ಶ್ರೀ ಆಂಟೊನಿಯೊ ಲೊರೆನ್ಸ್ ಜೆರಿ ಬ್ರಗಾಂಜಾ
ಕೊಂಕ್ಣಿ ಪಿಂತುರಾಂಚೊ ಬಾಪುಯ್
(ಆಲ್ ಜೆರಿ ಬ್ರಗಾಂಜ಼ಾ)
ಆಜ್ ಕಾಲ್ ಗೊಯಾಂತ್ ಆನಿ ಮಂಗ್ಳೂರಾಂತ್ ಆಮ್ಕಾಂ ಸಬಾರ್ ನವ್ಯಾ ನವ್ಯಾ ಕೊಂಕ್ಣಿ ಫಿಲ್ಮಾಂ ವಿಶಿಂ ಅಯ್ಕೊಂಕ್ ವ ಪಳೆಂವ್ಕ್ ಮೆಳ್ತಾ. ಕೊಂಕ್ಣಿ ಫಿಲ್ಮ್ ಇಂಡಸ್ಟ್ರಿ ಪರಾತ್ ಎಕ್ ಪಾವ್ಟಿಂ ಜಿವಾಳ್ ಜಾಲ್ಲೊ ಆನ್ಭೊಗ್ ಜಾತಾ. ಗೊಯಾಂತ್ ಥೊಡ್ಯಾ ಬೊರ‍್ಯಾ ಮಟ್ಟಾಚ್ಯಾ ಫಿಲ್ಮಾನಿ ಬರೆಂ ನಾಂವ್ ಹಾಡ್ಲಾಂ ಮಾತ್ರ್ ನಹಿಂ ಆಸ್ತಾಂ ಕೊಂಕ್ಣಿ ಫಿಲ್ಮಾಂಕ್ ಸಬಾರ್ ದೇಶ್ ಆನಿ ವಿದೇಶಿ ಪುರಸ್ಕಾರ್ ಲಾಬ್ಲ್ಯಾತ್. ಮಂಗ್ಳೂರಾಂತ್ ಸಬಾರ್ ಫಿಲ್ಮಾ ತಯಾರ್ ಜಾವ್ನ್, ಪ್ರದರ್ಶಿತ್ ಜಾಲ್ಯಾಂತ್ ಆನಿ ತಾಂಕಾಂ ಪ್ರೇಕ್ಶಕಾಂಚೊ ಬರೊ ಸಹಕಾರ್ ಲಾಭೊನ್ ಆಸಾ ಹಿ ಎಕ್ ಸಂತೊಸಾಚಿ ಗಜಾಲ್. ಹೆಂ ಪಳೆವ್ನ್ ಆನಿ ಥೊಡೆ ನವಿಂ ಫಿಲ್ಮಾಂ ತಯಾರ್ ಕರುಂಕ್ ಮನ್ ಕರುನ್ ಆಸಾತ್. ಅಶೆಂಚ್ ಮುಕಾರ್ ವ್ಹಚಾತ್ ತರ್ ಕೊಂಕ್ಣಿ ಫಿಲ್ಮ್ ಇಂಡಸ್ಟ್ರಿ ಅಮ್ಚಾ ಉದೆವ್ನ್ ಯೆಂವ್ಚಾ ತಾಲೆಂತ್ ವಂತ್ ಕಲಾಕಾರಾಂಕ್ ಎಕ್ ಬರಿ ವೆಧಿ ಜಾಂವ್ಕ್ ಪಾವ್ತೆಲಿ.
ಪುಣ್ ಹ್ಯಾ ಸಗ್ಳ್ಯಾ ಕೊಂಕ್ಣಿ ವಾವ್ರಾ ಪಾಟ್ಲ್ಯಾನ್ ಎಕ್ ನಾಂವ್ ಲಿಪೊನ್ ಆಸಾ ಆನಿ ತೆಂ ಜಾವ್ನಾಸಾ ಕೊಂಕ್ಣಿ ಪಿಲ್ಮಾಂಚೊ ಬಾಪುಯ್ ಮ್ಹುಣೊನ್ ನಾಂವಾಡ್ಲೆಲ್ಯಾ ಮಾನೆಸ್ತ್ ಆಂಟೊನಿಯೊ ಲೊರೆನ್ಸ್ ಜೆರಿ ಬ್ರಗಾಂಜಾ, ಮಟ್ವ್ಯಾನ್ ಆಲ್ ಜೆರಿ ಬ್ರಗಾಂಜಾ. ಆನ್ಯೇಕ್ ನಾಂವ್ ಹಾಚೆ ಸಾಂಗಾತಾ ಜೊಡುನ್ ಅಸ್ತೆಂ; ಪುಣ್ ದುರ್ದೈವಾನ್ ತಶೆಂ ಘಡ್ಲೆಂ ನಾ. ತೆಂ ಜಾವ್ನಾಸಾ ಮುಂಬಯ್ಚೊ ಜಿ. ಎಮ್. ಬಿ. ರೊಡ್ರಿಗಸ್. ಜೆರಿ ಬ್ರಗಾಂಜ಼ಾ ಆನಿ ಜಿ. ಎಮ್. ಬಿ.-ನ್ ಎಕಾಚ್ ವೆಳಾರ್ ಎತಿಕಾ ನಾಂವಾಚಾ ಕಂಪೆನಿ ಖಾತಿರ್ ಕೊಂಕ್ಣಿ ಫಿಲ್ಮಾಂ ಉತ್ಪನ್ನ್ ಕರ್ಚಿ ಜವಾಬ್ದಾರಿ ಹಾತಿಂ ಘೆತ್‍ಲ್ಲಿ ತರೀ ಜಿ. ಎಮ್. ಬಿ. ಉತ್ಪನ್ನ್ ಕರ್ನ್ ಆಸ್‍ಲ್ಲೆಂ “ಸುಖಿ ಕೋಣ್?” ಫಿಲ್ಮ್ ಕಾರಣಾಂತರ್ ರಿಲಿಜ್ ಜಾಲೆಂ ನಾ.
ಶ್ರೀ ಆಂಟೊನಿಯೊ ಲೊರೆನ್ಸ್ ಜೆರಿ ಬ್ರಗಾಂಜ಼ಾ (ಉಪ್ರಾಂತ್ ಆಲ್ ಜೆರಿ ಬ್ರಗಾಂಜಾ) ಹಾಚೊ ಜಲ್ಮ್ ಗೊಯಾಂತ್ 1920 ಅಗೊಸ್ತ್ ಮಹಿನ್ಯಾಚಾ 28 ವೆರ್ ಮಾಪ್ಸಾಂತ್ ಜಾಲೊ. ತಾಚೆ ಮುಳಾವೆಂ ಶಿಕಾಪ್ ಸೆಕ್ರೆಡ್ ಹಾರ್ಟ್ ಆಫ್ ಜೀಜಸ್ ಹೈಸ್ಕೂಲ್, ಪಾರ್ರಾ ಹಾಂಗಾಸರ್ ಜಾಲೆಂ. ತಾಕಾ ಭುರ್ಗ್ಯಾಪಣಾ ಥಾವ್ನ್ ನಟನ್ ಆನಿ ಪದಾಂ ಗಾಂವ್ಚ್ಯಾಂತ್ ಆಭಿರೂಚ್ ಆಸ್‍ಲ್ಲಿ. ಬರೊ ಪುಡಾರ್ ಸೊಧುನ್ 1940 ಇಸ್ವೆಂತ್ ತೊ ಮುಂಬಯ್ ಪಾವ್ಲೊ. ಥೊಡೊ ತೇಂಪ್ ತಾಣೆಂ ಬೊಂಬೆ ಟ್ಯುಟೋರಿಯಲ್ ಕೊಲೆಜಿಂತ್ ಆನಿ ಉಪ್ರಾಂತ್ ಐ. ಇ. ಎಮ್. ಇ. ವರ್ಕ್ ಶೋಪಾಂತ್ ಸೆವಾ ದಿತೆಚ್ ತೊ ಫಿಲ್ಮ್ಸ್ ಡಿವಿಜನ್ (ತೆದ್ನಾ ಇಂಡಿಯನ್ ನಿವ್ಸ್ ಪೇರೆಡ್) ಥಂಯ್ಸರ್ ಟೆಲಿಪೊನ್ ಒಪರೇಟರ್ ಜಾವ್ನ್ ಭರ್ತಿ ಜಾಲೊ. ಪುಣ್ ತಾಚೆ ಥಂಯ್ ಆಸ್‍ಲ್ಲಿ ತಿ ಉಮೆದ್ ಜಿವಿ ಜಾಲಿ ಆನಿ ತೊ ತಾಚ್ಯಾ ಸೊಧ್ನೆರ್ ಚೆಂಬುರ್ ಲಾಗ್ಸಾರ್ ಉಪಸ್ಥಿತ್ ಗೀತಾ ಪಿಕ್ಚರ್ಸ್ & ಸ್ಟುಡಿಯೊಸ್ ಹಾಂಗಾಸರ್ ಭರ್ತಿ ಜಾಲೊ.
ಉಪ್ರಾಂತ್ ರಮೇಶ್ ವ್ಯಾಸ್ ಆನಿ ವಿಶ್ವ ಭಾರತಿ ಫಿಲ್ಮ್ಸ್ ಹಾಂಚ್ಯಾ ಫಿಲ್ಮಾಂಚೊ ಮುಖೆಲ್ ನಿರ್ಮಾಣ್ ನಿರ್ವಾಹಕ್ ಜಾಂವ್ಕ್ ಪಾವ್ಲೊ. ಹಾಂಗಾಸರ್ ಫಿಲ್ಮ್ ನಿರ್ಮಾಣ್ ಕರ್ಚೆ ವಿಶಿಂ ಜಾಯ್ ತಿ ಮಾಹೆತ್ ತಾಕಾ ಲಾಭ್ಲಿ ಆನಿ ಸಾಂಗಾತಾಚ್ ನವ್ಯಾನ್ ಸುರ‍್ವಾತ್ ಜಾಲ್ಲ್ಯಾ ’ಎತಿಕಾ’ (ಎಕ್ಶೇಂಜ್ ಟೋಕಿಸ್ ಆಫ್ ಇಂಡಿಯಾ, ಚೈನಾ & ಆಫ್ರಿಕಾ)ಹಾಚೆ ಖಾತಿರ್ ಕೊಂಕ್ಣಿ ಫಿಲ್ಮ್ ತಯಾರ್ ಕರ್ಚೊ ಅವ್ಕಾಸ್ ತಾಕಾ ಲಾಬ್ಲೊ. ತಾಚೆ ಲಾಗಿಂ ಬರ್ಪೂರ್ ಆನ್ಭೋಗ್ ಆಸ್‍ಲ್ಲೊ ದೆಕುನ್ ತಾಣೆಂ ತೊ ಆವ್ಕಾಸ್ ದೊನೀ ಹಾತಾನಿ ಆಪ್ಣಾಯ್ಲೊ ಆನಿ ದಿಯೊಗಿನ್ಹೊ ಡಿ’ಮೆಲ್ಲೊ ಹಾಣೆ ಬರಯ್ಲೆಲ್ಯಾ “ಮೊಗಾಚಿ ವ್ಹೊಡ್” ಕಾದಂಬರಿಚೆರ್ ಆಧಾರಿತ್ ಫಿಲ್ಮ್ ತಯಾರ್ ಕರ್ಚಿ ಸುರ‍್ವಾತ್ ಕೆಲಿ.
1949 ಜುಲಾಯ್ ಮಹಿನ್ಯಾಚಾ 31 ತಾರೀಕೆರ್ ಆಪ್ಲ್ಯಾ ಫಿಲ್ಮಾಚೆಂ ಮುಹೂರ್ತ್ ಗೊಂಯಾಂತ್ ಕೆಲೆಂ ಆನಿ ಫಿಲ್ಮಾಚೆಂ ಚಿತ್ರಿಕರಣ್ ಸುರ‍್ವಾತ್ ಕೆಲೆಂ. ಗೊಂಯ್ಚಾ ಎಕಾ ಗರಿಭ್ ಕುಟ್ಮಾ ವಯ್ರ್ ಆಧಾರಿತ್ ಕಾಣಿ ಆಸ್‍ಲ್ಲ್ಯಾನ್ ಸಗ್ಳೆಂ ಚಿತ್ರಿಕರಣ್ ಗೋಯಾಂತ್ ಮ್ಹಣ್ಜೆ ಕಲ್ಲಂಗೂಟ್, ಕಂಪಾಲ್, ಮಾಂಡೊವಿ ನ್ಹಂಯ್ ತಡ್, ಲಾಯ್ಟ್ ಹೌಸ್ ಆನಿ ಇತರ್ ಸುಂದರ್ ಸುವಾತ್ಯಾನಿಂ ಕಾಬಾರ್ ಕರ್ನ್ ’ನೋವ್ ಮಹಿನ್ಯಾಂ” ಭಿತರ್ ಆಪ್ಲೆಂ ಪಯ್ಲ್ಯಾನ್ ಪಯ್ಲೆಂ ಕೊಂಕ್ಣಿ ಫಿಲ್ಮ್ “ಮೊಗಾಚೊ ಆಂವ್ಡೊ” ಪ್ರದರ್ಶನಾಕ್ ತಯಾರ್ ಕೆಲೆಂ. ಆನಿ ಅಬ್ಳೆ, 1950 ಎಪ್ರಿಲ್ 24 ದಿಸಾ “ಮೊಗಾಚೊ ಆಂವ್ಡೊ” ಮುಂಬಯ್ಚಾ ಮಾಟುಂಗಾಂತ್ ’ರಿವೊಲಿ’ ಆನಿ ಮಜ಼್ಗಾಂವಾಂತ್ ’ಸ್ಟಾರ್’ ಆನಿ ಗೊಯಾಂತ್ ಮಾಪ್ಸಾಚಾ ’ದಶರತ್’ ಟೋಕಿಸಾನಿಂ ಎಕಾಚ್ ದಿಸಾ ಪ್ರದರ್ಶನಾಕ್ ಗಾಲ್ನ್ ಕೊಂಕ್ಣಿ ಫಿಲ್ಮ್ ಇತಿಹಾಸಾಂತ್ ಎಕ್ ದಾಕ್ಲೊ ರಚ್ಲೊ. ಎಕ್ಸ್-ಛೇಂಜ್ ಟೊಕಿಸ್ ಆಫ್ ಇಂಡಿಯಾ, ಚೈನಾ ಎಂಡ್ ಆಫ್ರಿಕಾ (ETICA) ಬೊಂದೆರಾಖಾಲ್ ನಿರ್ಮಿತ್ ಹ್ಯಾ ಫಿಲ್ಮಾಕ್ ಶ್ರೀ ಆಲ್ ಜೆರಿ ಬ್ರಗಾಂಜಾನ್ ದಿಗ್ದರ್ಶನ್ ದಿಲಾಂ ಮಾತ್ರ್ ನಹಿಂ ಆಸ್ತಾಂ ತಾಚಿಂ ಪದಾಂ ಗಾಯ್ಲ್ಯಾಂತ್ ಆನಿ ಸಂವಾದ್ ಬರಯ್ಲ್ಯಾತ್. ಹ್ಯಾ ಫಿಲ್ಮಾಂತ್ ಲಿನಾ ಫೆರ್ನಾಂಡಿಸ್, ಲುವಿಸ್ ರಾತುಸ್, ಐರಿನ್ ಅಮರಾಲ್, ಎಲಿಜಾಬೆತ್ ಡಿ’ಆಬ್ರೆವೊ, ಮೆರಿ ಡಿ’ಸೋಜಾ, ಜೆಕಬ್ ಫೆರ್ನಾಂಡಿಸ್, ಜೊಯ್ಸ್ ಫೆರ್ನಾಂಡಿಸ್, ರೊಮಿಯೊ ಪಾವ್ಲ್ ಪಿರೆಸ್, ಜೇಮ್ಸ್ ಬ್ರಗಾಂಜಾ ಹಾಣಿಂ ನಟನ್ ಕೆಲಾಂ. ಆಲ್ಫ್ರೆಡ್ ಆಲ್ಮೇಡಾ ಹಾಣಿಂ ಹ್ಯಾ ಫಿಲ್ಮಾಕ್ ಸಂಗೀತ್ ದಿಲಾಂ. ಜೆರಿ ಬ್ರಗಾಂಜ಼ಾ ಸಾಂಗಾತಾ ಲಿನಾ ಫೆರ್ನಾಂಡಿಸ್ ಆನಿ ಜೇಮ್ಸ್ ಬ್ರಗಾಂಜಾ ಹಾಣಿಂ ಪದಾಂ ಗಾಯ್ಲ್ಯಾಂತ್.
ಆಲ್ ಜೆರಿ ಬ್ರಗಾಂಜಾನ್ 1966 ಇಸ್ವೆಂತ್ ಅಪ್ಲೆಂ ದುಸ್ರೆಂ ಕೊಂಕ್ಣಿ ಪಿಲ್ಮ್ ’ಸುಖಾಚೆಂ ಸ್ವಪಾಣ್” ಹೆಲೆನ್ ಪ್ರೊಡಕ್ಶನ್ಸ್ ಬೊಂದೆರಾಖಾಲ್ ನಿರ್ಮಾಣ್ ಕೆಲೆಂ. ಹ್ಯಾ ಫಿಲ್ಮಾಚಿ ಕಾಣಿ ಎಲ್. ಎಮ್. ರಾತುಸ್ ಹಾಚಿ ಜಾವ್ನಾಸಾ. ಪದಾಂ, ಪಠ್-ಕಥಾ, ಸಂವಾದ್ ಆನಿ ದಿಗ್ದರ್ಶನ್ ಜೆರಿ ಬ್ರಗಾಂಜಾಚೆಂ ಜಾವ್ನಾಸಾ. ಜೆರಿ ಬ್ರಗಾಂಜಾ, ಫಾತಿಮಾ, ಸಿಸಿಲಿಯಾ ಮಾಚಾದೊ, ಆಂಟೊನೆಟ್ ಮೆಂಡಿಸ್, ಸೋಜಾ ಫೆರಾವೊ, ರೊಬಿನ್ ವಾಜ್, ರಿಕೊ ರೋಡ್, ಶ್ರೀರಂಗ್ ನಾರ್ವೆಕರ್, ಜೇಮ್ಸ್ ಬ್ರಗಾಂಜಾ, ಜೊಯ್ಸ್ ನೊರ್ಟನ್, ಫ್ರಾನಿಸ್ ಒಲಿವೆರೊ ಗೋಮ್ಸ್, ಪ್ಯಾಟ್ರಿಕ್ ವಾಜ್, ವೆರ್ನನ್ ಜೂನ್, ಮಾರಿಯೊ ಆನಿ ವೀಣಾ ಹ್ಯಾ ಫಿಲ್ಮಾಚಿಂ ಕಲಾಕಾರಾಂ ಜಾವ್ನಾಸಾತ್. ಸಂಗೀತ್ ಮ್ಯಾನುವೆಲ್ ಆಲ್ಫೊನ್ಸೊ ತರ್ ಜೆರಿ ಬ್ರಗಾಂಜಾ, ಆಂತೊನೆತ್ ಮೆಂಡಿಸ್, ಸೋಜಾ ಫೆರಾವೊ, ಆಲ್ಫ್ರೆಡ್ ರೊಜ್, ಸಿಸಿಲಿಯಾ ಮಾಚಾದೊ, ರೊಬಿನ್ ವಾಜ಼್ ಹಾಣಿಂ ಪದಾಂ ಗಾಯ್ಲ್ಯಾಂತ್. ಪದಾಂಚಿಂ ಉತ್ರಾಂ ಆಲ್ಫ್ರೆಡ್ ರೊಜ್, ಜೆರಿ ಬ್ರಗಾಂಜಾ, ರೊಬಿನ್ ವಾಜ್ ಆನಿ ಸಿಸಿಲಿಯಾ ಮಾಚಾದೊ ಹಾಣಿಂ ಲಿಖ್ಲ್ಯಾಂತ್.
ದಾಲ್ಗಾಡೊ ಕೊಂಕಣಿ ಆಕಾಡಮಿ, ಗೋವಾ ಆನಿ ಫೊಸ್ಟ್ ಮಾಸ್ಟರ್ ಜನರಲ್, ಗೋವಾ, ಶ್ರೀ ಚಾರ್ಲ್ಸ್ ಲೋಬೊ ಹಾಂಚಾ ಮಿನ್ಹತೆನ್ 24 ಎಪ್ರಿಲ್, 2015 ಕೊಂಕಣಿ ಸಿನೆಮಾ ದಿವಸಾಚಾ ಸಂದರ್ಭಿ ಗೊಂಯ್ಚೊ ಉಪ-ಮುಖೆಲ್ ಮಂತ್ರಿ ಶ್ರೀ ಫ್ರಾನ್ಸಿಸ್ ಡಿ’ಸೋಜಾ ಹಾಚೆಂ ಹಾತಿಂ ಎಕ್ ಸ್ಪೆಶಲ್ ಪೊಸ್ಟಲ್ ಕವರ್ ರಿಲಿಜ್ ಕೆಲೆಂ.
[ಕೊಂಕ್ಣಿ ಫಿಲ್ಮಾಂಚೊ ಬಾಪುಯ್ ಆಲ್ ಜೆರಿ ಬ್ರಗಾಂಜಾ ಹಾಚಾ ಅಮರ್ ಉಗ್ಡಾಸಾ ಖಾತಿರ್ ಆಸಾ ಕೆಲ್ಲೆಂ ಹೆಂ ಸ್ಪೆಶಲ್ ಪೊಸ್ಟಲ್ ಕವರ್.]
ಹ್ಯಾ ಪಯ್ಲ್ಯಾ ಕೊಂಕ್ಣಿ ಫಿಲ್ಮಾಚಿಂ ಥೊಡಿಂ ರೀಲಾಂ ಹಾತಿಂ ಮೆಳ್ಳ್ಯಾಂತ್ ಆನಿ ಇತರ್ ರೀಲಾಂ ಸೊದ್ಚೊ ಪ್ರಯಾಸ್ ಚಲೊನ್ ಆಸಾ. ಹೆಂ ಕಾಮ್ ಸುಫಳ್ ಜಾಯ್ತ್ ತರ್ ಆಮ್ಕಾಂ ಸರ್ವಾಂಕ್ ’ಮೊಗಾಚೊ ಆಂವ್ಡೊ’ ಫಿಲ್ಮ್ ಪಳೆಂವ್ಚೊ ಸುಯೋಗ್ ಲಾಭ್ತೊಲೊ. ಆನಿ ತಶೆಂಚ್ ಜಾಂವ್…!
