ಕೊಮೆಡಿ ಕಿಂಗ್ ಫ್ರಾನ್ಸಿಸ್ ಫೆರ್ನಾಂಡಿಸ್, ಕಾಸ್ಸಿಯಾ

ಕೊಮೆಡಿ ಕಿಂಗ್

ಫ್ರಾನ್ಸಿಸ್ ಫೆರ್ನಾಂಡಿಸ್, ಕಾಸ್ಸಿಯಾ

ಕಲಾ ಜಾವ್ನಾಸಾ ದೆವಾನ್ ಮನ್ಶಾಕ್ ದಿಲ್ಲೆಂ ಎಕ್ ದೆಣೆಂ.  ತಾಕಾ ಆಮಿ ತಾಲೆಂತ್ ಮ್ಹಣ್ತಾಂವ್.  ದೆವಾನ್ ಸಬಾರಾಂಕ್ ಸಬಾರ್ ಥರಾಚಿ ದೆಣಿಂ ವ ತಾಲೆಂತಾ ದಿಲ್ಯಾಂತ್.  ತ್ಯಾ ತಾಲೆಂತಾಂಕ್ ಫಾವೊತ್ಯಾ ವೆಳಾರ್ ಉರ್ಜಿತ್ ಕರ್ನ್, ಹೆರಾಂ ಮುಕಾರ್ ಪ್ರದರ್ಶಿತ್ ಕರುಂಕ್ ಎಕಾ ಆವ್ಕಾಸಾಚಿ ಗರ್ಜ್ ಆಸ್ತಾ.  ಆನಿ ತೊ ಸಂದರ್ಭ್ ಕೆದಳಾ ಆನಿ ಕೊಣಾ ಮಾರಿಪಾತ್ ಮೆಳಾತ್ ತೆಂ ತ್ಯಾ ಮನ್ಶಾಚಾ ನಶಿಬಾಚೆರ್ ಹೊಂದೊನ್ ಆಸ್ತಾ. ಎಕಾ ತಾಲೆಂತ್ ವಂತ್ ವ್ಯಕ್ತಿಕ್ ಅಪ್ಲಿಂ ದೆಣಿಂ ಲೋಕಾ ಮುಕಾರ್ ಪ್ರದರ್ಶಿತ್ ಕರುಂಕ್ ಎಕಾ ವೆಧಿಚಿ ಗರ್ಜ್ ಆಸಾ ಆನಿ ಸಾಂಗಾತಾ ಎಕಾ ಪೊದೊರ್ನಿಚಿ ಮ್ಹಣ್ಜೆ “ಗೋಡ್ ಫಾದರ್”.  ತಿ ವೆಧಿ ತಾಚಿ ಮುಕ್ಲಿ ವಿಧಿ ಠರಾಯ್ತಾ.  ಥೊಡ್ಯಾಂಕ್ ತಸಲಿ ವೆಧಿ ಆಯಿನ್ನ್ ವೆಳಾರ್ ಫಾವೊ ಜಾತಾ ಆನಿ ತಾಚೊ ಬರೊ ವಾಪಾರ್ ಕರುನ್ ತೆ ಮುಕಾರ್ ನಾಂವ್ ಜೊಡುಂಕ್ ಪಾವ್ತಾತ್.  ಆನಿ ಹೆರ್ ಥೊಡೆ ಫಾವೊತೊ ಆವ್ಕಾಸ್ ಮೆಳಾನಾಸ್ತಾನಾ, ದಾಟ್ ರಾನಾಂತ್ ಫುಲ್‍ಲ್ಲ್ಯಾ ಸೊಭಿತ್ ಫುಲಾ ಬರಿಂ ಫುಲೊನ್,  ಥಂಯ್ಸರ್ ಬಾವೊನ್ ವ್ಹೆಚೆಂ ಆಸಾ. ಹೊ ಜಾವ್ನಾಸಾ ಎಕ್ ನಶಿಬಾಚೊ ಖೆಳ್!

ರಂಗ್ ಮಂಚಾರ್ ಗೆಲೆತ್ಯಾ 58 ವರ್ಸಾಂ ಥಾವ್ನ್ ಎಕ್ ನಾಟಕಿಸ್ತ್ ಆಪ್ಲ್ಯಾ ದೆಣ್ಯಾಂಚೊ ಬರೊ ವಾಪಾರ್ ಕರ್ನ್, ಅಪ್ಲೊಚ್ ಎಕ್ ಸಂಸಾರ್ ರಚುಂಕ್ ಪಾವ್ಲಾ ಆನಿ ತೊ ಜಾವ್ನಾಸಾ ಕೊಮೆಡಿ ಕಿಂಗ್ ಮ್ಹಣ್ ನಾಂವಾಡ್ಲೆಲೊ ಶ್ರೀ ಫ್ರಾನ್ಸಿಸ್ ಫೆರ್ನಾಂಡಿಸ್, ಕಾಸ್ಸಿಯಾ.  ಲ್ಹಾನ್ ಆಸ್ತಾನಾ ಇಸ್ಕಲಾಚಾ ಲ್ಹಾನ್-ವ್ಹಡ್ ಮನೋರಂಜನಾಚಾ ಕಾರ್ಯಾನಿಂ ಭಾಗ್ ಘೆವ್ನ್ ಪ್ರೇಕ್ಷಕಾಂಚಾ ಮೆಚ್ವೊಣೆಕ್ ಪಾತ್ರ್ ಜಾಲ್ಲೊ ತೊ ಆಜೂನೀ ವರ್ಸಾನ್ ವರ್ಸಾ ಪ್ರಶಂಸೆಚಿಂ “ಶೊಲಾಂ” ಜಮೊ ಕರುನ್ ಆಸಾ ಆನಿ ಆತಾಂ ತಾಚಿ “ಟ್ಯಾಲಿ” (ಜುಮ್ಲಾ) ಶೆಂಬರಾಂ ವಯ್ರ್ ಜಾಲ್ಯಾ.

ಮಾ| ಬಾಪ್| ಲೊರೆನ್ಸ್ ಮೆಂಡೊನ್ಸಾ-ಚೊ (ತೆದಳಾಚೊ ಕಾಸ್ಸಿಯಾ ಫಿರ್ಗಜೆಚೊ ಕಾಜಿತೊರ್) ಪಾಟಿಂಬೊ ಮೆಳ್‍ಲ್ಲ್ಯಾನ್ ತಾಣೆಂ ಆಪ್ಲೊ ಪಯ್ಲೊ ನಾಟಕ್ “ಕಿತ್ಯಾಕ್ ನೆಗಾರ್ ಕರ‍್ತಾಯ್?” ಬರಯ್ಲೊ.  ಆನಿ ಪಯ್ಲೆ ಪಾವ್ಟಿಂ ಕೊಂಕ್ಣಿ ನಾಟಕಾಂತ್ ಚಲಿಯಾನಿ ಭಾಗ್ ಘೆತ್ಲೊ – ಹೊ ಎಕ್ ದಾಕ್ಲೊ ಜಾವ್ನಾಸಾ.  ತೇಸರ್ ಕೊಂಕ್ಣಿ ನಾಟಕಾನಿಂ ಸ್ತ್ರೀ-ಚಲಿಯಾಂಚೊ ಪಾತ್ರ್ ಚಲ್ಯಾನಿ ಖೆಳ್ಚೊ ಆಸ್‍ಲ್ಲೊ. ತಾಚೊ ನಾಟಕ್ 1966 ಜನೆರಾಚಾ 30 ತಾರೀಕೆರ್ ದೆ| ಫ್ರೆಡ್ ಫೆರ್ನಾಂಡಿಸಾಚಾ ದಿಗ್ದರ್ಶನಾಖಾಲ್ ಮಂಗ್ಳೂರ್ಚಾ ಡೊನ್ ಬೊಸ್ಕೊ ಹೊಲಾಂತ್ ಪ್ರದರ್ಶಿತ್ ಜಾಲೊ.  ಹೊ ಜಾವ್ನಾಸ್‍ಲ್ಲೊ ಕಾಸ್ಸಿಯಾಗಾರಾನಿಂ ಡೊನ್ ಬೊಸ್ಕೊ ಹೊಲಾಂತ್ ಕರ್ಚೊ ಪಯ್ಲೊ ನಾಟಕ್ ಆನಿ ಮಂಗ್ಳೂರಾಂತ್ ಚಲಿಯಾನಿಂ ನಟನ್ ಕೆಲ್ಲೊ ಪಯ್ಲೊ ಕೊಂಕ್ಣಿ ನಾಟಕ್.

ಹ್ಯಾ ನಾಟಕಾಂತ್ ಫ್ರಾನ್ಸಿಸಾನ್ ಕೊಮೆಡಿ ಪಾತ್ರ್ ಕೆಲೊ ಆನಿ ಲೊಕಾಚಾ ಮೆಚ್ವೊಣೆಕ್ ಫಾವೊ ಜಾಲೊ.  ತಾಚೆ ಉಪ್ರಾಂತ್ 1967 ಇಸ್ವೆಂತ್ ಪೊಟಾಚಾ ಗ್ರಾಸಾ ಖಾತಿರ್ ತಾಕಾ ಗಾಂವ್ ಸೊಡ್ನ್ ಬೊಂಬಯ್ ಯೆಂವ್ಕ್ ಪಡ್ಲೆಂ. ತರೀ ತಾಚಿ ನಾಟಾಕಾಚಿ ಪಿಸಾಯ್ ತಾಣೆಂ ಸೊಡ್ಲಿ ನಾ. 1968 ವರ್ಸಾ ತಾಣೆಂ ಕಾಸ್ಸಿಯಾಚಾ ತರ್ನಾಟ್ಯಾಂಕ್ ಎಕ್ವೊಟಾವ್ನ್ “ಯಂಗ್‍ಸ್ಟರ್ಸ್ ಆಫ್ ಕಾಸ್ಸಿಯಾ” ನಾಂವಾಚೊ ಸಂಘ್ ಸ್ಥಾಪಿತ್ ಕರ್ನ್, ತಾಚೆ ದ್ವಾರಿಂ ಆಪ್ಲ್ಯಾ ಕಿತ್ಯಾಕ್ ನೆಗಾರ್ ಕರ್ತಾಯ್? ನಾಟಕಾಚಿಂ ದೊನ್ ಪ್ರದರ್ಶನಾಂ ಮುಂಬಯ್ಚಾ ಮಜ಼್ಗಾಂವ್ ಆನಿ ಬೇಂಡ್ರಾಂತ್ ಆಸಾ ಕರ್ನ್ ಕಿರ್ತ್ ಜೊಡ್ಲಿ.  1968 ಥಾವ್ನ್ 1977 ಮ್ಹಣಾಸರ್ ತಾಣೆ 28 ನಾಟಕ್ ಬರಯ್ಲೆ, ದಿಗ್ದರ್ಶಿಲೆ ಅನಿ ತಾಂತುಂ ನಟನ್ ಕರ್ನ್ ಸಬಾರ್ ಸಂಘ್-ಸಂಸ್ಥ್ಯಾಂಚಾ ಸಹಕಾರಾನ್ ಖೆಳೊವ್ನ್ ದಾಕಯ್ಲೆ.

 

ಹೆಂ ಕಾಮ್ ತೊ 1977 ಇಸ್ವೆಂತ್ ಬರೊ ಪುಡಾರ್ ಸೊಧುನ್  ಗಲ್ಫಾಕ್ ವ್ಹೆತಾ ಮ್ಹಣಾಸರ್ ಚಲ್ಲೆಂ. ವಿಧಿಚೊ ಖೆಳ್ ಮ್ಹಣ್ಯೆತಾ ತೆಣೆ ತೊ ಗಲ್ಫಾಕ್ ಪಾವ್ಲೊ ಆನಿ ಹೆಣೆಂ ಹಪ್ತ್ಯಾನ್ ಹಪ್ತೆ ನಾಟಕ್ ಸಾದರ್ ಜಾಂವ್ಚೆಂ ಸೈಂಟ್ ಮೇರಿಸ್ ಹೊಲ್ ಬಂಧ್ ಪಡ್ಲೆಂ !

ಕಿತ್ಯಾಕ್ ನೆಗಾರ್ ಕರ್ತಾಯ್?, ಆವಯ್ ತಿ ಆವಯ್, ತುಂ ಮ್ಹಾಕಾ ವಿಸರ್, ಮತ್ಲಾಬಿ ಸಂಸಾರ್, ಮಾಲ್ಧಿಸಾಂವ್, ಘಾತ್ಕಿ ಸಮಾಜ್ ಆನಿ ಮ್ಹಾತಾರೊ ಚರ್ಬೆಲಾ ತಾಚೆ ಥೊಡೆ  ಪ್ರಮುಖ್ ನಾಟಕ್ ಜಾವ್ನಾಸಾತ್.

ತೀನ್ ಕಾದಂಬರಿ, ಧಾ ಮಟ್ವ್ಯೊ ಕಾಣಿಯೊ, 25 ವಯ್ರ್ ಕವನಾಂ ತಾಣೆ ಲಿಖ್ಲ್ಯಾಂತ್. ತಾಚೆ ಸಬಾರ್ ಬೂಕ್ ಪ್ರಕಾಶಿತ್ ಜಾಲ್ಯಾತ್.  ತಾಂಚೆ ಪಯ್ಕಿ ಧುಳಿಂತ್ಲಿಂ ಫುಲಾಂ, ಕೋಣ್ ಆಯ್ಕಾತ್ ಮ್ಹಜೊ ತಾಳೊ?, ಮಾಲ್ಧಿಸಾಂವ್ (ನಾಟಕ್), ಥೊಡೆ ಜಾವ್ನಾಸಾತ್.

ತಾಚ್ಯಾ ಥೊಡ್ಯಾ ನಾಟಕಾಚಿಂ ನಾಂವಾಂ ಘೆಂವ್ಚಿಂ ತರ್ –

ಕಿತ್ಯಾಕ್ ನೆಗಾರ್ ಕರ್ತಾಯ್? (1966), ಹಾಂವ್ ಹೆಂ ಪಾತ್ಯೆನಾಂ(1966) ಪರ್ದೆಶಿ(1966), ತುಜೊ ವೇಳ್ ಲಾಗಿಂ ಪಾವ್ಲಾ (1968), ವ್ಹೊನಿ (1968), ತುಂ ಮ್ಹಾಕಾ ವಿಸರ್ (1969), ದೆವ್ ತುಕಾ ಭೊಗ್ಸುಂದಿ (1969), ಆದೆವ್ಸ್ ತುಕಾ(1970), ಆಜ್ ಮ್ಹಾಕಾ, ಪಾಲ್ಯಾಂ ತುಕಾ (1970), ಪಾಲ್ವಾಲ್ಲೊ ದಿವೊ(1971), ಹಾಂವೆಂ ಕಿತೆಂ ಕೆಲಾಂ? (1971), ತುಂ ಮ್ಹಾಕಾ ಆಶೆನಾಕಾ(1972), ಬಾಪಾ ತಾಂಕಾಂ ಭೊಗ್ಸಿ (1972), ದಾಕಯ್ ತುಜೊ ಅಪ್ರಾಧ್(1973), ಲಿಪ್‍ಲ್ಲೊ ಚೋರ್(1973), ಬದ್ಲಾಮ್ (1974), ಮರ್ಯಾದ್ (1974), ಜಾಗ್ರುತ್ ರಾವ್ (1975), ಮಾಲ್ಧಿಸಾಂವ್ (1975), ಪಯ್ಲಿ ರಾತ್ (1975), ಖಾಂದ್ಯಾ ವಯ್ಲೊ ಖುರಿಸ್(1977), ಘಾತ್ಕಿ ಸಮಾಜ್(1976), ಸ್ರೀಯೇ ತುಜಿಂ ಕಿತ್ಲಿಂ ರುಪಾಂ ?(1976), ದೈರಾಧಿಕ್ ಸ್ರೀ(1976), ಸೊಸ್ಣಿಕಾಯ್(1976),ಆಶಿರ್ವಾದ್(1976), ದೆವಾನ್ ಕೆಲ್ಲೊ ಘುನ್ಯಾಂವ್(1979), ತಾಣೆಂ ಮ್ಹಾಕಾ ವಿಕ್ರಿತ್ ಕೆಲೊ (1982), ಮತ್ಲಾಬಿ ಸಂಸಾರ್ (2003)ಆನಿ ಮ್ಹಾತಾರೊ ಚರ್ಬೆಲಾ(2007).

“ಮಾಲ್ಧಿಸಾಂವ್” ಆನಿ “ಆವಯ್ ತಿ ಆವಯ್” ನಾಟಕಾಚೆ ವಿಡಿಯೊ ಕೆಸೆಟಿಂಚೊ ತೀನ್ ಹಜಾರಾಂ ವಯ್ರ್ ವಿಕ್ರಾಪ್ ಜಾಲಾ.  ತಾಣೆಂ  ಲಗ್ ಬಗ್ 35 ತೀನ್ ಘಂಟ್ಯಾಂಚೆಂ ಆನಿ 25 ದೋನ್ ಘಂಟ್ಯಾಂ ಭಿತರ್ಲೆ ನಾಟಕ್ ಬರೈಲ್ಯಾತ್

ಎದ್ದೊಳ್ ಮ್ಹಣಾಸರ್ ತಾಕಾ ಶೆಂಬೊರಾಂ ವಯ್ರ್ ಸಂಘ್-ಸಂಸ್ಥ್ಯಾನಿಂ ಬಿರುದಾಂ ದಿವ್ನ್ ಸನ್ಮಾನ್ ಕೆಲಾ.

ತಾಂಚೆ ಪಯ್ಕಿ – ಕೊಂಕ್ಣಿ ವಾಘ್, ನಟ್ ಸಾಮ್ರಾಟ್, ಕಲಾ ಶ್ರೀ, ಕೊಂಕಣ್ ಕಲಾ ಶ್ರೇಷ್ಟ್, ಕೊಂಕಣಿ ಕಲಾ ಸಾಹಿತ್ಯ ರತ್ನ, ಕೊಂಕಣಿ ಮೇನ್ ಆಫ್ ದ ಸೆಂಚುರಿ ಥೊಡೆ ಜಾವ್ನಾಸಾತ್.

ತಾಕಾ ಭಿರುದಾಂ ದಿಲ್ಲ್ಯಾ ಸಂಸ್ಥ್ಯಾಂ ಪಯ್ಕಿ ಥೊಡ್ಯಾಂಚಿಂ  ನಾಂವಾಂ ಘೆಂವ್ಚಿಂ ತರ್ – ಮಂಗ್ಳೂರ್ ಕೊಂಕಣ್ಸ್, ದುಬಾಯ್ (1994), ಸೈಂಟ್ ಮೇರಿಸ್ ಕೊಂಕಣಿ ಎಸೋಸಿಯೇಶನ್, ದುಬಾಯ್, (1998), ಸಂಗಮ ಕಲಾವಿದರು, ದುಬಾಯ್,(2001).

2002 ಇಸ್ವೆಂತ್: ದಾಯ್ಜಿ ದುಬಾಯ್,  ಕೊಂಕಣಿ ರಾಯ್ಟರ್ಸ್ ಎಸೊಶಿಯೇಶನ್, ದುಬಾಯ್, ಕಾಣಿಕ್ ಕೊಂಕಣಿ ಹಪ್ತ್ಯಾಳೆಂ, ಮಂಗ್ಳೂರ್, ಕಾಸ್ಸಿಯಾ ಫಿರ್ಗಜ್, ಮಂಗ್ಲೂರ್,, ಉತ್ತರ ಕನ್ನಡ ಜಿಲ್ಲಾ ಕೊಂಕಣಿ ಪರಿಷದ್, ಸಿರ್ಸಿ, ಭಟ್ಕಳ್ ಫಿರ್ಗಜ್ ಮಂಡಳಿ, ಭಟ್ಕಳ್, ದಿವೊ ಕೊಂಕಣಿ ಸಚಿತ್ರ್ ಹಪ್ತ್ಯಾಳೆಂ, ಮುಂಬಯ್, ಕೊಂಕಣ್ ತಾರಾಂ, ಜೆರಿಮೆರಿ, ಮುಂಬಯ್.

2003 ಇಸ್ವೆಂತ್.   ಮಹಾರಾಷ್ಟ್ರ ಕೊಂಕಣ್ ಎಸೋಶಿಯೇಶನ್, ಮುಂಬಯ್, ಕಥೊಲಿಕ್ ಸಭಾ, ಆಂಜೆಲೊರ್, ಮಂಗ್ಳೂರ್, ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ, ಮುಂಬಯ್, ದಿ ಮೆಂಗ್ಳೂರಿಯನ್ ವೆಲ್ಫೇರ್ ಎಸೋಶಿಯೇಶನ್, ವಿದ್ಯಾವಿಹಾರ್, ಮುಂಬಯ್, ಕೆನಾರಾಯ್‍ಟ್ಸ್ ಯೂತ್ತ್ ಎಸೋಶಿಯೇಶನ್, ಮುಂಬಯ್, ಸೈಂಟ್ ಜೊಸೆಫ್ ಕೊಂಕಣಿ ಎಸೋಶಿಯೇಶನ್, ಥಾನೆ, ಮುಂಬಯ್, ಕಲಾಂಗಣ್, ಮಂಗ್ಳೂರ್,  ಬೆಳ್ಳೆ ಎಸೋಶಿಯೇಶನ್, ದುಬಾಯ್.

2004 ಇಸ್ವೆಂತ್- ಕಥೊಲಿಕ್ ಎಕ್ಷನ್ ಲೀಗ್, ಬೆಂದೂರ್, ಮಂಗ್ಳೂರ್, ಸೈಂಟ್ ಮೇರಿಸ್ ಕೊಂಕಣಿ ಕಮ್ಯೂನಿಟಿ, ದುಬಾಯ್, ಮುದರಂಗಡಿ ಸೈಂಟ್ ಫ್ರಾನ್ಸಿಸ್ ಎಸೋಶಿಯೇಶನ್, ದುಬಾಯ್, ಶಾರ್ಜಾ,  ಕನ್ನಡ ಸ್ಟಾರ್ಸ್, ಆಲ್-ಆಯ್ನ್-ಬುರೈಮಿ, 2005 ಇಸ್ವೆಂತ್ – ಪುನವ್ ಪ್ರಕಾಶನ್, ಮಂಗ್ಳೂರ್, ಸೆಕ್ರೆಡ್ ಹಾರ್ಟ್ ಯಂಗ್ಸ್ಟರ್ಸ್ ಎಸೋಶಿಯೇಶನ್, ಸುರತ್ಕಲ್.

2006 ಇಸ್ವೆಂತ್ – ಕೆನರಾ ಕಥೊಲಿಕ್ ಎಸೋಶಿಯೇಶನ್, ಫುಜೈರಾ.

2007 ಇಸ್ವೆಂತ್ – ಕೊಂಕಣಿ ವೆಲ್ಫೇರ್ ಎಸೋಶಿಯೇಶನ್, ಮಿರಾ ರೋಡ್, ಮುಂಬಯ್, ಸೈಂಟ್ ಪೀಟರ್ಸ್ ಎಸೋಶಿಯೇಶನ್, ಬಾರ್ಕುರ್, ಮುಂಬಯ್, ಕೆನರಾ ಕೊಂಕಣಿ ಎಸೋಶಿಯೇಶನ್, ಬೊರಿವ್ಲಿ, ಮುಂಬಯ್, ಮೆಂಗ್ಳೂರಿಯನ್ ಕಥೊಲಿಕ್ ಎಸೋಶಿಯೇಶನ್, ಪುಣೆ.

2008 ಇಸ್ವೆಂತ್ – ಕರ್ನಾಟಕ ಸಾಹಿತ್ಯ ಆಕಾಡಮಿ, ಸೈಂಟ್ ಜೊಸೆಫ್ಸ್ ಫಿರ್ಗಜ್ ಗಾರ್, ಮುಗಲಿ ಹೊಂಡ, ಭಟ್ಕಳ್, “ಝೆಲೊ ಕೊಂಕಣಿ ಹಪ್ತ್ಯಾಳೆಂ, ಮಂಗ್ಳೂರ್, ಭೊಟಾಮ್, ಬೊಳಿಯೆ ಆನಿ ಸಾಂಗಾತಿ, ಮೂಡುಬೆಳ್ಳೆ, ICYM ನೀರ್ ಮಾರ್ಗ, ಮಂಗ್ಳೂರ್, ನಿಡ್ಡೊಡಿ ಫಿರ್ಗಜ್ ಗಾರ್, ಮಂಗ್ಳೂರ್,  ಕಥೊಲಿಕ್ ಸಭಾ, ಕಾಟಿಪಳ್ಳ, ಮಂಗ್ಳೂರ್, ದಿರ್ವೆಂ ಕೊಂಕಣಿ ಹಪ್ತ್ಯಾಳೆಂ, ಮಂಗ್ಳೂರ್, ನಕ್ರೆ ಫಿರ್ಗಜ್, ಕುವೈಟ್ ಕೊಂಕಣ್ಸ್, ಕುವೈಟ್,  ಜೆಬೆಲ್ ಆಲಿ ಕೊಂಕಣಿ ಎಸೋಶಿಯೇಶನ್, ದುಬಾಯ್, ಕರ್ನಾಟಕ ಸಂಘ, ದುಬಾಯ್, T. M. A. Pai ಪ್ರತಿಷ್ಟಾನ್, ಪಡ್ವಾಳ್ ಪ್ರಕಾಸನ್, ಪಾಂಬೂರ್ ಎಸೋಶಿಯೇಶನ್, ಕರಾಮಾ, ದುಬಾಯ್.

2009 ಇಸ್ವೆಂತ್ – ವಸಯ್ ಕೊಂಕಣಿ ಎಸೋಶಿಯೇಶನ್, ವಸಯ್, ಕಥೊಲಿಕ್ ವೆಲ್ಫೇರ್ ಎಸೋಶಿಯೇಶನ್, ಭಾಂಯ್ದರ್, SVP ಕಾರ್ಕಳ,  ಮುಡಿಪು ಫಿರ್ಗಜ್ ಮಂಡಳಿ, ಪೆರಂಪಳ್ಳಿ ಫಿರ್ಗಜ್ ಮಂಡಳಿ, ಸೆವಕ್ ಕೊಂಕಣಿ ಹಪ್ತ್ಯಾಳೆಂ, ICYM ಕುಂದಾಪುರ್, SVP ಪಾಲಾಡ್ಕಾ, ಫಾಮಾದ್ ಪೆರ್ನಾಲ್, ದುಬಾಯ್, ಬೈಂದೂರ್ ಕಥೊಲಿಕ್ ಎಸೋಶಿಯೇಶನ್, ದುಬಾಯ್,  ಉಜಿರೆ ಫಿರ್ಗಜ್ ಮಂಡಳಿ, MCE ದೊಹಾ, ಖಟಾರ್, ಕೊಂಕಣಿ ಗ್ರೂಪ್ ಮಾಲ್ವಾಣಿ ಆನಿ ಇತರ್ ಸಬಾರ್.

ಸಬಾರ್ ಕೊಂಕಣಿ ನಾಟಕ್ ತಾಣೆ ಬರೈಲೆ, ದಿಗ್ದರ್ಶಿಲೆ ಆನಿ ಸಾದರ್ ಕೆಲೆ.  ಆಜ್ ಕಾಲ್ ಚಲೊನ್ ಅಸ್ಚ್ಯಾ ತಾಚ್ಯಾ “ಮ್ಹಾತಾರೊ ಚರ್ಬೆಲಾ” ನಾಟಾಕಾಚೆಂ ನಾಂವ್ ಘೆತಾನಾ ಅಪಾಪಿಂಚ್ ಫ್ರಾನ್ಸಿಸ್ ಫೆರ್ನಾಂಡಿಸಾಚೆಂ ನಾಂವ್ ಜಿಬೆರ್ ಯೆತಾ.  ಪುಣ್ ಎಕ್ ವಿಶಯ್ ಮಾತ್ರ್ ಖಂಡಿತ್, ಹೊ “ಮ್ಹಾತಾರೊ” ಕೆದಿಂಚ್  ಮ್ಹಾತಾರೊ ಜಾಂವ್ಚೊಂ ನಾ!

 

“ಮ್ಹಾತಾರೊ ಚರ್ಬೆಲಾ” ನಾಟಕಾಚಿಂ ಶೆಂಬರ್ ಪ್ರದರ್ಶನಾಂ ತೊ ವೆಗ್ಗಿಂಚ್ ಸಂಪವ್ನ್, ಎಕ್ ದಾಕ್ಲೊ ರಚುಂದಿ ಮ್ಹಣ್ ಆಂವ್ಡೆತಾಂ.

 

****