ಶ್ರೀಮತಿ ಜಾನೆಟ್ ನೊರೊನ್ಹಾ
ಸೊಫಿಯಾ – ಫಿಲ್ಮಾಚಿ ನಿರ್ಮಾಪಕಿ
ಸೊಫಿಯಾ – A dream girl ಹೆಂ ಫಿಲ್ಮಾಚೊ ಮೇ ಮಹಿನ್ಯಾಚ್ಯಾ 12 ತಾರೀಕೆರ್ ಮಂಗ್ಳೂರಾಂತ್ ಸಕಾಳಿಂಚಾ 10 ವರಾಂಚೆರ್ ಪ್ರೀಮಿಯರ್ ಶೋ ಜಾಂವ್ಚೊ ಆಸಾ. ತ್ಯಾಚ್ ದಿಸಾ ಮಂಗ್ಳೂರಾಂತ್ ಆನಿ ಇತರ್ ಸಬಾರ್ ಶಹರಾನಿಂ ಪ್ರದರ್ಶಿತ್ ಜಾತೆಲೆಂ. ಆತುರಾಯೆನ್ ರಾಕೊನ್ ಆಸ್‍ಲ್ಲ್ಯಾ ಕೊಂಕ್ಣಿ ಫಿಲ್ಮ್ ಮೋಗಿಂಕ್ ಎಕ್ ಸಂತೊಸಾಚಿ ಗಜಾಲ್.
ಹ್ಯಾ ಫಿಲ್ಮಾಚಿ ನಿರ್ಮಾಪಕಿ ಶ್ರೀಮತಿ ಜಾನೆಟ್ ನೊರೊನ್ಹಾ, ಕೋಸ್ಟಲ್‍ವುಡ್ಡಾಚಿ ಪಯ್ಲಿ ಮಹಿಳಾ ನಿರ್ಮಾಪಕಿ ಜಾವ್ನಾಸಾ. ಶ್ರೀಮತಿ ನೊರೊನ್ಹಾ ಮಡಂತ್ಯಾರ್-ಚ್ಯಾ ಶ್ರೀ ಸಬಾಸ್ ಮಾಡ್ತಾ ಆನಿ ಸಿಸಿಲಿಯಾ ಮಾಡ್ತಾ ಹಾಂಚಿ ಧುವ್ ಜಾವ್ನಾಸಾ. ತಿಚೆ ಲಘ್ನ್ ಶ್ರೀ ವಲೇರಿಯನ್ ನೊರೊನ್ಹಾ ಲಾಗಿಂ ಜಾಲೆಂ ಆನಿ ದೆವಾನ್ ತಾಂಕಾಂ ಎಕ್ ಸೊಭಾಯೆನ್, ತಾಲೆಂತಾನಿ ಆನಿ ದೆಣ್ಯಾನಿಂ ಭರ‍್ಲೆಲೆಂ ಧುವ್ ಎಸ್ತೆರ್ ಫಾವೊ ಕೆಲೆಂ. ಕಶೆಂ ನಾಂವ್ ತಶೆಂ ಕಾಮ್. ಎಸ್ತೆರ್ ನೊರೊನ್ಹಾ ಕಾಂಯ್ ಎಸ್ತೆರ್ ರಾಣಿಯೆಕ್ ಸೊಡುನ್ ದಿನಾ. ಎದ್ದೊಳ್‍ಚ್ ಎಸ್ತೆರಾನ್ ಸಬಾರ್ ಭಾಶೆಂಚಾ ಫಿಲ್ಮಾನಿಂ ನಟನ್ ಕರ್ನ್ ಅಪ್ಲೊಚ್ ಎಕ್ ಜಾಗೊ ತಯಾರ್ ಕರ್ನ್ ದವರ್ಲಾ. ತೆಂ ಎಕ್ ಬೊರೆಂ ನಟಿ ಮಾತ್ರ್ ನಹಿಂ ಆಸ್ತಾಂ ಎಕ್ ಊಂಚ್ಲೆಂ ನಾಚ್ಪಿಣ್ ಆನಿ ಗಾವ್ಪಿಣ್ ಜಾವ್ನಾಸಾ.
ಜಾನೆಟಾಕ್ ನಾಟಕ್, ನಾಚ್ ಆನಿ ಗಾಂವ್ಚಾ ಸಂವೆಂ ಖೆಳ್-ಪಂದ್ಯಾಟಾಂತ್ ಆನಿ ಕರಾವಳಿಚಾ ಯಕ್ಷಗಾನಾ ಬಯಲಾಟಾಂತ್ ಬೊರಿಚ್ ಅಭಿರೂಚ್ ಆಸ್‍ಲ್ಲಿ. ಇಸ್ಕಲಾಂತ್, ಫಿರ್ಗಜ್ ಆನಿ ತಾಲೂಕ್ ಹಂತಾರ್ ತಾಣೆಂ ಸಬಾರ್ ಇನಾಮಾ ಜಿಕ್ಲ್ಯಾಂತ್. ದಾಕ್ಲೆ ಮೊಡ್ಲ್ಯಾತ್ ಆನಿ ನವೆ ದಾಕ್ಲೆ ರಚ್ಲ್ಯಾತ್. ತ್ಯಾ ಕಾಳಾಚಾ ಪರಿಸ್ಥಿತೆಕ್ ಲಾಗೊನ್ ಥೊಡ್ಯಾ ತೇಂಪಾಂಕ್ ಜಾನೆಟಾಕ್ ಹ್ಯಾ ಸರ್ವ್ ಸಂಗ್ತೀಂ ಥಾವ್ನ್ ಪಯ್ಸ್ ರಾವೊಂಕ್ ಪಡ್ಲೆಂ. ಪುಣ್ ಎಸ್ತೆರಾಚಾ ಜಲ್ಮಾ ಉಪ್ರಾಂತ್, ಎಸ್ತೆರಾ ಥಂಯ್ ಆಸ್‍ಲ್ಲಿಂ ತಾಲೆಂತಾ ಆನಿ ದೆಣಿಂ ವಳ್ಕೊನ್ ಜಾನೆಟಾನ್ ತಾಕಾ ಸಂವ್ದರ್ಯಾತ್ಮಕ್ ಕಲೆಚಿ (Fine arts) ತರ್ಭೆತಿ ದಿಂವ್ಚೊ ನಿರ್ಧಾರ್ ಘೆತ್ಲೊ. ತೆದ್ನಾ ತಾಚೆಂ ಸ್ವತಾಚೆಂ ಸ್ವಪಾಣ್ ಜಿವಾಳ್ ಜಾಲೆಂ ಆನಿ ಅಪ್ಣೆಂ ಸ್ವತಾ ಕರುಂಕ್ ಸಾದ್ಯ್ ನಾತ್‍ಲ್ಲೆಂ ಎಸ್ತೆರಾ ಮಾರಿಫಾತ್ ಕರ್ನ್ ದಾಕಯ್ಲೆಂ. ಎಸ್ತೆರಾಚಾ ಯಶಸ್ವೆ ಪಾಟ್ಲ್ಯಾನ್ ಜಾನೆಟಾನ್ ಕೆಲ್ಲೊ ಸಾಕ್ರಿಫಿಸ್ ಆನಿ ಲ್ಹಾನ್ ಥಾವ್ನ್ ಎಸ್ತೆರಾ ಥಂಯ್ ಕಲೆಚಿ ಅಭಿರೂಚ್ ವೋಂಪ್‍ಲ್ಲ್ಯಾಚೊ ಫಳ್ ಆಜ್ ಆಮಿ ಪಳೆವ್ನ್ ಆಸಾಂವ್.
ಜಾನೆಟಾನ್ ಆಪ್ಲ್ಯಾ ಸರ್ವ್ ತಾಲೆಂತಾಕ್ ಏಕ್ ಕರ್ನ್, “ಸೊಫಿಯಾ” -A dream Girl ಹ್ಯಾ ಕೊಂಕ್ಣಿ ಫಿಲ್ಮಾಚೆಂ ನಿರ್ಮಾಣ್ ಕೆಲಾಂ. ಹ್ಯಾ ಫಿಲ್ಮಾಚೆಂ ಆಕರ್ಶಣ್ ಜಾವ್ನಾಸಾ ಎಸ್ತೆರ್ ನೊರೊನ್ಹಾ. ಫಿಲ್ಮಾಕ್ ಸೆನ್ಸರ್ ಬೋರ್ಡಾ ಥಾವ್ನ್ ‘U’ ಸರ್ಟಿಪಿಕೆಟ್ ಲಾಭ್ಲ್ಯಾ ಆನಿ ಮೇ 12, 2017 ದಿಸಾ ಮಂಗ್ಳೂರ್ ಆನಿ ಇತರ್ ಶಹರಾನಿಂ, ತಶೆಂಚ್ ವೆಗ್ಗಿಂಚ್ ದೇಶ್-ವಿದೇಶಾನಿಂ ಪ್ರದರ್ಶಿತ್ ಜಾಂವ್ಚೆಂ ಆಸಾ. ತಾಚೊ ವಿವರ್ ಅಮಿಂ ತುಮ್ಕಾಂ ದಿತೇ ರಾವ್ತೆಲ್ಯಾಂವ್.
ಆಮಿ ಜಾನೆಟ್ ಬಾಯೆಕ್ ಹ್ಯಾ ತಿಚ್ಯಾ ಮುಕ್ಲ್ಯಾ ವಾವ್ರಾಂತ್ ಬರೆಂ ಮಾಗ್ತಾಂವ್ ಆನಿ ಮುಕಾರೀ ತಿಚೆ ಥಾವ್ನ್ ಚಡ್ ಆನಿ ಚಡ್ ಕೊಂಕ್ಣಿ ವಾವ್ರ್ ಜಾಂವ್ದಿಂ ಮ್ಹಣ್ ಅಶೆತಾಂವ್.
