ಮಿಕ್ ಮ್ಯಾಕ್ಸ್
ಮಿಕ್ ಮ್ಯಾಕ್ಶ್ ಮ್ಹಣೊನ್ ಲೋಕಾಮೊಗಾಳ್ ಜಾಲ್ಲೊ ದೆವಾಧಿನ್ ಮೈಕಲ್ ಮ್ಯಾಕ್ಷಿಮ್ ಡಿ’ಸೋಜಾ, ದೆ| ಪಾವ್ಲ್ ಆನಿ ಫ್ಲೊರಿನ್ ಡಿ’ಸೋಜಾ ಹಾಂಚಾ ನೋವ್ ಜಣಾಂ ಭುರ್ಗ್ಯಾಂ ಪಯ್ಕಿ ಮಾಲ್ಘಾಡೊ. ಹಾಚೊ ಜಲ್ಮ್ ಎಪ್ರಿಲ್ 13, 1950 ದಿಸಾ ಬಿಜೈ, ಮಂಗ್ಳೂರಾಂತ್ ಜಾಲೊ.
ಕೊಂಕ್ಣಿ ಸಾಹಿತ್ಯ್ ಶೆತಾಂತ್, ನಾಟಕ್ ಆನಿ ಸಂಗೀತಾಂತ್ ತಾಕಾ ವಳ್ಕಾನಾತ್‍ಲ್ಲೊ ಕೊಣೀ ನಾ ಮ್ಹಣ್ಯೆತಾ. ನವ ಭಾರತ ಕನ್ನಡ ದಿಸಾಳ್ಯಾಚ್ಯಾ ಸಂಪಾದಾಕೀಯ್ ವಿಭಾಗಾಂತ್ ತೊ ಸೆವೆಕ್ ಭರ್ತಿ ಜಾಲೊ. ಮಸ್ಕತಾಂತ್ 22 ವರ್ಸಾಂಚಿ ಸೆವಾ ದಿಲ್ಲ್ಯಾ ಉಪ್ರಾಂತ್ ತೊ ಪಾಟಿ ಆಯ್ಲೊ ಆನಿ ಕೊಂಕ್ಣಿ ಆನಿ ಸಮಾಜ್ ಸೆವಾ ಮುಕಾರುಂಕ್ ಲಾಗ್ಲೊ.
ತೊ ಎಕ್ ಊಂಚ್ಲ್ಯಾ ಮಟ್ಟಾಚೊ ನಟ್ ಜಾವ್ನ್ ಆಸ್‍ಲ್ಲೊ. ತಾಣೆಂ ತಮಿಳ್ ಫಿಲ್ಮಾನಿಂ ನಟನ್ ಕೆಲ್ಲೆಂ ಆಸಾ. ಮೊಗ್ ಆನಿ ಮಯ್ಪಾಸ್ ಕೊಂಕ್ಣಿ ಪಿಂತುರಾಂತ್ ತಾಣೆಂ ನಟನ್ ಮಾತ್ರ್ ನಹಿಂ ಆಸ್ತಾಂ ತಾಚೆ ಸಂವಾದ್ ತಾಚೆ ಜಾವ್ನಾಸಾತ್. ತಾಚೆ ’ಸಿಕೇರಾಮ್ ಡ್ರಾಯ್ವರ್’ ಆನಿ ”ಚಿಂತ್ನೆನ್ ಸಭ್ದಾನ್ ಆನಿ ಕರ್ನೆನ್’ ತಸಲೆ ನಾಟಕ್ ಅತೀ ಲೋಕಾ ಮೊಗಾಳ್ ಜಾವ್ನಾಸ್‍ಲ್ಲೆ ಆನಿ ತಾಂಚಿಂ ಸಬಾರ್ ಪ್ರದರ್ಶನಾ ಮುಂಬಯ್ ಆನಿ ಗಾವಾಂತ್ ಜಾಲ್ಯಾಂತ್.
2002 ಇಸ್ವೆಂತ್ ತಾಕಾ ಕರ್ನಾಟಕ ಸಾಹಿತ್ಯ ಆಕಾಡಮಿ ಥಾವ್ನ್ ಬೆಂಗ್ಳೂರಾಂತ್ ಜಾಲ್ಲ್ಯಾ ಆಲ್ ಇಂಡಿಯಾ ಡ್ರಾಮಾ ಕೊಂಪಿಟಿಶನಾಂತ್, ತಾಚಾ “ಪಾಟಿಂ ಪೊಳೈನಾಕಾ” ನಾಟಕಾಕ್ ದುಸ್ರೆಂ ಇನಾಮ್ ಲಾಭ್‍ಲ್ಲೆಂ. ತಾಣೆಂ 6 ನಾಟಕ್, 3 ಕಾದಂಬರಿ, 2 ಮಟ್ವ್ಯಾ ಕಾಣಿಯಾಂಚೆಂ ಬೂಕ್, ಸಬಾರ್ ಕವನಾಂ ಆನಿ ಲೆಖನಾ ಬರಯ್ಲ್ಯಾಂತ್.
ತಾಕಾ ಆಲ್ ಇಂಡಿಯಾ ಕೊಂಕಣಿ ಪರಿಷದ್ ಥಾವ್ನ್ 1984 ಆನಿ 1986 ತಾಣೆ ಬರಯ್ಲೆಲ್ಯಾ ದೋನ್ ಕಾದಂಬರಿಂಕ್ “ದಿ ಬೆಸ್ಟ್ ನೊವೆಲ್ ಆಫ್ ದ ಇಯರ್” ಪ್ರಶಸ್ತಿ ಫಾವೊ ಜಾಲ್ಯಾ.
ಸಂದೇಶಾ ಸಂಸ್ಥ್ಯಾನ್ ತಾಚಾ ಸಾಹಿತಿಕ್ ದೆಣ್ಗ್ಯಾ ಖಾತಿರ್ ಸನ್ಮಾನ್ ಕೆಲಾ. ಕೊಂಕ್ಣಿ ಕುಟಾಮ್ ಬಾಹ್ರೈನ್ ಥಾವ್ನ್ ತಾಕಾ ಮಾನ್ ಫಾವೊ ಜಾಲಾ. ತಾಣೆಂ ಕೊಂಕಣಿ ಸಾಹಿತ್ಯ್ ಆನಿ ನಾಟಕ್ ಕ್ಷೇತ್ರಾಕ್ ದಿಲ್ಲ್ಯಾ ಸೆವೆ ಖಾತಿರ್ ತಾಕಾ ಕೊಂಕಣ್ ಕರಾವಳಿ ಕಲಾಕಾರ್ ಪಂಗ್ಡಾ ಥಾವ್ನ್ ಮಾನ್ ಫಾವೊ ಜಾಲಾ.
