Shri Antonio Lawrence Jerry Braganza

 Konknni Filmamcho Bapu’y

(Al Jerry Braganza)

Aj kaal Goeamt ani Mongl’luramth amkam sabar novea novea Konknni Filmam vishim iekomk vo pal’lemvk mel’lta.  Konknni Film Industy parat ek pavtim jivall jal’lo anbhog jata.  Goeamt thodya borea mattachea Filmanim borem namv hadlam matr nahim astam Konknni Filmamk sabar desh ani vidheshi puraskar labhleat. Mongl’luramth sabar Filmam tayar javn, pradarshit jaleant ani tamkam prekshakamcho boro sahakar labhon asa hi ek samtosachi gojal.  Hem pal’levn ani thode jann navim Filmam toyar karunk mon karun asat. Ashemch mukar vhochat tor Konknni Film Industry amchea udevn yemvcha talemtvomt kolakaramk ek bori vedhi jaunk pavteli.

Punn hea sogl’lea Konknni vavra patlean ek namv lipon asa ani tem javnasa Konknni Filmamcho Bapu’y mhunnon namvadlea manesth Antonio Lawrence Jerry Braganza, motvyan Al Jerry Braganza  hachem.  Ek dusrem namv hache samgata jodun astem, pun durdaivan tashem ghadlem na – tem javnasa Mumbai-cho Shri G. M. B. Rodrigues hachem. Jerry Braganza ani GMB Rodrigues hanni tea vel’lar Etica namvachea kampeni khatir Konknni Filmam uthpann korchi javabdhari hatim ghetul’li tori GMB-n uthpann karn asul’lem Film “Sukhi Con?” Film adhurem urlem.

Shri Antonio Lawrence Jerry Braganza (Upranth Al Jerry Braganza) hachem janam Goeamt 1920 August, 28-ver Mapusa sheramt jalem.  Tachem mul’lavem shikap Sacred Heart of Jesus High School, Parra hamgasor jalem.  Taka bhurgea ponnar thaun natan ani padam gamvcheamt abhiruch asul’li.  Boro pudar sodhun to 1940 varsa Bombay pav’lo.  Thodo temp tannem Bombay Tutorial kolejimth ani uprant I. E. M. E. workshopamth seva ditech to Indian news Parade(Atam Films Division) hamgasor Telephone Operator jaun borti jalo. Punn tache tham’y asul’li umed jivi jali ani to tachea sodhner Chembur lagsar aschea Geeta Pictures & Studios hamgasor kamak borti jalo.

Ashem Ramesh Vyas ani Vishwa Bharati Films hamchea Filmamcho mukhel Nirmann Nirvahak jamvk pavlo.  Hamgasor Film Nirmann karche vishim borich mahet labhli. Samgatach novean survat jal’lea ETICA Films (Exchange Talkies of India, China and Africa) kampeni khatir konknni Film nirmann karcho avkas labhlo.  Tache lagim barpoor anbhog asul’lo dekun tanne to avkas doni hatanim apnnailo ani Dioguinho de Mello hachea “Mogachi Vhod” kadambaricher adharit Film tayar karchi survat keli. 1949 July mahinychea 31 tariker aplea   filmachem murhurt karn chitrikarann survat kelem.

Goemchea eka garib kutma vayr adharit kanni asle’lean sogl’lem chitrikarann Goeamt mhunje Kallamgut, Camphal, Mandovi tadir, Light House ani itor jagynim kabar karn “nov” mahineam bhitor  aplem poilean poilem Konknni film “Mogacho Aunddo” pradarshanak tayar kelem.  1950 April, 24 disa Bombay Matunga “Rivoli” ani Mazgaon “Star” Talkies ani Goemant Mapusa “Dasharat” Talkies hamgasor ekuch disa release karn Konknni Film itihasamt dhaklo rochlo.  Exchange Talkies of India, China and Africa bomderakhal nirmit hea filmak Shri Jerry Braganza-n digdorshan dilam matr nahim astam tachim padam gaileant ani samvad likhleat. Hea filmamt Lena Fernandes, Luis Ratus, Irene Amaral, Elizabeth D’Abreao, Mary D’Souza, Jacob Fernandes, Joyce Fernandes, Romeo Paul Pires, James Braganza, hannim natan kelam. Alfred Almeida hannim samgeet dilam.  Jerry Braganza samgata Lena Fernandes ani James Braganza hannim padam gai’leant.

Jerry Braganza-n 1966 vorsa aplem dusrem Konknni film “Sukhachem Sopan” Helen Productions boderakhal Nirmann kelem. Hea filmachi kanni L. M. Ratus hachi javnasa.  Padam, Pat-katha, samvad ani digdorshan Jerry Braganza-n kelam.

Jerry Braganza, Fatima,  Cecilia Machado, Antonette Mendis, Souza Ferrao, Robin Vaz, Rico Rod, Shrirang Narvekar, James Braganza, Joyce Norton, Francis Olivero Gomes, Patrick Vaz, Vernon June, Mario ani Veena hea filmachim kalakaram javnasat.  Samgeet Manuel Alphonso-n tor, Jerry Braganza, Antonette Mendis, Souza Ferrao, Alfred Rose,  Cecilia Machado, Robin Vaz hannim gai’leant.  Padamchim utram Alfred Rose, Jerry Braganza, Robin Vaz ani  Cecilia Machado hannim likhleant.

 April, 24 Konkani Cinema  divas mhunn acharann jata. Dalgado Konkani Akademi, Goa  ani Post Master General of Goa, Shri Charles Lobo hamchea minahten 24^th April, 2015 disa Konkani Cinema Divas hachea samdarbhi goemchea upa-Mukhel Mantri Shri Francis D’Souza hachem hatim ek Special Postal cover release kelem.

 [Konknni filmamcho bapu’y Al Jerry Braganza hachea amar ugdasa khatir asa kel’lem Special Postal cover.]

 Poilea Konknni  filmachim thodim reelam hatim mel’leant ani itor reelam sodcho prayas cholon asa. Hem kam suphol’l jayt tor amkam sorvamk “Mogacho  Aunddo” poilem Konknni film pol’levmcho suyog labhtolo.

Ani tashemch jamv…!