ಮಿಲ್ ರೊಯ್ ಗೊಯೆಸ್ – ’ವೆಲ್ಕಮ್ ಮಿಲಿಯನ್ಸ್” ಕೊಂಕ್ಣಿ ಫಿಲ್ಮಾಚೊ ದಿಗ್ದರ್ಶಕ್

ದೆವಾಧಿನ್ ವಿನ್ಸೆಂಟ್ ಫ್ಲೊರಿಯಾನೊ ಗೊಯೆಸ್ ಆನಿ ಪಿಯೆದಾದ್ ಕಾರ್ಡೊಜೊ ಇ ಗೊಯೆಸ್ ಹಾಂಚೊ ಪೂತ್, ಪರ್ವಿಸ್ ಮಿಲ್ ರೊಯ್ ಗೊಯೆಸ್, ಮಟ್ವ್ಯಾನ್ ಮಿಲ್ರೊಯ್ ಗೊಯೆಸ್, ಹಾಚೆ ಜನಮ್ ಸಪ್ಟೆಂಬರ್ 3, 1989 ವರ್ಸಾ ಮಡ್ಗಾಂವಾಂತ್ ಜಾಲೆಂ.  ಆತಾಂ ತೊ ಕಂಕೊಲಿ, ಪಶ್ಶಿಮ್ ಗೊವಾಂತ್ ವಸ್ತಿ ಕರ್ನ್ ಆಸಾ. ತೊ ಬಹು ಭಾಶಿಕ್ ಜಾವ್ನಾಸಾ ಆನಿ ತಾಕಾ ಕೊಂಕಣಿ, ಇಂಗ್ಲಿಷ್, ಹಿಂದಿ ಸಾಂಗಾತಾ ಥೊಡಿ ಪೊರ್ಚಿಗೀಸ್ ಭಾಸ್ ಉಲಂವ್ಕ್ ಯೆತಾ.

ತಾಚೆಂ ಸುರ್ವಿಲೆಂ ಶಿಕಾಪ್ ಅವರ್ ಲೇಡಿ ಆಫ್ ಹೆಲ್ತ್ ಹೈಸ್ಕೂಲ್, ಕಂಕೊಲಿಂತ್ ಜಾಲೆಂ. ಭುರ್ಗ್ಯಾಪಣಾರ್-ಚ್ ತೊ ಕಲೆಂತ್ ಪಾಮಾಧ್  ಜಾವ್ನ್ ಆಸ್‍ಲ್ಲೊ.  ಡ್ರಾಯಿಂಗ್,  ಸ್ಕೆಚಸ್, ಲೈವ್ ಪೊರ್ಟ್ರೈಟ್ಸ್ ಹಾಂತುಂ ತಾಕಾ ಬರಿಚ್ ಆಸಕ್ತ್ ಆಸ್‍ಲ್ಲಿ ದೆಕುನ್ ತೊ ವೆಬ್ ಡಿಸಾಯ್ನಿಂಗ್ ಆನಿ ಗ್ರಾಫಿಕ್ಸ್ ಡಿಸಾಯ್ನಿಂಗ್ ಕರುಂಕ್ ಮುಕಾರ್ ಸರ್ಲೊ.  ಸೈಬರ್ ಅಟೆಂಡಂಟ್ ಆನಿ ವೆಬ್ ಡಿಸಾಯ್ನಾರ್ ಜಾವ್ನ್ ಥೊಡೊ ತೇಂಪ್ ಎಕಾ ಕಂಪೆನಿಂತ್ ಸೆವಾ ದಿಲ್ಲೆ ಉಪ್ರಾಂತ್ ತೊ ಎಕ್ ವರಸ್ ಬರ್ ಫಾದರ್ ಆಗ್ನೆಲ್ ಇನ್ಸ್ಟಿಟ್ಯೂಟ್ ಆಫ್ ಕೋಮರ್ಸ್ ಹಾಂಗಾಸರ್ “ಕೊರಲ್ ಡ್ಯಾಯ್ವ್, ಫೊಟೊಶೋಪ್, ಎಚ್ ಟಿ ಎಮ್ ಎಲ್ ಹಾಂಚೊ ಟಿಚರ್ ಜಾವ್ನ್ ಭರ್ತಿ ಜಾಲೊ.  ತಾಕಾ ಫಿಲ್ಮಾಂನಿ ಪಯ್ಲೆಂ ಥಾವ್ನ್ಂಚ್ ಉರ್ಭಾ ಆಸ್‍ಲ್ಲಿ ದೆಕುನ್ ತಾಚೆಂ ಕಾಮ್ ಸೊಡ್ನ್ ಫಿಲ್ಮ್ ಇಂಡಸ್ಟ್ರಿಂತ್ ಸೆರ್ವಾಲೊ.

ತಾಚೆಂ ಪಯ್ಲೆಂ ಮಟ್ವೆಂ ಫಿಲ್ಮ್ ಜಾವ್ನಾಸಾ “ವೆಂಜೆಯೆನ್ಸ್”.  ಹೆಂ ಫಿಲ್ಮ್ ತಾಚೊ ಭಾವ್ ಆನಿ ಎಕ್ ಆಪ್ಘಾನಿ ಇಷ್ಟಾ ಸಾಂಗಾತಾ ಮೆಳೊನ್ ತಾಣಿಂ ನಿರ್ಮಾಣ್ ಕೆಲೆಂ.  ಬೆಸ್ಟ್ ಫೊಟೊಗ್ರಾಪರ್ ಮ್ಹಣ್ ನಾಂವಾಡ್ಲೆಲ್ಯಾ ಶ್ರೀ ಕಬಿರ್ ಮೊರಾಯಸಾಕ್ ಸಾಂಗಾತಾ ಘೆವ್ನ್ ತಾಣೆಂ ದೋನ್ ಫಿಲ್ಮಾಂ “Unexpected”  ಆನಿ “Expect the unexpected” ನಿರ್ಮಾಣ್ ಕೆಲಿಂ.  ಹಿಂ ದೊನೀ ಫಿಲ್ಮಾ ಅಂತಾರಾಷ್ಟ್ರೀಯ್ ಫಿಲ್ಮ್ ಫೆಸ್ಟಿವಲಾನಿಂ ವಿಂಚುನ್ ಅಯ್ಲಿಂ ಆನಿ ಸಾಂಗಾತಾ ತಾಚೆಂ ನಾಂವ್ ಗಾಜ್ಲೆಂ.  ಕಬಿರ್ ಮೊರಾಯಸಾ ಸಾಂಗಾತಾ ಮೆಳೊನ್ ತಾಣೆಂ ಥೊಡಿಂ ಉಣ್ಯಾ ಬಜೆಟಿಚಿಂ ಕಮರ‍್ಶಿಯಲ್ ಫಿಲ್ಮಾಂ ಉತ್ಪಾದನ್ ಕರ್ನ್, DVD ರುಪಾರ್ ರಿಲಿಜ್ ಕೆಲೆಂ.  ಪುಣ್ DVD ಫಿಲ್ಮಾಂಕ್ ಲಾಗು ಆಸ್‍ಲ್ಲ್ಯಾ ಅನುಧಾನಾ ವಯ್ರ್ ನಾಖುಶ್ ಜಾವ್ನ್ ತಾಣೆಂ ತೆಂ ಕಾಮ್ ಸೊಡುನ್ ದಿಲೆಂ.

ಉಪ್ರಾಂತ್ ತೊ DNV ಪ್ರೊಡಕ್ಷನ್ಸ್, ವಾಸ್ಕೊ ಹಾಚೊ ಶ್ರೀ ಡ್ಯಾನಿ ಗೊಯೆಸ್ ಆನಿ ಅಪ್ಲ್ಯಾ ಪ್ರೊಡಕ್ಷನ್ ಟೀಮಾ ಸಾಂಗಾತಾ “ಮಿಡಿಯಾ ವೇವ್ಸ್ ಫಿಲ್ಮ್ಸ್, ಡೆಲ್ಲಿ” ಹಾಂಚೆಂ ಖಾತಿರ್ ಆಸ್ಟ್ರೇಲಿಯಾಚೊ ಕ್ರಿಕೆಟರ್ ಬ್ರೆಟ್ಟ್ ಲೀ (Brett Lee)  ಘೆವ್ನ್ ಎಕ್ Ad ಫಿಲ್ಮ್ ತಯಾರ್ ಕೆಲೆಂ.  ಹೆಂ ಮಿಲ್ ರೊಯಾಚಾ ಫಿಲ್ಮಿ ಜಿವನಾಂತ್ ಎಕ್ ವ್ಹಡ್ಲೆಂ ಘಡಿತ್ ಜಾಂವ್ಕ್ ಪಾವ್ಲೆಂ.  ತಾಚೆ ಉಪ್ರಾಂತ್ ತಾಣೆಂ  “Let my Life go by – John Dcosta ft. Nick Ross”  ಹೆಂ ಮ್ಯೂಜಿಕ್ ವಿಡಿಯೊ VH1 ಖಾತಿರ್ ದಿಗ್ದರ್ಶನ್ ಕೆಲೆಂ.  ಸಾಂಗಾತಾಚ್ “ತುಮ್ ಸಾತ್ ನಹಿಂ” ಹಿಂದಿ ಪದ್ ಆನಿ ಎಕ್ “Casino Carnival” Ad ಫಿಲ್ಮ್ ಡೈರೆಕ್ಟ್ ಕೆಲೆಂ. ಜೆರಿಟೊನ್ ಡಾಯಾಸ್ ಹಾಚೆಂ ಕೊಂಕ್ಣಿ ಫಿಲ್ಮ್ “ದ ವಿಕ್ಟಿಮ್” ಹ್ಯಾಚ್ ವೆಳಾರ್ ತಾಣೆಂ ದಿಗ್ದರ್ಶನ್ ಕೆಲೆಂ.

ತಾಣೆಂ MTV ಖಾತಿರ್ ಖ್ಯಾತ್  ನಟಿ “ಸ್ಕಾರ್ಲೆಟ್ ರೋಸ್” ಹಾಕಾ ಘೆವ್ನ್ “Been Here Before” ನಾಂವಾಚಾ ಹಿಂದಿ ಫಿಲ್ಮಾಕ್ ದಿಗ್ದರ್ಶನ್ ದಿಲೆಂ.  “ಆದೆವ್ಸ್ ಮೊಗಾ” ನಾಂವಾಚೆಂ ಕೊಂಕ್ಣಿ ಹೊರರ್ ಫಿಲ್ಮ್ ದಿಗ್ದರ್ಶನ್ ಆನಿ ಸಂಕಲನ್ ಕೆಲೆಂ ಆನಿ ತೆಂ ಸುಪರ್ ಹಿಟ್ಟ್ ಜಾಲೆಂ.   ಫ್ಲಿಂಟ್ ಮಿಡಿಯಾ, ದುಬಾಯ್ ಹಾಂಚೆಂ ಮಟ್ವೆಂ ಫಿಲ್ಮ್ “ಪಿಯುನ್ ಎಕ್ ಚಾಪ್ರಾಸಿ” ದಿಗ್ದರ್ಶನ್ ತಾಣೆಂ ಕೆಲೆಂ.   ಜೋನ್ ಡಿ’ಕುನ್ಹಾ ಆನಿ ಬೊಲಿವುಡ್ಡ್ ಗಾಯಕ್ ಶಹಾ ತಿರುಪತಿ ಹಾಣಿಂ ಗಾಯ್ಲೆಲೆಂ “ತುಂಚ್ ಮ್ಹೊಜೆಂ ಜಿವಿತ್” ಕೊಂಕ್ಣಿ ವಿಡಿಯೊ ಮ್ಯೂಜಿಕ್ YOU Tube ಮಾರಿಪಾತ್ ರಿಲಿಜ್ ಜಾಲೆಂ.

ಪ್ರಸ್ತುತ್ ತೊ UK ಚೆಂ “ಮನ್ನಾ ಮೊಹಿ ಫಿಲ್ಮ್ಸ್” ಪ್ರೊಡಕ್ಶನ್ ಹೌಸ್ ಹಾಂಚೆಂ ಸಾಂಗಾತಾ ಅಪ್ಲೆಂ ಸ್ವತಾಚೆಂ “ಮಿಲ್ ರೊಯ್ ಗೊಯೆಸ್ ಫಿಲ್ಮ್ಸ್” ಬೆನರಾಚಾ ಭಾಗಿದಾರಿಂತ್ ಫಿಲ್ಮಾ ನಿರ್ಮಾಣ್ ಕರ್ತೆ ಆಸಾ.  ಆನಿ ತಿಂ ಫಿಲ್ಮಾಂ ದಿಗ್ದರ್ಶನ್ ಕರ್ಚೆಂ ಕಾಮ್ ತೊ ಕರ್ನ್ ಆಸಾ.  ಹ್ಯಾ ಭಾಗಿದಾರಿಚೆಂ ಪಯ್ಲೆಂ ಫಿಲ್ಮ್, ಮನ್ನಾ ಮೊಹಿ ಉತ್ಪಾದಿತ್ (WELCOME M1LL10NS) “ವೆಲ್ಕಮ್ ಮಿಲಿಯನ್ಸ್” ಮಿಲ್ ರೊಯಾನ್ ಸ್ವತಾ ಬರವ್ನ್ ದಿಗ್ದರ್ಶನ್ ಕೆಲಾಂ. ಹೆಂ ಫಿಲ್ಮ್ ಬೊಲಿವುಡ್ಡ್ ಕಲಾಕಾರ್ ರಜಾಕ್ ಖಾನ್  ಹಾಚೆ ವಯ್ರ್ ಕೇಂದ್ರಿತ್ ಆಸಾ.  ದುಖಾಚಿ ಗಜಾಲ್ ಮ್ಹಳ್ಯಾರ್  ಮೇ 24 ಆನಿ 25 ತಾರಿಕೆರ್ ಹ್ಯಾ ಫಿಲ್ಮಾಚ್ಯಾ ಶೂಟಿಂಗಾಂತ್ ವಾಂಟೆಲಿ ಜಾಲ್ಲೊ ರಜಾಕ್ ಖಾನ್ ಸ ದಿಸಾಂ ಉಪ್ರಾಂತ್ ದೆವಾಧಿನ್ ಜಾಲೊ.

ಅಂತರಾಷ್ಟ್ರಿಯ್ ಬ್ಯಾಂಡ್ ಗ್ರೂಪ್ MICHAEL LEARNS TO ROCK ಹಾಚೆಂ “Its Gonna Make Sense” ಪದ್ ಹ್ಯಾ ಫಿಲ್ಮಾಂತ್ ಅಸ್ತೆಲೆಂ.  ಬ್ಯಾಂಡ್ ಮೆಂಬರ್ ಮಿಕ್ಕೆಲ್ ಲೆಂಟ್ಜ್ ಹಾಣೆಂ ಹ್ಯಾ ಫಿಲ್ಮಾಕ್ ಪಾರ್ಶ್ವ ಸಂಗೀತ್ ದಿಲಾಂ.  “ವೆಲ್ಕಮ್ ಮಿಲಿಯನ್ಸ್” ಫಿಲ್ಮಾಂತ್ Pond’s Femina Miss Glowing Skin-2013 ಖ್ಯಾತ್ ಜೊಆನ್ ಡಿ’ಕುನ್ಹಾ ಮುಖೆಲ್ ಪಾತ್ರಾಂತ್ ದಿಸ್ತೆಲೆಂ.  ಸೊಹಾನ್ ಸರ್ಕಾರ್, ಲೆಸ್ ಮಿನೆಜಸ್, ಮನ್ನಾ ಮೊಹಿ ಇತರ್ ಮುಖೆಲ್ ಕಲಾಕಾರ್ ಜಾವ್ನಾಸಾತ್.

ಗೊಂಯ್ಚಾ ಎಕಾ ಆಳ್ಶಿ ಪೊಲಿಸ್ ಆಫಿಸಾರಾನ್ ಎಕ್ ಹುಶಾರ್ ಕ್ರಿಮಿನಲಾಕ್ ಸೊಧ್ಚೆಂ ಆನಿ ತ್ಯಾ ಅನ್ಯಾಯಾಕ್ ಬಲಿ ಜಾಲ್ಲ್ಯಾ ವ್ಯಕ್ತಿನ್  ನೀತ್ ಸೊಧ್ಚೆಂ ಹ್ಯಾ “ವೆಲ್ಕಮ್ ಮಿಲ್ಲಿಯನ್ಸ್” ಫಿಲ್ಮಾಂತ್ ಆಟಾಪ್ಲಾಂ.  ಹಾಂತುಂ ಬೊಲಿವುಡ್ಡ್ ಕಲಾಕಾರ್ ಜಾನ್ ಬೊಸ್ಟೊಕ್, ಪಂಜಾಬಿ ಕಲಾಕಾರ್ ಜಗ್ ಜೀತ್ ಬೊಪಾರಿ, ಕೊಂಕಣಿ ಕಲಾಕರಾಂ ಸೆಲ್ವಿ, ವರ್ದನ್ ಕಾಮತ್, ಜೊನಿ ಡಿ’ಕುನ್ಹಾ ಹಾಣಿಂ ಪಾತ್ ಖೆಳ್ಳ್ಯಾತ್.

ಗೋಯಾಂ ಆನಿ ಪಂಜಾಬಾಂತ್ ಚಿತ್ರಿಕರಣ್ ಕೆಲ್ಲ್ಯಾ ಹ್ಯಾ ಫಿಲ್ಮಾಂತ್, ಹಿಂದಿ, ಕೊಂಕಣಿ, ಇಂಗ್ಲಿಷ್ ಆನಿ ಪಂಜಾಬಿ ಭಾಸಾನಿಂ ಸಂವಾದ್ (dialogues) ಆಸ್ತೆಲೆ.