Chris Perry – Songitacho Jadugar
Chris Perry ho Konkani Songitak novi dixa divpi zavn gelo. Zorui mornnan tachi jinn sompli, torui kallzak dhadhosponn divpi tacho sogntiacho avaz ozun kana kodde ghunvta. Tachem vije sarkem songit konknni songitachea agllea-vegllea sounsarant pavoita ani aikupeank bhul ghalta. Konkanni songitak, avoddte ani khopovpachea panvddear pavovpachea proitnank taka iesh favlam.
Tacho zolm Moddganvchea Bodd’dde vaddeant Novembrache 25 tariker 1928 vorsa zalo. Agostinho Pereira ani Espiciosa Pereira kuttumbantlea nov zannantlo Chris dusro put. Tannem Kunkollechea Lilly D’Costa kodden logn kelem ani tankam char put Miles, Giles, Glenn ani Errol asulle, atam Errol devadhin zala. Chrostovam Pereira hem tachem niz nanv pun tanne tem mottvem korun Chris Perry kelam.
Boreach Goenkaram bhaxen, Chrisachea rogtant songit aslem ani songituch tachem soglem aslem. Tancho fankivont bhav Joe Perry hannim Hindi cholchitranim alto sax vazovn aplem nanv sarvamchea kalljamni kanmtovn dovorlam.
Aple khas tiatr Noxibantlo Nhovro, Padricho Lob, Vid Mog Kornaranchem tannem machier dakhoile. Svota songit vachunk ani borovpak to xiklo, hwm tanchem khaxeleponn asa. To sompeponnim funkechim zoxem saxophone, trumpet ani murli (flute) toxench hatant vazovpachim vazontram zoxem keyboard, petti, piano ani gitar vazoitalo. Punn trumpet tachi khas zavn asli. Cha, cha cha cho raza mhonn fank zoddunk pavlo. Cherry Pink and the apple blossom white hi nanvaddloli songit rochna aplea trumpeti udexim usvas soddnastana vazovn tannin prekxokanak (audience) montrmugdh (enthral) keleat. Hea khatir Man with the Golden Trumpet hem nanv tannem zoddlam. Tanchem purvillem purvillem songit Columbia ani H M V rekorddancher aikunk melltta zantunt mukheltiatrist C Alvares, Ophelia, Mohana, M. Boyer,Star of Arossim, Alexinho de Candolim…gailolim aikunk mellttat jim vinyl rekorddancher asat. Fuddem, to Kolkatta, Delhi, Madras xaramni chok’k (posh) hottelamnim vazovnk gelo.
Hindi filmi ud’degant tannim proves kelo ani thoim ponchvis vorsam Hindi film songitkarancho adari rnhonnun kam pollelem. Tanchea jadvacho sporx(touch) zaitea Hindi filmamni dista chodd korun Kabhi Kabhi, Trixul…Konkanni songitachea dekhaveak tannim kantaramni jazz songit bhitor kaddun kranti haddli. Lorna sarkea huxar gavpeachi liploli fixalkai(talent) sodun kaddun tacho faido ghevun tichea vangdda mell zulloilo, dekhun Konknni bhavonddam tanchea upkarant asat. Abghat kelo, Red Rose, Tum ani Hanv, Calangute, Nachom-ia Kumpasar, Bebdo, Ugdas, Sorg Tujea Dolleanim, Lisboa, Amerikak Pavxi. Noxibak Roddttam…Lornachea godd ani bollixtt tallean gailolim ozun sade toxench suxikxit ugddas kortat. Tony Carr hannim gailolim Cu Cu Ru Ru, Maddancho Soro, Kalliz Boong Bang Zata, hinvuim loukik zaleant.
Tanni Konknni songitachi vollokh thor kolakarank zoxem Mohamad Rafi, Asha Bhonsle, Usha Uthup hankam korun dili. Mohamad Rafiche koifar (rhapsody) haddpi Bom Jezuchea re Konventant, Maria, kantaramni Konknni songitacho suvad ghevpeanchi kallzann jikhlim.
Usha Uthup hannim aplea oddlainnea tallean Meu Amor, Tum ani Hanv… hankam tallo dila. Fankivont tiatrist H. Briton hannim tanchea songitacher kantaram gaileant tanchim nanvam Marialina, Kazarachem Utor, Bandra Festak, Bus Conductor, Dukrachim Chevrisam…Tachea songitacho dorzo mhan songitkar Miles Devis, Charles Parkar ani Chic Correia hanchea xim sor kortat. To aplea kallzantsun songit boroitalo ani tem rochun, manddun bosoitalo ani tantunt Goencho suvad zhollkota.
Konknnichem poilem rongit cholchitr Bhuierantlo Munis 1978 vorsa tannim nirmoilem zantunt namnechi gavpi Asha Bhonsle title kantar gaita. Durdoivan tem borem cholunk na karonn tem Hindi filmanche pod’doticher bosoilolem ani tachi orth sonkolp(budget) unnem aslo. Tache songit khell-Nhovro Mhozo Devchar, Tum ani Hanv, Lob Paqdricho ani Sankistanv iesvont zavunk pavleat. Taka Best Composer torsip 1974 vorsa favlam.
Tachea songitacher Lorna gailolim kantaram borinch famad zaleant. Punn tanchi hi zoddi eka kontradak lagun fiskottunk pavli. 1975 vorsa Chris Mumboi soddun, chok’k hottelamni apli fixalkai dakhovpak Dubai gelo, karonn thoinchea lokak adinch mudrailolem songit posont zaina pun tankam jivem (live) zai. Tannem Dubai songit xallasthapli zoim piano, keyboard, dhol-kaxichem toxench funkechea vazontranchem proxikxonn divunk laglo. London Trinity College-chea vidheartheank toiar kortalo.
Carnival in Goa, From Dubai with Love, Mhoji Maim, Poilo Kiss heo tancheo gazloleo kesetti asat. Legends Kesett Canada xarant mudrailea. Konneim besur gailear tankam cholnaslem.
Nachom-ia Kumpasar hea famad Konknni filmant tachea vis kantarancho upeog kela.
Janeracher 2ver 2002 vorsa to devadhin zalo ani tachea interak tachem famad kantar Adeus vazovpant ailem ani taka nimanno adeus korpant ailo. Hea mhan songitkarak mhozo solam.
