ಕವಿರಾಜ್ ಜೆ. ಬಿ. ಸಿಕ್ವೇರಾ ಆನಿ ಜೆ. ಬಿ. ಮೊರಾಯಸ್ ಸ್ಮಾರಕ್ ಕವಿತಾ ಸ್ಪರ್ಧೊ
ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ-ನ್ ಹ್ಯಾಚ್ ಫೆಬ್ರೆರಾಚಾ 18 ತಾರೀಕೆರ್ ಸಾಂಜೆರ್ 4 ವರಾಂಚೆರ್ ಆತ್ಮ ದರ್ಶನ್, ಗ್ಯಾನ್ ಆಶ್ರಮ್ ಸಂಕೂಲ್, ಮಹಾಕಾಲಿ ಕೇವ್ಸ್ ರೋಡ್, ಆಂಧೆರಿ ಪೂರ್ವ್, ಮುಂಬಯ್ ಹಾಂಗಾಸರ್ ಕವಿರಾಜ್ ಜೆ. ಬಿ. ಸಿಕ್ವೇರಾ ಆನಿ ಕವಿ ಜೆ. ಬಿ. ಮೊರಾಯಸ್ ಸ್ಮಾರಕ್ ವಾರ್ಷಿಕ್ ಕವಿತಾ ಸ್ಪರ್ಧೊ ಆಸಾ ಕೆಲ್ಲೊ.
ಭಾಷಾ ಮಂಡಳಾಚೊ ಅಧ್ಯಕ್ಷ್ ಶ್ರೀ ಜೋನ್ ಡಿ’ಸಿಲ್ವಾನ್ ಸರ್ವಾಂಕ್ ಯೆವ್ಕಾರ್ ಮಾಗೊನ್ ಕವಿರಾಜ್ ಜೆ. ಬಿ. ಸಿಕ್ವೇರಾ ಆನಿ ಜೆ. ಬಿ. ಮೊರಾಯಸ್ ಹಾಂಚಾ ಸಾಹಿತಿಕ್ ಆನಿ ಇತರ್ ವಾವ್ರಾ ವಿಶಿಂ ಪ್ರಶಂಶಾ ಕರ್ನ್ ಸ್ಪರ್ಧ್ಯಾಚಿ ಸುರ‍್ವಾತ್ ಕೆಲಿ. ಸಂಸ್ಥ್ಯಾಚೊ ಜೆರಾಲ್ ಕಾರ್ಯಾದರ್ಶಿ ಶ್ರೀ ಲೋರೆನ್ಸ್ ಡಿ’ಸೋಜಾ-ಕಮಾನಿನ್ ಕವಿರಾಜ್ ಜೆ. ಬಿ. ಸಿಕ್ವೇರಾ ಆನಿ ಚಡ್ ಕರ್ನ್ ಕವಿ ಜೆ. ಬಿ. ಮೊರಾಯಸ್ ಹಾಣಿಂ ಕೊಂಕ್ಣಿ ಭಾಷಾ ಮಂಡಳಾಕ್ ಆನಿ ಇತರ್ ಸಂಘ್ ಸಂಸ್ಥ್ಯಾಂಕ್ ದಿಲ್ಲ್ಯಾ ಸೆವೆ ವಿಶಿಂ ಮಾಹೆತ್ ದಿಲಿ. ವರಯ್ಣಾರ್ ಶ್ರೀ ಫ್ರಾನ್ಸಿಸ್ ಒಲಿವೆರಾ ಆನಿ ಶ್ರೀ ಜೋನ್ ಮಸ್ಕರೇನ್ಹಸ್ ವೆಧಿಚೆರ್ ಹಾಜರ್ ಆಸ್‍ಲ್ಲೆ.
ಸ್ಪರ್ಧ್ಯಾಂತ್ ತೀನ್ ಇನಾಮಾಂ ಆಸ್‍ಲ್ಲಿಂ. ಪಯ್ಲೆಂ ಸ್ಥಾನ್ (3000 ರುಪಯ್) ಶ್ರೀ ಫಿಲಿಪ್ ಡಿ’ಸೋಜಾ, ಕಾಂಜುರ್ ಮಾರ್ಗ್, ದುಸ್ರೆಂ ಸ್ಥಾನ್, (2000 ರುಪಯ್) ಶ್ರೀ ಶಾಂತಿರೋಯ್ ಕುಪ್ಪೆಪದವು ಆನಿ ತಿಸ್ರೆಂ ಸ್ಥಾನ್ (1000 ರುಪಯ್) ಶ್ರೀ ಜೋನ್ ಜಿ. ಮೆಂಡೊನ್ಸಾ ಹಾಂಕಾಂ ಫಾವೊ ಜಾಲೆಂ. ವಿಜೆತ್ಯಾಂಕ್ ತಾಂಚಿ ಇನಮಾಂ ಸಂಸ್ಥ್ಯಾಚೊ ಅಧ್ಯಕ್ಷ್ ಶ್ರೀ ಜೋನ್ ಡಿ’ಸಿಲ್ವಾ ಹಾಂಚೆಂ ಹಾತಿಂ ದಿವ್ನ್ ಸನ್ಮಾನ್ ಕೆಲೊ.
ಸ್ಪರ್ಧ್ಯಾಂತ್ ಪ್ರಸ್ತುತ್ ಜಾಲ್ಲಿಂ ಸರ್ವ್ ಕವಿತಾ ಆರ್ಥಾಬರಿತ್, ಸಕಾಳಿಕ್ ಆನಿ ಪ್ರಾಸ್ ಬದ್ದ್ ಜಾವ್ನ್ ಆಸ್‍ಲ್ಲಿಂ ಮ್ಹಣಾಲೊ ವರಯ್ಣಾರ್ ಶ್ರೀ ಫ್ರಾನ್ಸಿಸ್ ಒಲಿವೆರಾ.
ಶ್ರೀ ಲೋರೆನ್ಸ್ ಡಿ’ಸೋಜಾ-ಕಮಾನಿ-ನ್ ವಂದಿಲೆಂ. ಚಾ-ಫಳಾರಾ ಸವೆಂ ಕಾರ್ಯೆಂ ಸಂಪ್ಲೆಂ.
