ಕ್ರಿಸ್ ಪೆರ್ರಿ – ಸಂಗೀತಾಚೊ ಜಾದುಗಾರ್
ಕ್ರಿಸ್ಸ್ ಪೆರ್ರಿ ಹೊ ಕೊಂಕ್ಣಿ ಸಂಗೀತಾಕ್ ನವಿ ದಿಶಾ ದಿವ್ಪಿ ಜಾವ್ನ್ ಗೆಲೊ. ಮರ್ಣಾನ್ ತಾಚಿ ಜೀಣ್ ಸಂಪ್ಲಿ ತರೀ, ಕಾಳ್ಜಾಕ್ ದಾದೊಸ್ಪಣ್ ದಿವ್ಪಿ ತಾಚೊ ಸಂಗೀತಾಚೊ ಆವಾಜ್ ಆಜೂನ್ ಕಾನಾ ಲಾಗಿಂ ಘುಣ್ಘುಣ್ತಾ. ತಾಚೆಂ ವೀಜೆ ಸಾರ್ಕೆಂ ಸಂಗೀತ್ ಕೊಂಕ್ಣಿ ಸಂಗೀತಾಚ್ಯಾ ಅಗ್ಲ್ಯಾ-ವೆಗ್ಳ್ಯಾ ಸಂಸಾರಾಂತ್ ವರ್ನ್ ಪಾವಯ್ತಾ ಆನಿ ಆಯ್ಪೊಪ್ಯಾಂಕ್ ಭುಲ್ ಘಾಲ್ತಾ. ಕೊಂಕ್ಣಿ ಸಂಗೀತಾಕ್ ಮನ ಪಸಂದ್ ಆನಿ ವಿಕ್ರಿ ಜಾಂವ್ಚಾ ಪೌಂಡ್ಯಾರ್ ಪಾವೊವ್ಪಾಚ್ಯಾ ಪ್ರಯತ್ನಾಕ್ ತಾಕಾ ಯಶ್ ಮೆಳ್ಳಾಂ.
ತಾಚೊ ಜಲ್ಮ್ ಮಡ್ಗಾಂವ್ಚ್ಯಾ ಬೊಡ್ಡೆ ವಾಡ್ಯಾಂತ್ ನವೆಂಬರಾಚಾ 25 ತಾರ್ಕೆರ್ 1928 ವರ್ಸಾ ಜಾಲೊ. ಆಗೊಸ್ಟಿನ್ಹೊ ಪಿರೇರಾ ಆನಿ ಏಸ್ಪಿಸಿಯೊಸಾ ಪಿರೇರಾ ಕುಟ್ಮಾಂತ್ಲ್ಯಾ ನೋವ್ ಜಣಾ ಭುರ್ಗ್ಯಾಂತ್ಲೊ ಕ್ರಿಸ್ ದುಸ್ರೊ ಪುತ್. ತಾಣೆಂ ಕುಂಕೊಲಿಚಾ ಲಿಲ್ಲಿ ಡಿ’ಕೊಸ್ಟಾ ಕಡೆನ್ ಲಘ್ನ್ ಲೆಲೆಂ ಆನಿ ತಾಂಕಾಂ ಚಾರ್ ಪುತ್, ಮೈಲ್ಸ್, ಗೈಲ್ಸ್, ಗ್ಲೆನ್ ಆನಿ ಎರ್ರಲ್ ಆಸ್‍ಲ್ಲೆ. ಎರ್ರಲ್ ಆತಾಂ ದೆವಾಧಿನ್ ಜಾಲಾ. ಕ್ರಿಸ್ಟೊವಮ್ ಪಿರೇರಾ ಹೆಂ ತಾಚೆಂ ನೀಜ್ ನಾಂವ್ ಪುಣ್ ತಾಣೆಂ ತೆಂ ಮಟ್ವೆಂ ಕರ್ನ್ ಕ್ರಿಸ್ ಪೆರ್ರಿ ದವರ್ಲೆಂ.
ಬೊರ‍್ಯಾಚ್ ಗೊಂಯ್ಕಾರಾಂ ಬಾಶೆನ್, ಕ್ರಿಸ್ಸಾ-ಚ್ಯಾ ರಗ್ತಾಂತ್ ಸಂಗೀತ್ ಅಸ್ಲೆಂ ಆನಿ ಸಂಗೀತ್‍ಚ್ ತಾಚೆಂ ಸರ್ವಸ್ಸ್ ಜಾಲ್ಲೆಂ. ತಾಂಚೊ ಫಾಂಕಿವಂತ್ ಭಾವ್ ಜೋ ಪೆರ್ರಿ ಹಾಣೆಂ ಹಿಂದಿ ಚಲ್ ಚಿತ್ರಾನಿಂ ಆಲ್ಟೊ ಸಾಕ್ಸ್ ವಾಜೊವ್ನ್ ಅಪ್ಲೆಂ ನಾಂವ್ ಅಮರ್ ಕೆಲಾಂ.
ಆಪ್ಲೆ ಖಾಸ್ ತಿಯಾತ್ರ್ ನಶೀಬಾಂತ್ಲೊ ನೊವ್ರೊ, ಪಾದ್ರಿಚೊ ಲೋಬ್, ವಿದ್ ಮೋಗ್ ಕರ್ಣಾರಾಂಚೆಂ ತಾಣೆಂ ಮಾಂಚಿಯೆರ್ ದಾಕಯ್ಲೆಂ. ಸ್ವತಾ ಸಂಗೀತ್ ಬರಂವ್ಕ್ ಆನಿ ವಾಚುಂಕ್ ತೊ ಶಿಕ್ಲೊ ಹೆಂ ತಾಚೆಂ ಖಾಶೆಲೆಪಣ್ ಜಾವ್ನಾಸಾ. ತೊ ಸೊಂಪೆಪಣೆ ಫುಂಕೆಚಿಂ ಜಶೆಂ ಸಾಕ್ಸಫೊನ್, ಟ್ರಪೆಂಟ್ ಆನಿ ಮುರ್ಲಿ (ಫ್ಲುಟ್) ತಶೆಂಚ್ ಹಾತಾಂತ್ ವಾಜೊವ್ಪಾಂಚಿಂ ವಾಜಾಂತ್ರಾ ಜಶೆಂ ಕೀ ಬೋರ್ಡ್, ಪೆಟ್ಟಿ, ಪಿಯಾನೊ ಆನಿ ಗಿಟಾರ್ ವಾಜೊಯ್ತಾಲೊ. ಪುಣ್ ಟ್ರಪೆಂಟ್ ತಾಚಿ ಖಾಸ್ ಜಾವ್ನ್ ಅಸ್‍ಲ್ಲಿ. ಚಾ, ಚಾ, ಚಾ -ಚೊ ರಾಜಾ ಮ್ಹಣ್ ಪಾಂಕ್ ಜೊಡುಂಕ್ ಪಾವ್ಲೊ. ಚೆರ್ರಿ ಪಿಂಕ್ ಎಂಡ್ ದ ಎಪ್ಪಲ್ ಬ್ಲೊಸ್ಸಾಮ್ ವಾಯ್ಟ್ ಹಿ ನಾವಾಡ್ಲಿಲಿ ಸಂಗೀತ್ ರಚ್ನಾ ಅಪ್ಲ್ಯಾ ಟ್ರಂಪೆಟಿ ಉದೆಶಿಂ ಉಸ್ವಾಸ್ ಸೊಡ್ನಾಸ್ತಾನಾ ವಾಜೊವ್ನ್ ತಾಣೆಂ ಪ್ರೇಕ್ಶಕಾಂಕ್ ಮಂತ್ರ್ ಮುಗ್ಧ್ (enthrall) ಕೆಲ್ಯಾತ್. ಹ್ಯಾ ಖಾತಿರ್ “Man with the Golden Trumpet” ನಾಂವ್ ಜೊಡುಂಕ್ ತೊ ಪಾವ್ಲೊ. ತಾಚೆಂ ಪುರ್ವಿಲೆಂ ಸಂಗೀತ್ ಕೊಲುಂಬಿಯಾ ಆನಿ H M V ರೇಕೊರ್ಡಾಂಚೆರ್ ಅಯ್ಕೊಂಕ್ ಮೆಳ್ತಾ. ತಾಂತು ಮುಖೆಲ್ ತಿಯಾತ್ರಿಸ್ತ್ C. ಆಲ್ವಾರಿಸ್, ಒಫೆಲಿಯಾ, ಮೊಹನಾ, ಎಮ್. ಬೋಯರ್, ಸ್ಟಾರ್ ಒಫ಼್ ಆರೊಸ್ಸಿಮ್, ಆಲೆಕ್ಸಿನ್ಹೊ ದೆ ಕೊಂಡೆಲಿಂ ಹಾಣಿಂ ಗಾಯ್ಲೊಲಿಂ ಅಯ್ಕೊಂಕ್ ಮೆಳ್ತಾತ್. ತಿಂ ವಿನಾಯ್ಲ್ ರೇಕೊರ‍್ಡಾಚೆರ್ ಆಸಾತ್.
ಫುಡೆಂ ತೊ ಕೊಲ್ಕತ್ತಾ, ಡೆಲ್ಹಿ, ಮದ್ರಾಸ್ ಶೆಹರಾನಿಂ ಪಂಚ್ ತಾರಾ ಹೊಟೆಲಾನಿಂ ವಾಜೊಂವ್ಕ್ ಗೆಲೊ. ಹಿಂದಿ ಫಿಲ್ಮಿ ಉಧ್ಯಮಾಂತ್ ತಾಣೆಂ ಪ್ರವೇಶ್ ಕೆಲೊ ಆನಿ ಥಂಯ್ಸರ್ ಪಂಚ್ವೀಸ್ ವರ್ಸಾಂ ಹಿಂದಿ ಫಿಲ್ಮ್ ಸಂಗೀತ್ಕಾರಾಂಚೊ ಆದಾರಿ ಜಾವ್ನ್ ತಾಣೆಂ ಸೆವಾ ದಿಲಿ. ತಾಚೊ ಜಾದುವಿ ಸ್ಪರ್ಶ್ ಜಾಯ್ತ್ಯಾ ಹಿಂದಿ ಫಿಲ್ಮಾನಿಂ ದಿಸ್ತಾ, ಚಡ್ ಕರ್ನ್ ಕಭಿ ಕಭಿ, ತ್ರಿಶೂಲ್. ಕೊಂಕ್ಣಿ ಸಂಗೀತಾಂತ್ ತಾಣೆಂ ಕಂತಾರಾನಿಂ ಜಾಜ಼್ ಸಂಗೀತ್ ಭರ್ಸುನ್ ಕ್ರಾಂತಿ ಹಾಡ್ಲಿ. ಲೊರ್ನಾ ಸಾರ್ಕ್ಯಾ ಹುಶಾರ್ ಗಾವ್ಪ್ಯಾಣಿಚೆಂ ಲಿಪೊನ್ ಗೆಲ್ಲೆಂ ತಾಲೆಂತ್ ಸೊಧುನ್ ಕಾಡ್ನ್ ತಾಚೊ ಪಾಯ್ಧೊ ಘೆವ್ನ್ ತಿಚ್ಯಾ ಸಾಂಗಾತಾ ಮೇಳ್ ಜಳಾಯ್ಲೊ. ದೆಕುನ್ ಕೊಂಕ್ಣಿ ಭಾಂವ್ಡಾ ತಾಂಚಾ ಉಪ್ಕಾರಾಂತ್ ಆಸಾತ್. ಆಫ್ಘಾತ್ ಕೆಲೊ, ರೆಡ್ ರೋಸ್, ತುಂ ಆನಿ ಹಾಂವ್, ಕಲಾಂಗುಟ್, ನಾಚೊಂಯಾ ಕುಂಪಾಸರ್, ಬೆಬ್ದೊ, ಉಗ್ಡಾಸ್, ಶರ್ಗ್ ತುಜ್ಯಾ ದೊಳ್ಯಾನಿಂ, ಲಿಸ್ಬೊವಾ, ಆಮೆರಿಕಾಕ್ ಪಾವ್ಶಿ, ನಶಿಬಾಕ್ ರಡ್ತಾಂ, … ಲೊರ್ನಾಚ್ಯಾ ಗೂಂಡ್ ಆನಿ ಬಳಿಷ್ಟ್ ತಾಳ್ಯಾನ್ ಗಾಯ್ಲೊಲಿಂ ಪದಾಂ ಆಜೂನ್ ಸುಶುಕ್ಷಿತ್ ಆಯ್ಕೊಪಿ ಉಗ್ಡಾಸ್ ಕರ್ತಾತ್. ಟೊನಿ ಕಾರ್ರ್ ಹಾಣಿಂ ಗಾಯ್ಲೊಲಿಂ ಕು ಕು ರು ರು., ಮಡ್ಡಾಂಚೊ ಸೊರೊ, ಕಾಳಿಜ್ ಬೂಂಗ್ ಬ್ಯಾಂಗ್ ಜಾತಾ, ಹಿಂ ಲವ್ಕಿಕ್ ಜಾಲ್ಯಾಂತ್.
ತಾಣಿಂ ಕೊಂಕ್ಣಿ ಸಂಗೀತಾಚಿ ವಳಕ್ ಮಹಾನ್ ಕಲಾಕಾರಾಂಕ್ ಜಶೆಂ ಮೊಹಮದ್ ರಫಿ, ಆಶಾ ಭೊಸ್ಲೆ, 
ಉಷಾ ಉತ್ತುಪ್, ಹಾಂಕಾಂ ಕರ್ನ್ ದಿಲಿ. ಮೊಹಮದ್ ರಫಿಚೆ ’ಕೊಯ್ಫರ” (Rhapsody) ಹಾಡ್ಪಿ ಬೋಮ್ ಜೆಜುಚ್ಯಾ ರೆ.. ಕೊಂವೆತಾಂತ್, ಮರಿಯಾ, ಕಂತಾರಾನಿಂ ಕೊಂಕ್ಣಿ ಸಂಗೀತಾಚೊ ಸುವಾದ್ ಘೆವ್ಪ್ಯಾಂಚಿ ಕಾಳ್ಜಾಂ ಜಿಕ್ಲಿಂ. ಉಷಾ ಉತ್ತುಪ್ ಹಾಣಿಂ ಅಪ್ಲ್ಯಾ ಗಾಯ್ಲೆಲ್ಯಾ ”ಮೆವ್ ಅಮೊರ”, ’ತುಂ ಆನಿ ಹಾಂವ್’, .. ಹಾಂಕಾಂ ತಾಳೊ ದಿಲಾ. ಫಾಂಕಿವಂತ್ ತಿಯಾತ್ರಿಸ್ತ್ ಎಚ್. ಬ್ರಿಟ್ಟೊನ್ ಹಾಣಿಂ ತಾಚ್ಯಾ ಸಂಗೀತಾಚೆರ್ ಕಂತಾರಾಂ ಗಾಯ್ಲ್ಯಾಂತ್ ತಾಂಚಿಂ ನಾಂವಾಂ ಮರಿಯಾಲಿನಾ, ಕಾಜಾರಾಚೆಂ ಉತಾರ್, ಬೆಂಡ್ರಾ ಫೆಸ್ತಾಕ್, ಬಸ್ ಕಂಡಕ್ಟರ್, ದುಕ್ರಾಚಿಂ ಚೆವ್ರಿಸಾಂ…” ತಾಚ್ಯಾ ಸಂಗೀತಾಚೊ ದರ್ಜೊ ಮ್ಹಾನ್ ಸಂಗೀತ್ ಕಾರ್ ಮೈಲ್ಸ್ ಡೆವಿಸ್ ಚಾರ್ಲ್ಸ್ ಪಾರ್ಕಾರ್ ಆನಿ ಚಿಕ್ ಕೊರ್ರೆಯಾ ಹಾಂಕಾಂ ಸರೀ ಕರ್ತಾತ್. ತೊ ಆಪ್ಲ್ಯಾ ಕಾಳ್ಜಾ ಥಾವ್ನ್ ಸಂಗೀತ್ ಬರಯ್ತಾಲೊ ಆನಿ ತೆಂ ರಚುನ್, ಮಾಂಡುನ್ ಬೊಸಯ್ತಾಲೊ ಆನಿ ತಾಂತುಂ ಗೊಂಯ್ಚೊ ಸ್ವಾದ್ ಝಳ್ಕತಾ.
ಕೊಂಕ್ಣಿಚೆಂ ಪಯ್ಲೆಂ ರಂಗೀನ್ ಚಲ್ ಚಿತ್ರ್ “ಭುಯಾರಾಂತ್ಲೊ ಮನಿಸ್” 1978 ವರ್ಸಾ ತಾಣಿಂ ನಿರ್ಮಾಣ್ ಕೆಲ್ಲೆಂ. ತಾಂತುಂ ಆಶಾ ಭೊಸ್ಲೆನ್ ಟೈಟಲ್ ಕಂತಾರ್ ಗಾಯ್ಲಾಂ. ದುರ್ದೈವಾನ್ ತೆಂ ಫಿಲ್ಮ್ ಬರೆಂ ಚಲುಂಕ್ ನಾ. ತೆಂ ಹಿಂದಿ ಪದ್ದತಿಚೆರ್ ಕಾಡ್ಲೆಲೆಂ ಆನಿ ತಾಚಿ ಬಜೆಟ್ ಉಣೆಂ ಆಸ್‍ಲ್ಲೆಂ. ತಾಚೆಂ ಸಂಗೀತ್ ಖೆಳ್-ನೊವ್ರೊ ಮ್ಹಜೊ ದೆವಾಚೆರ್, ತುಂ ಆನಿ ಹಾಂವ್, ಲೊಬ್ ಪಾದ್ರಿಚೊ ಆನಿ ಸಾಂಕಿಸ್ತಾಂವ್ ಬರಿಂಚ್ ಫಾಮಾದ್ ಜಾಲ್ಯಾಂತ್. ತಾಕಾ 1974 ವರ್ಸಾ ’ಬೆಸ್ಟ್ ಕಂಪೊಸರ್’ ಪ್ರಶಸ್ತಿ ಪಾವೊ ಜಾಲ್ಯಾ.
ತಾಚ್ಯಾ ಸಂಗೀತಾಚೆರ್ ಲೊರ್ನಾನ್ ಗಾಯ್ಲೆಲಿಂ ಕಂತಾರಾ ಬರಿಂಚ್ ಫಾಮಾದ್ ಜಾಲ್ಯಾಂತ್. ಪುಣ್ ತಾಂಚಿ ಹಿ ಜೊಡಿ ಎಕಾ ಕಂತ್ರಾಟಾಕ್ ಲಾಗುನ್ ವೆಗ್ಳಾಚಾರ್ ಜಾಲಿ. 1975 ವರ್ಸಾ ಕ್ರಿಸ್ ಮುಂಬಯ್ ಸೊಡುನ್, ಪರ್ತುನ್ ಎಕ್ ಪಾವ್ಟಿಂ ಹೊಟೆಲಾನಿಂ ಅಪ್ಲಿ ಫಿಶಾಲ್ ಕಾಯ್ ದಾಕೊವ್ಪಾಕ್ ದುಬಾಯ್ ಗೆಲೊ. ಕಾರಣ್ ಥಂಯ್ಚಾ ಲೋಕಾಕ್ ರೆಕೊರ್ಡ್ ಜಾಲ್ಲೆಂ ಸಂಗೀತ್ ಪಸಂದ್ ಜಾಯ್ನಾ. ತಾಂಕಾಂ ಜಿವೆಂ (live) ಸಂಗೀತ್ ಜಾಯ್. ತಾಣೆಂ ದುಬಾಯ್ ಸಂಗೀತ್ ಶಾಲಾ ಸ್ಥಾಪನ್ ಕೆಲಿ. ಥಂಯ್ಸರ್ ಪಿಯಾನೊ, ಕೀ ಬೋರ್ಡ್, ಡೊಲ್-ಕಾಶಿಚೆಂ ತಶೆಂಚ್ ಫುಂಕೆಚ್ಯಾ ವಾಜಾಂತ್ರಾಚೆಂ ಶಿಕಾಪ್ ದಿಂವ್ಕ್ ಲಾಗ್ಲೊ. ಲಂಡನ್ ಟ್ರಿನಿಟಿ ಕೊಲೆಜ್ –ಚ್ಯಾ ವಿಧ್ಯಾರ್ಥಿಂಕ್ ತೊ ಶಿಕ್ಷಣ್ ದಿತಾಲೊ.
ಕಾರ್ನಿವಲ್ ಇನ್ ಗೊವಾ, ಫ಼್ರೊಮ್ ದುಬಾಯ್ ವಿಧ್ ಲವ್, ಮ್ಹಜಿ ಮಾಂಯ್, ಪಯ್ಲೊ ಕಿಸ್ಸ್ ಹ್ಯೊ ತಾಚ್ಯೊ ಗಾಜ್ಲೆಲ್ಯೊ ಕೆಸೆಟಿ ಜಾವ್ನಾಸಾತ್. ಲೆಜೆಂಡ್ಸ್ ಕೆಸ್ಸೆಟ್ ಕೆನಡಾ ಶೆಹರಾಂತ್ ಮುದ್ರಿತ್ ಜಾಲ್ಯಾ.
ನಾಚೊಯಾಂ ಕುಂಪಾಸರ್ ಹ್ಯಾ ಫಾಮಾದ್ ಕೊಂಕ್ಣಿ ಫಿಲ್ಮಾಂತ್ ತಾಚ್ಯಾ ವೀಸ್ ಕಂತಾರಾಚೊ ಉಪ್ಯೊಗ್ ಕೆಲಾ.
ಜನೆರಾಚ್ಯಾ 2ವೆರ್ 2002 ವರ್ಸಾ ತೊ ದೆವಾಧಿನ್ ಜಾಲೊ ಆನಿ ತಾಚ್ಯಾ ಇಂತೆರಾಕ್ ತಾಚೆಂ ಕಂತಾರ್ “ಆದೆವ್ಸ್” ವಾಜೊಂವ್ಪಾಂತ್ ಅಯ್ಲೆಂ ಆನಿ ತಾಕಾ ನಿಮಾಣೊ ಆದೆವ್ಸ್ ಕರ್ಚಾಂತ್ ಆಯ್ಲೊ. ಹ್ಯಾ ಮ್ಹಾನ್ ಸಂಗೀತಾಕಾರಾಕ್ ಮ್ಹಜೊ ಸಲಾಮ್.
– ಇಜಿದೊರ್ ದಾಂತಾಸ್
