ಸಹಮಿಲನ್ – 2018

ಕೊಂಕಣಿ ಸೆವಾ ಸಂಘ್, ಮಹಾರಾಷ್ಟ್ರ ಥಾವ್ನ್ ಸಹಮಿಲನ್ ಕಾರ್ಯೆಂ

 ಕೊಂಕಣಿ ಸೆವಾ ಸಂಘ್, ಮಹಾರಾಷ್ಟ್ರ ಹ್ಯಾ ಕೊಂಕ್ಣಿ ಸಂಸ್ಥ್ಯಾನ್ ಆಪ್ಲೊ ವಾರ್ಷಿಕ್ ದಿವಸ್ “ಸಹಮಿಲನ್-2018”  ನಾವಾಖಾಲ್ ಜನೆರ್ 13, 2018 ಸಾಂಜೆಚಾ 8.30 ವರಾಂಚೆರ್ ಕುರ್ಲಾ ಕಮಾನಿ ಉಪಸ್ಥಿತ್ ಶ್ರೀ ಮೊಸೆಸ್ ಗೋಮ್ಸ್ ಆನಿ ಶ್ರೀಮತಿ ಜೀನ್ ಮೊಸೆಸ್ ಗೋಮ್ಸ್ ಹ್ಯಾ ಜೋಡ್ಯಾಚಾ ಮಾರ್ಸೆಲಿನ್ ಜ್ಯುನಿಯರ್ ಕೋಲೆಜಿಚಾ ಸಾಲಾಂತ್ (ಮೈಕಲ್ ಸ್ಕೂಲ್ ನಾವಾನ್ ಫಾಮಾದ್) ಬೊವ್ ಗದ್ದಾಳಾಯೆನ್ ಆಚಾರಣ್ ಕೆಲೊ.

ಸುರ್ವೆರ್ ಸ್ವಾಗತ್ ನಾಚಾ ದ್ವಾರಿಂ ಕಾರ್ಯಾಚಿ ಸುರ‍್ವಾತ್ ಜಾಲಿ.  ಶ್ರೀಮತಿ ಎವ್ಲಿನ್ ಡಿ’ಸೋಜಾನ್ ಮಟ್ವಿ ಮಾಗ್ಣ್ಯಾ ವಿಧಿ ಚಲೊವ್ನ್ ವೆಲಿ. ಉಪ್ರಾಂತ್ ಸಂಸ್ಥ್ಯಾಚೊ ಅಧ್ಯಕ್ಷ್ ಶ್ರೀ ಲೊರೆನ್ಸ್ ಡಿ’ಸೋಜಾ, ಕಮಾನಿ ಹಾಣಿಂ ಸರ್ವಾಂಕ್ ಸ್ವಾಗತ್ ಕರ್ನ್ “ಕೊಂಕ್ಣಿ ಬಾಸೆಚೊ ಪ್ರಸಾರ್ ಆನಿ ಕೊಂಕ್ಣಿ ಲೊಕಾಚೊ ವಿಕಾಸ್” ಹೊ ಮುಖ್ಯಾ ದ್ಯೇಯ್ ಜಾವ್ನ್ ಆಸ್ಚ್ಯಾ ಹ್ಯಾ ಸಂಸ್ಥ್ಯಾಚೆ ಮುಖೆಲ್ ಉದ್ದೇಶ್ ಸಾಂದ್ಯಾಂಚ್ಯಾ ಭುರ್ಗ್ಯಾಂಕ್ ಶಿಕ್ಪಾ ವಿಶಿಂ, ತಾಂಚಾ ಪುಡರಾ ವಿಶಿಂ ಮಾರ್ಗದರ್ಶನ್ ದಿಂವ್ಚೆಂ, ಗರ್ಜೆವಂತ್ ಗರಿಬ್ ಸಾಂದ್ಯಾಕ್ ಶೈಕ್ಷಣಿಕ್ ಆನಿ ವೈದ್ಯಕೀಯ್ ಶಿಕ್ಪಾ ಖಾತಿರ್ ಆರ್ಥಿಕ್ ಮಜತ್ ದಿಂವ್ಚಿ, ಕೊಂಕ್ಣಿ ಸಾಂಸ್ಕೃತಿಕ್ ಆನಿ ಸಾಮಾಜಿಕ್ ಕಾರ್ಯಾಂ ಆಸಾ ಕರ್ನ್, ಸಾಂದ್ಯಾಂ ಥಂಯ್ ಎಕ್ವೊಟ್ ಹಾಡ್ಚೊ,  ಫೆಸ್ತಾಂ-ಪರ್ಭೊ ಸಾಮುಹಿಕ್ ಥರಾನ್ ಆಚಾರಣ್ ಕರ್ಚೆಂ, ಆನಿ ಕೊಂಕ್ಣಿ ಭಾಸೆ ಖಾತಿರ್ ವಾವುರ‍್ಚಾ ಇತರ್ ಸಂಘ್-ಸಂಸ್ಥ್ಯಾ ಸಾಂಗಾತಾ ಮೆಳೊನ್ ಕೊಂಕ್ಣಿ ವಾವ್ರ್ ಕರ್ಚೊ ಅಶೆಂ ಮಟ್ವ್ಯಾನ್ ಮಾಹೆತ್ ದಿಲಿ. “ಆಮ್ಚಾ ಘರಾನಿಂ ಕೊಂಕ್ಣಿ ಭಾಸ್ ಉಲವ್ಯಾಂ, ಕೊಂಕ್ಣಿ ಭಾಸೆನ್ ಸದಾಂಚಿಂ ಮಾಗ್ಣಿಂ ಮ್ಹಣ್ಯಾಂ, ಕೊಂಕ್ಣಿ ಮಿಸಾಕ್ ಹಾಜರ್ ಜಾಂವ್ಯಾಂ, ಕೊಂಕ್ಣಿ ಬೂಕ್ ಆನಿ ಪತ್ರಾಂ ಮೊಲಾಕ್ ಘೆಂವ್ಯಾಂ ಆನಿ ವಾಚ್ಯಾಂ, ಕೊಂಕ್ಣಿ ಕಾರ್ಯಾಂಕ್ ಪಾಟಿಂಬೊ ದಿಂವ್ಯಾಂ. ಕೊಂಕ್ಣಿ ಆಮ್ಚಿ ಮಾಂಯ್ ಭಾಸ್ ತಿಕಾ ಆಮ್ಚಾ ಕಾಳ್ಜಾಂತ್ ಆವಯ್ಚೊ ಜಾಗೊ ದಿಂವ್ಯಾ ಆನಿ ಇಂಗ್ಲಿಶ್ ಆಮ್ಚಿ ಪೋಟಾಚಿ ಭಾಸ್, ತಿಕಾ ಪೊಟಾಂತ್‍ಚ್  ದವರ‍್ಯಾಂ” ಮ್ಹಣೊನ್  ಫಿರ್ಗಜಿಚಾ ಸರ್ವ್ ಕೊಂಕ್ಣಿ ಲೊಕಾಕ್ ಹ್ಯಾ ಸಂಸ್ಥ್ಯಾಚೆ ಸಾಂದೆ ಜಾಂವ್ಕ್ ತಾಣೆ ಉಲೊ ದಿಲೊ.

ದೆವಿಕಾ ಮೊಂತೆರೊ ಆನಿ ಬ್ಲ್ಯಾನಿ ಡಿ’ಕೋಸ್ಟಾ

ಕಾರ್ಯಾಕಾರಿ ಸಮಿತಿಚೆ ಸಾಂದೆ ಶ್ರೀಮತಿ ಅನಿತಾ ಶೆಟ್ಟಿ (ಕಾರ್ಯಾದರ್ಶಿ), ಶ್ರೀ ನೊರ್ಸಿ ಮೊಂತೆರೊ (ಖಜನ್ಧಾರ್) ಆನಿ ಕಾರ್ಯಾಕಾರಿ ಸಮಿತಿಚೆ ಸಾಂದೆ ಶ್ರೀಮತಿ ಎವ್ಲಿನ್ ಡಿ’ಸೋಜಾ, ಸರ್ವ್‍ಶ್ರೀ ಒಜಿ ಕೊರ್ಡೆರಾ, ಮ್ಯಾಕ್ಸಿ ಮೊಂತೆರೊ, ಡೆಸ್ಮಂಡ್ ಲೋಬೊ, ಡೊಮಿನಿಕ್ ಪಿಂಟೊ, ಎಡ್ವರ್ಡ್ ಸಲ್ಡನ್ಹಾ ವೆಧಿಚೆರ್ ಹಾಜರ್ ಆಸ್‍ಲ್ಲೆ.

ಸಾಂಸ್ಕೃತಿಕ್ ಕಾರ್ಯಾಚೊ ವಾಂಟೊ ಜಾವ್ನ್ ರಾಯ್ಸಿಂಗ್ ಸ್ಟಾರ್ಸ್, ಮಹಾಕಾಲಿಚ್ಯಾ (Rising Stars, Mahakali) ನೆಣ್ತ್ಯಾಂ ಭುರ್ಗ್ಯಾಂ ಥಾವ್ನ್ ನಾಚ್ ಆಸ್‍ಲ್ಲೆ. ಹ್ಯಾ ನಾಚಾನಿಂ ಅರಶೆಲ್ ಗೊವಿಯಸ್, ರೀಶೆಲ್ ಗೊವಿಯಸ್, ರೈಜ಼ೆಲ್ ಮುಂತೊಡೆ, ಎಂಜೆಲ್ ಮುಂತೊಡೆ, ವಿನ್ಶೆಲ್ ಡಿ’ಸೋಜಾ ಆನಿ ಜೊಯ್ಡನ್ ರೇಗೊ ಹಾಣಿಂ ವಾಂಟೊ ಘೆತ್ಲೊ. ಶ್ರೀ ಬ್ಲ್ಯಾನಿ ಡಿ’ಕೋಸ್ಟಾನ್ ಆಪ್ಲ್ಯಾ ಸುಮಧುರ್ ತಾಳ್ಯಾನ್ ಕೊಂಕ್ಣಿ ಆನಿ ಹಿಂದಿ ಪದಾಂ ಗಾವ್ನ್ ಲೋಕಾಕ್ ದಾದೊಸ್ ಕೆಲೆಂ.  ಶ್ರೀಮತಿ ದೆವಿಕಾ ಮೊಂತೆರೊನ್ ಕೊಂಕ್ಣಿ ಸುಡಾಳ್ ಥರಾನ್ ಉಲಂವ್ಕ್ ಯೆನಾ ತರೀ, “ಮೊಗ್ ತುಜೊ ಕಿತ್ಲೊ ಅಶೆಲೊಂ” ಹೆಂ ಕೊಂಕ್ಣಿ ಪದ್ ಬೋವ್ ಆಪುರ್ಬಾಯೆನ್ ಗಾವ್ನ್ ಸರ್ವಾಂಚಿ ಕಾಳ್ಜಾಂ ಜಿಕ್ಲಿಂ. ಶ್ರೀಮತಿ ಎವ್ಲಿನ್ ಡಿ’ಸೋಜಾ, ಡೊಮಿನಿಕ್ ಪಿಂಟೊ ಆನಿ ಎಡ್ವರ್ಡ್ ಸಲ್ಡಾನ್ಹಾನ್ ಆಪ್ಲ್ಯಾ ಮಧುರ್ ತಾಳ್ಯಾನಿ ಕೊಂಕ್ಣಿ ಪದಾಂ ಗಾಯ್ಲಿಂ.

ಶ್ರೀಮತಿ ಮಟಿಲ್ಡಾ ಮಿರಾಂದಾ-ನ್ ಆಪ್ಲ್ಯಾ ಪೊಕಣಾಂ ದ್ವಾರಿಂ ಪ್ರೇಕ್ಶಕಾಂಕ್ ಪೋಟ್ ಭರ್ ಹಾಸಾಯ್ಲೆಂ.

ಹ್ಯಾ ಸಂದರ್ಭಾರ್ ಜನೆವರಿ 27 ತಾರಿಕೆರ್ ಆಪ್ಲೊ ಭಾಂಗ್ರಾಳೊ ಜನಮ್ ದಿವಸ್ ಆಚಾರ್ಸುಂಚಾ ಶ್ರೀ ಒಝಿ ಕೊರ್ಡೆರಾಕ್ ಅಧ್ಯಕ್ಷ್ ಶ್ರೀ ಲೊರೆನ್ಸ್ ಡಿ’ಸೋಜಾ, ಕಮಾನಿನ್ ಶಾಲ್ ಪಾಂಗ್ರುನ್, ಫುಲಾಂ ದಿವ್ನ್ ಆನಿ ಹ್ಯಾ ಮಹಿನ್ಯಾಂತ್ ಆಪ್ಲೊ ಜಲ್ಮಾ ದೀಸ್ ಆಚಾರಣ್ ಕರ್ಚಾ ಇತರ್ ಪಾಂಚ್ ಜಣಾಂ ಸಾಂದ್ಯಾ ಸಂಗಿಂ ಕೇಕ್ ಕಾತರ್ನ್ ಸನ್ಮಾನ್ ಕೆಲೊ.

ಥೊಡ್ಯಾಚ್ ದಿಸಾಂ ಆದಿಂ ಆಪ್ಲ್ಯಾ ಕಾಜರಾಚೊ ರುಪ್ಯೋತ್ಸವ್ ಆಚಾರಣ್ ಕೆಲ್ಲ್ಯಾ ಶ್ರೀಮತಿ ಚಾರು ಒಲಿವೆರಾ ಆನಿ ಶ್ರೀ ಲಿಬರ್ಟ್ ಒಲಿವೆರಾ ಹಾಂಕಾಂ ಉಲ್ಲಾಸುನ್ ಆನಿ 60 ವಯ್ರ್ ಹಿಂದಿ ಟಿವಿ ಸಿರಿಯಲಾನಿಂ ಆನಿ ರಾಯಿಸ್, ತಲಾಶ್ ಆನಿ ABCD 1 ಹ್ಯಾ ಹಿಂದಿ ಫಿಲ್ಮಾನಿಂ ನಟನ್ ಕರ್ನ್ ಲೋಕಾ ಮೊಗಾಳ್ ಜಾಲ್ಲ್ಯಾ ಶ್ರೀ ಲಿಬರ್ಟ್ ಒಲಿವೆರಾಕ್ ಫುಲಾಂ ಸಂವೆಂ ಮಾನ್ ಕೆಲೊ.

ಶ್ರೀ ಒಝಿ ಕೊರ್ಡೆರಾನ್ ಉಪ್ಕಾರ್ ಆಟಾವ್ಣಿ ಕೆಲಿ.  ಶ್ರೀಮತಿ ಐಡಾ ರೋಚ್ ಹಿಣೆಂ ಜೆವ್ಣಾಂ ಅದಿಂ ಮಾಗ್ಣೆಂ ಬೆಟಾಯ್ಲೆಂ. ಶ್ರೀಮತಿ ದೆವಿಕಾ ಮೊಂತೆರೊನ್ ಬೊವ್ ಬೊರ‍್ಯಾ ಥರಾನ್ ಕಾರ್ಯಾ ನಿರ್ವಾಹಣ್ ಕೆಲೆಂ.

ಬೆನ್ ಹಿಲ್ ಕೇಟರರ್ಸ್ ಥಾವ್ನ್ ಆಸಾ ಕೆಲ್ಲ್ಯಾಸ್ವಾದಿಷ್ಟ್ ಜೆವ್ಣಾ ಸಂವೆಂ ಸಹಮಿಲನ್ ಸಂಪ್ಲೆಂ.