ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ – ವ್ಯಕ್ತಿ ಪರಿಚಯ್

“ಪಾಲ್ಘಾರ್ ಶೆಹರಾಕ್ ಮಿನಿ-ಮಣಿಪಾಲ್ ಕರ್ಚೆಂ ಮ್ಹಜೆಂ ಸ್ವಪಾಣ್ ಜಾವ್ನಾಸಾ”:

– ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ 

“ಹಾಂವ್ ಪಾಲ್ಘಾರಾಕ್ ಮಿನಿ-ಮಣಿಪಾಲ್ ಜಾವ್ನ್ ರುಪಾಂತರ್ ಕರ‍್ಚಾಂತ್ ಸಮರ್ಪಿತ್ ಆಸಾಂ.” – ಹಿಂ ಉತ್ರಾಂ ಜಾವ್ನಾಸಾತ್ ಶ್ರೀ ಆಲ್ಬರ್ಟ್ ಡಬ್ಲ್ಯೂಡಿ’ಸೋಜಾ ಹಾಂಚಿಂ. ಎಕ್ ಬಹು ಮುಖಿ ಉದ್ಯಮಿ, ಶಿಕ್ಪಾ ಶಾಸ್ತ್ರಿ,  ಬಾಷಣ್ಕಾರ್, ಸಮಾಜ್ ಸೆವಿ, ಮಹಾಧಾನಿ ಆನಿ ಆಮ್ಚೊಚ್ ಮಂಗ್ಳೂರ್ ಗಾರ್!  ಪಾಂಗ್ಳ್ಯಾಚಾ ಮೊಗ್ರ್ಯಾ ಕಳ್ಯಾಂಚೊ ಫರ್ಮಳ್ ಎಕ್ ವಿಶಿಷ್ಟ್ ಫರ್ಮಳ್ ಆನಿ ಆಲ್ಬರ್ಟ್ ಸೊಜ್  ಗಾಂವಾನ್ ಪಾಂಗ್ಳಾಚೊ ಜಾಲ್ಲ್ಯಾನ್ ತಸಲಿಚ್ ಎಕ್ ವಿಶಿಷ್ಟತಾ ತಾಚೆ ಥಂಯ್ ಉಟೊನ್ ದಿಸ್ತಾ. 

ಎಕ್ ಸಾದ್ಯಾ ಕೃಷಿಕಾಂಚಾ ಘರಾಣ್ಯಾಂತ್ ಜಲ್ಮ್ ಘೆವ್ನ್ ಆಜ್ ತೊ ಎಕ್ ಊಂಚ್ಲ್ಯಾ ಮಟ್ಟಾಚೊ ಶಿಕ್ಪಾ ಪಂಡಿತ್, ಉದ್ಯಮಿ, ಮಹಾ ದಾನಿ, ಸಮಾಜ್ ಸೆವಕ್ ಜಾಂವ್ಕ್ ಪಾವ್ಲಾ ತರ್ ತಾಚೆ ಪಾಟ್ಲ್ಯಾನ್ ತಾಚೆಂ ಪರಿಶ್ರಮ್, ಜಿದ್ದ್, ಥಿರ್ ವಾವ್ರ್, ದೂರ್ ದೃಷ್ಟಿ ಆನಿ ಶಾಣೆಪಣ್ ಉಟೊನ್ ದಿಸ್ತಾ.  “ಆಲ್ಬರ್ಟ್ ಸೊಜಾನ್ ಆಪಡ್ಲೆಲೆಂ ಭಾಂಗಾರ್ ಜಾತಾ” -ಹಿಂ ಉತ್ರಾಂ ಮ್ಹಜಿಂ ನಹಿಂ ಬಗಾರ್ ಮೊಡೆಲ್ ಬೇಂಕಾಚಾ ಶತಾಬ್ಧಿ ಸುವಾಳ್ಯಾ ವೆಳಾ ಸಭೆಂತ್ ಬಳ್ಳಾರಿಚೊ ಬಿಸ್ಫ್ ಅಧಿಕ್ ಮನಾಧಿಕ್ ಹೆನ್ರಿ ಡಿ’ಸೋಜಾ ಹಾಣಿಂ ಉಚಾರ್ಲೆಲಿಂ ಜಾವ್ನಾಸಾತ್.  ಆನಿ ಖಂಡಿತ್ ಜಾವ್ನ್ ತಾಣೆಂ ಆಪಡ್ಲೆಲೆಂ ಭಾಂಗಾರ್ ಜಾತಾ ತೆಂ ತುಮ್ಕಾಂ ಹೆಂ ಲೆಖನ್ ವಾಚ್ತಾನಾ ರುಜು ಜಾತೆಲೆಂ.

ಎಕ್ ಲ್ಹಾನ್ ಹಳ್ಳೆ ಥಾವ್ನ್ ಮುಂಬಯ್ ಪಾವೊನ್, ಎಕ್ ಸಾದೊ “ಮಂಗ್ಳೂರ್ ಸ್ಟೋರ್” ಸುರ‍್ವಾತ್ ಕರ್ನ್ ಥಂಯ್ ಥಾವ್ನ್ ಪ್ರಿಂಟಾನಿಯಾ ಒಫ್ ಸೆಟ್ಟ್ ಪ್ರಾಯ್ವೆಟ್ ಲಿಮಿಟೆಡ್ ಹಾಚೊ ಎಮ್. ಡಿ., ಆಲ್ಡೆಲ್ ಏಡುಕೇಶನ್ ಟ್ರಸ್ಟ್ ಆನಿ ಮೋಡೆಲ್ ಕೋ-ಓಪರೇಟಿವ್ ಬೇಂಕಾಚೊ ಸಭಾದ್ಯಕ್ಷ್ ಆನಿ ಕ್ರಿಸ್ಚಿಯನ್ ಛೆಂಬರ್ ಆಫ್ ಕೋಮರ್ಸ್ ಎಂಡ್ ಇಂಡಸ್ಟ್ರಿ ಹಾಚೊ ಉಪ-ಕಾರ್ಯಾಧ್ಯಕ್ಷ್ ಆನಿ ಇತರ್ ಸಬಾರ್ ಸಂಸ್ಥ್ಯಾಚೊ ಪದಾಧಿಕಾರಿ ಜಾವ್ನ್ ವಾವುರ್ತಾ ತರ್ ತಾಚಿ ಕಾರ್ಯಾ ನಿಷ್ಟತಾ, ಸಮರ್ಪಿತ್ ಸೆವಾ ಹಾಕಾ ಕಾರಣ್ ಜಾವ್ನಾಸಾತ್.  ಖಂಚಾಯ್ ಎಕಾ ಉದ್ಯಮಾಂತ್ ವಾವುರ್ನ್ ತಾಚಾ ಶಿಖರಾಕ್ ಪಾವ್ಲೆಲೆ ಸಬಾರ್ ದೃಷ್ಟಾಂತ್ ಅಮ್ಕಾಂ ಪಳೆಂವ್ಕ್ ಮೆಳ್ಚೆಂ ಸಹಜ್ ಜಾವ್ನ್ ಆಸಾ. ಪುಣ್ ಎಕ್ ವ್ಯಕ್ತಿ ಸಬಾರ್ ಉದ್ಯಮಾನಿಂ ಅವ್ವಲ್ ದರ್ಜೆಚೆರ್ ಪರ್ಜಳ್ಚೆಂ ಬೋವ್ ಆಪ್ರೂಪ್ ಆನಿ ತಸಲ್ಯಾಂ ಮಧ್ಲೆಂ ಎಕ್ ಥಿಕ್ ಜಾವ್ನಾಸಾ ಆಲ್ಬರ್ಟ್ ಡಬ್ಲ್ಯೂ ಡಿ’ಸೋಜಾ. 

1957 ಇಸ್ವೆಂತ್ ವರ‍್ಸಾಚಾ ಪಯ್ಲ್ಯಾ ದಿಸಾ ಪಾಂಗ್ಳಾಚಾ ಶ್ರೀ ಆಲೆಕ್ಸ್ ಆನಿ ಎಲಿಜಾಬೆತ್ ಡಿ’ಸೋಜಾ ಹಾಂಚಾ ಸಾತ್ ಜಣಾ ಬುರ್ಗ್ಯಾಂ ಪಯ್ಕಿ ತೊ ಚೊವ್ತೊ ಜಾವ್ನ್ ತಾಣೆ ಜನಮ್ ಘೆತ್ಲೊ.  ವರ್ಸಾಚಾ ಪಯ್ಲೊ ದಿಸ್ ಆನಿ ತಾಣೀ ಕರ್ಚಾ ಹರ್ಯೆಕಾ ಕಾಮಾಂತ್ ತೆ ಪಯ್ಲೆ ಹೆಂ ಪಳೆತಾನಾ ಸಬಾರಾಂಕ್ ಆಪುಣೀ ವರ್ಸಾಚಾ ಪಯ್ಲ್ಯಾ ದಿಸಾ ಜಲ್ಮಾಲ್ಲೊಂ ತರ್ ಬರೆಂ ಜಾತೆಂ ಮ್ಹಣೊನ್ ಭೊಗ್ಚೆಂ ಆಸಾ. ಪಾಂಗ್ಳಾ ಮೊಗ್ರ್ಯಾ ಕಳ್ಯಾಂಕ್ ನಾಂವಾಡ್ಲಾ ಆನಿ ಆಲ್ಬರ್ಟಾಚಾ ವ್ಹಡಿಲಾಂಕ್ ಮೊಗ್ರ್ಯಾಚಿ ಕೃಷಿ ಆ‍ಸ್‍ಲ್ಲಿ.  ಸಕಾಳಿಂ ತೆ ಕಳೆ ಜಡಾಂತ್ಲೆಂ ಕಾಡ್ನ್, ತಾಂಕಾಂ ಬಾಂದುನ್, ವೆಳಾರ್ ಆಂಗ್ಡಿ ಪಾವೊಂಕ್ ಆಸ್ತಾ.   ಹಿ ಎಕ್ ಶಿಸ್ತ್ ಪಾಳಿನಾ ತರ್ ತ್ಯಾ ಫುಲಾಂಕ್ ಫಾವೊ ತೆಂ ಮೋಲ್ ಮೆಳಾನಾ.  ವೇಳಾಚೊ ಮಹತ್ವ್ ಬೋವ್ ಗರ್ಜೆಚೊ ಆನಿ ತೆಂ ಶಿಸ್ತ್ ಭುರ್ಗ್ಯಾ ಪಣಾರ್ ಆಲ್ಬರ್ಟಾ ಥಂಯ್ ಖಂಚೊನ್ ಗೆಲಾಂ.  ಆಜ್ ಕಾಲ್ ಜಾಲ್ಯಾರೀ ತೆ ಆಪ್ಲ್ಯಾ ಉದ್ಯಮಾಂಚಾಕೀ ಚಡ್ ವೇಳ್ ಆಪ್ಲ್ಯಾ ಸಾಮಾಜಿಕ್ ಕಾರ್ಯಾಂಕ್ ದಿತಾತ್ ತೆ ಪಳೆತಾನಾ ತಾಂಚೆ ದೀಸ್ ಪಕತ್ತ್ ಚೊವೀಸ್ ವರಾಂಚೆಂ ಯಾ ತಾಚಾಕೀ ವ್ಹಡ್ ಹೆಂ ಹಾಂವೆಂ ಸಬಾರ್ ಪಾವ್ಟಿಂ ಚಿಂತ್ಚೆಂ ಆಸಾ.  ವೆಳಾಚೊ ಪ್ರಭಾವಿಕ್ ಥರಾನ್ ಬರೊ ವಾಪಾರ್ ಕಸೊ ಕರ್ಚೊ ತೆಂ ತಾಂಚೆ ಥಾವ್ನ್ ಶಿಕಾಜಯ್.

ಅಪ್ಲೆಂ ಪ್ರಾಥಮಿಕ್ ಶಿಕಾಪ್ ಪಾಂಗ್ಳಾಚಾ ಸೈಂಟ್ ಜೋನ್ ಹಾಯರ್ ಪ್ರಾಯ್ಮರಿ ಇಸ್ಕಲಾಂತ್  ಆನಿ ಉಡ್ಪಾಚಾ ಸೊಧೆ ಮಠಾನ್ ಚಲಂವ್ಚಾ  ಎಸ್. ವಿ. ಎಚ್. ಹೈಸ್ಕೂಲಾ ಥಾವ್ನ್ ಸಂಪವ್ನ್, ಆಪ್ಲ್ಯಾ ಫುಡಾರಾಚಾ ಸೊದ್ನೆರ್ ತೊ ಮಾಯಾ ನಗರಿ  ಮುಂಬಯ್ ಪಾವ್ತಾ.  ಬೊರಿವ್ಲಿಚಾ ಸೈಂಟ್ ಫ್ರಾನ್ಸಿಸ್ ಟೆಕ್ನಿಕಲ್ ಇನ್‍ಸ್ಟಿಟ್ಯೂಟ್ ಥಾವ್ನ್ ಪ್ರಿಟಿಂಗ್ ಟೆಕ್ನೊಲೊಜಿಂತ್ ಪ್ರವಿಣತಾ ಆಪ್ಣಾವ್ನ್ ಎಕಾ ನಾವಾಡ್ದೀಕ್ ಪ್ರಿಂಟಿಂಗ್ ಕಂಪೆನಿಂತ್ ಎಪ್ರೆಂಟಿಸ್ ಜಾವ್ನ್ ಆಪ್ಲ್ಯಾ ಫುಡಾರಾಚಿ ಸುರ‍್ವಾತ್ ತೊ ಕರ್ತಾ.

1981 ತಾಣೆಂ ಆಪ್ಲ್ಯಾ ಪುಡಾರಾಚೆಂ ಪಯ್ಲೆಂ ಮೇಟ್ ಘೆತ್ಲೆಂ ಮ್ಹಣ್ಯೆತಾ ಜೆದ್ನಾಂ ತಾಣೆಂ ಮೌಂಟ್ ವೀವ್ ಮೆಂಗಲೊರ್ ಸ್ಟೊರ್ಸ್ ಆನಿ ಕೋಲ್ಡ್ ಸ್ಟೊರೆಜ್ ಹಾಚಿ ಸುರ‍್ವಾತ್ ಬೊರಿವ್ಲಿಂತ್ ಕೆಲಿ.  ತ್ಯಾ ದಿಸಾನಿಂ ತೊ ಎಕ್ ಮೆನೆಜ್ ಮೆಂಟ್ ಟ್ರೈನಿ ಜಾವ್ನ್ ಎಕಾ ಪ್ರಿಂಟಿಂಗ್ ಪ್ರೆಸ್ಸಾಂತ್ ಕಾಮ್ ಕರ್ತಾಲೊ.  ತಾಚಿ ಶಾಥಿ ಪಳೈಲ್ಲ್ಯಾ ತ್ಯಾ ಕಂಪೆನಿಚಾ ಎಮ್. ಡಿ.-ನ್ ಆಲ್ಬರ್ಟಾಕ್ ಜೆ. ಜೆ. ಸ್ಕೂಲ್ ಆಫ್ ಆರ್ಟ್ಸ್ ಹಾಂತುಂ ಪ್ರಿಂಟ್ಟಿಂಗಾಂತ್ ಪಾರ್ಟ್ ಟೈಮ್ ಡಿಪ್ಲೊಮಾ ಕರ್ಚಿ ಸವ್ಲತಾಯ್ ಒದಗ್ಸುನ್ ದಿಲಿ. ಆಶೆಂ ಪ್ರಿಂಟಿಂಗ್ ಕ್ಷೇತ್ರಾಂತ್ ಆಧುನಿಕ್ ತರ್ಭೆತಿ ಜೊಡ್‍ಲ್ಲೊ ತೊ 1982 ವರ್ಸಾ ತೇಗ್ ಕಾಮ್ಗಾರಾಂಕ್ ಘೆವ್ನ್ ಅಪ್ಲೆಂ ಸ್ವತಾಚೆಂ ಪ್ರೆಸ್ಸ್ ಸುರ‍್ವಾತ್ ಕರ್ತಾ. ಆನಿ ಆಜ್ ತೆಂ ಲ್ಹಾನ್ ಮಟ್ಟಾರ್ ಆಸಾ ಕೆಲ್ಲೆಂ ಪ್ರಿಂಟ್ಟಿಂಗ್ ಪ್ರೆಸ್ಸ್ ಪ್ರಿಂಟಾನಿಯಾ ಒಫ್ಸೆಟ್ ಪ್ರಾಯ್ವೆಟ್ ಲಿಮಿಟೆಡ್ ಜಾವ್ನ್ ಸಂಸಾರ್ ಬರ್ ನಾಂವಾಡ್ಲಾಂ. ಆಜ್ ತಾಂಚಾ ಗ್ರಾಹಕಾ ಪಯ್ಕಿಂ ಅಂತಾರಾಷ್ಟ್ರೀಯ್ ವಕ್ತಾ ಕಂಪೆನಿ, ಇನ್ಸುರೆನ್ಸ್, ಪೆಟ್ರೊಕೆಮಿಕಲ್ಸ್, ಶಿಕ್ಪಾ ಸಂಸ್ಥೆಂ ಆನಿ ಸಬಾರ್ ಬೇಂಕಾ ಮೆಳೊನ್ ಆಸಾತ್.  ಬೈಬಲ್ ಪ್ರಿಂಟ್ ಕರ್ಚಾಂತ್ ಪ್ರಿಂಟಾನಿಯಾಚೆಂ ನಾಂವ್ ಪಯ್ಲ್ಯಾ ದರ್ಜೆರ್ ಆಸಾ.  ಇಂಗ್ಲಿಷ್, ಹಿಂದಿ, ಕೊಂಕ್ಣಿ ಆನಿ ಇತರ್ ಭಾಸಾನಿಂ ಲಾಖಾನಿಂ ಬೈಬಲ್ ಪ್ರಿಂಟ್ ಕರ್ಚೆ ಖಾತಿರ್ ತೆಂ ನಾವಾಡ್ಲಾಂ. ಪ್ರಿಂಟಾನಿಯಾ ಲಗ್ ಬಗ್ 13  ಭಾಸಾನಿಂ ಪ್ರಿಂಟ್ಟಿಂಗಾಚೆಂ ಕಾಮ್ ಕರ್ತಾ.  ತಾಂತ್ರಿಕ್ ಆಧುನಿಕರಣ್ ಆಲ್ಬರ್ಟಾಚೆಂ ಮಂತ್ರ್ ಜಾವ್ನಾಸಾ.  ಪ್ರಗತೆ ಪ್ರಮಾಣೆ ವಿದೇಶಾಂ ಥಾವ್ನ್ ನವ್ಯ ನವ್ಯಾ ಯಂತ್ರಾಚೊ ಆಯಾತ್ ಕರ್ನ್, ಪ್ರಿಂಟಿಂಗ್ ಸವ್ಲಾತಾಯೆ ವಾಡೊವ್ನ್, ತಾಚೆಂ ಪ್ರಿಟ್ಟಿಂಗ್ ಪ್ರೆಸ್ಸ್ ಎಕ್ ಆಧುನಿಕ್  ಪ್ರೆಸ್ಸ್ ಕರ್ಚಾಂತ್ ತೊ ಶೆಂಬರ್ ಠಕ್ಕೆ ಯಶಸ್ವಿ ಜಾಂವ್ಕ್ ಪಾವ್ಲಾ.

ಶಿಕ್ಪಾ ಕ್ಷೆತ್ರಾಂತ್ –  

ಕೊಂಕ್ಣಿ ಸಮುದಾಯಾಂತ್ ಭುರ್ಗ್ಯಾಂಕ್ ಜಾಯ್ ತಶೆಂ ತಾಂತ್ರಿಕ್ ಶಿಕಾಪ್ ದಿಂವ್ಚ್ಯಾ ಶಿಕ್ಪಾ ಸಂಸ್ಥ್ಯಾಚೆಂ ಉಣೆಪಣ್ ಆಲ್ಬರ್ಟಾಕ್ ಧೊಸುನ್ ಆಸ್‍ಲ್ಲೆಂ.  ಹೆಂ ಉಣೆಪಣ್ ಪಯ್ಸ್ ಕರ್ಚೆ ಖಾತಿರ್ ತಾಣೆ ಕಾಡ್ಲೆಲಿ ವಾಂವ್ಟ್ ಆತಾಂ ಫಳ್ ದಿವ್ನ್ ಆಸಾ. ಚಾರ್ ಇಂಜಿನಿಯರಿಂಗ್ ಕೊಲೆಜಿ ಆನಿ ತೀನ್ ಮೆನೆಜ್ ಮೆಂಟ್ ಕೊಲೆಜಿ ಮುಂಬಂಯ್ತ್ ಆನಿ ಧಾ ಕೊಲೆಜಿ ಇತರ್ ರಾಜ್ಯಾನಿಂ ಪ್ರಾರಂಭ್ ಜಾಲ್ಲೆಂ ತಾಚಾ ಮಿನ್ಹತೆಚೊ ಫಳ್ ಜಾವ್ನಾಸಾ. ಮಂಗ್ಳೂರಾಂತ್ ಸೈಂಟ್ ಜೊಸೆಫ್ ಇಂಜಿನಿಯರಿಂಗ್ ಕೊಲೆಜ್ ಸುರ‍್ವಾತ್ ಕರ್ತಾಸ್ತಾನಾ ತಾಚೊ ಮೊಟೊ ಸಹಕಾರ್ ಆಸ್‍ಲ್ಲೊ.  ಆತಾಂ ತೊ ಸಬಾರ್ ಕೊಲೆಜಿಂಚಾ ಆಡಳ್ತೆ ಮಂಡಳಿಂಚೊ ಸಾಂದೊ ಜಾವ್ನ್ ತಾಂಕಾಂ ಆಮೂಲ್ಯ್ ಸೆವಾ ದಿವ್ನ್ ಆಸಾ.

ಮುಂಬಯ್ ಲಾಗ್ಸಾರ್ ಫಾಲ್ಘರ್ ಶೆರಾಂತ್ ತಾಣೆ ಆಪ್ಲೆಂಚ್ ಎಕ್ ಶಿಕ್ಪಾ ಕೇಂದ್ರ್ ಆಸಾ ಕೆಲಾಂ.  ಥಂಯ್ಸರ್ ಸೈಂಟ್ ಜೋನ್ ಕೊಲೆಜ್ ಆಫ್ ಇಂಜಿನಿಯರಿಂಗ್ ಎಂಡ್ ಟೆಕ್ನೊಲೊಜಿ, ಸೈಂಟ್ ಜೋನ್ ಇನ್‍ಸ್ಟಿಟ್ಯೂಟ್ ಆಫ್ ಫಾರ್ಮೆಸಿ ಎಂಡ್ ರೀಸರ್ಚ್, ಸೈಂಟ್ ಜೋನ್ ಇನ್‍ಸ್ಟಿಟ್ಯೂಟ್ ಆಫ್ ಹೊಸ್ಪಿಟ್ಯಾಲಿಟಿ ಎಂಡ್ ಟೆಕ್ನೊಲೊಜಿ ಆಸಾ ಕೆಲ್ಯಾತ್. ಸಾಂಗಾತಾಚ್ ಸೈಂಟ್ ಜೋನ್ ಇನ್‍ಸ್ಟಿಟ್ಯೂಟ್ ಆಫ್ ಹ್ಯುಮಾನಿಟಿಸ್ ಎಂಡ್ ಸಾಯೆನ್ಸಸ್, ಸೈಂಟ್ ಜೋನ್ ಪೊಲಿಟೆಕ್ನಿಕ್ , ಆಲ್ಡೆಲ್ ಟ್ಯುಟೋರಿಯಲ್ ಆಕಾಡಮಿ ಆನಿ ಸೈಂಟ್ ಜೋನ್ ಇಂಟರ್ ನೇಶನಲ್ ಸ್ಕೂಲ್ ಅಶೆಂ ಕೆಜಿ [KG] ಥಾವ್ನ್ ಪಿಜಿ [PG] ಮ್ಹಣಾಸರ್ 4 ಹಜರಾಂ ವಯ್ರ್ ವಿಧ್ಯಾರ್ಥಿಂಕ್ ಶಿಕಾಪ್ ದಿವ್ನ್ ಆಸಾ. 

ಪಾಲ್ಘರ್ ಶೆರಾಕ್ ಎಕ್ ಮಿನಿ-ಮಣಿಪಾಲ್ ಕರ್ಚೆಂ ತಾಚೆಂ ಸ್ವಪಾಣ್ ಆತಾಂ ಜ್ಯಾರಿ ಜಾತೇ ಆಸಾ ತಿ ಸಂತೊಸಾಚಿ ಗಜಾಲ್.  ಪಾಲ್ಘರ್  ವಿಶಿಂ ಉಲಯ್ತಾನಾ ತೊ ಅಶೆಂ ಮ್ಹಣ್ತಾ: “ಹಾಂವ್ ಎಕಾ ಕೃಶಿ ಪ್ರಧಾನ್ ಕುಟ್ಮಾಂತ್ ಜಲ್ಮಲ್ಲೊಂ ದೆಕುನ್ ಮ್ಹಾಕಾ ತಾಚೊ ಅಭಿಮಾನ್ ಲ್ಹಾನ್ಪಣಿ ಥಾವ್ನ್ ಆಸ್‍ಲ್ಲೊ.  ದೆಕುನ್ ಹಾಂವೆಂ ಮುಂಬಯ್ ಲಾಗ್ಸಾರ್ ಪಾಲ್ಘರಾಂತ್ 20 ಎಕ್ರೆ ಜಾಗೊ ಮೊಲಾಕ್ ಘೆತ್ಲೊ ಆನಿ ತಾಂತುಂ ಕೃಶಿ ಕರುಂಕ್ ಸುರು ಕೆಲೆಂ.  ತಾಂದುಳ್, ಮಾಡ್ ಆನಿ ಚಿಕ್ಕುಚಿಂ ಜಡಾಂ ಆನಿ ಇತರ್ ಕೃಶಿ ಕರಯ್ತಾಲೊಂ.  ಆಶೆಂ ಚಲೊನ್ ಆಸ್ತಾನಾ ಪಾಲ್ಘಾರಾಂತ್ ಚಡ್ ಶಿಕ್ಪಾ ಸಂಸ್ಥೆಂ ನಾತ್‍ಲ್ಲೆಂ ಆನಿ ಊಂಚ್ಲ್ಯಾ ಶಿಕ್ಪಾಚೆ ಕಸಲೆಚ್ ಕೊಲೆಜಿ ನಾತ್‍ಲ್ಲೆಂ ಮ್ಹಜಾ ಗುಮನಾಕ್ ಆಯ್ಲೆಂ.  ಹಾಂವೆಂ ತೆ ವಿಶಿಂ ಸ್ಥಾನಿಯ್ ಕ್ರಿಸ್ತಾಂವ್ ಬಾವಾಲಾಗಿಂ ವಿಚಾರ್ ವಿಮರ್ಸೊ ಕೆಲೊ. ತಾಂಚೊ ಮ್ಹಾಕಾ ಪಾಟಿಂಬೊ ಲಾಬ್ಲೊ. ಆನಿ ಕ್ರಮೇಣ್ 2008 ಇಸ್ವೆಂತ್ ಆಲ್ಡೇಲ್ ಏಡುಕೇಶನ್ ಟ್ರಸ್ಟಾ ದ್ವಾರಿಂ ಥಂಯ್ಸರ್ ಆತಾಂಚೆಂ ಶಿಕ್ಪಾ ಸಂಕುಲ್ ಆಸಾ ಕರ‍್ಚಾಂತ್ ಯಸಶ್ವಿ ಜಾಲೊಂ” – ಮ್ಹಣ್ತಾ ತೊ.

ಪಾಲ್ಘಾರಾಂತ್ ಎಕ್ ಮೆಡಿಕಲ್ ಕೊಲೆಜ್, ಎಕ್ ಆರ್ಕಿಟೆಕ್ಚರಲ್ ಆನಿ ಲಾ ಕೊಲೆಜ್ ಸುರ‍್ವಾತ್ ಕರ್ಚಿ ತಾಂಚಿ ಆಶಾ ವೆಗಿಂಚ್ ಸುಫಳ್ ಜಾತೆಲಿ.  ಸರ್ವ್ ಸಮುದಯಾಂಚಾ ವಿಧ್ಯಾರ್ಥಿಂಕ್  ಹ್ಯೊ ಸವ್ಲತಾಯೊ ಉಗ್ತೆ ಆಸ್ತೆಲೆ” -ಮ್ಹಣ್ತಾ ಆಲ್ಬರ್ಟ್.

ಬೇಂಕಿಂಗ್ ಕ್ಷೇತ್ರಾಂತ್:

ಆಲ್ಬರ್ಟ್ ಡಬ್ಲ್ಯೂ. ಡಿ’ಸೋಜಾ  ಮೋಡೆಲ್ ಕೋ-ಓಪರೇಟಿವ್ ಬೇಂಕ್ ಲಿಮಿಟೆಡ್ ಹಾಚೊ ಕಾರ್ಯಾಧ್ಯಕ್ಷ್ ಜಾವ್ನ್ ವಾವುರ್ನ್ ಆಸಾ.  ಹಾಚೆ ಪಾಟ್ಲ್ಯಾನೀ ಎಕ್ ಉದ್ಧೇಶ್ ಆಸಾ.  ಮಂಗ್ಳೂರ್ ಮುಳಾಚಾ ಉದ್ಯಮಿಂಕ್ ಲೋನ್ ಮೆಳೊಂವ್ಕ್ ಕಷ್ಟ್ ಜಾತಾಲೆ.  ರಾಷ್ಟ್ರಿಕೃತ್ ಬೇಂಕಾ ಲೋನ್ ದಿಂವ್ಕ್ ಪಾಟಿಂ ಸರ್ತಾಲಿಂ ದೆಕುನ್ ಆಮ್ಚಾ ಉದ್ಯಮಿಂಕ್ ಸಹಕಾರಿ ಬೇಂಕಾಚಿಂ, ಚಡ್ ಕರ್ನ್ ಮಂಗ್ಳೂರೀ ಮುಳಾಚಾ ಬೇಂಕಾಚಿ ಗರ್ಜ್ ಮ್ಹಣ್ ತಾಕಾ ದಿಸ್ಲಿ.  ಸಹಾಕಾರಿ ಬೇಂಕಿಂಗ್ ಕ್ಷೇತ್ರಾಂತ್ ನಾಂವಾಡ್ಲೆಲೊ ಶ್ರೀ ಜೋನ್ ಡಿ’ಸಿಲ್ವಾ ಆಯಿನ್ನ್ ವೆಳಾರ್ ಏಕ್ ಕ್ರೆಡಿಟ್ ಸೊಸಾಯ್ಟಿಕ್ ಬೇಂಕ್ ಮ್ಹಣ್ ಪರಿವರ್ತನ್ ಕರ್ಚೆ ಖಾತಿರ್ ಮುಕಾರ್ ಸರ್ಲೊ.  ತಕ್ಷಣ್ ಆಲ್ಬರ್ಟ್ ಡಿ’ಸೋಜಾ ತ್ಯಾ ಪಂಗ್ಡಾಕ್ ಸೆರ್ವಾಲೊ ಆನಿ ಆಪ್ಲೊ ಪುರ್ತೊ ಸಹಕಾರ್ ದಿಂವ್ಕ್ ಲಾಗ್ಲೊ.  ದಿ ಮೆಂಗ್ಳೊರಿಯನ್ ಕೊ-ಓಪರೇಟಿವ್ ಕ್ರೆಡಿಟ್ ಸೊಸಾಯ್ಟಿ ಲಿಮಿಟೆಡ್ ಆಸ್ಲೆಲಿ ಶ್ರೀ ಜೋನ್ ಡಿ’ಸಿಲ್ವಾಚಾ ಕಾರ್ಯಾಧ್ಯಕ್ಶ್ ಪಣಾಖಾಲ್, ದಿ ಮೋಡೆಲ್ ಕೋ-ಓಪರೇಟಿವ್ ಬೇಂಕ್ ಲಿಮಿಟೆಡ್ ಜಾವ್ನ್ ಪರಿವರ್ತಿತ್ ಜಾಲಿ..  ಉಪ್ರಾಂತ್ ಆಲ್ಬರ್ಟ್ ತ್ಯಾ ಬೇಂಕಾಚೊ ಉಪ-ಕಾರ್ಯಾಧ್ಯಕ್ಷ್ ಆನಿ ಕ್ರಮೇಣ್ ಕಾರ್ಯಾಧ್ಯಕ್ಷ್ ಜಾವ್ನ್ ವಿಂಚುನ್ ಆಯ್ಲೊ.

ಬೇಂಕಾಚೆ ಪ್ರಸ್ತುತ್ 21 ಶಾಖೆ ಆಸೊನ್ NRE ಸೆವಾ ಸಮೇತ್ ಹರ್ಯೆಕ್ ಥರಾಚಿ ಬೇಂಕಿಂಗ್ ಸೆವಾ ಉಪಲಬ್ಧ್ ಆಸಾ ಜಾಲ್ಲ್ಯಾನ್, ಕೊಂಕ್ಣಿ ಲೋಕಾನ್ ಹಾಂಚೊ ಪಾಯ್ಧೊ ಘೆವ್ನ್ ಬೇಂಕಾಚಾ ಆಭಿವೃದ್ದೆ ಸಾಂಗಾತಾ ಹಾತಾಕ್ ಹಾತ್ ಮೆಳೊಂಕ್ ಉಲೊ ದಿಲೊ. ಹೆಂ ಬೇಂಕ್  ಪ್ರಗತೆಚಾ ವಾಟೆನ್ ಪಾವ್ಲಾಂ ಕಾಡುನ್ ಆಸಾ ತರ್ ಆಲ್ಬರ್ಟ್ ಡಿ’ಸೋಜಾ ಹಾಂಚೊ ಪುರ್ತೊ ಸಹಕಾರ್ ಹಾಚೆ ಪಾಟ್ಲ್ಯಾನ್ ಉಟೊನ್ ದಿಸ್ತಾ.

ಸಮಾಜ್ ಸೆವಾ

ಆಲ್ಬರ್ಟ್ ಡಿ’ಸೋಜಾ ಮುಂಬಂಯ್ತ್ಲ್ಯಾ ಸಬಾರ್ ಸಂಘ್ ಸಂಸ್ಥ್ಯಾನಿಂ ಸಕ್ರೀಯ್ ಪಾತ್ರ್ ಖೆಳೊನ್ ಆಸಾ. ಆಪ್ಲ್ಯಾ ಉದ್ಯಮಾಂಚಾ ರಾಠಾವಳಿಂ ಮಧೆಂ ಹರ್ಯೆಕಾ ಸಂಘಾಚಾ ದೈನಿಕ್ ಕಾರ್ಯಾವಳಿಂ ವಿಶೀಂ ಬಾರ್ಕಾಯೆನ್ ಜತನ್ ಘೆತಾ.  ಥೊಡೆ ಪಾವ್ಟಿಂ ತೊ ವೆಳಾ ಪಯ್ಲೆಂಚ್ ಮಿಟಿಂಗಾಂಕ್ ಹಾಜಿರ್ ಜಾಂವ್ಚೆಂ ಪಳೆತಾನಾ, ತಾಚ್ಯಾ ಘಡಿಯಾಳ್ಯಾಂತ್ 24 ವರಾಂಚಾಕೀ ಚಡ್ ವೇಳ್ ಆಸಾಗಾಯ್ ಮ್ಹಣ್ ಭೊಗ್ತಾ.  ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಹಾಚೊ ತೆ ಉಪಾಧ್ಯಕ್ಷ್ ಜಾವ್ನ್ ಸಬಾರ್ ವರ್ಸಾಂ ಥಾವ್ನ್ ಸೆವಾ ದಿತೇ ಆಸಾತ್.  ಹ್ಯಾ ಸಂಸ್ಥ್ಯಾನ್ ಹ್ಯಾಚ್ ವರ್ಸಾ ಆಪ್ಲಿ ಪ್ಲಾಟಿನಮ್ ಜುಬಿಲೀ ವ್ಹಡಾ ದಬಾಜ್ಯಾನ್ ಆಚಾರ್ಸಿಲಿ.  ಆನಿ ಆತಾಂ ಹೊ ಸಂಸ್ಥೊ ಜನೆವರಿಂತ್ ಮುಂಬಂಯ್ತ್ ಅಖಿಲ್ ಬಾರತೀಯ್ ಕೊಂಕ್ಣಿ ಪರಿಷದೆಚೆಂ 31-ವೆಂ ಆಧಿವೇಶನ್ ಶಿವಾಜಿ ಪಾರ್ಕ್, ಮುಂಬಯ್ ಹಾಂಗಾಸರ್ ಅಖಿಲ್ ಬಾರತೀಯ್ ಕೊಂಕ್ಣಿ ಪರಿಷದೆಚಾ ಜೋಡ್ ಅಶ್ರಯಾಖಾಲ್ ಆಸಾ ಕರ‍್ಚಾರ್ ಆಸಾ. ಹಾಚೆ ಪಾಟ್ಲ್ಯಾನ್ ಶ್ರೀ ಆಲ್ಬರ್ಟ್ ಡಿ’ಸೋಜಾಚೊ ಪುರ್ತೊ ಸಹಕಾರ್ ಆಸಾ.   ಕೆನರಾ ಕೊಂಕಣಿ ಎಸೋಸಿಯೇಶನ್, ಬೊರಿವ್ಲಿ, ಆನಿ  ಇತರ್ ಸಬಾರ್ ಸಂಘ್ ಸಂಸ್ಥ್ಯಾನಿಂ ತೊ ನಿರಂತರ್ ಸೆವಾ ದಿವ್ನ್ ಆಸಾ.

ಫಾವೊ ಜಾಲ್ಲೆ ಪುರಸ್ಕಾರ್

ತಾಕಾ ಸಬಾರ್ ಪುರಸ್ಕಾರ್ ಫಾವೊ ಜಾಲ್ಯಾತ್. ತಾಂಚೆಂ ಪಯ್ಕಿ ಥೊಡೆಂಚ್ ಹಾಂಗಾಸರ್ ಉಲ್ಲೆಖ್ ಕರ್ಚೆ ತರ್ ರಚನಾ ಎಂಟ್ರಪ್ರನರ್ ಆಫ್ ದ ಇಯರ್, ಪೇಪಲ್ ಆವಾರ್ಡ್ ಫಾರ್ ಪ್ರಿಂಟಿಂಗ್ ಎಂಟ್ರಪ್ರನರ್ (ರೋಮ್ 2004), ಕಥೊಲಿಕ್ ಎಂಟ್ರಪ್ರನರ್ ಆಫ್ ಕರ್ನಾಟಕ (FKCA ಥಾವ್ನ್) ಗ್ಲೋಬಲ್ ಎಂಟ್ರಪ್ರನರ್ ಆವಾರ್ಡ್ (2012) ಜಾವ್ನಾಸಾತ್.

ಸಂಪನ್ಮೂಳ್ ವ್ಯಕ್ತಿ

ಆಮ್ಚಾ ತರ್ನಾಟ್ಯಾನಿಂ ಉದ್ಯಮಿ ಜಾವ್ನ್ ಹೆರಾಂಕ್ ಕಾಮಾಂ ದಿಂವ್ಕ್ ಜಾಯ್ ಹೆಂ ಆಲ್ಬರ್ಟಾಚೆಂ ಎಕ್ ಸ್ವಪಾಣ್ ಜಾವ್ನಾಸಾ.  ಹಾಚೆ ಖಾತಿರ್ ಆಮ್ಚಾ ಸಮಾಜಿಚಾ ತರ್ನಾಟ್ಯಾಂಕ್ ಫಾವೊ ತ್ಯಾ ವೆಳಾರ್ ಫಾವೊ ತಿ ಮ್ಹಾಹೆತ್ ದಿಂವ್ಚೆಂ ಖಾತಿರ್ ಮಂಗ್ಳೂರ್, ಮುಂಬಯ್ ಆನಿ ಇತರ್ ಜಾಗ್ಯಾನಿಂ ಆಸಾ ಕರ್ಚಾ ಶಿಬಿರಾನಿಂ ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಭುರ್ಗ್ಯಾಂಕ್ ಗರ್ಜೆಚಿ ಮಾಹೆತ್ ದಿತಾ. ಚಡ್ ಆನಿ ಚಡ್ ವಿಧ್ಯಾರ್ಥಿನಿಂ ಮುಕ್ಲೆಂ ಶಿಕಾಪ್ ಜೊಡ್ನ್ ಆಮ್ಚಾಚ್ ದೇಶಾಂತ್ ಪ್ರಗತಿ ಜೊಡಿಜಯ್ ಹೆಂ ತಾಚೆಂ ಧೊರಣ್ ಜಾವ್ನಾಸಾ.

ಹರ್ಯೆಕಾ ಯಶಸ್ವಿ ದಾದ್ಲ್ಯಾ ಪಾಟ್ಲ್ಯಾನ್ ಎಕ್ ಸ್ತ್ರೀ ಆಸ್ತಾ ಹಿ ಸಾಂಗ್ಣಿ ಆಪುಣ್ ಚಿಂತ್ನಾನ್, ಸಬ್ಧಾನ್ ಆನಿ ಕರ್ನೆನ್ ಮಾಂದ್ತಾ ಮ್ಹಣ್ತಾ ಆಲ್ಬರ್ಟ್ ಆಪ್ಲ್ಯಾ ಪತಿಣೆಚಾ ಸಹಕಾರಾ ವಿಶಿಂ ಉಲಯ್ತಾನಾ. ಪತಿಣ್ ಎಲ್ವಿನಾಚೊ ಪುರ್ತೊ ಸಹಕಾರ್ ಆನಿ ಭುರ್ಗ್ಯಾಂ ಥಾವ್ನ್ ಪ್ರೇರಣ್ ಘೆವ್ನ್ ಮ್ಹಜೆಂ ಕಾಮ್ ಕರುಂಕ್ ಉರ್ಭಾ ಮೆಳ್ತಾ ಮ್ಹಣ್ತಾ ಆಪ್ಲ್ಯಾ ಕುಟ್ಮಾ ವಿಶಿಂ ಉಲವ್ನ್.

ಆಲ್ಬರ್ಟ್ ಸೊಜ್ ಕೊಂಕ್ಣಿ  ಕಥೊಲಿಕ್ ಮಂಗ್ಳೂರಿಯನ್ ಲಾಯಿಕಾಂ ಪಯ್ಕಿಂ ಎಕ್ ಇಂಜಿನಿಯರಿಂಗ್ ಕೊಲೆಜ್ ಸುರ‍್ವಾತ್ ಕರ್ಚಾಂತ್ ಪಯ್ಲೊ ವ್ಯಕ್ತಿ ಜಾವ್ನಾಸಾ –  ಹೊ ಎಕ್ ದಾಕ್ಲೊ ಜಾವ್ನಾಸಾ.  ತಾಚ್ಯಾ ಕೊಲೆಜಿನಿಂ ಶೆಂಬರ್ ಠಕ್ಕೆ ವಿಧ್ಯಾರ್ಥಿ ಆಸೋನ್ ಸರ್ವ್ ಆಧುನಿಕ್ ಸವ್ಲತಾಯೊ ಉಪಲಭ್ದ್ ಆಸಾ ಕೆಲ್ಯಾತ್.

ತೊ  Printania Offset Pvt. Ltd. ಹಾಚೊ ಮ್ಹಾಲಕ್ ಆನಿ ಕಾರ್ಯಾದ್ಯಕ್ಷ್ ಜಾವ್ನಾಸಾ. ಭಾರತೀಯ್ ರೈಲ್ವೆ ಆನಿ ಡಿಫ಼ೆನ್ಸ್ ಹಾಂಕಾಂ “ಪವರ್ ಸಪ್ಲಾಯ್ ಸಿಗ್ನಲಿಂಗ್ ಸಿಸ್ಟಮ್ಸ್” ಇನ್ಸ್ಟ್ರುಮೆಂಟ್ಸ್ ಉಪಲಬ್ಧ್ ಕರ್ಚಾ Brisk Instruments company ಹ್ಯಾ ಕಂಪೆನಿಚೊ ತೊ ಮೆನೆಜಿಂಗ್ ಡೈರೆಕ್ಟರ್ ಜಾವ್ನಾಸಾ. ತಾಣೆಂ ಸ್ಥಾಪನ್ ಕೆಲ್ಲೆ ಥೊಡೆ ಶಿಕ್ಪಾ ಸಂಸ್ಥೆ:

St. John College of Engineering and Technology,

St. John Institute of Pharmacy and Research

St. John Institute of Management and Research

St. John Degree College / St. John Polytechnic

St. John International School

ಹ್ಯಾ ಸಂಸ್ಥ್ಯಾನಿಂ ತೆ ಸಕ್ರೀಯ್ ಸೆವಾ ದಿವ್ನ್ ಆಸಾತ್:

Chairman – Model Co-op Bank Ltd.

Vice Chairman – Christian Chamber of Commerce and Industry

Adviser: Higher & Technical Education – Archdiocesan Board of Education, Mumbai  &   Diocese of Mangalore.

Member – Catholic Council of India

Executive Committee Member: St. Francis Institute of Technology, Borivli, Mumbai

Don Bosco Institute of Technology, Kurla, Mumbai

Xavier Institute of Engineering, Mahim, Mumbai

St. Joseph’s Engineering College, Mangalore

St. Aloysius Institute of Technology, Jabalpur

Don Bosco Degree College, Kurla, Mumbai

St. Francis Institute of Management and Research, Borivli, Mumbai

Xavier  Institute of Management and Research, Fort, Mumbai

Karuna Hospital, Borivli / Holy Family Hospital, Bandra, Mumbai

Holy Spirit Hospital, Andheri, Mumbai.