ಶ್ರೀ ಮೆಕ್ಸಿಮ್ ಪಿರೇರಾ
“ಮಾನಸ” ಉಪ್ರಾಂತ್ “ಆಶೆಂ ಜಾಲೆಂ ಕಶೆಂ !!!?
ದಿಗ್ದರ್ಶಕ್ – ಶ್ರೀ ಮೆಕ್ಸಿಮ್ ಪಿರೇರಾ
“ಅಶೆಂ ಜಾಲೆಂ ಕಶೆಂ?” (ತುಳುಂತ್ “ಇಂಚ ಆಂಡ್ ಎಂಚ”) ಕೊಂಕ್ಣಿ ಆನಿ ತುಳು ಸಂಭಾಷಣಾನಿಂ ಅಸ್ಚೆಂ ಹೆಂ ಫಿಲ್ಮ್ ಎಪ್ರಿಲ್ 21, 2017 -ವೆರ್ ಮಂಗ್ಳೂರ್ ಆನಿ ಭಂವ್ತೊಣಿಂಚ್ಯಾ ಶಹರಾನಿಂ ಪ್ರದರ್ಶಿತ್ ಜಾಂವ್ಚೆಂ ಆಸಾ. ಹಾಚೊ ಬರಯ್ಣಾರ್, ನಿರ್ಮಾಪಕ್ ಆನಿ ದಿಗ್ದರ್ಶಕ್ ಶ್ರೀ ಮೆಕ್ಸಿಮ್ ಪಿರೇರಾ ಕೊಂಕ್ಣಿ ಸಮಾಜಿಕ್ ಕಾಂಯ್ ನವೊ ಮನಿಸ್ ನಹಿಂ. ತಾಣೆ “ಗ್ಲೊರಿಯಸ್ ಆಂಜೆಲೊರ್” ಬೊಂದೆರಾಖಾಲ್ ನಿರ್ಮಾಣ್ ಕೆಲ್ಲೆಂ ಟೆಲಿ ಫಿಲ್ಮ್ “ಮಾನಸ” ಬರೆಂಚ್ ಹಿಟ್ಟ್ ಜಾಲ್ಲೆಂ.
ಮೆಲೊಡಿ ಸ್ಟಾರ್ “ಬಾಯ್ಲಾ ಬೂಮ್ ಮಾಕ್ಸಿಮ್” ನಾಂವಾನ್ ಸಕ್ಡಾಂಕ್ ವಳ್ಕಿಚೊ ಮೆಕ್ಸಿಮ್ ಪಿರೇರಾ, ಆಂಜೆಲೊರ್-ಚ್ಯಾ ದೆವಾಧಿನ್ ಜೋನ್ ಪಿರೇರಾ ಆನಿ ಸಿಸಿಲಿಯಾ ಪಿರೇರಾ ಹಾಂಚೊ ಪುತ್ ಜಾವ್ನಾಸಾ.
ಮೆಕ್ಸಿಮಾಚೆಂ ತಾಲೆಂತ್ ಭುರ್ಗ್ಯಾಪಣಾರ್ ಫಿರ್ಗಜೆಚಾ ಗಾಯನ್ ಮಂಡಳಿಂತ್ ಉಟೊನ್ ದಿಸ್ಲೆಂ. ತಾಕಾ ಬಾಳ್ಪಣಾ ಥಾವ್ನ್ ಗೀಟಾರ್, ಕೀ ಬೋರ್ಡ್, ಡ್ರಮ್ ತಸಲಿಂ ಸಬಾರ್ ವಾಜಾಂತ್ರಾ ವಾಜೊಂವ್ಚಿ ಶಾಥಿ ಆಸ್‍ಲ್ಲಿ.
ಕೊಂಕಣಿ ದರ್ಭಾರ್ ತಾಲೆಂತ್ ಸ್ಪರ್ಧ್ಯಾಂತ್ ತಾಣೆಂ “ಯುವ ಪ್ರತಿಭಾ ಪುರಸ್ಕಾರ್” ಆಪ್ಣಾವ್ನ್ ಆಪ್ಲಿ ಶಾಥಿ ಥಿರಾಯ್ಲಿ. ಬಾವೀಸ್ ವರ್ಸಾಂ ಆಧಿಂ ತಾಣೆಂ “ಆಂಜೆಲೊರ್ ಗ್ಲೊರಿಯಸ್ ಬೇಂಡ್” ಸುರ‍್ವಾತ್ ಕೆಲೆಂ. ತೆಂ ಬೇಂಡ್ ಆಜೂನೀ “G-ಮೇಜರ್” ನಾಂವಾನ್ ಕಾಜರ್ ಸೊಭಾಣಾಂಕ್ ಸೊಭಾಯ್ ದಿತೇ ಆಸಾ.
ತಾಣೆಂ ಎದ್ದೊಳ್ ಮ್ಹಣಾಸರ್ 13 ಮ್ಯೂಜಿಕ್ ಅಲ್ಬಮ್ಸ್ ಕಾಡ್ಲ್ಯಾತ್. 12 ಮೆಕ್ಸಿಮ್ ಸಂಗೀತ್ ಸಾಂಜ್ ತಾಣೆ ಆಸಾ ಕೆಲ್ಯಾತ್. ದೂರ್ ದರ್ಶನ್, ಗಲ್ಫಾಂತ್ ಯು. ಎ. ಇ., ಕುವೈಟ್ ಆನಿ ಬಾಹ್ರೈನ್ ಕೊಂಕಣಿ ಆನಿ ತುಳು ಭಾಷೆನಿಂ ಸಂಗೀತ್ ಸಾಂಜಾ ಖಾತಿರ್ ತೊ ಖ್ಯಾತ್ ಜಾಲಾ. ತಾಣೆಂ “ಗ್ಲೊಮ್ಯಾಕ್ಸ್” ನಾಂವಾನ್ 150 ವಯ್ರ್ ಕೊಂಕಣಿ ಆನಿ ತುಳು ಪದಾಂಕ್ ಸಂಗೀತ್ ದಿಲಾಂ.
ಕೊಂಕಣಿಂ ಆನಿ ತುಳು ಭಾಶಾನಿಂ ಸಂಭಾಷಣ್ ಅಸೊನ್ ಎಕ್ ಫಿಲ್ಮ್ ತಯಾರ್ ಜಾಂವ್ಚೆಂ ಹೆಂ ಪಯ್ಲೆ ಪಾವ್ಟಿಂ ಜಾವ್ನಾಸಾ. ಆಮಿ ತಾಚ್ಯಾ ಹ್ಯಾ ವಾವ್ರಾಂತ್ ತಾಕಾ ಬರ್ಪೂರ್ ಯಶಸ್ವಿ ಮಾಗ್ತಾಂ ಆನಿ ತಾಚೆ ಥಾವ್ನ್ ಆನಿಕೀ ಕೊಂಕ್ಣಿ ವಾವ್ರ್ ಜಾಂವ್ ಮ್ಹಣೊನ್ ಆಶೆತಾಂವ್.
