆಂಗ್ಳೂರ್ ಥಾವ್ನ್ ಮುಂಬಯ್ ರಿಕೊ ರೋಡಾಕ್ ಮೆಳೊಂಕ್ ಅಯ್ಲೊ.  ತಾಕಾ ಎಕ್ ಕೊಂಕ್ಣಿ ಫಿಲ್ಮ್ ಕಾಡ್ಚಿ ಅಶಾ ಆಸ್‍ಲ್ಲಿ.  ಫಿಲ್ಮಾಚಾ ಕಾಸ್ಟಿಗಾಂತ್ ತಾಣೆಂ ರಿಕೊ ರೊಡಾಚೊ ಸಹಕಾರ್ ಘೆತ್ಲೊ.  ರಿಕೊ ರೊಡಾಕ್ ಬರಯ್ಣಾರ್ ಆನಿ ದಿಗ್ದರ್ಶಕ್ ಮಾವ್ರಿಸ್ ಕಬ್ರಾಲಾಚಿ ವಳಕ್ ಆಸ್‍ಲ್ಲ್ಯಾನ್, ಕಲಾಕಾರಾಂಕ್ ವಿಂಚ್ಣುಕ್ ಕರ್ಚಾಂತ್ ತಾಚೊಯೀ ಸಹಕಾರ್ ಘೆತ್ಲೊ.

ತಾಣಿ ಅಪ್ಣಾಕ್ ದಾಸಾಚಿ ವಳಕ್ ಕರ್ನ್ ದಿಲಿ ಆನಿ ಅಶೆಂ ಮ್ಹಾಕಾ “ಜಿವಿತ್ ಆಮ್ಚೆಂ ಅಶೆಂ”  ಕೊಂಕ್ಣಿ ಫಿಲ್ಮಾಂತ್ ನಟನ್ ಕರ್ಚೊ ಸುಯೋಗ್ ಲಾಭ್ಲೊ ಮ್ಹಣ್ತಾ ಬೆಟ್ಟಿ.  ತ್ಯಾ ಫಿಲ್ಮಾಂತ್ ಡೊಕ್ಟರ್ ರಮಣಿ, ಸಿಸಿಲಿಯಾ ಮಾಚಾದೊ ಆನಿ ಪಂಡರಿ ಬಾಯಿ ತಸಲ್ಯಾ ಮಹಾನ್ ಕಲಾಕಾರಾಂ ಸಾಂಗಾತಾ ಮುಖೆಲ್ ಪಾತ್ರ್ ಖೆಳ್ಚೊ ಅವ್ಕಾಸ್ ತಾಕಾ ಲಾಭ್ಲೊ. ದಾಸಾನ್ ನಿರ್ಮಾಣ್ ಕೆಲ್ಲೆಂ ದುಸ್ರೆಂ ಫಿಲ್ಮ್ “ಬೊಗ್ಲಾಂಟ್” ಹಾಂತುಂ ಆಪ್ಣಾಕ್ ಪ್ರೇಮ್ ಕುಮಾರಾಚ್ಯಾ ಆವಯ್ಚೊ ಪಾತ್ರ್ ಖೆಳ್ಚೊ ಅವ್ಕಾಸ್ ಲಾಭ್ಲೊ ಮ್ಹಣ್ತಾ ತೆಂ.

ರಿಕೊ ರೊಡಾಚೊ ತಿಯಾತ್ರ್ “ವ್ಹೊನಿ ಆನಿ ದೆರ್” ಆನಿ ಸಿ. ಅಲ್ವಾರಿಸಾಚೊ “ಖಂಚೊ ಸಾಕ್ರಾಮೆಂತ್ ?”  ದ್ವಾರಿಂ ಬೆಟ್ಟಿನ್ ಗೊಂಯ್ಚಾ ರಂಗ್ ಮಂಚಾರ್ ಪಾಯ್ ದವರ್ಲೊ.  “ಖಂಚೊ ಸಾಕ್ರಾಮೆಂತ್?” ತಿಯಾತ್ರಾಚೆಂ ಆಭ್ಯಾಸ್ ಚಲ್ತನಾ ತೆಂ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾಚಾ ಎಕಾ ನಾಟಕಾಂತ್ ಪಾತ್ರ್ ಆಭ್ಯಾಸ್ ಕರ್ನ್ ಆಸ್‍ಲ್ಲೆಂ. ಪುಣ್ ಸಿ. ಆಲ್ವಾರಿಸಾನ್ ಫ್ರಾನ್ಸಿಸಾಕ್ ಸಾಂಗೊನ್ ತೊ ಪಾತ್ರ್  ಸೊಡುಂಕ್ ಪಡ್‍ಲ್ಲೊ ಉಗ್ದಾಸ್ ತಾಕಾ ಆಜೂನ್ ಆಸಾ.   ಉಪ್ರಾಂತ್ ತಾಣೆಂ ಎಮ್. ಬೊಯರ್, ಪ್ರೇಮ್ ಕುಮಾರ್ ಆನಿ  ರೆಮ್ಮಿ ಕುಲಾಸೊ (ಖೆಳ್ ತಿಯಾತ್ರ್) ತಸಲ್ಯಾ ಸಬಾರ್ ನಾವಾಡ್ದೀಕ್ ದಿಗ್ದರ್ಶಕಾಂಚಾ ಹಾತಾಖಾಲ್ ಪದಾಂ ಗಾವ್ನ್, ಆನಿ ನಟನ್ ಕರ್ನ್ ಎಕಾ ವರ್ನಿ ಎಕ್ ಬರೆಂ ಪ್ರದರ್ಶನ್ ದಿಲೆಂ.

ಖೆಳ್ ತಿಯಾತ್ರ್ ವಾಡ್ಲೆ ಆನಿ ಸಾಂಗಾತಾ ಬೆಟ್ಟಿಕ್ ಮೆನಿನೊ ದೆ ಬಂದಾರ್, ರೊಸ್ ಫೆರ್ನ್ಸ್ ಆನಿ ಎ. ಎಮ್. ಪಚೆಕೊ ತಸಲ್ಯಾ ಫಾಮಾದ್ ದಿಗ್ದರ್ಶಕಾಂ ಥಾವ್ನ್ ಚಡ್ ಆನಿ ಚಡ್ ಪಾತ್ರ್ ಲಾಭ್ಲೆ.   ತೆಂ ಎಕ್ ಬರೆಂ ಗಾವ್ಪಿಣ್ ಜಾಲ್ಲ್ಯಾನ್ ಚಡಾವತ್ ದಿಗ್ದರ್ಶಕ್ ತಾಚೆ ಖಾತಿರ್ ಬರಿಂ ಗಿತಾಂ ಬರವ್ನ್ ಗಾಂವ್ಕ್ ಕರ್ತಾಲೆ.  ತಾಕಾ ಕಂತರಾಂ ಗಾಂವ್ಚಾಂತ್ ಸಬಾರ್ ಪ್ರಶಸ್ತ್ಯೊ ಲಾಭ್ಲ್ಯಾತ್. ತಾಣೆಂ ನಟನ್ ಕೆಲ್ಲ್ಯಾ ನಾಟಕಾ ಪಯ್ಕಿಂ ಮಾವ್ರಿಸ್ ಕಬ್ರಾಲಾನ್ ಬರವ್ನ್ ದಿಗ್ದರ್ಶಿಲ್ಲೊ “ಕಾಂಕಣ್”, ಎಮ್.ಬೊಯಾರಾಚೊ ತಿಯಾತ್ರ್ “ಎಕ್‍ಚ್ ರಸ್ತೊ”, ರೆಮಿ ಕುಲಾಸೊಚೊ ತಿಯಾತ್ರ್ “ಆತಾಂಚೊ ತೇಂಪ್”, ಆನಿ ಸಿ. ಆಲ್ವಾರಿಸಾಚೊ ತಿಯಾತ್ರ್ “ಕೊಣೆಂ ಲಾಯ್ಲೊ ಉಜೊ” (ಬೆಟ್ಟಿನ್ ಡ್ರಗ್ಗ್ ಎಡಿಕ್ಟಾಚೊ ಪಾತ್ರ್ ಖೆಳ್‍ಲ್ಲೊ), ಪ್ರೇಮ್ ಕುಮಾರಾಚೊ ತಿಯಾತ್ರ್ “ಜವಾನ್”, ಮೆನಿನೊ ದೆ ಬಾಂದರ್ ಹಾಚೊ ತಿಯಾತ್ರ್ “ಸಗ್ಳ್ಯಾಂಕ್ ಗರ್ಜೆಚೆಂ” ಆನಿ ರೊಸಾರಿಯೊ ರೊಡ್ರಿಗಸಾಚೆ “ಫುಲಾಂ ಆನಿ ಕೊಲೆ” ಆನಿ “ಉಜ್ವಾಡ್ ಪಾಲ್ವಾಲೊ”.   ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾಚೊ ಪ್ರಸ್ತುತ್ ಸುಪರ್ ಹಿಟ್ಟ್ ನಾಟಕ್ “ಮ್ಹಾತಾರೊ ಚರ್ಬೆಲಾ” ಹಾಂತುಂ ಬೆಟ್ಟಿ ನಟನ್ ಕರ್ನ್ ಆಸಾ ಆನಿ ಹೊ ನಾಟಕ್ ವೆಗ್ಗಿಂಚ್ ಶೆಂಬರ್ ಪ್ರದರ್ಶನಾಂ ಸಂಪವ್ನ್ ಎಕ್ ದಾಕ್ಲೊ ರಚುಂಕ್ ಆಸಾ.

1989 ವರ್ಸಾ ತಾಣೆಂ “ದೆವಾಚೆಂ ಬೆಸಾಂವ್” ನಾಂವಾಚಿ ಆಡಿಯೊ ಕೆಸೆಟ್ ಕಾಡ್ಲಿ.  ತ್ಯಾ ಕೆಸೆಟಿಂತ್ ತಿಚೊ ಪತಿ ಎಬ್ಡೊನ್ ಆನಿ ತೆದಳಾ ಚಾರ್ ವರ್ಸಾಂಚೊ ಪೂತ್, ಆರನ್ ತಾಣಿಂ ತಾಳೆ ದಿಲ್ಯಾತ್.

ಬೆಟ್ಟಿ ನಾಜ್ ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಹ್ಯಾ ಸಂಸ್ಥ್ಯಾಚಿ ಕಾರ್ಯಾಕಾರಿ ಸಮಿತಿಚಿ ಸಾಂದೊ ಆನಿ ಮಹಾರಾಷ್ಟ್ರ ಕಲಾ ಸಂಸ್ಥ್ಯಾ ಹಾಚ್ಯಾ ಸುರ್ವಾತೆ ಥಾವ್ನ್ ಖಜನ್ದಾರ್ ಜಾವ್ನ್ ಸೆವಾ ದಿವ್ನ್ ಆಸಾ.

“ಕೊಂಕ್ಣಿ ಉಲಯ್ ಆನಿ ಕೊಂಕ್ಣಿ ಉರಯ್”  ಬೆಟ್ಟಿಚೆಂ ಸರ್ವ್ ಕೊಂಕ್ಣಿ ಲೊಕಾಂಕ್ ಮೊಗಾಚೊ ಉಲೊ ಜಾವ್ನಾಸಾ.  ಎಕಾ ಕಾಳಾರ್ ನಾಟಕ್ ಆನಿ ತಿಯಾತ್ರ್ ಸದಾಂಚೆಂ ಜಾಲ್ಲೆ ಆತಾಂ ಬೋವ್ ವಿರಳ್ ಜಾಲ್ಯಾತ್.

ಆಮಿ ಆಮ್ಚಾ ಭುರ್ಗ್ಯಾಂಕ್ ಕೊಂಕ್ಣಿ ಶಿಕಂವ್ಕ್ ಜಾಯ್, ತಾಂಚೆಂ ಲಾಗಿಂ ಕೊಂಕ್ಣೆಂತ್ ಉಲಂವ್ಕ್ ಜಾಯ್ ತೆದ್ನಾ ಕೊಂಕ್ಣಿ ನಾಟಕ್, ತಿಯಾತ್ರ್ ಆನಿ ಫಿಲ್ಮಾಂ ಆನ್ಯೇಕ್ ಪಾವ್ಟಿಂ ಭಾಂಗಾರಾಚೊ ಕಾಳ್ ಪಳೆಂವ್ಕ್ ಸಕ್ತೆಲಿಂ – ಹೆಂ ಬೆಟ್ಟಿಚೆಂ ಸ್ವಪಾಣ್.

ಪ್ರಸ್ತುತ್ ಬೆಟ್ಟಿ ಬೆಂಡ್ರಾಂತ್ ವಸ್ತಿ ಕರ್ನ್ ಆಸಾ.